8點鐘唔洗等位直接入座。 我叫咗個酸辣湯雲呑，朋友叫咗個雞絲涼皮同酸辣湯拉麵。 買滿200定250可以再用半價加兩款指定食品(份量會小一半，而家諗返起有啲揾笨) 咁我同朋友半價叫咗雞絲涼皮(小)、小籠包(小) 1.酸辣湯係完全冇酸味，兩碗都係！要自己加醋。 2.千祈唔好買紫米豆漿！唔係水吧沖俾你既，係岀面賣既樽裝，得個300ml仲要賣成$16，餐牌個紫米豆漿既圖片係杯裝又冇寫明係樽裝，所以我有俾人呃既感覺。 3.個小籠包同岀去惠康、百佳急凍賣既$7十粒一盒既南翔小籠包味道口感一樣，都係外皮乾真真，內𥚃一啲湯汁都冇。 4.雲呑唔知點解特別重鹼水味 1.侍應姐姐好細心，見我有gel甲就幫我扭開樽紫米豆漿既蓋。 2.酸辣湯份量頗大，湯內算多料 3.雞絲粉皮真係超級好食，花生醬味勁濃，重口味既人一定啱。 多得個雞絲涼皮拉高啲分，為咗碗雞絲涼皮會再去

侍應全部講英文，老闆娘同老闆好nice，尤其老闆娘好好笑容，前菜多，水係會俾市面上嘅樽裝水你，雖然唔係水龍頭水，但有啲唔環保。 但食物質素真係麻麻地，份量極少，我地得兩個人原本諗住吃盤牛肉、魷魚、柚子燒酒再加一人一碗飯就夠。點知魷魚就得兩片(可能見我地得兩個人)，特上牛排骨肉就得四、五片薄片，焗住叫多個辣五花肉同海鮮拉麵先夠飽。 而最好味竟然係最平嘅海鮮拉麵$58，第二係特上牛排骨肉$180(不過不失)，第三係辣五花肉$125(擺明啱啱係冰格攞出嚟，雪到勁硬，有雪藏味)，第三係魷魚$130(冇味、完全咬唔爛)，飯唔係百分百珍珠米，柚子燒酒好藥水味。 主動問先知原來芝士粟米同埋泡菜蛋可以refill ，當然唔好期望會主動行過嚟同你refill，但佢地就要叫幾次先過到嚟refill。 老闆好唔熟部機器EPS同Visa都分唔清，搞到要碌左四五次先知道點比錢，然後睇到張單見到咁貴，又廢事阻住人哋做生意，就出去門口禁下計數機計下條數，點知老闆娘見到就有啲語氣唔好用英文講叫我地有咩事入去鋪頭傾，佢哋唔會呃錢嘅。 然後發現原來佢哋係計原價錢既服務費而唔係計八折左嘅價錢嘅服務費。

一人仼食118加一包雞、牛、豬。講真幾抵。好多火鍋都係呢個價錢但係只係包牛。 可以一人一鍋亦可以鴛鴦鍋。 當日去係下午四點唔係繁忙時間，唔使排隊即刻有得入，我哋去嗰陣冇做足功課唔知有咁多湯底可以揀，所以我猶豫左兩秒，再問朋友泡菜湯好唔好？點知侍應好唔耐煩即刻幫我落咗泡菜湯，因為我朋友話佢唔食得辣所以即刻問佢可唔可以轉返豆乳湯，佢就話師傅已經落咗湯，到你落單至我話改前後十幾秒咋喎。 好啦之後上座啦，連埋個鍋一齊嚟係牛肉，豬肉同埋雞肉，佢啲肉全部都正正常常啦，雞肉反而最好食。 出邊有各款醬料（6-7款，佢地啲醬唔知點解都係好咸同埋冇沙茶醬），乳酪雪糕及配料，士多啤梨同芒果味嘅沙冰，四款汽水仲有三款甜品（朱古力糯米糍好食，其他冇乜味），自助既餸比較簡單同埋少，食到五點左右發現出面自助餐換晒其他菜式，冷藏食物多好多，仲有壽司添。可能因為我地下午嚟食仲未換晚餐Menu，所以建議各位晚餐黎食好過。 可能因為呢間野開冇幾耐，啲員工都比較唔熟悉，問佢Wi-Fi密碼先後問兩個員工個密碼都可以係錯哂嘅，最後問經理先搵到一個啱嘅密碼。😑 仲有上菜時間偏慢，因為用餐時間得90分鐘，等咗好耐都未有肉食，最後都係出去自助度搵啲平價丸類同烏冬粉絲填飽個肚🙄，到佢終於送到盤牛肉黎個肚已經飽咗一半🤢。最後lastorder諗住叫多盤牛肉，最後都冇上。🙁 用餐時間90分鐘，唔好食淨。店內冷氣好勁，勁到係食住火鍋都可以覺得好凍

例牌叫咗個中辣小窩春卷加辣豬腩肉，習慣落勁多醋。 好少食灣仔呢間南記，通常都係食旺角同中環，比較起來我覺得中環嘅分店最好食。 但同旺角分店唔同，中環同灣仔分店有個優惠套餐係收銀個牆上方，50蚊一樣有春卷同豬腩肉，但多咗二至三款其他配菜仲包一杯野飲。呢個抵食啲，希望我下次記得叫呢個套餐。 呢間分店暫時冇米線買，個牌寫住三月中先會再有米線供應，啲豆漿唔知點解會淡啲，接近無糖。 Btw叫號碼個姐姐幾好人叫號碼把聲勁宏亮，好西利😂負責收拾碗入返廚房嗰位姐姐，個樣成日好囂張😂

行街個陣唔覺，買完嘢先聽到個肚餓到咕咕聲，見到無印入面有間餐廳(好似ikea咁)又唔多人唔洗等又未試過於是就去試下伏唔伏。 佢係有分幾品幾品揀(姐係幾餸飯😂)，有規定你幾品飯就要幾冷盤幾主菜。例如：五品飯揀三個主菜兩個冷盤（最唔鍾意呢個規定），佢啲冷盤睇起黎麻麻，因為三品飯可以溝亂嚟揀，所以揀咗三品。 啲餸係好少，影俾朋友睇啲朋友仲問我係咪人哋食剩嘅，我發誓我掂都未掂😩 飯係糙米飯當然你可以揀返普通白飯，送一碗麵鼓湯(好清淡)，雞肉超嫩又多汁好好食，咖喱薯餅入邊嘅咖喱好濃郁，但係外面唔夠脆一夾就散，牛奶薯蓉並唔係薯蓉係一片片搭埋一齊好似千層麵咁，但冇乜味仲要係凍嘅，呢個最唔好食，最後埋單95蚊。都叫頂到下個肚既，但下次唔會再嚟。🤢 Btw食完記得自己收拾乾淨放返係回收架度，

估唔呢間逸東泰國餐廳第一個食評係我寫。 之前去呢間係食雞扒撈朦既，都唔錯架酸酸地不過因為佢啲撈朦係凍食的，所以啱夏天食多啲 逸東泰國餐廳位於街市轉角位 街市內做自取外賣(只送指定飲品)，街市外就做堂食(只限送即沖飲品和飯麵) 。晚上才做外賣速遞(要買滿$50才送而且不送飲品和飯麵) 我地堂食 客滿，伙計在店外開張摺枱和摺凳俾我地，當時我地已經近九點才吃晚飯，但依然很多人。 新年後差不多每樣食物都加$2-8元。
舊價格餐牌 #之前影的，新年後有加價。#只供參考價錢

幸好我至愛的冬陰功只加了$2。舊時$38，現時$40 與友人叫咗個蝦醬炒飯，菠菜檸蜜同冬陰冬湯配白飯，奶茶。

奶菜冇奶味，好難飲。 菠菜檸蜜味道好怪 冬陰公好足料，味道略微甜 蝦醬炒飯好夠獲氣。 總括唔錯 埋單總共$75 #對面係個公園仔，堂食坐露天位睇住啲小朋友嘻嘻哈哈心情都輕鬆愉快啲

行街行到肚餓就想食泰餐 上次都食過一次金泰屋，各方面感覺唔錯所以食過返尋味。 一如既往，坐路邊的四人桌。錫造的杯令水變得更凍。周圍都有燈飾氣氛唔錯，都有幾多泰國人黎食，証明食物唔錯同正宗 本身座位下方已放置蚊香但蚊實在太多所以要多兩個蚊香，要求多多都冇咋形仲同我地噓寒問暖，笑容可掬。服務熊度唔錯。 飯桌可能未抹乾淨，有啲油油地又有啲湯汁，地下都有啲上一枱食客殘羹衛生欠佳 自行換去後面一個四人位枱坐。 食飯要緊 叫咗咖哩，薄餅，生菜包，冬陰功湯，白飯。份量頗多，三個人食都食唔唒。冬陰功湯好足料好多隻蝦同海鮮，咖哩唔會好水味道又濃郁。生菜包啲肉都幾多下。食到我地飽飽濟濟
上次唔記得影相，今次記得了 下次一定再幫襯

昌發有兩間店，相連的。由於第一間店已經滿哂所以去第二間。四周牆壁都痴滿自家美食相片，我坐既位置對面上方仲有幅和尚相片(因為驚唔禮貌所以冇影低)，增添不少泰國風味

每樣菜都有編號，點菜就寫喺佢准備既點菜紙度
(連續三個想食都話無得賣 ，可能賣哂) 起筷三個人叫咗兩個咖哩耶汁雞絲伊麵同一個青咖哩牛。

等咗20分鐘先上一個咖哩耶汁雞絲伊麵 之後等多15分鐘再上青咖哩牛，我另一個咖哩耶汁雞絲伊麵好耐都未上實在太肚餓叫咗個$12白飯R我朋友啲青咖哩撈飯食。
青咖哩偏甜唔夠辣所以我地落幾多下辣椒粉。R人嘢食食到飽都未上我個咖哩耶汁雞絲伊麵 ，問店員真係漏咗單，諗住話我已經食飽唔要個麵了。佢又話落咗單。。
打包又驚啲麵吸哂啲湯
最後唯有死死氣三個人食埋個麵

之後頂住個大肚腩慢吞吞走人 ，埋單一百幾差唔多二百。

去完寵物店買完狗糧經過金泰谷必定忍唔住門口串燒既香味，成日下一秒清醒過來已經喺店內。店內分上下兩層，下層得兩張檯（兩張枱都係四人座位），地方頗狹窄，原本想上樓上坐好似清靜啲舒服啲又唔洗被行行注目禮，但員工話上層清潔緊，我地唯有焗住坐下層。光頭老闆見我地一袋二袋就同我地講可以將啲嘢放上櫈咁就唔洗放地下，我媽話，而家晚飯時段驚覇住啲位嘛。老闆答，我間舖有咁好生意就好lu 。。。 之後叫咗個大頭蝦冬陰功湯，乾炒咖哩牛肉，小食拼盤（小）同木瓜沙律是買滿$200加$1。 由於我同屋企人brunch只食咗半碗芝士麵所以個肚早就打鼓於是買咗兩串串燒分別係沙嗲汁牛同泰式酸辣汁雞$26，食住等上菜。個 泰式酸辣汁真係好好味唔太辣酸度亦剛剛好，如果唔係喺公眾場合我一定舉高個碟飲埋啲汁佢，沙嗲都唔錯，有啲花生喺入邊幾得意，肉質反而偏硬同細舊。 首先上菜係乾炒咖哩牛肉，都唔係乾炒既係濕炒，同埋都唔係牛肉係豬肉既！！！我明明叫咗牛肉，不過當時大家都好餓所以差唔多食哂先發現。算！話哂喺廚師推介，味道唔算差，叫咗個白飯撈飯食，老闆就行過黎同我地傾計，其間又上冬陰功湯，好淡，於是嗜辣既媽咪自己加辣。之後上木瓜沙律，酸酸甜甜，好好味最後上小食拼盤$58（小）認真唔抵得幾塊蝦片，一舊分開兩半既蝦餅同埋同樣 一舊分開切半既咖哩角仲有兩串串燒。太飽，打包拼盤 離開前，去上層店內廁所，上層有幾枱食客食飯又話清緊潔。。。廁內地板濕立立好多黑印，由於蹲廁所以排洩物到處都有又冇沖廁，見到咁爭啲要空肚離開（嘔

店舖有三位韓國人其餘是本地員工，蔡瀾和美食節目都有採訪過雖價格上漲但亦屬平民價，價錢大都三十幾送一配菜，學生更有優惠。韓國菜式味道較正宗但嫌味道太重吃完拼命喝水都不減殘餘味道，菜式大都普通平凡但即叫即炸口感佳亦有韓國特別食物例如各款湯鍋，拌飯，年糕，泡菜餅，紫菜包飯$25（推薦）（不像日式，裏面有蔬菜，口感十分特別）最值得一提是配菜有黑豆，酸甜白蘿蔔，薯仔，菠菜，魚糕，八爪魚青瓜，泡菜。。。 酸甜白蘿蔔和薯仔為我個人最喜好，薯仔甜甜的有少許辣十分惹味 貼在店旁邊的報導說薯仔一日賣十公斤呢我常常晚上去都售罄，所以要買就趁早。 酸甜白蘿蔔則如其名酸酸甜甜十分開胃。除了阿珠媽一口廣東話一口韓文笑容滿面跟你撘話外其他員工基本上自顧不暇，飲品冰箱前有一桌但只有兩至三個座位加上在人來人往的富東街市吃飯反而顯得突兀所以那小位置通常給員工休息用。