日本料理「和亭」 (屯門)

今晚唔想食咁heavy,就想食下日本嘢，記得以前返工附近都有間和亭，我都有成日去食lunch,於是今晚就同老公嚟屯門呢間試下嘞！

一入到嚟，原來都幾大間，入面好多小朋友，好嘈。見到好多人食窩，都幾平，不過因為唔想打邊爐，所以都係冇叫。

叫咗：
和亭沙律

個賣相就麻麻，不過有芝士配牛油果都ok

三文魚刺身

有三種，三文魚，三文魚腩，火灸三文魚，個樣睇落好似唔係好新鮮，不過又好有三文魚味喎。


帶子刺身，好細件，不過又係唔好睇，但幾有鮮味！

帶子及章紅魚壽司

不過不失，不過感覺上製作好求其。

集錦天婦羅

好食，有一個好似係炸牛膀，幾得意👍

燒魷魚

Well,基本上係烚熟隻魷魚加少少醬上去，好似食橡筋咁😰

仲叫咗支清酒，

原來係和民嘅平價版，可能較平，所以好多小朋友，又無乜staff,如果有時間，當然係去和民物有所值好多。

HC Cafe (灣仔)

今日一個人嘅浪漫就係嚟咗呢度，叫咗個午市香草雞沙律意式包餐，見咁多人推介個咖啡，我都專登叫嚟試下

無睇清楚，原來個餐有個湯，今日嘅是日餐湯係忌廉湯

好味喎，有少少細細粒嘅薯仔喺入面，雖然我比較喜歡用麵包送個湯，不過聽到隔離個waiter哥哥話佢地會見你飲完個湯先上主菜，食完先再上餐茶，咁我都係跟返規矩嘞

跟住上個包嘩好大個呀，結果我都係分拆嚟食，個香草包好鬆軟，蕃茄又新鮮，最好係佢其實得少少醬，無咁肥👍個雞有少少辣，提一提味，好食

到主角嘞，

加咗$10要咗杯Lavazza意大利咖啡，聞落唔係好香，飲落夠苦（我唔加奶），咖啡面頭個油脂同咖啡加埋都夠滑，好飲！

其實一路食都有人追order,不過可能大家都知道呢度係社企，所以都特別有耐性啲，同埋怨氣都少啲，冇其他食肆咁趕，好舒服

Balencia Bakery & Cafe (荃灣)

去完吉之島就同老公搵個地方食tea,見唔駛等位就試下新嘢喇～

老公叫咗個明太子卡幫尼帶子意粉，帶子雖然細啲，不過個明太子辣辣地，加落個意粉令到個卡幫尼汁唔會滯，日式加西式又好match

我叫咗個公司三文治，足料，絕對唔係得中間先有涵，有火箭菜，個蛋仲有蛋汁，火腿都有兩種，因為佢隔離就係自己嘅麵包舖，所以好新鮮，一個人份量係足夠有餘，抵食

Tea set包杯飲品，杯咖啡都夠濃，好滿足

利苑酒家 (中環)

生日放假就同老公去玩，途經IFC ,夜晚食西餐，中午我地就揀咗去食下中餐嘞！

高湯牛肉球:
初頭我以為係牛肉球入面係有湯，原來係牛肉球浸喺湯入面，牛肉球新鮮，魚肉味無蓋過牛味，個湯都有牛味，仲有幾粒蘿白，好味

煎鍋貼:
初頭我又以為係普通煎鍋貼，一拎到嚟，個賣相已經非常吸引，面頭有一層好似拔絲嘅脆脆，下面有三隻餃，配上葱絲，食入囗有平時食煎鍋貼嘅口感，但係完全無傳統煎鍋貼肥膩感，好值得推介

黑椒牛肉炆米：
又一個估唔到咁好食，個米粉係新竹米粉，炆米但做到有咬口，個牛肉絲都好有牛味

水晶餃：
個皮夠煙韌，個涵係魚鬆，仲有西芹蘿白夠爽口，囗感一流

初頭驚好貴唔值，食完我同老公都讚口不絕，又坐得舒服

Jimmy's Kitchen (中環)

記得第一年同老公過生日就係去咗Jimmy's kitchen, 7年後嘅生日我地又去返呢度。

一坐低就有一盤麵包拎過嚟俾我地揀，我地每樣要咗一件，基本上都幾好味，幾新鮮，幾鬆軟

我地食咗好多嘢，

Baked Onion Soup洋蔥湯：見個個嚟親都話要飲，我地都一人叫咗一個，好香好濃嘅芝士面，焗過之後真係特別香，個洋蔥湯又都幾清喎，呢個好味👍



Chick Madras乾咖喱雞：有一盤提子花生橙醬⋯用來點薄脆食，個雞當然係無雞味，不過個乾咖喱好食，不過都幾辣，好少食乾嘅咖喱，紅色嘅就食得多，黃色嘅都係第一次，好濃味，粉粉哋，幾得意，愈食愈辣，好飽⋯如果你無食過真係要試一次


Fish and chips: 個炸魚好新鮮，好有魚味，個炸粉都幾厚，不過好脆

Apple crumble: 好食，夠多蘋果，上面啲好似曲奇嘅脆脆真係好夠脆，加埋個雲尼拿汁好夾

Jimmy Satellite: 本身其實想食火焰雪山，不過實在太飽，見到呢個都有火，就叫嚟試下，一個蛋糕包住個雪糕，先淋橙酒上面，點火，再淋士多啤梨汁，又凍又熱都幾特別

老公叫咗杯margaritas，我叫咗杯Boston beach party，老公話佢嗰杯正常，我嗰杯就好藥水

呢間餐廳真係好多外國人，加上啲裝修，都幾有懷舊嘅感覺，不過我都覺啲staff對外國人嘅反應同態度係好啲