飯堂巡禮 - 北角道

自從搬到北角區以後，每個月總有數次來這裡吃飯。

為什麽會來？ 一來，它們開得比較晚。二來，味道真的不錯。因為已經來過很多次，所以想寫寫我覺得好吃的菜式

有什麼好吃？
－吃得辣的，可以試試水煮大魚
－我最愛吃他們的拍青瓜，蒜/鹽/麻油比例剛好
－蔥爆羊肉：蔥吸了羊肉的精華，食完包你聰明伶俐
－午市：麻辣雞絲撈冷麵

題外話：
阿叔林尚義未去之前， 通常多會在小辣椒見到他。到小辣椒吃飯， 有時都會想起他。

對我來説，由港式茶餐廳改裝而成的翠華， 本來就跟以前沒太大分別。

最大的得著應該，算是門口那麵包檔 - 因爲有新鮮熱辣的麵包供應！ 一直希望中環翠華跟銅鑼灣翠華一樣可以賣熱麵包，現在得賞所願！！

那， 先來一個麵包巡禮吧！

第一位：紅豆菠蘿包
菠蘿皮夠鬆化，紅豆餡甜度剛好。推介！

第二位：奶黃墨西哥
跟紅豆菠蘿包一樣，皮夠鬆化， 奶黃不會太甜， 入口燙嘴。 在冷冷的街頭細吃，正！推！

第三位：提子麥包
比其他港式麵包店相比， 五元一個好像貴了一點！ 但熱辣辣的包又加一點分噢

第四位：咸餐包
無乜特別，都係要五元一個！但夠鬆軟

整體而言，熱麵包真係會加分的。 唯一要彈的就是麵包底太多油。 有待改善。

其他的包， 試完再寫！

十一月六日
星期五

周初剪頭髮o個時，偶然看到一篇鱔稿 - 響炮台山有間新開o既台灣菜。

當時想法：
1. 新店位於炮台山，而該區通常無乜新食店 (係開，都看響天后或北角啦)
2. 港島o既台灣菜， 通常都係台式飲品或快餐形式。 台式館子比較少。

阿Mo一路都頗喜歡台灣菜，所以星期五收工便打算同阿Mo試一試。

點知， 係一個錯o既決定...

一座低，已覺得有一陣煙味。 莫非樓上Neway可以食煙, 而中央空調有問題?!

看餐牌， 台式 - 一頁，客家 - 一頁，好似仲見到燒鰻魚。我以爲去o左茶餐廳...

我地叫o左四小碟，拍青瓜，炒海瓜子同粉蒸肉

四小碟已經港化， 味道偏甜 - 滷豬耳，一碟唔知咩絲，薰蹄及辣雞腳。
拍青瓜好似無乜拍過， 蒜味唔夠
炒海瓜子係比較好o既一道菜。 亦遍甜
粉蒸肉最離譜 - 一上檯， 我仲以爲塊荷葉響地下執番上o黎 - 有o的似一舊鹹菜。塊荷葉仲乾過把葵扇！一打開，弊 - o的粉一舊舊o既? 阿Mo夾o左一舊， 大鑊！ o的肉仲未熟！豬流感呀大佬！！ 我o地即刻退都退唔切...

埋單個時， 張單仲未取消個粉蒸肉。個侍應好唔情願先至改單.

阿Mo總結："差。差。差。。。"

以後唔會再去。

每星期六早上送完阿仔去興趣班之後，便要搵地方食早餐。

天后區早餐的選擇， 話多唔多， 話少又唔少。

要食ABC餐的話， 電氣道兩旁都有選擇 - 新釗記，榮發等都有一定捧場客。 想要杯好o的o既奶茶，祥發應該係首選，但早餐就只得獨孤兩味。 要食西式的話，Pumpernickel應該會係你o既選擇，鬼佬餐廳價。

不過，如果你又唔想食ABC餐，有唔想食鬼佬西式的話， 仲有咩揀?

我今日就試o左泉和o既皮蛋芫茜腸粉配白粥。

皮蛋芫茜腸粉？！

平時食皮蛋XX粥， o的皮蛋多數無乜味。 皮蛋芫茜腸粉就解決o左o黎個問題, 因爲一個比較濃味o既腸粉，同白粥就其實好夾。

我覺得出奇地好味喔！

響天后想食粥的話，應該試試

好耐之前
o個陣時仲未搬入元朗
阿Mo已經帶我飲過佢地o的凍奶茶
好夠茶味

依家搬o左入o黎
有機會就行去歎杯茶
不過, 依家儘量少飲凍野啦, 中醫話, 對身體唔好...

但係佢地杯熱奶茶應該係元朗第一, 或者係新界第一

從Kenny口中聽過o黎間蛇竇
聽講豬扒好好味
今日終於有機會試吓

叫o左個豬扒蛋米同熱鴛鴦
豬扒好腍,好入味. 應該係炸o左再浸響汁入面
熱鴛鴦咖啡味唔會太強

好食過蘭芳園. 正!

事先聲明
食完車仔麵去o左喜利買林狗隻DVD
所以先套用可愛教主語言
敬請留意

都係響openrice先知道永年士多個大名..'近'搞笑
永年都到好鬼多人排隊..超低能
第一次去是在元朗運動場練完跑之後.
o的車仔麵好鬼辣..超低能
之後常常想帶阿MO去食（因爲佢食得好辣..勁搞笑)
上個禮拜揸車去到
見條龍唔係好長
終於同到佢去

我地叫o左
豬皮- 夠爽
豬腸- 超好味
魚蛋- 有咬頭
蘿蔔- 無渣
但係就無豬紅..超低能
上次食過牛根同豬紅, 都唔錯

辣汁好味但真係好鬼辣.超低能
眼水鼻水都出晒o黎.勁搞笑

阿Mo話辣汁落左好多咖哩粉
頂唔住
...
勁搞笑!!!!!!!!!

我諗自從搬o左入元朗之後, 大大話話都食過La Crepe 三次. 作為一間班戟專門店, La Crepe選在元朗開業昰勇氣可嘉的. 始終香港的班戟不太普及吧..

最近一次我在La Crepe食過:
卡夫片片芝士+罐頭蘑菇+Pizza腸班戟

店員把預先準備好的麵粉漿倒到圓形的熱力板上
然後用他們熟悉的手法把麵粉漿推開
待配料加上, 等一會兒已經可以包起

班戟皮質感昰可取的, 但用料可以再改進一點. 還有, 收到時覺得班戟只有微暖, 不昰熱哄哄的

記得在澳洲的時候, 在東園shopping centre 的food court 都可以食到可口的crepe. 他們有一台專造crepe的機器, 有點像工廠的輸送帶一樣吧. 麵粉漿從漏斗留到一條有熱力的輸送帶. 配料被加上, 待班戟傳到輸送帶的終點, 熟手的店員便會把整條班戟拿下再立即包好. 收到的時候班戟環視熱燙燙的! 很好食

十一月二十四日
星期五

想試Giovanni好耐, 但每次阿Mo都反對, 覺得個格似豉油西餐

今日真的試過, 阿Mo是那麼的對..

裝修舊, 天花板吊左好多酒樽響頂, 唔知做乜..
牆邊竟然用浴室磁磚裝飾..

食物方面
洋蔥湯似牛精加雞精湯
意大利飯, 除o左係用意大利米之外, 味道似雞精煮飯加少少cream
拿玻里薄餅正常少少, 但係個底唔知點解好濕

匆匆食完, 過B仔再食過

十一月二十一日
星期二

中午要去上環扮點事, 先在Openrice找找有無好o野食. 找到一間叫Soland的素食店有好高的評價, 便去試試看

好在得網友提點, 如果唔係一定揾唔到Soland

入到去, 個場唔係好大(400呎左右呱?)
6 張檯, 24個位
菜牌係set定的, 但你可以揀配汁, 同要唔要餐湯, 飲品, 甜品

先來個忌廉菠菜湯. 好香迷迭香味

個飯我揀左蕃茄紅菜頭汁

香茜節瓜英嘴豆- 好香芫茜味, 似泰式沙律
有機豆干南瓜- 好mouth-full, 好rich
蜜糖豆羅勒薯醬- 好creamy的醬, 充滿basil香味
紅腰豆地瓜粒蝴蝶粉
有機黑野米糙飯

我味覺好耐都未試過咁多沖激
從沒食過咁有口感又咁好味o既素食, 覺得好感動.

另外, 聽侍應姐姐推介, 試o左香蕉蛋糕
侍應姐姐話個蛋糕其實無旦無奶做
一試過, 亦覺得個蛋糕好有質感. 中間有紅豆, 同一層鮮香蕉肉
侍應姐姐話佢地落o左好多果仁, 所以食落好香口, 有果仁味
同印度奶茶(Masala tea) 都好夾

原來有堅持的話, 素食都可以咁好食

Soland 的堅持:
無煎無炸無炒絕不用微波加熱食物
無五辛無旦無奶無惰性菇類無素肉
少油少糖(黃糖) 少鹽(粗鹽)
以有機籽為生機飲食自培各種豆芽
所有食物以天然蔬果菜香草調製
以秘製醬汁為例以天然蔬果自製
用以蘊含豐富營養的薯仔南瓜芋頭番薯牛油果等等...做醬汁
香滑而不含油份