西灣安記 (新馬路)

以前要數好食O既, 我一定會推介西灣安記O既「蟹子豬扒包」, 但係...佢依家...已經退步到...我唔會再返去食。

蟹子豬扒包最緊要脆, 但係佢依家d 包稔到不得了...豬扒個粉好厚, 厚得o黎無味; 蟹籽仲要有陣腥味。價錢就進步左好多喇, 由$12加到依家差不多$20個; 但係食物質素呢...香港是但一間茶餐廳都好過佢呀。

最令人憤怒o既係佢o既服務態度!!! 超惡劣!!! 無禮貌, d位又迫, 一食完就趕你走。畀水攞o野都係掟畀你。呢方面, 我相信香港任何一間MK茶室都會做得比佢地好。

唉~~ 要知道, 水能覆舟, 亦能載舟。你紅, 係因為有人O黎食, 畀錢你使, 你先紅到; 到你依家紅到目中無客, 將來? 難講喇。

澳門大利來記豬扒包 (氹仔舊城區)

人人O黎呢度都係食包, SORRY, 我唔係, 因為我知佢D包唔好食 工作關係, 而我經常都會去澳門講飲講食, 所以今次O黎呢度, 只係因為當日晨咁早肚餓, 無乜餐廳早開, 所以是但食個粉頂頂肚。

由於一早就知呢度D 包唔得, 所以唔食包, 亦唔食豬扒, 改食個米粉, 諗住穩陣, 結果...係穩陣O既, 食完會飽, 係滿足左人類O既基本需要, 不過高層次少少O既就唔得喇。

D魷魚呢...無味架....勝在夠多...不過唔好食....而且有「骨」...哈哈....大家食O既時候要小心, 記得去「骨」呀! 雖然係透明, 不過勁硬架, 唔好咬!

咖啡...不過不失啦.....有點像奶水...

如果真係為個包而O黎..就算喇....為食飽而O黎都可以O既..不過唔好有期待。

萊茵咖啡 (下環)

又係因為拍攝旅遊飲食節目「澳門諸事喱」, 而被帶到呢個餐廳。當日係去佢對面O既帆船餐廳拍攝, o係開機之前, 一CREW 人走O黎呢度食早餐。

三年後, 偶然O既機會下, 又無啦啦返左O黎呢度。

萊茵O既咖啡做得非常之出色, 比起大品牌O既出品更出色。

出色作:煙鴨胸蕃茄通粉, 茄味濃, 鴨胸非常好食...而且勁大碗!

豬扒包加左青瓜同芥辣, 多重層次, 而且個包烘到非常非常之脆, 誠意之作。

環境係一般CAFE 格局, 得幾張檯仔, 勝在食物出色; 當出面曬到你傻O既時候, 入到去飲個咖啡食個包, 再熱都已經唔再關你事~~! 寫意~~~

新武二廣潮福粉麵食館 (宋玉生廣場(皇朝))

要食好嘢唔一定要貴, 平嘢都有令你回味無窮嘅能力。

呢個蠔仔米粉, 我第一次同佢相遇, 係3年前, 拍攝飲食節目「澳門諸事喱」時, 喺佢間離嗰間「彿笑樓2」等開鏡, 於是, 襯有空檔即去隔離食個LUNCH。

雖然只係十幾蚊, 不過D 蠔仔勁肥, 勁大隻, 而且非常鮮甜, 加埋湯底好味得嚟唔味精, 仲有炸蒜香, 香蔥同冬菜, 未食已經香味撲鼻。

如果係嗜辣嘅朋友, 就更加會愛上呢度嘅醃酸青尖椒。佢好酸, 好鬼酸, 不過佢亦好辣, 勁鬼辣。當2種味撞埋一齊, 哇~~~ 正呀!!! 你食過就會明白有幾好。

食尖椒時由個尖尖咬落去, 然後啜一下D 汁, 勁辣到舌尖有點發麻, 同時又有非常惹味嘅醋酸味, 口水直流...好正呀!

工作過後, 我一直都記住呢碗粉~~ 往後3年, 每次無論在公在私, 去到澳門我都一定會去呢度再食一次。識去嘅人唔多, 只有澳門人識去, 遊客只會當佢係流嘢, 但識食嘅就會當佢係寶~!

有機會就去試吓啦~~好嘢嚟架~~

最好下午3點左右去, 一來份量細細可以當TEA食; 二來太早去到無蠔仔賣, 中午時間超多學生同上班族去, 所以都係3點後去最好。