植幕宵 (尖沙咀)

上網見啲食家話呢間蝦拉麵好掂，今日去開尖沙咀，就記得要黎試下。去到舖頭對面街，見到落左閘，好失望，行過去閘前睇下張告示講咩，原來搬左對面街，即係正正我地頭先企果個位置。好彩行過去望一望，唔係就走寶了！
舖頭唔大，咁岩都仲有張人枱，所以可以即刻入座。店員細心話今日淨係蝦拉麵，其他款式都冇晒。冇所謂，我地原先都諗住係食蝦拉麵，另外仲加左個醬油青口小食。
先講拉麵，店員放低拉麵後，會喺你面前落蝦油，落完之後已經聞到好香蝦味。食麵前先飲啖湯，好濃郁，同埋個湯好杰身，仲有啲蝦米粒。拉麵本身唔會煮到好淋，夠爽口。最欣賞係麵入面兩隻蝦，蝦身已經脫晒殼，肉質鮮嫩，彈牙。
醬油青口反而冇咩驚喜，醬油有少少辣辣地，都好食既。我地冇額外叫飲品，食完麵過左兩個鐘，都唔口渴，証明冇落味精，非常欣賞。
去開尖沙咀既朋友，不妨一試。

丼吉日式吉列豬排專門店 (尖沙咀)

今日同友人食午餐，叫左一個二人餐，包括有三文魚刺身，吉列大蝦兩隻，吉列帶子兩隻，吉列豬柳同吉列豬扒，甜品有芝麻雪糕。飲品仲可以揀酒類飲品，多款日本牌子啤酒俾你揀！

三文魚刺身厚切，好新鮮



主角出場，見到呢個吉列拼盤，真係不自覺地嘩左一聲。由於本人非常鍾意食炸物，所以呢個吉列真係無敵。每件食物都炸得非常好，入口不油膩，加上非常脆口。好怕食吉列食到一口都係油。



吉列豬柳，好多肉汁，唔會因為炸完而變得乾身，加上好軟滑，非常好食！



吉列豬扒同帶子，如果豬扒同豬柳相比，我會比較鍾意食豬柳，可能豬扒比較薄身，豬柳肉汁較為鮮甜。吉列帶子好大粒，並唔係因為粉漿厚而大粒，帶子本身都係好鮮甜，加上脆口表面，非食不可！



吉列大蝦，蝦肉爽口彈牙，口感十足，不但冇“梅”既感覺，仲好鮮甜，好新鮮。



從而可見，粉漿一啲都唔厚，輕輕一層就包住蝦肉，一啲膩既感覺都冇。


記得第一次食呢間吉列專門店，已經係4-5年前既事，事隔多年再食，估唔到都係咁好食。加上服務員非常細心，見到我地啲椰菜絲就快食完，就主動幫我地添加。

不得不提，椰菜絲係任添既，加上柚子醋同紫菜汁，唔鍾意食椰菜絲既我，都食左好多。配合吉列食物一齊食，成個感覺好舒服，唔會覺得滯。

炭家 (中環)

朋友聚會建議食串燒，揀左呢間位於歌賦街“炭家”串燒店。由地鐵站行上黎，都唔太遠，不過如果天氣熱就有啲辛苦。
店舖近街頭位置，離遠已經見到招牌燈牌，好搶眼。不論店內或店外，格局都好有日本風格。雖然店舖唔大，但坐得舒服，一啲都唔迫，好岩三五知己飲下酒，傾下計。
叫得做“炭家”，當然用以炭燒聞名，所以我地都叫左幾款串燒同鰻魚試下。咁岩我地坐既位置，隔離就有塊玻璃，望到師傅喺入面不停用扇撥，作為顧客，就最鍾意望住師傅整野食，特別有風味。
食物質素當然唔需要懷疑，每款串燒既有炭香味，又唔會過火。特別係雞肉同豬肉串，外皮香脆，肉質嫩滑，又有肉汁。當然唔少得鰻魚，我地試左兩款，一款係白燒，一款係蒲燒。白燒係冇加任何醬汁，純用炭燒，能夠以呢個方法煮，鰻魚一定要夠新鮮，所以一啲腥味都冇，仲好清甜。蒲燒就適合濃口味既朋友，炭燒完，再搽一層薄薄既蒲燒汁。唔會太漏，個底又夠脆。如果要食白飯既朋友，可以選擇鰻魚丼飯。
特別一讚，老闆非常細心，連洗手間都有日式風格，擺放左一小盒即棄漱口水，即棄牙刷俾有需要客人使用。

銀座炎蔵燒肉 (荔枝角)

第一次食呢間燒肉店，一入門口已經知道同普通燒肉店好唔同。首先唔會有油煙味，店內裝修日式風格，座位寛躺。可能今日係平日，所以唔多人，職員安排我地坐梳化卡位。
我地叫左一個2-3人set，有4款唔同部位牛，2款豬，2款雞，一塊和牛扒。由於我地好鍾意食牛舌，所以額外再加1份牛舌芯。
Set包左兩客沙律菜同少少Kimchi ，食完岩岩好上主菜，牛肉好新鮮，好鮮紅。最好食一款係“和牛友三角”肉味濃厚，入口即溶，又唔漏。食到中途，order左一個紫菜飯，總係覺得燒牛配飯係最正。之後開始食豬同雞，估唔到都有驚喜。特別係豬，有鮮甜肉味，燒肉店通常主打牛肉，冇諗過豬肉都咁好食。雞腿同雞柳，外皮香脆，肉質嫩滑。接住食終極和牛扒，職員教我地撈蛋漿食，不過我地覺得就咁食已經好好味。脂肪同肉比例非常好，唔會淨係食到油脂。不過可能太薄，我地燒既時間多左少少，但仍然咁好味。最後食埋牛舌芯，真係好好好味呀！牛舌芯係厚切，一啲都唔韌，爽口又有肉汁！溫馨提示鍾意食牛舌既朋友，建議俾多少少錢揀牛舌芯，因為menu有兩款牛舌，一款係普通特上牛舌，另一款係牛舌芯。呢個價錢食到高質燒肉，物有所值。

ULURU (灣仔)

之前朋友帶我黎食過一次，環境坐得舒服，食物質素又唔差。所以今日老公生日，決定再黎多次。
訂左枱6點，入座時只有一枱客，但慢慢就多幾枱，雖然係平日，但都算多客。
我地兩個人叫左一個沙律，一個小食，兩個主菜，仲有個生日甜品，哈哈....兩個人食左好多野。
柚子蝦沙律-酸甜柚子汁配沙律菜，絕對係用黎醒胃，好鍾意個柚子汁係分開一個兜，唔會加落沙律菜入面。有兩隻蝦，新鮮爽口。
黑松露薯條-一黎到已經聞到陣陣黑松露香味，如果唔鍾意食黑松露既朋友，一定會覺得好臭。
肉眼扒配紅酒汁-牛扒要求要5成熟，都煮得岩岩好，唔會over cook，肉質都算夠香口，牛味略為淡，紅酒汁有啲搶左主角，唔係好食到牛味。
士多啤梨醬豬肋骨-呢個真係不得了，份量頗大，見到真係嚇親。職員好好，見我唔知點切開，就話叫廚房幫我切開一舊舊。甜甜地，不過唔係好食到士多啤梨味，豬肋骨肉質偏鞋，咬得比較辛苦。建議多人share，兩個人都食唔晒。
蘑菇蛋糕-先講造型，可愛蘑菇，配上食用花，同蛋糕碎扮泥，冇得輸。以為咁靚賣相既蛋糕，味道通常都一般，但呢個絕對有驚喜蘑菇頂部中間夾心係紅桑子醬，酸酸地，外層白朱古力脆皮，加埋一齊食好正，唔會好甜。蘑菇根部係純海綿蛋糕，一啲都唔漏。如有朋友生日，可以訂位時預訂埋呢款甜品，店員會寫埋Happy birthday喺碟邊。