今日去希慎開餐，見到呢間拉麵，價錢都算好低，$65有拉麵+細細個飯，見賣相OK，一於試下。嘩! 真係好大份! 第一件事梗係放靚靚，相機食先啦! 但...........已發覺D湯有粒粒既情況出現，即係好似麵鼓湯咁.......心知不妙.....因為以經驗話我知，好味的湯底係唔會咁樣...
一試之下，大失所望，唔怪之咁平啦，個湯底一D都唔香，唔厚，直頭好似麵鼓湯溝出黎咁! 個飯......又係完全唔掂....冇味!

呢個餐雖然大份, 但質素唔得, 唔值.....唔會再有下次

中午一心去一田試呢間拉麵，12:30pm去到，可能D人未放lunch，所以餐廳只有3個客人，唔駛等位。因本人鐘意濃厚湯低，又鐘意有酒香的東西，所以好快就揀左個 "酒粕濃厚味噌拉麵"。

睇落去，湯低都算夠厚，試落OK，但好似冇酒味喎....可能我了解錯左，酒粕唔係即係有酒咁解.... 呢個真係唔知，不過味道是OK的。
另外，呢間舖用的麵質好唔同，係好彈牙的，同一蘭完全係不同風格，個人認為都幾好食，不過食食下好似有D似公仔麵。哈哈!

整體黎講OK, 下次又係唔駛等位的話都會再食。

天氣咁凍, 最岩就係食D熱辣辣既野! 最後決定又黎呢度食拉麵。因為落雨，又凍，岩岩冇乜人，唔駛排隊，正! 平時呢個時間最少要排幾個字!

今次發現多左幾款小食，一於試下呢個新既小食併盤! 一次過滿足幾個願望~
併盤有池魚, 魔鬼魚, 鱈魚。我個人最鐘意食魔鬼魚, 好特別, 未見過出面有呢隻小食! 下次真係要叫一碟先夠皮啦!至於主菜 --- 拉麵!! 我楝左新出既鹿兒島A4和牛拉麵! 嘩! 超正, D和牛燒得岩岩好, 油香味實在係難以形容。另外，最特別既地方係，佢有一舊叫分子泡沬既物體，用黎點和牛食，睇落好似沙律醬，以為係普通野，但食落有驚喜，原來夾埋和牛黎食係絕配! 勁! 咁都諗到!! 所以幾塊和牛真係唔夠! 如果有得加錢追加就好啦!一時醒唔起和牛拉麵已經有半隻蛋, 重追加左一隻!不過唔緊要, 呢度D蛋係我食過咁多間拉麵舖最好食既!因為佢可以造到個蛋黃半熟得黎係滑既! 又唔太咸,食2隻絕對冇問題, 只怕膽固醇高咋, 哈哈!
另外,老公叫左碗竹炭胡麻黑蒜油拉麵. 嘩!成碗黑色,好特別,重好看蒜油味!湯底濃度適中,幾乎成個湯飲晒!我走既時候都已經坐滿, 要等啦, 好彩早黎者!