韓舍 (旺角)

今日好開心服務令後約左孖寶出黎食生日開年飯~!細孖就提議去呢間開心下~

試新野,我們當然好舉腳贊成LA!

約左7點半,餐廳門口勁多人~訂左位仍要等一陣~

5分鐘左右,有位服務員帶我們入坐,餐廳的枱位好大,間格相當擠迫,

由於走廊好窄,客人行來行去出出入入,故我們需一邊行一邊左右閃避,

終於行去到我們的坐位,大大的枱櫈,坐上去好濶落

我們坐下打點,服務員替我們開爐添醬油,孖寶就出去夾食物,..

回來一看,拿的並沒我預期的份量,他們說因為路程遙遠,取食物的碟子小小的,

不同的菜式又不方便放埋一齊,所以一次只能取小量食物,交換位置,他們在燒,而我便出去看看,

沿路小小的走廊,踴有著不同的服務員和客人,濟迫得很~

有的在排隊領食物,有的3,5一團在研究夾那些食物,有的在排隊裝飲品,

更妙的是有的地自裝棉花粉及燒墨魚丸…每個等候區之間機乎沒有可行人的空間..

好不容易走到拿食物區. 生和熟的食物區分開放得很整齊,

鮮貨區內各人都排隊拿食物,牛豬鷄羊海鮮,生果及蔬菜都有,

由於是沒有名牌,所以不容易分得出他們, 

除生果及蔬菜可以講話鮮味之外,其餘的牛豬鷄羊海鮮都有好多師傅坐陣,

食過後要不斷飲水都難以解渴,

吃了燒牛仔粒,西冷牛,及一D魚柳…都有著同一種咸味,郤分唔到佢係燒汁定係七味汁…

除魚柳外,其他的肉食都好韌,吃了一轉便放下了…

去到熟食區有不同的料理,各有不同的重口味,麻辣鷄,炸鷄件….各有各特色,

睇去感覺好乾身,似係炸好有一段時間,

天婦羅區有大廚在旁即點即炸,所以要等一下~應該是最新鮮的,可惜排隊的人太多,沒機會試,

飲品部都是很擠迫的區域,大家都拿著自己的杯子排隊添飲,

有多款氣水,鮮果汁和清酒…

氣水是自加打氣的,所以己變了糖水一樣,沒氣的甜水,

鮮果汁係開水的,亦是得個甜字,

清酒就更一絕…大大樽的給客人任飲, 一試之下,味道就就中國的米酒…真唔易入口,細心一想,沒有寫明的清酒,就可能是指中國的米酒吧…嚐了一小口,就倒掉了~

最後得我帶回去的飲品,就是即沖綠茶包~!水滾茶靚..應該都沒有地方可挑剔吧…

甜品部,我們都試了3,4個款式,沒有甚麼驚喜,算是做到了基本,或者是我們女兒家的心中,對甜品點都會有點要求吧…雪糕就長期都有人排隊,所以都沒有機會品嘗

燒了一會,行來行去拿食物的時間比坐下燒野食和傾計的時間還多,轉眼服務員就提示我們要埋單夠鐘了,剛放下錢就過來收拾我們的枱面,並提示我們如過了15分鐘,便會重新計單,著意我們要快點還枱..噢~這個真的太高效率了…

整理了一會,去個洗手間,店舖的洗手間設備我覺得尚可接受~~女有兩格,細細地算係乾淨都可以用~

總括黎講..算係見識過佢的出品~可見的未來相信唔會再見,真心希望佢地他日可以有所進步

入到餐廳,會發覺整個餐廳都被好濃的煙包著,
可能係沒有良好的抽煙系統吧 我們多次請服務員調教一下個抽氣,
不知係佢地無能為力,還是莫視客人意見,3,4個都不了了之....
最後帶著一身的煙味離開,那股氣回家後仍濃濃不散...真係怕怕了~!

咖喱至尊 (大埔)

新年第一日約左班粉絲去HAPPY,HAPPY前咁啱要先到大埔搞少少野,

對新一年食乜野做第一個午餐感到又期待又迷茫…大埔區乜野都有,樣樣都想食,

就喺呢個時候就遇到友人甲,佢推介我可以去試一個好出名的咖哩…

用著試新野的心情去到餐廳,簡單的茶餐廳格局,細細張的圓枱圓櫈,一坐落,服務員姐姐就過黎問我要乜野,

我睇下又睇個價錢比我的感覺,每樣菜式都好有大碟,我一個人真係試唔到咁多,

於是就點左佢地的招牌咖哩牛腩河…之後又問我係咪茶餐,我唯有話係LA…

之後大姐仔就話有杯餐飲跟,之後不加思索地點左杯熱檸水

好快就上枱了! 就係好快的快餐~

咖哩牛腩河 – 原以為係咖哩濃汁,一睇就知係一般牛腩湯河加上咖哩汁,感覺有點越式OR泰式,

面頭加上新鮮的青瓜同洋蔥,食落好清新,粗身河粉好有口感,唔知係咪有意煮得唔係太熟,有點硬硬的..

咖哩湯味好清淡,咖哩味唔重,感覺就如車仔檔的咖哩汁,難以想像係餐廳主打,可能係我想得太多了,

牛腩份量算多,而且好大件,可惜入口又硬又韌,咬到牙都軟..

唔知係咪茶餐價,所以品質會和價有少少不同..可惜我冇機會見識到

熱檸水果真係水滾茶靚,一般我都係先拎開檸檬到小碟,待水涼DD先再放落去,

可是今次餐廳冇提供小碟,所以我唯有晾起了

一淡淡的慢慢食,未食到一半,就差D被轉枱,因為有一行3人的客人入來,沒有其他客人可調動,

所以想把我轉到別的枱,幸好那客人見我不太方便,所以停止了轉枱行動~

有見及此,我都係加快步伐,食好就走,唔好阻人做生意…

店舖本身冇洗手間設備~要解手的話要去商場的洗手間..要行到鬼咩遠,唔識路都好難搵...辛苦了

總括黎講...真係唔好咁易相信''招牌同馳名''呢D說話,真心希望佢地他日可以有進步!!

三和火鍋雞煲 (上水)

確實好少一個地方去左几次都覺得好正~!尤其喺上水呢個地方…

自去過呢到之後,就成為左我同一班寶貝做邊青的熱點~!

呢到環境唔係好吸引,一般的大排檔格局,而且冇得預先訂枱,最好早早自己去搵位,.

想喺呢到食得開心,最重要搵個自己心儀的坐位,基本上新來的客人,

服務員(老闆除外)會求其地安一D唔係咁好坐的位置,例如路口位及場地中央位置,

到時4方都坐滿了客人,感覺好嘈,我個人就很不喜歡,所以來這裡想開心地開飯,必定要自己揀位啊~!!

我們喜歡揀好了位置,留一位朋友留守,其他再到街市買海鮮~

最初頭係D湯底吸引我先~有香辣鷄煲,暖身的胡椒豬肚煲,仲有清清地的椰子鷄煲,傳統的豬骨煲…每款個樣好似好普通,但係充滿內涵!! 

香辣鷄煲 – 當初最為吸引我的賣點之一 ~ 佢的辣同外面的辣有點不同,唔會得個咸字,又唔會太過搶晒鷄的味道,舖頭所用的鷄唔似係雪藏鷄,至少食落仲有鷄味,唯是我有愛辣如命的朋友未覺得痛快,所以嘗試叫老闆加辣,老闆好樂意地盡最大的努力滿足我的好朋友~不論色香味都上左几層樓~正~!

暖身的胡椒豬肚鷄煲 – 入冬日子真係唔試唔得 ~ 香濃的胡椒味食落又唔會覺得太刺激,暖湲的感覺,點點地在食道中來回,豬肚洗得真係好乾淨,大家都知道如豬肚清潔得唔好,那種腥味真會令一切都冇晒意思~!煲中還仲有著多款唔同的配料,如白果同淮生,令煲湯更添美味~!正~! 

清甜的椰子鷄煲 – 一個清甜的椰子鷄煲,緊係唔止得椰子同鷄,一打開真係心都離一離~以為自己點錯了~!煲入面先係放左好豐富的材料, 椰子,紅棗,雪耳,.龍眼.更精彩係可能會見到一隻蟹或蜆,或其他海鮮~!老闆話咁樣個湯底先夠鮮甜養身~!先煲一下個湯底,到咁上下水滾先落鷄,大火煲8分鐘再熄火焗3分鐘,咁就完成個煑鷄的過程,咁整法D湯有鷄味,而D鷄又唔會太老..嘩…真係不得了~~~之後再烚其他材料,真係冇得頂~!

更清的芫茜清湯 – 真係冇得再簡單的湯底,最能帶出食材的真味~!但不要以為佢只有零碎片青菜,入面一大堆的芫茜同分量十足的皮蛋,一D都唔會欺場~!

PS老闆稱各湯底配料會因時令而變,所以期待當日驚喜!!

唯獨係傳統的豬骨煲仲未有能力去挑戰,真係會好担心食完佢就食唔落其他野了~.

講到尾都係打邊邊的地方,當然都有佢的火鍋款式~亦由於近街市的關係,好多材料都相當新鮮,

如客人想自己買材料上來烚的話,老闆都好歡迎!只要比少少工夫費就可~

師夫會把材料洗得好乾淨,就連蝦腸都會挑去~!用心得到你估唔到~!

我地都愛自己在街市買多款海鮮上去烚~真係一樂也~!

飲品方面餐廳都唔會限客人帶自己的飲品在店內享用,客人可帶自家制的涼茶及心儀的飲品~

當然唔好過多啦~我覺得這點好有人情味

店舖本身冇洗手間設備~要解手的話要去街市的洗手間..要行到鬼咩遠.遠都唔緊要,仲要係唔太衛, 那真係要用的話,就真係辛苦了

總括黎講..出品唔錯,絕對係KILL TIME 好地方~!值得再去~!

蓮花健康素食 (九龍城)

今日約左粉絲食飯~大家都覺得要食得清清地,所以決定去食素,

為配合大家,所以揀左九龍城這個美食天堂開飯~我自己好少去呢頭食飯,所以特別期待!

原先心中都認為齋菜沒有甚麼好期待,清淡簡單就好,抱住見下粉絲,傾下心事的心態,

去到有意外驚喜.

可能唔係初一十五,所以客人唔算多,每張枱都算大張,但整體顯得有點逼,

我地揀左個好位置坐下,服務員姐姐就送上每人一碗素湯,

素湯 – 一睇D色就知係落足料,一啖飲去就感覺到冇特別調味,可能會覺得淡了一點,但我反覺得好到位,粟米赤小豆粉葛走不了~仲有一D見到都唔知叫咩名的材料呢~!好味道!

睇睇餐牌,有好多時尚的菜名,好多想試下,但我地几人都眼闊肚窄,所以一定要好精選~!

先來一碟頭盤小食- 素鹵味,入口感覺唔似係整左好耐的味道,腐皮要軟的軟,要硬的硬,各有口感,咖哩味尤其出色~!

招牌湯麵 – 本以為只係一大碗普通的麵,誰知真係深藏不露,面頭放滿了不同的菜,有菇有菜有仿海鮮,埋在裡面的麵條就是最令人意外! 原以為浸左咁耐一定又淋又軟又唔好食,點知一食入口,啖啖彈牙,而姐好有蛋香味~就係一種鮑魚味的口感~一試難忘!即使食第二碗時已經放涼了,但口感仍在~!

五柳青魚 – 腐皮紫菜加埋其他食唔出的東西卷成,炸一下後淋上甜酸汁,舖上醃製過的甜酸菜,真係冇得頂~咬落去一下脆一下軟一下甜一下酸,唔止係小朋友的喜愛,我都好中意呢~!

野菌黑耳炒淮生 – 每樣材料都好清甜,不用加任何調味,食出佢的鮮味,我欣賞這種無添加~!

見我地傾得咁上下,又會送上糖水,真係感謝~!

糖水係5豆糖水,一望就知煲得好夠火喉,豆豆食入口感覺好棉,真係正~

我地几個一邊食一邊傾,食完都仲要傾~當中服務員都會勤來為我地的茶壺加水,真係好體貼

店舖的洗手間設備我覺得尚可接受~~男女各一格,細細地算係乾淨都可以用~

總括黎講..!出品唔錯,又係KILL TIME 好地方~!值得再去~!

陳六記飯店 (上水)

氣溫突然急跌,又係做邊青的好日子~所以急CALL几個兄弟一齊赴湯蹈火!

一個話要做邊青,一個話要食羊腩煲,一個話要靜靜地咁坐,唔好比人趕..

咁我地唯有搵個三樣都有既地方啦~!

去到呢間老字號,企門口的服務員姐姐問我地几多位,佢表示呢到可以滿足到我地三個願望

由於時間尚早,唔洗等位就可以有個樓上雅坐,而且暫時只有我地一枱客人

好舊的酒樓枱櫈,牆上貼滿仿手寫的菜名,古式古香的感覺,

我地一面欣賞一面落單,服務員姐姐話我地可以一邊羊腩一邊做邊青,

我地好快就點好菜,而好快就有食物上枱~

先黎一客鎮店之寶5層燒腩肉,羊腩煲,白鱔片,鷄件,菜

5層燒腩肉($70) – 服務員姐姐強烈推介的鎮店之寶,一眼望落去果然係同平時的有所不同,食入口感覺相當吸引,脆脆的皮加上嫩滑的肉,燒得啱啱好,一D都唔會覺得過火而太乾,而佢所講的5種質感就…可能要再用心感覺先可發現

羊腩煲($250) – 我地滿心期待!一上枱就已經滾下滾下,一打開,一股羊氣衝出,吸了兩吸滿足左一下臭覺,一望好似好多料,滿滿的支竹放滿左成個煲,一搞再搞…湯水好浠,羊件數埋唔夠10小件,我地每人食唔到3件,再搞搞睇下有冇其他材料,就有几粒馬蹄及零星的蘿蔔定薯仔…互望一下,感覺就係中伏了,夾一件試食,羊腩一D都唔夠羊味,而且好硬,好明顯係新煮的,唉…失望至極…

食左一陣羊,我地請服務員姐姐為我地加湯,佢就話加水就可以了,因為湯底已經好夠味…

但係我地覺得D湯一D都味都冇...OK…加左一轉水,

點下其他野食,睇完全張點菜紙,真係點唔落手,最想食的脆魭同海蝦居然冇…

其他的款式亦唔及一般的酒樓多,碟碟計,每碟$45….好不容易就揀几款大家都啱食的東西...

白鱔片($110) – 話係海鮮價,問左服務員姐姐先話一碟百一,我地都一試啦~上到黎質量相當唔錯,大約有10片,食入口感覺新鮮爽口有魚味~呢個價錢尚可吧~

鷄件($45) – 特純鷄件, 葱都冇條,冇調味…應該話冇咩味,就連鷄都食唔出

火鍋丸(每碟$45) – 芝士丸同貢丸,每碟9粒,就係一般的街巿貨,本來都冇咩要求了,就係貴左少少

豆卜(每碟$45) – 呢碟真係貴到不得了, 街巿貨色的豆卜,就係收我地$45/十粒,真係嚇了我地一跳,為保持我地的高雅,唯有互望了一下…….

菜(每碟$45) – 油麥菜同生菜,各$45,份量算係合理,而且新鮮冇爛葉…

期間我地再叫服務員姐姐幫我地加湯,今次服務員建議我地可加普洱茶做湯,我地都覺得奇怪,但服務員再三建議,話咁先有風味,咁我地都識一下啦~唉…..結果真係不想再提,之後再叫佢加多一次湯,佢先不太甘願地在樓下的廚房取了一碗湯給我們…即使加了湯,都沒甚麼羊味..

傾下講下時間好快過~由我地一枱人到滿坐又變返只得我地一枱人,

可能客人唔多,服務員姐姐就似是我們專用的,

我地一邊傾都唔會過黎打擾(其實佢都唔想黎埋我地),好令我地可以傾得痛快!!,

店舖洗手間設備唔係咁令人滿意~要經過廚房重地,所以迫迫細細濕濕窄窄…所以可以的話都係忍耐一下,搵另一個更好的解手吧~!

總括黎講...真係唔好咁易相信''招牌同馳名''呢D說話,真心希望佢地他日可以有進步!!