稻香超級漁港 (上水)

今日同長老們去搵地方飲茶~事原兩位老人家常去的粉嶺區酒樓己結業得8899,

於是就喺上水搵新地標,今日選擇呢間大集團的~試下新口味
去到攞位部,客人都几多,我地3大一小一架私家車,似乎唔係咁受歡迎
等左陣就被叫入坐,公主的私家車被放到另一個特定的地方,遠離我地的視線,
車上大大小小的東西拿不了咁多,我地只好冒這個險,扮安心地食飯
啱啱坐下,就有兩三位服務員同時過來打點餐具,PIN PIN PAN PAN咁感覺好粗暴,好炒耳.
之後問完我地要乜野茶冇回應就走左去,我相信佢係聽到的…
跟手我地就點野食了~!拿起點菜紙, 點菜紙係双面印刷,兩邊都可點菜,
我個人好欣賞酒樓環保的概念!話說稻香的燒味有一手~所以我地都點左几款試下~
等左陣,茶同點心好快上枱了,我有習慣愛打開茶壺蓋看看~普利茶葉唔係太多~
泡開了都未滿一半,成本控制吧~雖話如此,但沖出來的茶好深色,感覺怪怪的~
飲去更奇怪,有種淡淡的炒燶氣味~冇乜普利的茶香,不好飲
叉燒賴粉 – 冇特別要求的款式,叉燒確係好味~半肥瘦感覺嫩口,頭尾段有少少燶,我的至愛~伴叉燒的菜凍冰冰的~感覺差矣~!賴粉湯底冇味,相信係絕對清湯, 賴粉軟硬啱啱好~整體感覺尚可~
切鷄燒鵝飯 – 上枱睇落感覺好肥美~一睇之下切鷄被分配到骨邊位,冇乜肉食~我個人OK的,可惜長老唔係咁滿意~話得塊皮喎,D皮佢又唔食,只係咬下舊骨邊少少肉~HA~燒鵝脆皮真係極品~只係肉質鞋口左少少,入口仍有著濃濃的鵝香~唔錯啊~伴菜仍凍冰冰的,相信係燒味部的特色!
蟹子燒賣 – 大大粒的蟹子燒賣,睇落好圓潤,面頭原粒己挑腸的蝦仁爽口又彈牙~可惜下半部份一入口感覺好咸~己食唔出鮮味~師傅真係落得好重手呢~破壞左一粒好燒賣~!
炸兩 – 是日廚師推介,我個人都喜歡新的嘗試~難得見到當然要試下啦~!點知真係極為失望~
上枱的時候睇落感覺軟弱無力~一D都唔堅挺,裡面的油條好似己被包起一段時間,入口唔脆不特止,而仲有點韌~凍冰冰的,超難食~真係想退左佢…可幸長老們心地比我更和善~只講左句’’下次唔好點LA’’就算了~
潤腸卷 – 唔知係咪特色之一~潤腸好乾身~冇乜油脂,感覺外層的包包失去左吸油的功能~入口唔係太熱,可能放起左好耐了~
上湯菜心 – 有左上湯浸住的菜心~可能唔係當做,定係煮得唔夠耐,所以食落又幼又硬~
鳳爪 – 一上枱份量比我想像中多,唔會放左好多花生喺底做墊,入口感覺…嗯~相信係同一個點心師傅所為~所以味道咸得好重手, 漿汁太結身,最後要用熱水沖浸下先可入口
店舖的洗手間設備令人滿意~~女厠有5大格,地下有少少濕,算係乾淨又唔迫!!有足夠的通風系統 ,整體令人滿意~
總括黎講..算係見識過佢的出品~可見的未來相信唔會再見,真心希望佢地他日可以有所進步
 

帝京餅店 (旺角)

今日路經上水一廣場,突然比我發覺近出口的轉彎位有擺攤位~就走過去8下

點知唔睇由自可~一睇就不得了~我竟然見到芝士撻~
我呢D芝士怪當然唔想放過呢個咁好的機會快快手咁買返兩隻黎支持下LA
買完即時搵個靚位坐低開動~大凍天時雖然有點涼意,但拿上手仍感到有點微暖~
原味芝士流心撻 – 雖然服務員話流心,可能天氣凍了,所以當起動時,一D都唔流心了,,
即使係咁,香濃的芝士仍在口中流連,撻皮係曲奇底,好重牛油味,脆卜卜的,整體感覺唔錯,如再暖D就更加好味~!
朱古力味芝士流心撻 – 相信撻皮仍係曲奇餅底,朱古力比純芝士撻做得出色,至少即使放左一樣咁耐,仍有流心的質感, 朱古力味比芝士重,而且感覺甜左少少,如可以75%朱古力做漿就好了~只要用心感受就可食到芝士的味道!
總括黎講.~見識過就好…

Home Sweet Home (太子)

今日係個4年一次的特別日子,我計劃同寶貝們一齊做D特別既事~
就係一齊去捐血後再去享用一個生蠔大餐!
失禮講句自己唔係咁識品嚐生蠔,但求佢唔壞唔臭肥肥白白甜甜美美就OK!
上網搵下資料,居然比我遇到呢間餐廳有做團購,再睇D食評都唔錯,反正近旺角,就一於去呢間!
捐完血由女人街行返去太子~三條友都唔係咁熟路,又餓又累,顯得呢段路變得特別漫長,
但寶貝們為左完我一個心願,只好繼續走~! ^__^
去到餐廳門口,望入去地方唔大,坐到30人左右,有正常餐枱同喺近門口有兩張高腳BAR枱,
我地喺門口望一望,見正常餐枱已經坐滿人,只係有張吉BAR枱,心感不妙
心諗我地神咁早預約.冇理由會安排BAR枱掛,點知向服務員小姐一問,確實係咁!!
仲話如果要轉的話,就要等一下了!!我的心中即時著火...但大家都肚了,只好入坐!!
坐著二話不說就比張COUPON佢地睇,佢地都好快咁拎份''特製(團購專用)餐牌''比我地睇,
我地几個就諗住食住D生蠔開下胃,先再決定其他主菜,
我地問佢今日有咩生蠔款選擇,佢就話今日只有韓國生蠔,其他都冇了!
吓~~????!!我真係希望自己係聽錯...既然佢咁講,我地跟本冇第二條路揀~
落左單,服務員就拎住張餐牌行開了,我地想要几杯水,佢話OK,之後等左一排先至有
呢刻我地只係覺得好想快D有野食~同快D食完離開~!因為完全失去左我心中的感覺~!
我一地邊傾計,一邊飲水,左等右等,只見服務員小姐喺我身後行黎行去~未見有食物上枱,
寶貝們覺得唔係咁妥,於是就諗住點個主菜送下蠔( 此餐係可以用優惠價追加主菜一份 )
於是跟手就落左份三文魚,再繼續等~
等左3,4個字~終於生蠔上枱了~~一眼望過去,唔知係我地唔識欣賞韓國生蠔的品種
定係咩啦~總係覺得生蠔仔隻隻都營養不良,一D都唔飽滿
CHEER左之後就開動了~
生蠔入口感覺普通,食唔到有生蠔爽甜的蠔肉質感,又唔覺濃郁的海水味,
可能呢隻品種的本質就係咁掛~所以我地只好帶住平常的心情繼續享用~
己失去左我原先興奮的感覺~
食過生蠔,三文魚仲未見影,於是忍唔住要服務員跟進一下~佢就話廚房已整緊~
再等多十分鐘仍未見上枱~又再追,點知今次服務員居然話我地冇落單~~!!!!
成件事都令人好吃驚!!寶貝就話如真係冇落單的話,就黎埋飲品同甜品就算了,
個餐原本有配紅白酒做餐飲,我地就點了三杯白酒一杯紅酒,
紅白酒一入口就知道係一般table wine,唔太香,紅酒入口有點酸澀,白酒酒味唔重,可能係開左好耐走晒氣,就似飲緊白提子汁
之後另一服務員又走黎話廚房已整緊,大家只好再等一會~
等左陣~三文魚終於上枱了~嗯~~相信係價錢關係,所以份量都''被配合''了
三文魚唔算好大件肥厚,薯菜更係少得可憐,可能係我地肚餓掛~!
一睇就知係急凍三文魚扒,可能要等融雪所以等咁耐,再加上可能趕時間,所以煎得急火左少少~入口有點乾,冇乜肉汁~點點的忌廉汁味道唔太香濃,除了忌廉質感就食唔出係乜野味道~再用心感受可以食到少少黑松露的香氣
甜品 - 服務員話係自家製的唔知乜乜乳酪,確係好記得我地由10點開始等,等到10點半仲未有得食~大家都開始有少少情緒~~
終於上枱~有種莫明的失落,見到食評的甜品都擺得好靚好出色,....嗯~可能我地個團購餐就係配呢款吧~一下放入口~相信係將普通乳酪放入冰箱再解少少凍,就係咁~就係只有乳酪酸甜的味道~~
終於完成呢餐~我個人覺得真係好漫長~
我從未試過去一間無人食煙的餐廳,會令我有種好想快D離開的感覺~!呢間真係第一間~!
真係一個好特別的體驗! 呢個經驗話比我知,捐完血好肚餓的時候,千其唔好去食''法國餐''!!
店舖洗手間設備唔係咁令人滿意~要經過廚房重地,所以迫迫細細濕濕窄窄…所以可以的話都係忍耐一下,搵另一個更好的解手吧~!
總括黎講..算係見識過佢的出品~可見的未來相信唔會再見,真心希望佢地他日可以有所進步
 

記得當時我印好左張單(2月十几號)就打電話去預約,接電話服務員小姐非常友善咁幫我安排,

仲留埋佢個名,好等我地有變動時,可打電話去搵佢跟進,我個人相當滿意~!

當到左差唔多日子,我再拎返張單出黎睇下,發現其中一個條款係,如訂晚上9點之後要每位另加$10,

我就諗住我改早少少,又唔洗咁夜食,之後就打去改時間

點知有第二位小姐接,傾左一大餐,佢居然話冇我的BOOKING~!!!

我就同佢講,我係几時同阿邊個小姐約的,佢就話:我地餐廳有呢個人,咁真係冇呢個BOOKING

我已感到有D担心,如果我唔係突然要改時間,真係唔知到時有冇得食~!

OKOK 咁我重新訂8點半,佢就話8點半冇位最快要9點,居然係咁?!!

咁我就同佢講我見到9點要收$10的條款,我唔想比,佢就話可以免收...就約定好日子時間了

過左兩日我話比寶貝知訂左枱食飯,比埋張COUPON佢睇,

佢話張單好似話要喺3月1先用得,我有D唔放心,見張單上可以用WHATSAPP 查詢同訂位,

為求安心有白紙黑字留底,我就再WHATSAPP confirm 一次

來來回回咁WHATSAPP左几次,終於有個放心的定案,最後先可安心期待29號的來臨!

估唔到成個過程都係咁令人驚喜!!

麥當勞 (上水)

今日大凍凍天諗住搵粉絲唻個溫小HIGH TEA,點知搵佢唔到,只好喺附近自己處理~

平日好少食牡丹樓的我,今日見佢有新出品,就決定黎幫襯下~
呢到的人流管理真係非常之差~落單同等餐的客人都堆喺同一位置,
愚昧的我真係唔分唔清那條隊係買野,那堆人係等野,排左一兩個之後就知中伏排錯隊,要行另一邊再排過,D服務員又呆下呆下咁唔識叫人過去買野~好似做少一個得一個的心態~
終於買好,為方便其他人買野,我自己就好快咁閃埋一二邊等,唔加入人堆
等了又等,心諗我只係點少少野唔洗等咁耐掛,咁就前去望下~
點知服務員居然話: 我地已經叫左好多次了,是你遲來取…
仲要接收左佢不悅的眼神,…噢..是我錯~ ~__~”
拿好包就去搵位,一個人去搵位食野真係超級唔方便~我真心唔享受呢個感覺,
任何地方的牡丹樓相信都唔及呢到咁多長期支持者,每人每日都一杯飲品坐大半日~
我初到貴境只好配合配合~求其見位就坐了~一個人不要太計較了~坐下開餐
招財福堡牛 – 一開包~又一次證明公司的廣告一向都係只供參考~真包同上鏡往往有點距離,廣告永遠是吸引好多的~!一啖咬落去,嗯~~明白家陣牡丹樓提倡即點即整的出品,標榜新鮮,亦如佢所願,各材料真係新鮮得各有味道,整體入口覺得互不協調,安格斯牛塊雖然有點厚道,但冇乜牛味同埋感覺好乾身,唔期望好有肉汁,但都希望比一般的漢堡重牛味一D~原本只有早餐時段先可以品嚐到的薯餅而家夾埋落個包到,呢個FEEL同我多年前喺大英帝國時食過一次~感覺仍舊肥膩~薯餅一D都唔熱又唔脆,好明顯係炸起好耐再夾入個包中間,上下兩層的包更係不用多提~整體都係件令人有點失望的作品
熱朱古力 – 話晒今日都係香港59年黎最凍的日子~太凍天時緊係要點杯熱飲啦~未入口都想先比手仔取取暖,唔知係佢的隔熱杯質地太好定係太氣太凍,定係佢D熱水根本唔熱呢~完全FEEL唔到溫度, 失去左那種暖笠笠的感覺~望真D,煙絲都冇條,太室溫了~吹都唔洗吹,一啖飲落去..好結實的朱古力味,且比較甜,我本身都係個比較喜歡黑朱古力的人呢杯對我黎講甜左少少~我明白喺呢到唔應該有過份高的要求!~
總括黎講.~見識過就好…
店舖本身冇洗手間設備~要解手的話要去商場的洗手間..門口轉個彎就好,
好彩的話會遇到清潔姐姐,咁就會有一刻的清潔洗手間用了~!其他時段不願致評
 

栢檔去骨海南雞飯 (佐敦)

今日喺呢頭做完野,感覺到自己呆下呆下就明白係時候要醫肚了,

喺呢頭唔係咁熟路,只好周圍望下有乜心水~
突然比我發覺有間鷄店~心中驚喜,去門口望下,原來係新加坡風味的店,
餐牌D相好吸引,忍唔住決定入去一試~!!
店舖樓面細細窄窄長長~要行到最入面先有濶落一D既位置,
地面好跣,好在有D位有地毯,如果唔係對我呢D米之連人黎講會相當難行
由於呢個時間客人唔多,所以我可以搵一個心儀的位置坐底再睇餐牌
店舖有三樣主打美食,我只得一條友,實在係招呼唔到咁多~
作為一個鷄精,我只好點返自己最心儀的鷄了~!
海南鷄飯套餐,配香飯,自己製老火湯
去骨海南鷄 – 好快就上枱了~當我見到佢時,確係有點失望, 鷄件份量相當配合呢個價錢, 睇落好似初起左好耐,有點風乾了的感覺,鷄皮起晒粒粒,睇落一D都唔滑~放入口,肉質方面相信因為隻鷄煮得太老,所以好鞋,時放得太耐,所以好乾身,好難令人相信係舖頭的主打作品~,
香飯 – 確係純正的鷄油飯~輕輕的清香,入口唔會太濃味的,同食白飯的分別唔大
老火湯 – 木瓜紅青蘿蔔鷄湯, 既簡單又鮮甜,木瓜肉溶化後令到湯水變得結身,入口好有質感,令人有種真材實料的感覺,唔錯~我仲買左碗外賣去探寶貝!
烚生菜 – 相信係要重新開火煲水, 所以等左好耐先上枱,相信係D水煲得太滾,所以令到D菜淥得太熟,淋晒,食又痛苦唔食又浪費…
不得不提的是那漿料~結身的豉油就少用~因為點了一下便覺得太咸,搶左D鷄味,中間綠色的薑蔥茸真係好味到冇得頂~!薑蔥用機打碎再加入香油, 又香又夠薑,好有特色!!另一酸辣漿的酸辣度好出位, 酸辣得黎又唔會搶左D鷄的味道~我聽到隔離的客人仲加左碼呢(D漿汁)~!
進餐期間服務員姐姐除了落單同上菜時會過黎接觸客人之外,其餘時間都會比絕對的自由空間客人,不會隨便打擾~!佢地會坐喺門口到閒談,直到客人埋單或有其他需要,先會施施然地過黎了解~我几中意呢種冇人打擾的感覺~!
原想去了解一下洗手間實況,但我記得有其他客人問洗手間位置時,服務員會再三叮囑小心地滑,有見及此,我就放下去探訪的意圖了~
總括黎講.~係做街坊生意的溫馨小店,先要放下不必要的期望, 但求醫到小肚便可~
可見的未來相信唔會再見,真心希望佢地他日可以有所進步