9:45嗌外賣，1個早餐+1個雲南米線，等到11:15都唔見影⋯⋯打返落去舖頭問話啱啱先整好入緊袋？早餐等到變午餐，聽電話個個唔知老細定乜水，態度差到無人有，好似老馮嗌外賣要等佢2個鐘咁～

同朋友叫咗一個Dinner Set for Two，有沙律、餐湯、2個主菜、甜品+餐飲。 沙律ok，驚喜不大 磨菇湯，比想像中濃得多，飲完已經半飽 蟹肉啡菇意大利飯，飯質俾一般意大利飯「杰」得多⋯⋯食2啖已經覺得好漏，同埋食完睇到碟底好多油 三文魚扒，呢個其實好好食，不過由於飲完湯同食埋個意大利飯已經飽到上心口，只係食咗舊魚扒，配菜都無咩點郁過～ 甜品係一杯奶凍，但唔知係咪我太少食正宗意大利餐，杯奶凍又係好「杰」，食完有少少張住個口嘅感覺⋯⋯ 總括嚟講，啲嘢食味道係唔錯，不過太「杰」嘅關係，食到一半令人感覺好漏，個人會無意欲繼續食落去⋯⋯

晚餐時間好多人， 即使係9點🕘嚟到都好多人等緊位。由於我地2個人唔想搭檯，所以唯有等，等咗5分鐘左右就有檯，👌算快。等檯期間見到有部叫"Soda"嘅機，登記完可以拎佢個登記獎賞有抹茶雪糕甜品~👍
入去坐低睇咗陣餐牌就叫嘢食，嗌咗：
- 沙嗲肥牛"粉絲"
- 蛋包飯
- 避風塘脆豆腐
- 2杯嘢飲
由於我同個fd都算係吹水怪，只要有嘢傾就算平時等嘢食嚟嘅時間都唔會覺得好長，但今次等嘅時間係異常咁耐😞 可能人多啦……所以我地都唔諗住催啲侍應， 大約25分鐘後，終於見到個蛋包飯出現……由於打完機先食飯嘅關係，我地5分鐘就ko咗個飯，到我地食完之後5分鐘，個脆豆腐同啲嘢飲先出現。5分鐘ko埋個脆豆腐之後，我地嘅漫長等待時間出現喇……
等……等……等……20分鐘後，個沙嗲肥牛"粉絲"到喇。但一夾？！點解啲粉絲咁奇怪嘅，實色嘅？好似係"濛粉"嚟喎。於是叫個侍應嚟話佢知我地嚟錯嘢，點知佢拎張單嚟同我講話我地係叫咗"濛粉"。
吓……我同個fd當初一心嚟沙嗲王為嘅就係食個沙嗲"粉絲"，所以我同個fd都好肯定我地落單係嗌"粉絲"，而個落單嘅侍應都係覆我地"粉絲"。
個侍應都應承幫我地換，咁我地都唔介意等多陣等佢換俾我地。不過等完又等，個沙嗲肥牛"濛粉"要換返做沙嗲肥牛"粉絲"原來要足足等20分鐘，真係個人唔忟都等到忟😡
點知個侍應一放低，我個fd一夾……😠😠😠咩料？！又係實色嘅？乜沙嗲王啲粉絲變咗種呀？叫個侍應埋嚟問，佢話幫我地入廚房問吓，點知出嚟答我地個個都係"濛粉"！！重咩又係"濛粉"！！你依家係咪玩我地先？個侍應都好好心問使唔使換個碗俾我地，不過我地食呢餐已經由9點食到11點，如果再換我真係唔知又要我等到幾點先食到我要嘅嘢，何況個fd趕住食完走，所以我最後都無再叫佢換。
諗住哪哪聲食完走人，所以順個便叫佢俾埋個甜品同計吓我地埋單幾錢，因為聽聞好似食夠$200會送枝沙嗲醬仔。我地2個人食咗大約$18x，爭$1x左右就夠，問個侍應可唔可以送1枝個沙嗲醬仔俾我地，話晒等佢個2碗錯嘅粉咁耐。點知佢問都唔使問吓其他人就已經答我地做唔到~
Good👍原來我地白白晒嘅40分鐘時間係度等佢個2個錯嘅粉，都不及人地個1枝沙嗲醬咁珍貴。其實我地前前後後等嘅時間見到身邊幾檯客埋單之後都未必會拎個枝沙嗲醬走，啫係佢地送出去嘅比佢地出單嘅數量少。既然人地唔想送，我地都唔會去求人地俾，留返人地攞去送囉。
普通餐廳質素嘅食物同價錢，用餐嘅時間我以為自己食緊法國大餐，1個鐘左右食得晒嘅嘢我地差唔多2個鐘先完事……連俾咗錢埋單等佢找錢都要再等5分鐘先找到俾我😤😤
成餐晚餐我只得1個結論：「等多過食」
呢間餐廳已列入本人嘅Blacklist名單之中，不會再幫襯！！多謝！！！

上個月26號同屋企人去呢間食迴轉壽司,因為都見佢開張o左成年,成日都好似好多人排隊,所以去試一試~~

我地揀o左迴轉壽司bar檯坐,除o左食壽司,我媽咪重嗌o左個lunch套餐食~

d迴轉壽司既款式好少,食o黎食去都係三文魚,玉子蛋,吞拿魚......
比較平個d就勁少款,最貴個d就轉極都有......

另外個lunch套餐等o左成半個鐘先到,一拎o黎個o下重要係拎晒餐,
之後結果要再等多15分鐘!!

總括o黎講,都算幾平,味道都唔太差!!