今日約左寶貝下午茶,見有新舖開張,緊係要支持一下~
心中已經好期待佢最出名的叉燒
去到舖頭冇乜客人,我地自己揀左個心儀的位置,
未坐好,服務員姐姐就係咁問我地要食咩,我地話等等先,佢就走左去...
睇睇餐牌,選擇唔多,有出名的燒味系列,同埋一D西式意粉,
一個餐的價錢要5,6十蚊...睇到我有D眼突~!
由於我地都餓了,所以點左個清清地的玉子魚柳同常餐,仲另點左例牌叉燒
常餐有雪菜肉絲米粉 滑蛋 牛油方包
雪菜肉絲米粉 - 湯底淡而無味~雪菜冇雪菜味,肉絲冇肉絲味..幸好米粉份量足夠~
滑蛋 睇個樣就知係存放左一段時間的出品,幸好入口出奇地有少少滑,只係仍冇乜溫度..
牛油方包入口好似係烘熱左再放左好耐的出品,冇溫度,牛油都唔溶到
玉子魚柳飯餐 - 諗住食得清清,所以先點佢, 點知佢的芡汁超濃超多超結,一D都唔清,食左少少頂唔順要用熱水沖沖佢先食得,豆腐同魚柳各三件,仲多左几件冬菇,喧賓奪主,令人失望的出品~!!
招牌叉燒 - 上枱時份量少得嚇左我地一跳~呢個價錢呢個份量的比例真係太唔合理~入口食落冇叉燒味得個咸字,色水又唔夠,主要係製作時間唔足夠,失望~
傾下講下,服務員姐姐問我地餐飲要乜野,睇睇餐牌的特飲冇乜好選擇,
最後餐飲我照舊點左杯熱檸水成今餐的句號
店舖本身冇洗手間設備~要解手的話就要去商場的洗手間...要行好遠啊~~陰公~一個人來用餐的話,就唔係咁方便了~!!
總括黎講..算係見識過佢的出品~可見的未來相信唔會再見,真心希望佢地他日可以有所進步

大年初5 ,原本相約好一班好紙美喺上水做邊青~做一年的好開始~
點知道上水的食店好多要到初七先開~即使啟動緊急機制~上網搵下邊到開~
好快就搵到呢間~
打電話訂始的時候,服務員話只得私人房,最底消費要$1500.
我地只有几個少吃的少女,呢個消費真係有點困難,再三磋商後,服務員降價到$1000
真係新年一個好開始~!!!
入到房未齊人~就睇住電視先~服務員小姐就三兩分鐘開門問一次要唔要落左湯底或叫住D飲品先,我地當然話遲D先LA...好快再過三几分鐘,門又開了....我心諗..想開年嗎?!
冇耐之後齊人了~我地點左個清湯底再加D火鍋配料~完服務員小姐一個心願,
食物真係好快一次過上枱...我地張枱仔即時迫爆,隨後的服務員一於好少理由繼續放野上枱,我地話放喺旁邊的小茶几就OK,佢地好似聽唔到咁,繼續放上枱,我地唯有自己放返落去,唉...邊到出錯了?!
手切本地肥牛(大) - 上枱個樣已經令人開心~擺得好有誠意之餘,牛肉本身筋肉分明,每件都係8成肉2成脂肪,一烚就即食~唔洗烚太耐~6,7成熟我個人已經覺得好OK!!點丁丁漿油更能帶出牛的香味,入口有種鮮嫩的感覺,唔會韌~好味道
安格斯牛脊(大) - 本地肥牛有好明顯的分別!!同樣上枱的擺設食人滿意~安格斯牛脊特別香,而且烚熟後有種入口即溶的感覺
白鱔片 - 上枱一望真係要講句好刀功~鱔片每件起双飛切得比想像中薄~夾起已經怕佢爛,烚熟後變得更細件~變得食入口冇乜口感,食唔出魚肉的味道~唔通師夫當仲係牛肉咁切?!有點失望
脆骨腩 - 骨腩本身份量唔算好大件~一烚卷埋一堆,要喺個鍋中搵返確係唔易~食落係有魚味,只係唔夠爽脆~
魚皮餃 - 相信係來貨料~所以唔會有咩要求, 烚熟後魚皮餃的皮仲可以保持到唔爛,而且感覺有點厚~中間的肉饀感覺有點喊..
炸魚皮 - 每片都大大件唔會太醉~而且快浸後入口仍會有爽脆的感覺~好唔錯~~
雜菌籃 - 4大菇都有~以金菇最多~其他雜菇的份量就少左D,而且切得好細件~要好有耐性先可以清得晒~!!
炸响玲 - 本以為係自家出品,點知係來貨品~即時唔會有咩要求~只求得住脆脆的水準~
清酒豬青肉 - 用清酒浸過的豬肉薄片,令豬肉有陣陣的酒香,烚熟後乜都唔洗點就咁放入口,仍可感受到豬肉同酒混埋一啖的味道~!新試食令人喜出望外~!
椒鹽鮮魷 (小食) - 真係睇唔出咁好食的小食~薄薄的炸漿,高油快炸,上枱又熱又脆又香,每件有半隻食指咁大件~一口一啖~等烚之前的最佳小食~!
店舖的洗手間設備叫做過得去~~女有三格,算係乾淨冇乜水積又唔算好寛落,米之連人入厠格時要攝埋一二邊先閂到門,感覺真不爽!!
一邊傾計一邊食真係一大樂事~!!包房的感覺真係好~有自己的空間,唔會有太多閒雜人打擾,更唔會太嘈,傾下講下都唔覺時間過~
總括黎講...算係個坐得舒服唔錯的KILL TIME 好地方~!!

PS:餐廳地址已由上水中心搬到龍琛路~我地三人喺龍琛路用餐
新年流流三更半夜做完社會服務見有少少餓,就同几個紙美一齊食少少野先返屋企休息~
行晒成條街都唔係咁多地方開門~路經此地見燈火通明,就決定喺呢到落腳~
眼見門面地方淺窄,我呢D米之連真係有少少郤步,但好紙美們二話不說就入左去了!
唔講唔知原來呢間有二樓雅坐...以為會闊落一D,點知都係...
OKOK...心諗住快快手手食完就走~~
一睇份餐牌~款式話多唔唔多~夜媽媽大家都唔想食咁重手~諗諗下,
紙美話想食咖哩豬,我地三個人分唔算好過份,所以點左份餐同兩個糖水
咖哩豬扒飯 - 好有味道的巴勒斯坦咖哩~食落有點點的洋蔥同蕃茄粒粒加埋咖哩汁入面,香得黎又有點口感,豬扒骨多過肉~炸起再煮,食落唔太硬,飯就真係差左少少~好爛~而且有點涼意~
腐竹蛋糖水 - 應該簡單到唔會有咩要求的甜品, 只係入口就覺得確係一碗糖水~ 真係太甜了~有少少''那喉''的感覺,加多兩轉水都沖唔啖~ 失望
双皮奶 - 傳說中的振店之寶~紙美話好有水準, 入口滑嘟嘟,唔會太甜而且好香奶味~三兩啖就KO左佢了~
烙神花茶 - 又一超甜之作~250CC的水加左一大匙的糖漿,甜到紙美喊咁口~冇烙神花的酸味之餘仲甜到令人唔想再飲...真係可惜..
新年流流舖頭只有兩個人招呼,所以好多時服務員都冇閒理會我地,呢D時候只好親力親為,
嗯...總括黎講..算係見識過佢的出品~可見的未來相信唔會再見,真心希望佢地他日可以有所進步
 

今日真係忙爆~做完一日野真係要急救一下個肚仔先~
時間唔多又唔熟路,只好同自己講見到乜野食乜野LA...新年前通街都係人~唔通要食人?!
就喺呢個時候,我眼前出現呢個好特別的小店...望望下有個外國人行出黎HI左我一野~
四目交投.見時間冇多~就決定入去一試~舖頭坐位唔多~十個以下~
我一個人放埋行李都坐左三個位了~哈~真係SORRY
好快咁決定好食乜野~落單後外籍老闆唔知聽唔聽到,冇咩回應就行左入廚房...
OK..我坐住等一陣~~冇耐餃子先上,食左一粒,飯都到了~
咖哩羊飯 - 好令人驚喜的羊, 那種羊羶味真係吸引死我了~我最中意食強烈羶味的羊肉~!!配合埋D咖哩汁!呢到D咖哩汁質地唔會係結身,我覺得有D浠TIM,勝在咖哩味濃郁.正~..飯就真係太多了~一時間唔記得叫佢少飯~!!幸好唔會煮得太爛~
鷄肉餃子 - 一眼望過去好似D好硬皮.用叉桔入去的確係好硬皮~ V_V 硬皮包住大約一湯匙的鷄肉饀, 鷄肉饀仲有豐富的肉汁~嘩...真係估佢唔到,睇佢個樣以為佢係又硬又涼,估唔到係熱到辣咀~~成件作品好意想不到,好難諗佢點整~睇外皮佢的乾身程度唔似係蒸,睇佢又唔似煎過,可能係焗掛~總之食落去感覺好得意~
平時我都唔會叫野飲~見佢枱頭有張奶昔的廣告,突然覺得今日咁好日子~
要特別少少~所以就同老闆講要返杯芒果奶昔,
老闆就好似頭先咁唔知佢聽唔聽到就行左入廚房,
一邊食一邊等,眼見老闆唔係整緊我的奶昔, OK LA..當佢聽唔到,我當冇叫過~
到差唔多食完埋單~佢先施施然咁放下芒果奶昔一杯~我真係O左咀... ~_~"
芒果奶昔好濃的芒果味~食落知佢係鮮整的~份量都唔細~一時間真係處理唔到佢~
可能我食飽左~最後我只好拎住杯香濃的奶昔揚長而去...
總括黎講..這個價錢的話,先放下自己的要求及幻想..結果就有意外驚喜!
目測店舖本身冇洗手間設備~要解手的話都唔知應該去邊到好...唔係地胆都唔識搵~!唯有忍耐一下,搵個好地方解手了

社會服務前,緊係要食自己心中最想食的食物~作馬年一個開心的總結
裝修後感覺上好耐冇黎呢到食野~今日回來了~
入到去睇起黎好似大左,但枱櫈多左又迫左,卡位又窄左,我有少少覺得去錯地方~
揀左一個闊落少少的位置坐,叫左個最心儀的米線
大麻辣秘製豬軟骨雲吞粉線
一上枱真係令我有少少灰,同過去比較真係失色好多
麻辣湯底可能要配合香港人口味,所以感覺只係微辣,客人要自己加麻辣,
填補舌頭上感覺的不足,
豬軟骨由過去的兩件大大舊縮減到而家的三小舊,睇落少了三份一~口感方面都失去左過去入口即化的軟棉感覺,雖然都係軟,要咬兩野,雲吞都細粒左,只有米線的份量保持到的水準,可見舖頭的成本控制做得好嚴謹!
一面食一邊諗住睇電視,點知全店只有一個位可以舒服咁睇...嗯..
總括黎講..算係見識過佢裝修後的出品~可見的未來相信唔會再見,真心希望佢地他日可以有所進步
店舖有蚊型洗手間供應,迫迫細細濕濕窄窄…所以米之連人可以的話都係忍耐一下,搵另一個更好的解手吧~!

今日約好寶貝傾心事~路經此地見開左間新店,緊係要支持一下LA!
下午茶時間居然可以冇客人,我地以為有落場~問過服務員小姐~佢話OK可以入
舖頭地方濶落,枱同枱之間唔算太迫,感覺相當舒服
我地揀左個邊埋少少的心儀位置坐底,志在沒乜人打擾~傾計方便
睇睇餐牌~感覺有趣,新開舖頭餐牌已經比客人睇到有點殘舊,好似睇過好多次
我地最中意試舖頭的推介同必食之選,咁就可以睇到舖頭的水準~
呢到D推介多數係熟食煲煲飯飯, ...下午茶我地唔想食咁飽~所以點左少少輕食
三文魚腩刺身及壽司 - 三文魚腩刺身咬落去好新鮮好香三文魚味而且好肥美, 而且結實有口感~~
以呢個價錢可以食到呢個出品有少少意外!
只可惜壽司飯真係令人失望~作為一間日式餐廳,好難容許有呢種出品~
冇醋香之餘且煮得太爛~入口感覺爛得黎又壓得太實,失去一粒粒的口感...
蟹子沙律 - 一睇落去真係嚇親~成份沙律主要係青瓜絲同蟹子,仲有一條蟹棒,
被嚇親重點係佢那團勁多的沙律漿~真係實在多到太誇張了~
唔知係咪沙律漿來貨太平,所以重手了~破壞左原是清清地的沙律了
芥末八爪魚小食 - 簡單又唔簡單的小食,芥末太重手的話,唔係人人受得住,
唔夠味的話又失去了咽喉的刺激,我個人的話比較中意重口味~呢間的出品相當適合我~
八爪魚入口涼涼地,加上芥末攻鼻的刺激感,再配合少少青菜,感覺唔錯
自家制蟹肉玉子 - 算係店中的推介之一...等左好耐先上枱,差少少唔記得自己有點單,
上枱時睇見外型包包的,几OK,外表睇落煎得唔會太老,可惜上枱已經唔熱,失去左蛋香,
可能放左好耐冇人拎出黎...V_V 一切開見到蛋卷入面有豐富的蟹棒絲撈埋少少生生地的蛋汁,
算係手工之作~如果有返D溫暖,成件出品會更出色~!可能''涼食''先係舖頭的特色
軍艦三味 - 等左好耐先上枱,相信係所謂的即點即做~所以要D''時間'',
壽司飯相信係同一水出品~一樣係咁差~
芥末八爪魚 蟹子 明太子三樣都係來貨品~唔會差得去邊~塊紫菜真係淋得令人失望,
又軟又淋又冇紫菜香味~整件出品都係令人失望
食野其間各服務員除左必要時會主動喺你面前出現之外,你相招攬佢都有一點難度~
最好係佢行過來的時候一次過講出所有要求,萬一走了就好難見返了
店舖本身冇洗手間設備~要解手的話就要去商場的洗手間...要行好遠啊~~陰公~
總括黎講...算係個坐得舒服唔錯的KILL TIME 好地方~!!

今日約定好同月同日生的好紙美一齊慶祝生日~
我負起買蛋糕的重責,心中己有心水~但都周圍睇睇~
路經此地~順便入去望望~一眼見到心中最愛 -> 法國歌劇院蛋糕 !!勁興奮!緊係唔會放過~
但為求無憾~我都壓制住高興的心情, 再行埋隔離的餅店先決定,
服務員哥哥好語重心長咁話呢款蛋糕今日只出一個~示意啱的話就要早少少決定~
最後我都係決定行多個圈先!
行左一個圈~仍係決定買呢個~返到櫃面服務員哥哥己轉左做姐姐,
我就問服務員姐姐講可唔可以喺蛋糕面用白朱古力寫祝福字句,我覺得咁寫會好型好靚...
服務員姐姐話可加一個朱古力牌寫少少字,加個牌要廿蚊~喺呢D開心日子~當然唔會計較~所以我就執起笔唻,寫下想寫的祝福語~
寫左次一次~服務員姐姐話太長,唔可以咁多~話最多加10個字左右,我即時滴晒汗,覺得10個字真係太少了~只係寫到兩個名同一句生日快樂都冇左啦~
之後微調左少少,服務員姐姐仲係話唔得~之後再刪減, 服務員姐姐好勉強咁話試下,
話要拎個蛋糕上去餅房搵師夫寫,叫我地喺對面的梳化坐廿分鐘~
我心諗...好在有張梳化...如果唔係都唔知點等~~
時間到~終於見到個蛋糕連生日牌~真係眼都大埋~~這就係等足廿分鐘的酒店出品???!!!!
我個人認為呢個出品完全冇誠意~母牛咁大個的牌~寫篇論文都得LA~而家喺咁E了左几個字~比我自己寫仲要差,而且仲要摭住左一大半個蛋糕...搞到一D美感都冇~ ~!好明顯無論係服務員姐姐同寫字的餅房師夫,一D都冇企喺客人的角度去做服務!!
既然如此.時間又冇多.我唯有收貨.仲要掩飾自己的失望向紙美表現興奮!
勉得破壞開心的生日飯~
飯後打開蛋糕!!滿心期待7層肥死超濃朱古力的歌劇院蛋糕~點知得5層咁少
食歌劇院蛋糕最好就係一叉由頭到尾,可以一次過食晒咁多層的質感..

一切開~最外層的朱古力漿真係令人又愛又恨~香濃之餘入口會貼著你的脷~要用點力先可以慢慢溶化~
可惜其他几層的層次唔係好突出,食落只係感受到兩層質地一樣的朱古力海棉蛋糕,
用一層冇咩咖啡味的普通海棉蛋糕隔住,到最底一層比較結實的的朱古力軟糕...
幸好各層的朱古力香得黎唔會太甜令人覺得''那喉'',至少可以令我有追食的衝動!!!
嗯~可能我自我覺得酒店出品的話,無論係心思定係服務都會有比較好的水準..
而家發現可能係我想多了~
總括黎講..算係見識過佢的出品~可見的未來相信唔會再見,真心希望佢地他日可以有所進步

今日社會服務後約好粉絲一齊食好D!喺條街到行左陣決定去呢間一試~
記憶中几年前黎過~感覺唔係太好~之後一直都冇吸引力再來~
今次就比個機會大家再見識一下了~
入到去可能仲早,所以一個客人都冇,我地冇訂位,
服務員就安排我地一行4人去一個好入的位置,
我地大袋細袋的~坐得好唔舒服,行李又冇地方放...
服務員見到之後就安排一個近門口的梳化位,可以放一下行裝
坐好之後我地就開始睇餐牌~小食頭盤甜品類選擇唔算好多~主要以牛扒為主,
如比喺上水的話價錢算係中級~我地決定點三個餐再加個薄餅,點知服務員今日冇薄餅
噢~我心諗...咁早就乜都冇...真係主要食扒?! OKOK...
最後我地只點左三個牛扒餐~牛扒分別係3,5,8成熟~我個人非常期待3成熟的牛扒~
跟餐的話仲有麵包餐湯同埋三文魚小沙律
麵包係來貨品~唔會有要求LA!但求佢暖暖地..點知食落係硬DOGDOG冷冰冰的~
服務員對成本控制好嚴謹,三個餐就比三個飽~相信都唔會有再添~!
是日餐湯: 粟米忌廉湯~湯上滴有少少忌廉花紋,睇落好高雅,飲落味道比想像中啖,唔係太濃,仲好有茶記FEEL
三文魚小沙律:煙三文魚配合埋清新沙律菜~加上少少橄欖油,相當開胃~
終於等到主菜上枱了~我心愛的重量級三成熟牛扒~
成份餐個樣睇落好堅,放得好精緻,感覺好興奮~點知一切開...我地一度以為佢比錯我地~
3成的話,我那份簡直係5成有多 ~其他粉絲的牛扒(5,8成熟)都比我地落單的''老成'' ,
咁好可能我地同大廚對成熟的尺度有點分別~
牛扒入口尚好還有新鮮的牛味,質地唔係太鬆軟,唔覺加左好多梳打粉去處理~

粉絲的芝士大蝦份量都唔係太大件,蝦身燒得太過火,蝦肉冇左口感之外仲有D硬,
上面的芝士都少得有點可憐
焗薯食落相信係烚熟左之後再放喺焗爐興到幹身再上枱,可惜入口已經唔熱,清淡冇咩味道,
隨餐有漿汁一小碗,食落似係燒汁,味道好淡,唔係好特別,可能諗住點出牛扒的味道,
我個人都係中意黑椒汁的惹味!!
我地滿以為呢個價錢的話,對所要求出品可以有點期望, 感覺有點失望~
這令我諗返起點解咁多年都唔會再幫襯的原因...

最後餐飲我照舊點左杯熱檸水成今餐的句號
總括黎講..算係見識過佢的出品~可見的未來相信唔會再見,真心希望佢地他日可以有所進步

今日約左寶貝喺呢頭見面~~佢話由我全權發板,咁真係太好了~即時去搵地方啦~~
喺呢個商場真係唔知去邊間好~有D舖頭一睇唔會有興趣試~
而得兩條友仔上高層的話試唔到多款式,唯有喺底層慢慢睇下~
去到3樓,諗住去間食東南亞野的地方,去到門口望望,
感到那服務員的不良好態度,就令我改變主意了~
最後見到呢間餐牌的甜品,再控制唔到自己~決定入去一試~!
喺門口望左陣都冇服務員黎招呼,唯有自己走入去搵位,
一行入餐廳,先有個服務員帶住,佢求其點左個位比我,
最後我冇理佢,自己揀左個心儀的位置坐
一邊睇餐牌諗緊食乜野甜品,寶貝終於黎了~我提議食招牌生果拿破崙,
寶貝話要先食主菜,甜品之後再決定~
我為左可以有空間食甜品,所以點了西冷扒薯菜
西冷扒(3成熟) - 西冷扒上抬感覺好弱,一D大火燒過的惹火感覺都冇,上枱只係有點微暖,幸好切開質感唔會太差,我點了三成熟,最後有點過火,但求佢唔會太熟透就已經足夠,入口咬落唔似落得太多梳打粉~留住有肉的咬口,切的時間都要用點力!保存到西冷扒的風味
薯菜 - 配菜真係令人有點失望~薯條係粗薯條,睇落好開心~但係一D都唔熱,上枱時已有點涼意,其他配菜都係,相信係炒過後放得太耐先上枱,入口有點蒜香但凍冰冰~
可能呢間餐廳的主打係食麵包甜品,所以喺西餐熱食方面的質素唔會太高~
下次真係唔敢試!!
期待好耐諗住點的甜品~寶貝話已經食唔落,所以決定擇日重賽..
店舖本身冇洗手間設備~要解手的話就要去商場的洗手間...要行好遠啊~~唉~~真陰公~

今日約左個好耐冇見的寶貝喺呢頭下午茶~
都未諗到食乜野就見到呢間餐廳的廣告牌,四目交投下就決定一試~!
下午茶時段餐廳冇咩人,服務員帶左我地去近窗邊的位置, 安排我地喺人群之間~
餐廳有點輕音樂,枱櫈拍得好密,米之連人的我都攝唔到去坐~唯有比寶貝坐埋邊~
左右都有客人,講野大聲少少都會比人聽到, 感覺即時有點焗束..
我地大袋細袋,加上地方淺窄,服務員又冇打算幫忙..我地整理左好耐先坐得安樂~
一睇睇餐廳,有散點有套餐,我地決定叫個tea set 另再加份燒鵝肝~正呀~!!
tea set 有湯有意粉有份薄餅
點菜後餐湯同面包好快一次過上~枱面好細,簡直冇位放,兩邊的枱又有人,
冇機會拍枱~服務員繼續上菜,見唔夠位居然叫我地快D食晒D餐包...好比佢收起個包籃...
一向我覺得只有喺茶記先有呢種做法~原來法式茶記都有~哈哈!
牛尾忌廉湯 - 所謂牛尾忌廉湯, 一心諗住會有少少牛肉的紅色,點知睇落異常雪白,上面加點點香草點綴,同一般忌廉湯冇分別 ~入口要用心感受先可以感受到少少肉味~一D都唔特別~有點失望
三文魚雜菌意粉 - 自選意粉材料,可素可肉,上枱整體感覺好豐富,唔會得零星粹粒~意粉食落好有口感,唔會占埋一堆,且軟硬適中~用帶點辣味的橄欖油炒過~好惹味開胃~好味道~
燒茄子牛肉漿薄餅 - 積架餅干底真係估佢唔到~可能呢D係法國既特色LA!...餅底上面舖左配料再拎去焗一陣, 入口肉漿帶仲有少少香辣感覺!芝士味重而且出奇地多(雖然舖得一D都唔平均,有D地方冇咩芝士...)~拉開仲有一絲絲的感覺~勁興奮!!
法式燒鵝肝 - 寶貝同我的至愛~但因飲食要節制,所以只點一份兩人分~!!上枱聞到陣陣的鵝肝味~已經叫人垂涎三尺..一睇比餐牌張相薄切左5分1,心中緊係有點失望,但呢個厚度尚可接受,落食不失那香煎至外脆內軟,入口即容的香軟感覺~配合埋少少生果,減輕肥膩感~!真係食到停唔到口呢~
一邊傾計一邊食~真係一大樂事~服務員除左堆食物喺枱面之外,佢地的清理動作都好快手~我的刀叉都未放好,佢地已經有人黎清枱了...我心諗...真係要咁急嘛??等佢地清理左之後,我地繼續吹水,之後再冇服務員過黎提供服務,(包括加水)後來我地先記得未點餐飲,我地問服務員餐飲有乜野揀,心中以為喺法國餐廳唔多唔少都會有D特色飲品,估唔到外籍的服務員同我地講coffee or tea and lemon tea ...
最後我照舊點左杯熱檸水成今餐的句號,可惜檸檬勁苦~真係好唔新鮮~ V_V
寶貝點左熱咖啡,同樣唔係出色之作~佢話仲差過茶餐廳...噢~令人失望
總括黎講..算係見識過佢的出品~可見的未來相信唔會再見,真心希望佢地他日可以有所進步
店舖本身冇洗手間設備~要解手的話就要去商場的洗手間...要行好遠啊~~唉~~真陰公~