宿宿醉 (中環)

今日約左好紙美食午飯,佢好快就推介左呢間餐廳,我緊係好期待啦~
由佢公司行過黎要成15分鐘,上半山電梯又要行樓梯,真係千山萬水,
一入到去己被餐廳的裝潢吸引,紅黑的配搭,水晶燈,西洋皇宮的大椅,精緻的擺設,
都拉扯著我的視線~加上牆上不時轉換的電子掛畫,真係有趣~
店子坐位最多可坐30人左右,人少少的地方,服務可更貼心~

一坐下,午餐有4,5款選擇,有飯有麵,仲有餐飲小食可配,我這不愛飯氣的當然係食個麵啦,
點了佢最出面的鮮牛肉河粉,再加炸鷄翼小食,紙美揀左越式扎肉撈檬同炸春卷

點好餐,服務員就拿上佐料給我們,有好新鮮的辣椒粒,有小小芽菜同埋香葉,好讓客人以自己的喜好調味,裝佐料的盤子都好精緻

鮮牛肉河粉 – 一上枱就感到那種簡單的美味,唔洗太多調味,就係鮮牛骨煮出的湯,泡出的河粉,就有那種羶羶的味,因本人的喵舌,食不到太熱的東西,所以等河粉涼少少才入口,即使放了一會,都不會發大,保持到爽口度!再加上豐富的佐料,香香辣辣的,令人回味!

越式扎肉撈檬 – 一上枱就雙眼放光,因為個碗真係太精緻LA~好有清宮的美~撈檬加上餐廳自調的甜酸汁,令人胃口大開!可惜我目測而言這份量真係少了點,可能要配合這區OL的小胃口吧! 

炸鷄翼 - 鷄中翼一開二,適合咀小小的ol們, 鷄翼炸得皮脆肉嫩,放涼左先食,仍保持到脆口的感覺

炸春卷 – 食落相信係自家製出品,入面包住菜絲同D肉條,放涼左食雖然仲脆卜卜,但多了種油膩的感覺,呢個都係襯熱食好

香茅特飲 – 比我想像中的是兩回事~原以為係杯普通的清水加條香茅,最多加兩片香葉,但飲落有種香甜清新,冇想像中的草臭,更唔覺有搶鼻的感覺,幾得意

椰青 - 紙美餐飲點了老闆推介的椰青,香甜清爽~入口透心涼真係好介紹,老闆話唔甜換到甜~大家聽到真係好興奮!

老闆有時間便會走來為客人帶來輕鬆愉快的氣氛!

店舖的洗手間設備當令人滿意,
由很開揚的暗門推入便見到, 男女厠各有一大格,乾淨又唔迫,仲有D擺設!!有足夠的通風系統 ,整體令人滿意~最開心係唔洗經過濕滑的廚房重地!

總括黎講..出品唔錯,絕對係吹水的 好地方~!值得再去~!

Isaak's (佐敦)

好多時經過,都沒有進入試,因為睇見門口餐牌,款式豐富和睇落相當有份量
有朋友一齊,可試多D款,今日終於有機會了!!
和紙美來食生日飯,紙美係個韓迷,所以啱晒佢

餐廳空間好濶,枱櫈都好大張,感覺好舒服
可能我地早到,所以餐廳只得兩三枱客,我地就揀左窗邊位置坐下,
原以為有服務員來點餐,望下望下先知原來係快餐店…仲傻傻的等

去到收銀台,望住個餐牌點菜,誰知原來收銀員係個韓國人…真係眼都大埋,
我地唯有在餐牌上指指點點咁落單,佢都好友善咁配合我(唔問太多)
佢只係用簡單的英語單字加手勢來表達,幸好我可明白佢意思
服務員表示我地的餐有連飲品,我們其實唔係太好冰飲,但為慶祝紙美牛一,我地都破天荒的點了兩杯特飲來掽下杯..另加兩隻吉杯來’’走冰’’…

最後我地點了蛋卷,香辣牛肉湯飯,牛肉紫菜飯卷,炸雞(原味同香辣)
轉頭服務員就送上小小前菜,噢…真係好少~哈~!始終唔算係正宗的韓式餐廳,
一來便有10小碟吧~!之後各款美食排住隊上枱了~

蛋卷 – 一上枱就愛上左佢啦~大大件的,感覺厚厚實實,好有份量,一夾開更係一絕~唔理佢係即整定係反叮,一來開都有濃郁的芝士在拉扯,相信如非等埋一齊先影相,效果會更加驚人!!
一入口,那份蛋香和芝士混埋一齊,加埋上面的涼涼的沙律漿,又涼又熱的,真係又簡單又美妙!!

香辣牛肉湯飯 – 牛肉湯真係好重牛肉味,我想可能加左師夫,紙美就覺得係堅牛肉香,雖則唔知係真假,那種味道就係令人想飲多兩啖!至於辣的感覺就欠缺少少,可能我們都比較好辣,所以應該可以再強一點,但基於唔敢同異國姐姐溝通,所以只好話比自己聽,放棄辣吧..
牛肉入口感覺好淋,好鬆,幸好唔會好韌,最怕咬極都咬唔開嗰種感覺, 只係肉的份量就少左D,每人分到3件麻雀大小的肉~仲有少少高麗菜伴住,多菜少肉…感覺都唔錯~

牛肉紫菜飯卷 – 睇落除左大大件之外,好似冇咩特別.突晒出黎的頭頭尾尾部份,都比佢地擺到好有設計,用盡所有材料,一D都唔會浪費!!建議張開咀巴到最大,才可以一整件放入口,如分開兩次的話,D餡會跌晒出黎! 在口中再慢慢將其分散,感受不同材料的味道,食落紫菜的感覺….唔似得日本壽司咁要求,紫菜入口會爽脆聲,明顯是淋的,但又唔似係雪櫃拎出黎凍冰冰,所以相信係即做的~!好欣賞佢的牛肉,調味相當恰當,唔會掩蓋牛肉本身的香味,配合埋新鮮的青菜,簡單,唔錯!

炸雞(原味同香辣) -炸雞上枱呀~好大碟呢~~ 這一向都不是我的選擇範圍之列,
只因紙美牛一,而佢又覺得要試一下, 所以點了一份, 估唔到有咁多呢~~ 餐廳內炸雞有4味可選,但混合點的話,同一份炸雞只可點兩款口味, 所以我地選了原味同香辣,相比起快餐炸雞之王KXC,呢到明顯唔係那回事,原味的話….除了面頭的炸粉炸得脆卜卜之外, 雞肉本身真的沒太重的調味,就連味精的感覺都唔明顯…幸好我地仍知道自己在食炸雞;

香辣味的話,感覺會到位一D,因為炸雞裡裡外外都被韓式的香辣粉重重包裹,滿以為只有外層如是,一撕開,鷄肉都係紅色的,就知絕不欺場!!奇妙的是,即使係咁,食落的感覺唔似食四川的辣咁強烈,知道自己係食緊咩!!雖則話冇食四川菜咁強烈,但都唔好太睇少,那種遲來的辣味,就在口舌和喉嚨之間來來回回,偶然要飲啖水涼快一下!

可能我們選的日子是平日,所以客人唔算多,即使坐滿了8成,都不會很嘈吵,我很欣賞
這餐廳很自助,客人可以拿杯子去飲水機到加水,任加唔嬲,而且這裡沒有限時,我們飲飽食醉了還可以在放空發呆吹水~

店舖的洗手間設備當令人滿意~~男厠各有一大格,乾淨又唔迫,仲有D擺設!!有足夠的通風系統 ,整體令人滿意~最開心係唔洗經過濕滑的廚房重地!

總括黎講..出品唔錯,絕對係KILL TIME 好地方~!值得再去~!

三和火鍋雞煲 (上水)

確實好少一個地方去左几次都覺得好正~!尤其喺上水呢個地方…

自去過呢到之後,就成為左我同一班寶貝做邊青的熱點~!

呢到環境唔係好吸引,一般的大排檔格局,而且冇得預先訂枱,最好早早自己去搵位,.

想喺呢到食得開心,最重要搵個自己心儀的坐位,基本上新來的客人,

服務員(老闆除外)會求其地安一D唔係咁好坐的位置,例如路口位及場地中央位置,

到時4方都坐滿了客人,感覺好嘈,我個人就很不喜歡,所以來這裡想開心地開飯,必定要自己揀位啊~!!

我們喜歡揀好了位置,留一位朋友留守,其他再到街市買海鮮~

最初頭係D湯底吸引我先~有香辣鷄煲,暖身的胡椒豬肚煲,仲有清清地的椰子鷄煲,傳統的豬骨煲…每款個樣好似好普通,但係充滿內涵!! 

香辣鷄煲 – 當初最為吸引我的賣點之一 ~ 佢的辣同外面的辣有點不同,唔會得個咸字,又唔會太過搶晒鷄的味道,舖頭所用的鷄唔似係雪藏鷄,至少食落仲有鷄味,唯是我有愛辣如命的朋友未覺得痛快,所以嘗試叫老闆加辣,老闆好樂意地盡最大的努力滿足我的好朋友~不論色香味都上左几層樓~正~!

暖身的胡椒豬肚鷄煲 – 入冬日子真係唔試唔得 ~ 香濃的胡椒味食落又唔會覺得太刺激,暖湲的感覺,點點地在食道中來回,豬肚洗得真係好乾淨,大家都知道如豬肚清潔得唔好,那種腥味真會令一切都冇晒意思~!煲中還仲有著多款唔同的配料,如白果同淮生,令煲湯更添美味~!正~! 

清甜的椰子鷄煲 – 一個清甜的椰子鷄煲,緊係唔止得椰子同鷄,一打開真係心都離一離~以為自己點錯了~!煲入面先係放左好豐富的材料, 椰子,紅棗,雪耳,.龍眼.更精彩係可能會見到一隻蟹或蜆,或其他海鮮~!老闆話咁樣個湯底先夠鮮甜養身~!先煲一下個湯底,到咁上下水滾先落鷄,大火煲8分鐘再熄火焗3分鐘,咁就完成個煑鷄的過程,咁整法D湯有鷄味,而D鷄又唔會太老..嘩…真係不得了~~~之後再烚其他材料,真係冇得頂~!

更清的芫茜清湯 – 真係冇得再簡單的湯底,最能帶出食材的真味~!但不要以為佢只有零碎片青菜,入面一大堆的芫茜同分量十足的皮蛋,一D都唔會欺場~!

PS老闆稱各湯底配料會因時令而變,所以期待當日驚喜!!

唯獨係傳統的豬骨煲仲未有能力去挑戰,真係會好担心食完佢就食唔落其他野了~.

講到尾都係打邊邊的地方,當然都有佢的火鍋款式~亦由於近街市的關係,好多材料都相當新鮮,

如客人想自己買材料上來烚的話,老闆都好歡迎!只要比少少工夫費就可~

師夫會把材料洗得好乾淨,就連蝦腸都會挑去~!用心得到你估唔到~!

我地都愛自己在街市買多款海鮮上去烚~真係一樂也~!

飲品方面餐廳都唔會限客人帶自己的飲品在店內享用,客人可帶自家制的涼茶及心儀的飲品~

當然唔好過多啦~我覺得這點好有人情味

店舖本身冇洗手間設備~要解手的話要去街市的洗手間..要行到鬼咩遠.遠都唔緊要,仲要係唔太衛, 那真係要用的話,就真係辛苦了

總括黎講..出品唔錯,絕對係KILL TIME 好地方~!值得再去~!

蓮花健康素食 (九龍城)

今日約左粉絲食飯~大家都覺得要食得清清地,所以決定去食素,

為配合大家,所以揀左九龍城這個美食天堂開飯~我自己好少去呢頭食飯,所以特別期待!

原先心中都認為齋菜沒有甚麼好期待,清淡簡單就好,抱住見下粉絲,傾下心事的心態,

去到有意外驚喜.

可能唔係初一十五,所以客人唔算多,每張枱都算大張,但整體顯得有點逼,

我地揀左個好位置坐下,服務員姐姐就送上每人一碗素湯,

素湯 – 一睇D色就知係落足料,一啖飲去就感覺到冇特別調味,可能會覺得淡了一點,但我反覺得好到位,粟米赤小豆粉葛走不了~仲有一D見到都唔知叫咩名的材料呢~!好味道!

睇睇餐牌,有好多時尚的菜名,好多想試下,但我地几人都眼闊肚窄,所以一定要好精選~!

先來一碟頭盤小食- 素鹵味,入口感覺唔似係整左好耐的味道,腐皮要軟的軟,要硬的硬,各有口感,咖哩味尤其出色~!

招牌湯麵 – 本以為只係一大碗普通的麵,誰知真係深藏不露,面頭放滿了不同的菜,有菇有菜有仿海鮮,埋在裡面的麵條就是最令人意外! 原以為浸左咁耐一定又淋又軟又唔好食,點知一食入口,啖啖彈牙,而姐好有蛋香味~就係一種鮑魚味的口感~一試難忘!即使食第二碗時已經放涼了,但口感仍在~!

五柳青魚 – 腐皮紫菜加埋其他食唔出的東西卷成,炸一下後淋上甜酸汁,舖上醃製過的甜酸菜,真係冇得頂~咬落去一下脆一下軟一下甜一下酸,唔止係小朋友的喜愛,我都好中意呢~!

野菌黑耳炒淮生 – 每樣材料都好清甜,不用加任何調味,食出佢的鮮味,我欣賞這種無添加~!

見我地傾得咁上下,又會送上糖水,真係感謝~!

糖水係5豆糖水,一望就知煲得好夠火喉,豆豆食入口感覺好棉,真係正~

我地几個一邊食一邊傾,食完都仲要傾~當中服務員都會勤來為我地的茶壺加水,真係好體貼

店舖的洗手間設備我覺得尚可接受~~男女各一格,細細地算係乾淨都可以用~

總括黎講..!出品唔錯,又係KILL TIME 好地方~!值得再去~!

Outback Steakhouse (旺角)

今日同寶貝們出九龍辦D事~事成之後緊係要好好休息一下~!
大家冇咩心水~佢突然話去食甜品,所以上左新世紀~點知佢心儀的舖頭排長龍,
我就提議去呢到食雪糕!! WOO~~~諗起都吸引呀~流晒口水~!!!

去到唔洗等就有位,望下個餐牌~揀左D小食~我地打算食咁上下先點雪糕,
所以先點左個吞拿魚他他薄脆,一杯 PUNCH,加個芝士薯條,燒蝦沙律,燒鷄肶仔,朱古力餅雪糕,美式漢堡包餐….

我地坐下傾下,冇耐就有美食上枱了!~
先來左一杯 PUNCH, 見佢同張相差唔多樣真係開心~飲落好清涼,唔會太甜,几好味,食埋上面兩件橙…就記起呢D水果其實唔係要黎食.. V__V

吞拿魚他他薄脆 – 一上到枱真係冇可能認得佢~同張相真係差別太大了~!寶貝諗住係紅紅的鮮吞拿魚,就變左暗青綠色…即時同服務員了解一下,佢就話因為廚師己預先把漿汁撈埋落D吞拿魚到,所以顏色會有D唔同,仲話我地睇緊係舊餐牌, 所以唔知道改左,其實係一樣的…我心諗…其實你係咪應該比個最新的餐牌我地呢? 了解過後,就繼續用餐, 吞拿魚他他漿加起黎味道唔係太突出,薄脆一D都唔脆~可能放得太耐吧~

芝士薯條 – 上枱除左見到芝士同薯條之外,仲見到好多煙肉..又向服務員了解啦~佢話個款式係咁個喎,吓~乜咁多謝…由於我地都唔係咁LIKE 煙肉的關係,今次一定要佢地換過先得~!之後黎的薯條多左芝士漿, 薯條入口唔係咁脆,又細條,失色少少

美式漢堡包餐 – 比我想像中細份的美式漢堡包,心中諗住美式野要大大件先啱~不過而家細細份都唔錯,可以令多D其他野, 漢堡包的漢堡算香牛肉味,但係就乾身左D,跟包上的薯條真係不得了,又粗又長又熱又脆….

燒蝦沙律 – 有4大隻燒蝦,差D唔夠分, 燒蝦入口感覺雖然係燒過,但係仍好彈牙!!沙律菜口感好差,淋晒,一D都唔爽脆,感覺雪左好耐,一D都唔新鮮..菜同蝦的比例均勻一D就更好了~!

食到呢到..突然有個長包包放上我地張枱..我地同服務員講我地冇點呢個包啦,
服務員就話呢個係例牌會有的餐前包…呢個包真係令我地失左預算,食埋佢似乎有D OVER,
點知試食少少..入口鬆軟但有點散,好香小麥味,加埋佢地秘製的CREAM, 真係唔錯,…到最後一啖一啖咁食晒..

燒鷄肶仔 – 皮脆肉滑,又香又熱..加上有少少辣辣地~真係冇得彈!呢個真係唔夠我地分了.~

朱古力餅雪糕 – 呢個簡直係我的至愛~!唔愛朱古力甜味既朋友唔會識欣賞!
凍冰冰的雪糕加上暖暖地的朱古力蛋糕,兩樣一齊放入口的感覺令人覺得好幸福~!! ^O^

最後寶貝們以香香的熱咖啡為結尾~!!

店舖有專用的洗手間,唔洗去商場排隊.而且設備當唔錯~~算係乾淨又唔算好寛落!!

總括黎講...絕對係個坐得舒服,又可以KILL TIME 的好地方~!!希望下次有新餐牌睇~!!