今日去咗呢度飲咖啡


其實知道呢度都半室外，本來想拎走，不過老闆娘一句話出面有風扇，所以就坐低飲，一杯tall都係$35,梗係要大杯啲啦，我都係叫返我最愛嘅cappuccino, 等咗一陣，咖啡嚟嘞，咦，無拉花嘅？不過我又唔係嚟飲拉花，試下先⋯好飲喎，我鍾意有咖啡香，夠濃，泡夠挺身，夠滑，唔洗落糖，有濃濃嘅朱古力粉，苦中帶甜，正！同老闆娘講開，先知原來係double shot, 真係好，其他地方好多時大杯啲係多咗奶，並唔係多咗咖啡，呢個真係抵讚！

好喜歡小店，因為老闆娘會同你閒話家常，講講自己開舖嘅理念，老闆娘仲介紹我去飲其他地方嘅咖啡，絶不只賣花讚花香，值得去再幫襯

今日同老公喺灣仔，行行下見到呢間中餐，平日都好多人等，今日就相請不如偶遇入去試下嘞～

叫咗個$258嘅二人餐：

蕃茄湯，飲得出無味精，係老火湯，有豬骨落去煲，都ok


呢個墨魚仔頭盤，個味都可以，不過個賣相就核突啲，同埋唔知點解明明食中菜，有個日式頭盤


南乳齋煲，可以接受啦，不過真係無咩味，無味精就即係無味？！


口水雞，四份一隻雞，得個辣字，個雞本身係完全無味⋯


紅米白飯，可以多返小小紅米


最好食完來係個紫米糖水，唔太甜，紫米有咬口，椰汁份量剛好


室內都係懷舊裝修，又有公雞碗咁，收$6位茶錢，加埋1，呢個價錢食啲咁嘅嘢，大部份嘅錢都係去咗租同裝修，真係唔值

平日喺度都係打邊爐，今晚決定同老公嚟食小菜

呢個失傳雞，辣辣地，不過無雞味，送飯都ok


金銀蛋菜苗，咸咗少少，無咩特別

有鮑魚送，而家啲鲍魚可能都係養嘅關係，似食橡膠咁⋯

仲有糖水送，不過只係食咗一啖，因為個味怪怪地，個樣好似鬼口水

不過呢度坐得幾舒服，又有電視睇，不過加埋前菜，菜芥，白飯都成$100一位，食火鍋抵啲

其實如果喺假期見到間唔洗等位嘅食肆，基本上你真係唔好入去⋯

首先係個飯，黑松露海鮮糙米飯

個樣都唔錯，食落個味都可以，不過有啲覺得係飯還飯汁還汁，糙米太硬，索唔到個汁，成個飯，應該改名叫做一粒帶子雜菇飯，粒帶子尚有少少鮮味，但係唔可以叫做海鮮飯囉⋯

食完個飯，等咗成半個鐘先出個安格斯牛肉法飽

well, 呢個presentation 都真係......都不與致評，試下個味先，嘩，好臭，佢用咗blue Cheese，咁當然我完全食唔到牛味啦，最好笑係佢個牛係砌開咗一件件，但係個飽無砌開，結果都係分散晒嚟食...無下次。

今日行完青山寺，過嚟最近嘅商場休息下，度度都人山人海，好在一個人，實有位

Cappuccino 一向都係我至愛，不過其實同M字頭嘅$12相比，真係唔值呢個價錢，個奶係普遍嚟講都打得好過M字頭，不過你話咖啡香味同味道麻麻，飲到尾都只飲到奶味

仲有係無瓦杯，可能係洗唔切啦，不過其實用瓦杯好好多，無咁快凍吖嘛⋯

我點咗個雜莓撻，個撻底夠脆，不過個邊太實，用叉係會飛到成枱都係碎碎，不過好食，中間酸酸甜甜咁，經醒胃，唔怕滯



咖啡唔掂，甜品ok,唔通startbucks 想轉型？

本身想去第二度打邊爐，點知去到先知執咗，咁就去第二度啦，印象中以前喺荃灣食過譚魚頭覺得好食，咁我地就嚟咗灣仔呢間

嘩，大獲，首先係原來無睇清楚，9：00先有任食，9：00前，淨係個湯底最平都$98。


個魚湯其實係ok嘅


四川餃子我記得以前我會一次過食好多，咁$39我當然只係叫咗一碟。


完全無酒味嘅醉雞


一啲都唔新鮮嘅$89鱔片


仲有呢個，我會形容佢為燈影牛肉嘅$158手切安格斯肥牛⋯



呢樣又收$10，小食又兩碟，茶錢又$13，其實環顧身邊，都好似只係見到啲外籍人仕，我唯有當自己係遊客。

結果係45分鐘已經食完，當然亦係無飽嘅感覺，我地決定去再食pizza......

成日行經呢間coffee shop,今日卒之有機會試下喇，我地一行三人叫咗兩個甜品同三杯咖啡。


Apple crumble: 好新鮮，好脆，有好多蘋果，加埋個雪糕，仲有啲蓮蓉，好味



我呢杯係笛子咖啡，細細杯，又唔多奶，飲得出咖啡嘅香、苦味，係我鍾意嘅味道

香蕉bread,個口感似蛋糕，味道略為香精咗啲
另外兩位朋友嗰兩杯無影到(latte同cappuccino)，不過佢地都話好飲,拉花都唔特別花巧，味道取勝👍


裝修都幾特別，平日下午都full


順帶一提，我空口試咗呢個黃糖，淡淡地少少甜，平常唔加糖落咖啡嘅我我下次會試下

行過呢度唔知食咩，見到呢度最多人排隊，於是我又決定跟！


我叫咗:


苦瓜煎蛋: 苦瓜唔太苦，蛋煎得剛好，無咩加麵粉

煎腐皮卷：以為佢好油，不過唔係，木耳蔔白絲好爽，好味

餃子：西洋菜加素肉，食落好似有肉咁，好實在

三餸一湯都係$35，雖然呢度嘅food court幾舊式， 不過都坐得幾舒服，同埋有見到唔同國藉人仕，有啲唔係好似喺香港咁

有空盪時間，就嚟咗呢間禮頓新嘅mc cafe坐兼食我嘅light lunch


Mc cafe嘅中杯cappuccino ，一貫我至愛嘅苦苦咖啡味加上少少朱古力粉⋯Perfect!

菠蘿蕃茄醬烤雞意式飽，我最喜歡熱辣辣溶嘅芝士加上有坑紋嘅意式飽，我亦好欣賞麥記用來用去都係嗰啲料，不過組合起上嚟又有另一番風味

講真，呢間麥記比起灣仔另一間又係喺basement嘅好好多，順帶一提，如果飲咖啡可以坐吧枱，又可以見到沖咖啡嘅過程

荃灣，向來都係無咩咖啡店，後來有大型商場先有啲年鎖嘅咖啡飲吓，而家卒之多幾間揀下。今日就嚟咗呢度,小店，我好奇待...

我叫咗杯大cappuccino 加一件cheesecake



睇唔到個拉花，失望。一飲，個花就散，失望。加咗肉桂粉，完全飲唔到咖啡味，失望...



細細件，呢個size做tea係幾好，不過面頭嗰啲係sour cream cheese,成個cheese cake 嘅感覺怪怪的。

老公杯細latte



見到個靚拉花，飲落亦有咖啡味，兩者好match,不過不失，我地一路懷疑佢係落錯咗order,我嗰杯先係latte，因為真係好似飲緊咖啡味奶，不過收錢嗰陣又見啱喎⋯

其實我見都好多人等同take away, 環境都幾舒服（我地坐窗口位），下次嚟希望小店能夠有所進步啦...