Mymy Caffe (上環)

而家啲cafe，度度裝修都整到好有特色，價錢又偏貴，但係咖啡質數都幾參差，今日嚟開上環，搵到呢間小店

行到去，離遠已經見到好多人
小店真係好細，得兩個企位，見到咁多人原來佢地有gatheting,話會搬舖，再問店主，佢地自己都唔知新店有無位坐

見住佢地沖咖啡，咖啡豆係一大包，應該唔係mix 嘅，香味好夠，我仲聽到佢地有好多唔同味嘅咖啡，不過我都係鍾情cappuccino 


無靚拉花，不過奶夠厚夠滑，咖啡係我鍾意嘅苦味，有aftertaste,大口大口飲，好快飲完，哈哈

韓樓 (尖沙咀)

雖然我唔係星星嘅粉絲，不過今日都去咗食韓國嘢，成條金馬倫道所有韓國餐廰都大排長龍。

我地一行七人足足等咗個半鐘，前面有個大肚姐姐話差一位先齊人都唔俾入，慘慘⋯

坐底已經係八點九，我地叫咗
隊長火煱加麵，個湯有啲似辛辣麵湯，都幾辣，不過好味，啲料就係腸仔午餐肉豆腐，普通料。


三款前菜都好味，除咗泡菜，其他兩碟好重麻油味。


卷蛋，好厚，有蛋味。

拌飯，好味！

炒粉絲，好味！

炒年糕，好好味，個汁夠辣，年糕夠煙韌！

個牛肋骨，好油，但係勁稔，勁入味，好好好好味！


個葱餅雖然材料簡單，但係夠香脆，好味！

其實呢間餐廳真係好地道，又唔貴，不過如果又要我等個幾鐘我就真係唔會再嚟，多人就真係唔好嘞，兩個會快啲。

大姆指餐廳 (屯門)

星期六快午餐，
個茶底其實幾好

巴基斯坦咖喱，麻麻地，牛腩好似無咩點炆過，只係咖喱汁同牛腩。

印尼炒飯，個menu 上面係有雞翼同蛋，一拎到嚟，無嘅？原來佢話漏咗⋯ok 幾好食！

雪山茶餐廳 (深水埗)

呢排去咗好多扮懷舊嘅餐廳，係時候去返間真係舊㗎喇⋯


雪山⋯係咪有飛狐㗎呢？

嚟到梗係要食懷舊嘢啦⋯

常餐：

忌廉湯：坦白講，可以唔飲


喺舊式茶餐廳真係記住要叫佢轉多士，應該好食好多，腸仔都係嗰啲過完熱水再輕輕過鑊嗰啲啦，正當有少少失望之際⋯呢個菠蘿火腿茄汁豬扒飯又幾好食喎，係以前先有嘅茄汁味，豬扒煎得剛剛好，呢個常餐真係多嘢食。

我地仲叫咗⋯
波浪薯條真係唔係好多地方有得食，外脆內軟，雞脾應該係生炸，皮夠脆有雞味

個檸茶同奶茶就不過不失啦，$56兩個人真係好抵，希望佢可以一直做落去

Little Break Coffee & Kitchen (荔枝角)

荔枝角向來俾人嘅感覺都係以工廠為主，不過自從有咗四小龍之後個感覺就高尚好多，今日喺深水埗附近搵唔到啱心水嘅咖啡飲，於是就去咗荔枝角新嘅商場揾食嘞～

見到呢度有咖啡飲，又有all day breakfast 食就入咗去，我地入到去剛6點，menu 話6點就無all day breakfast,咁我地就問咗個staff，好在佢話有，如果唔係我地就走，因為個dinner set都幾貴。

老公叫咗個豪華breakfast

$98嚟講真係無咩驚喜：
1）麵包係硬同無咩味
2）類似牛由同cheese加埋其他配料係唔match
3)   黑松露炒蛋，夠味不過略熟，"鞋"!


Cuppucinno,其實佢拎到嚟已經唔係好開心，個拉花真係...仲話有專業咖啡師，飲落除咗奶之外，無咖啡味，老公形容係差過二合一。

我叫咗熱香餅漢堡個樣ok,味道尚算不過不失

到呢杯叫康寶藍嘅物體，我同個staff講，我想要苦嘅,佢就介紹我飲expresso 或者呢個，well, 到目前為止，我飲過最難飲嘅咖啡，先係我搞完啲cream我都覺得苦，都唔緊要，跟住就係好酸，其實大部份飲咖啡嘅人都係鍾意勁苦就唔會鍾意勁酸，我真係唔識欣賞呢杯嘢，之後我問個staff啲豆喺邊度嚟，佢話係巴西同xgyerjolpfeajo...佢唔係講粗口，佢係唔知講咗一個咩字，我再問佢都無諗住解釋

聽講呢度係年輕人創業嘅小店，個裝修都唔錯，不過如果係以咖啡加餐廳，真係要再調配一下啲咖啡豆，成間餐廳，咖啡機又唔係廚房入面，一啲咖啡味都無，希望遲下會有進步。