忙碌完一個星期，到星期五晚當然朋友出嚟開心吓。今次我哋揀咗去尖沙咀嘅食Tapas! 之前同事有介紹過話Happy Hour好正， 好多小食同cocktails，氣氛好、環境仲好chill。

雖然我同朋友今日冇order 酒，不過佢哋嘅主菜Menu都好多選擇，有Tacos、 Burritos、Nachos 同 Fajitas都有！

我地兩個人點咗 Ceviche (Tuna) - 一個非常精緻嘅前菜，賣相和味道都相當唔錯。檸汁醃吞拿魚伴厄瓜多爾醬。吞拿魚夠新鮮、酸酸甜甜嘅醬汁令人胃口大開，推！

Chipotle Chicken Tacos 軟身Taco帶着煙韌口感加上墨西哥chipotle味道很獨特，混入孜然粉，令味道更豐富。

食墨西哥嘢點少得Nachos這個墨西哥風味的特色小食，粟米脆片吃起來很香脆配上guacamole牛油果醬清新美味，兩者非常之夾

Pork Fajitas鐵板上枱，熱辣辣夠晒鍋氣！還配有墨西哥餅加三款不同口味的醬汁一起吃！豬肉夠入味，夾埋三色椒、洋蔥，sour cream同guacamole口感味道都超豐富，除咗豬、仲可以選擇牛、魚、雞、雜菜也可以，必點之選。

在香港，比較少機會食瑞典嘅菜式，最熟悉嘅瑞典菜式就係去宜X傢俬食品部 但估唔到今日經過西營盤第一街，見到一間好有聖誕氣氛嘅瑞典Cafe，最吸引嘅係佢地有戶外座位，可以同毛孩一齊慢慢嘆 店內除咗嘢食之外，其實仲有好多小精品可供購買，室內以藍白色裝修為主，感覺簡潔舒服 收銀旁邊嘅櫥櫃放滿麵包同甜點，真係好吸引呀！最後揀咗一個All day Breakfast因為發現佢入邊都幾乎包含晒餐牌入邊嘅食物，可以一次過滿足晒所有願望 最好味嘅我就覺得係薯蓉配肉丸，薯蓉夠香滑。整體份量都算幾大，兩個人食完都好滿足 之後點少得甜品，叫咗一個Baby Pancakes，加買個開心果雪糕，今次仲唔係大滿足 適逢聖誕節，店員為食物都添加上聖誕氣氛，好特別！打卡一流呀！仲唔快啲嚟！ 飲品就叫咗個Fika’s Dream 同 Flat White ，Fika’s Dream賣相真係靚，顏色好搶眼，飲落仲好解渴，酸酸甜甜 Let's go and fika!

平時食潮州菜都係諗到打冷、大排檔。但係原來宜家嘅潮州菜都可以好「潮」 今日朋友帶路去咗銅鑼灣The L Square - 「鬼滷」，好彩朋友有book定位，如果唔係分分鐘要等位。餐廳感覺好cozy，雖然座位唔多，但都唔會覺得好擠迫 店員一嚟到已經送上餐前小食爆谷，真係好潮呀！ 小食嗌咗個韭菜鴨血，鴨血口感較滑嫩，味道香辣惹味，食完這道前菜，我的胃口立即瞬間大開 食潮州嘢又點少得蠔仔粥，二人份量，每人都分到二大碗，其實份量多到足夠三四人都冇問題 蠔仔粥味道很好，鮮甜新鮮，唔會太鹹，綿密細滑，粒粒肥大飽滿的蠔仔，好足料，再加埋香蔥及菜莆，更加好味 滷水拼盤叫了五選份， 滷水鵝片、滷水鵝、豬仔髀、墨魚同豬肚， 拼盤上枱時仲有蠟燭保溫真係好貼心，滷水賣相亦都十分吸引 滷水鵝片皮薄肉嫩，而滷水鵝肉厚味道香濃，墨魚同豬肚都爽口彈牙，平時少見嘅豬仔脾都夠晒入味，連平平無奇嘅豆腐都夠嫩滑

講到日本名物，又點會少得天婦羅！但要做出一份出色嘅天婦羅並唔簡單，要夠香脆、不可過油、炸得恰到好處 想食好味嘅天婦羅並唔需要去到日本咁遠嘅，去灣仔利東街就已經食到喇！ 來自日本嘅金子半之助，唔單止係日本人氣過江龍咁簡單，仲連續7屈榮獲日本全國天丼金賞，而係東京日本橋本店總是大排長龍，今次來到香港分店，吃飯時間都要排一陣隊，等大約15分鐘很快就安排入座，店員先奉上黑豆茶、熱呼呼的很好喝 雖然餐牌上選擇只有天丼、上天丼、江戶前天丼、特選天丼…. 但已經足以令我覺得有選擇困難症 最後揀咗店員推介嘅特選車海老帆立貝天丼和軟殼蟹天丼。天丼上桌時真的令我眼前一亮，炸物堆得滿滿的、份量十足！ 配料很豐富有車海老、帆立貝、小柱魷魚天婦羅餅、莢豌豆、海苔和半熟蛋，吃得出食材新鮮帆立貝炸得外脆內軟，有口感 天丼set還附有味噌湯和漬物，真係十分豐富
 而軟殼蟹天丼就一樣有咁多配料，除咗軟殼蟹仲有海老、小柱魷魚天婦羅餅、莢豌豆、海苔和半熟蛋 每一種炸物都很好吃的，再淋上美味的秘製醬汁，甘甜的味道配上日本米飯，真係吃唔停口！

Happy hour除咗隊啤酒同食吓花生，嗰日喺銅鑼灣俾我搵到一種新玩法，就係一個價錢任飲清酒，仲要有居酒屋menu，飲得又食得，真係忍唔住要講吓！ 話說地點就喺總統戲院對面嗰幢商業大廈，一搭扶手電梯上去原來係有靚仔食肆嘅。好快就俾大大隻，投射喺頭頂嘅「昼月」兩個字吸引到，仲發現佢竟然只係$298，2小時任飲清酒，實在吸引，即刻入去坐低！ 呢段日子去親屋酒屋，都要叫薯條食吓。打開menu見到佢有松露薯條，點都要試吓啦！熱辣辣上枱，配埋絕不吝嗇嘅松露醬，佐酒一流呀！為咗感覺無咁熱氣，都叫咗個蟹子沙律，大大碟，好味吖！ 雖然話清酒任飲係一大賣點，但係佢menu其實都好豐富，除咗前菜，仲有壽司、串燒、飯、天婦羅等等乜都有 本身我見到好多人叫一個豚肉蛋飯，雖然佢的確好IG-able但因為好想食魚生嗰啲，所以叫個壽司十貫，魚生種類都好多，拖羅同海膽都有，絕不欺場。壽司食開有條癮，叫埋炸蝦卷，香脆惹味 飲酒都總係要夾啲煎炸嘢食，所以索性叫埋大蝦天婦羅，蝦夠哂大隻，今餐正宗飲飽食醉喇！另一賣點係坐得舒服，店員完全冇限時間吹你走

人來人往嘅觀塘，想搵間企理又好味嘅餐廳晚飯，其實都唔易。仲要值得encore嘅，就更加難能可貴。但，又竟然俾我搵到一間喎，佢就係喇NATA喇！ 自從上次嚟過晚餐，試過free flow dinner set之後，一直都想再嚟，咁啱又約咗人放工後食好西，想舒服坐低食個好啲嘅晚飯，第一時間就諗到要嚟呢度。 encore-able 嘅，除咗呢度嘅氣氛，仲有呢個包⋯⋯你唔好睇佢只係一碟包，送上枱仲係熱辣辣，食落又香又鬆軟，加埋Feta芝士，講真如果唔係要留肚食正餐，真係可以再追加。 除咗包，亦叫咗個磨菇湯。開頭有一吓以為叫錯咗杯cappuccino，但其他係一杯有foam嘅湯嚟。都幾滑，同埋菇味濃，唔錯。 嚟得encore，梗係必點肉肉大餐做主菜～今次叫咗Grilled Spanish Pork Loin同埋 Butter Roasted 黃油雞。呢度啲肉食嘅特點，係會將肉放喺一塊鐵板上面，底下就放兩個蠟燭㷫住，咁邊慢慢食邊傾偈都唔駛驚啲肉會凍哂。平時出街食飯好怕叫啲豬扒類嘅菜色，怕啲肉煮到好韌，呢度嘅燒豬肉就絕對無呢個問題喇，燒得香之餘又不失嫩滑，加埋個chimichurri醬，令人食到舐脷。 至於個雞都好正。同豬一樣，肉質都係好嫩滑，而雞仲多咗一陣油香，愈食愈想食！ 本身都已經飽飽哋，但見到個甜品menu都好吸引，忍唔住都係叫埋個抺茶Milk Mochi疏乎厘！超香濃嘅抺茶cream，配埋甜滑嘅疏乎厘，頂頭仲有煙韌嘅MOCHI包住啲紅豆，淋埋啲黑糖漿喺面，成件事豐富得嚟又好夾，大滿足！

北角和富道唔知幾時開始變咗食街，新餐廳都成日出現，呢排行過見到一間新嘅café開咗，咁啱想搵個企理舒服嘅地方食晚飯，傾吓偈，順便試新嘢。 打開MENU，原來仲有好多走意式風格嘅嘢食，pasta, pizza唔在講，risotto竟然都有幾款。見佢pasta方面，標榜係自家製，用意大利麵粉同鹿兒島雞蛋每日新鮮製作，咁梗係要試吓。 叫咗個黑虎蝦蘆筍法式濃汁意粉，賣相好吸引，麵條同平時嗰啲唔同，特別有咬口同香，加埋掛哂喺上面嘅濃汁，好惹味。 平時意大利飯唔係茄底紅汁就係忌廉底白汁，今次黒汁- 墨魚汁帶子意大利飯，個樣固然夠特別，食落仲有墨魚嘅鮮味，絕對唔係係咁二整黑啲飯就算，夠哂誠意。 飲品方面，除咗咖啡之外，仲有各種唔同嘅茶，啲茶啲名都好盞鬼，我哋分別叫咗洛神花加Berries嘅花弗姨丈，柚子加烏龍嘅烏龍媽咪。啲茶嘅新穎材料組合都俾到人清新嘅感覺、茶具都好靚。 小食必推黑松露薯條，好吃、真的好吃！看似平平無奇，但薯條係新鮮炸起、外脆內軟、真係忍唔住親佢熱辣辣嘅時候一條一條食唔停口，如果松露醬份量多啲就真係滿分💯啦！ 食到咁上下，見今日推介黑板上甜點，有一個叫Tiramisu Churros版本，真係好想知道佢係究竟乜東東。上枱之後發現佢係用Churros代替咗平時浸到林晒嘅手指餅、加上十分柔滑Tiramisu cream、配埋十分香濃嘅Expresso，三樣嘢分開自行配搭，真係好特別，就算食到好飽都絕對值得一試！

呢幾年疫情都冇好好地咁同朋友出去食飯，宜家放開曬心情咁就當然要去慶祝下啦！一直bookmark 咗呢間 Good Day Bad Day!

睇到個名都覺得好特別，餐廳裝潢設計都好搞笑好有藝術氣氛，超多打卡位，坐位都好舒服，真係啱晒約會，可以慢慢坐慢慢食。


餐廳以西式餐飲為主，餐牌上有好多搞鬼嘅菜式名字，睇Menu都睇得好開心！


今日係補祝朋友仔嘅生日，一於就食豪D！叫咗個瑞士名物芝士火鍋，必推之選。一上枱已經心心眼一鍋濃郁芝士加，加上大大塊牛扒沾來吃真係好浮誇下！另外配上大蝦、脆卜卜嘅麵包、薯仔、西蘭花，真係好有份量呀！啱晒呢幾日凍凍地，食完成個身暖笠笠，好幸福
沙律菜我地點咗海洋生物沙律，聽到個名都知道唔簡單，估唔到有驚喜，沙律顏色鮮明，真係令人食慾大增。帶子同蝦有煎炸過，外脆內軟好香口，呢個前菜真係夠晒醒胃！

既然食得咁開心，當然要叫返個好日梗係芝士龍蝦意粉賀一賀佢啦，大大隻超級肥美嘅龍蝦，賣相別緻夠派頭未食睇見到超興奮啦，食落仲好creamy, 龍蝦啖啖肉好彈牙！讓人食個翻尋味！

呢度嘅飲品都好有創意，非一般一般檸檬果皮烏龍茶沙冰，真係有果皮味，味道出奇地夾，真係香港先會有得飲！唔想飲凍野，可以揀自製山楂果肉玫瑰花菜、酸酸甜甜好好味！

其實真係好想食埋甜品，但實在太飽了，留返下次再試啦！
無論Good Day 定 Bad Day, 能夠於繁忙生活中和朋友一起品嚐美食，也是生活中的小確幸了！

有時諗晚餐食乜嘢都諗到頭痛，除咗粥粉麵飯，突然靈機一觸上次經過Villa Villa Burger一直都未有機會試，今日晚餐試下先！ 之前都食過Villa Villa北角西餐廳，已經好有水準。 Villa Villa Burger位於太古坊附近海光街，好容易找到，主要做take away，店外有張枱可立食，好方便！ Menu 上Burger有4款不同，不多不小，剛剛好！仲有期間限定，可以參考返貼出嘅告示！ 唔食牛嘅朋友唔洗怕，我要推介返呢度嘅西檸雞堡同手打蝦餅漢堡。 首先講下個黑媽媽嘅包，原來係自家製墨魚汁麵包，好香牛油味，煎得十分香脆軟熟，唔會浸淋淋咁 西檸雞叫兩餸飯就食得多，變做漢堡包真係第一次試。咬落去甜甜酸酸咁好開胃。同埋鍾意佢唔會好似一般啲雞堡咁炸得咁勁，外脆內Juicy!! 好吃！ 手打蝦餅漢堡，呢個真係推！因為係辣辣地，配上泰式海鮮醬，味道真係好夾，食唔停口！蝦餅好有份量，口感十足呀！ 兩個包加$20都可以轉做套餐，有薯條加飲品。薯條仲要係我最鍾意嘅波浪薯條，即叫即炸，真係好香口。另一個餐改為炸蕃薯條，外脆內Q Q，甜甜地好香軟！ 再加小食椰菜沙律，見到店員用心製作，用材新鮮，只需$35但份量足夠2-3人分享！ 如果大家都想食有質素嘅Burger，不妨試試！店員同廚師都十分Nice，有問必答！所有食物即叫即整，仲可以叫店員幫手將麵包一開二，方便同朋友仔開心share如果Menu能加impossible meat或素食包款應該都會好吸引！期待下次再嚟過！

夜晚想搵個地方食飯chill下飲杯嘢，朋友就推介位於鰂魚涌嘅Flames! 宜家天氣涼涼地，坐室外真係啱晒，原來夜晚呢度都好有氣氛。 坐低當然就梗係叫番杯draft beer先啦！ 啤酒口感新鮮清爽、夠晒冰凍，放工嘆一嘆真係人生樂事 Ceasar Salad，新鮮爽脆嘅羅馬生菜配上烤雞好醒胃，一個簡單的沙律，味道卻是出乎意料的好 我同朋友一人叫咗一份半雞餐 一份Mixed Herbs 炭燒雞，一上枱已經聞到陣陣香草味，烤雞烤得剛剛好，外脆內軟，肉汁鮮嫩多汁 配上黑松露薯條，份量超大，薯條即叫即炸，入口熱辣辣，真係食唔停口呀！ 另一份Peri Peri香辣燒雞，香噴噴嘅Peri Peri味，聞到已經覺得好惹味，辣味剛剛好，吃起來味道豐富，越吃越惹味！