銅鑼灣行行吓街，本身都有啲肚餓再加上有個姐姐係正餐廳樓下派傳單，見有優惠一於上去試吓，上到去原來地方好寬敞，仲有卡位，但最估唔到嘅就係食雞煲、烤魚嘅餐廳，$198一隻焗蒜蓉龍蝦本來都冇乜期望，但一枱見到賣相已經好吸引，食入口竟然咁好味，真係超級好食，超彈牙，非常驚喜，正😋 我哋兩個人叫咗半隻雞煲，點咗兩條串燒同埋燒蒜蓉粟米。雞煲會即時炒，香氣撲鼻，叫咗小辣但我覺得唔夠辣（下次要點中辣）但係雞就相當嫩滑。 因為點都要有啲澱粉質落肚，所以見到魚翅撈飯只係$68 ，咁抵食，點都要試吓，上枱仲係滾熱辣，好濃味仲有唔少魚翅，真係好抵食。朋友仲話難得有一碗細嘅酸菜魚可以叫，雖然一人份量但魚塊好多，而且味道酸酸辣辣非常開胃，今餐真係超滿足，估唔到做咗咁多嘢竟然食得晒，證明真係好好味。

又係來開荔枝角開會嘅日子，雖然自己一個人食lunch，但係都想開部電腦靜靜地做吓嘢食吓嘢，呢邊嘅同事介紹咗呢間樓上嘅Cafe，估唔到工業大廈入邊有一間感覺咁清新嘅Cafe，全間餐廳白色裝修，一入去就已經覺得好舒服。 一坐低未諗到食乜，先來杯Cappuccino醒吓神，一送上嚟嘅時候見到咁靚嘅拉花，真係忍唔住打吓卡影多兩張相，味道亦都好濃郁，咖啡味夠香。 叫咗個蟹肉牛油果沙律加咗三文魚，食沙律我覺得最緊要係醬汁，呢度醬汁好多，食落酸酸甜甜特別開胃，沙律非常多配料，超多蟹肉，牛油果完整嘅半個，三文魚做到成朵花咁，好睇又好食。 估唔到西式Cafe可以食到中式嘅嘢，呢個鹹蛋黃雞翼非常有驚喜，超級多鹹蛋黃，入口脆卜卜，味道鹹鹹香香，雞亦好嫩滑仲要係新鮮炸起，非常好食。

近排生活好似長期好腌悶，每一餐都想食返啲甜品填補下心靈，今日同家姐係佐敦見到呢間食疏乎厘pancake之餘又可以食晏，感覺都幾精彩，所以我哋決定一試。 意粉點左兩款一款係明太子蟹肉意粉，另一款係青醬汁煙三文魚意粉，兩款味道都唔錯，明太子有少少辣辣地特別開胃，青醬汁濃濃嘅香草味，味道清新。意粉軟硬度剛剛好，份量都幾大碟。 我的主角來啦，焦糖疏乎厘Pancake，有動L嘅感覺先係正宗疏乎厘pancake甜品，食得出嘅空氣感而且唔會太甜，好香蛋味，cream打得好軟滑，估唔到小店嘅甜品咁出色，埋單嘅時候聽侍應講，原來係藍帶廚師嘅出品，難怪咁好食。

唔係朋友介紹都唔知道原來而家蒸海鮮都可以一人一爐，因為第一次嚟食，所以叫咗價錢比較平嘅一款，不過真係好難相信今時今日二百幾蚊可以食到蒸海鮮，真心抵食。先來前菜小食，蟹籽沙律同埋章魚小丸子，小丸子真係好有驚喜，因為係即刻整起新鮮熱辣，非常好食仲好足料。 主菜嚟啦，蒸海鮮套餐入邊，主要有兩種唔同嘅顯，一隻蚌，一隻鮑魚，四隻蝦仲有少少雨，另外有幾粒丸同埋牛肉仲有蔬菜，雖然每樣嘢份量唔係好多，不過加埋加埋其實都真係好飽。真心要讚吓佢嘅海鮮，上碟嘅時候我以為係冰鮮海鮮，點知後來見到着件係生嘅仲識郁嘅，精元2分鐘即刻食真係超級鮮甜。 蒸嘅時間枱上面會有顯示，唔止錢好食，所有海鮮都冇沙，非常肥美，隻鮑魚仲要好大隻，入口彈牙，隻蝦爽口，而且仲有蝦膏，真係非常驚喜。 最後好似一般蒸海鮮咁樣，唔好浪費海鮮入邊嘅精華，可以將佢嘅湯底變成粥底或者米線，我揀咗蟹黃粥，超級超級鮮甜，非常好味，我食晒成個鍋足足有四碗，好飽好飽，二百幾蚊可以食到呢個程度，真係好抵食，如果呢個價錢食到新鮮海鮮仲要好飽肚，我真係唔明點解我仲要幫襯茶餐廳，下星期一於要帶媽媽嚟試吓。

銅鑼灣越來越多餐廳，唔係朋友介紹都唔知道樓上呢間食麻辣川菜嘅咁出名，未夠七點已經差不多滿座，好彩我地喺網上訂位，出邊天氣太熱一坐低即刻飲返兩杯啤酒解下渴先。 雞煲我揀咗小辣，果然真係唔係好辣，但係好有麻香，而雞有半隻，兩個人食啱啱好，而且雞煮得好嫩滑，每一件都點到醬汁，用嚟送飯真係特別開胃。 麻辣炒豆絲辣到適中，食入口好爽脆，用嚟送酒亦都非常適合，每次食川菜我都會點炒豆絲嚟食，因為真係好香口，好似咁簡單嘅菜式，但係屋企永遠都煮唔到。另外，豬油渣炒菜心，出邊已經好少見，果然炒出嚟啲菜真係比普通蒜蓉清炒，真係香好多。 豬油撈飯真係太耐冇食過，飯係俗稱嘅豬仔米，特別有口感，配埋豬油渣同埋碎葱，一碗飯輕鬆俾我K.O.，而另外撈麵味道好有川菜口味，麻麻辣辣，呢個面冇得揀辣度，不過我絕對接受到，成餐飯都覺得好開胃，份量亦都好足，我比起平時食得更加多，真係越嚟越鍾意食辣嘢，下次有機會再試其他食物。

近年我既減壓方法其中之一就係心情麻麻地就買杯甜甜既珍珠奶茶，一星期有時會飲2-3次，我都知唔係幾健康，所以小朋友我就費事比佢地飲，但原來motherpearl最近推出左小朋友系列，當中有小朋友都啱飲嘅珍珠奶茶，成個系列都⁠用左自家製植物奶、無咖啡因、 選用健康糖，每杯兒童飲品都有不同營養價值，好味得黎又唔會好甜，哈~ 佢地終於唔洗只係次次見到我飲無佢地份，而家佢地一人一杯，大大啖咁飲都不知幾爽!! 小朋友MENU有7款，小朋友最鐘意飲Snowy Olaf 即係小朋友版珍珠植物奶，同埋Golden Minion係蕃薯口味，我自己鐘意飲Cookie Monster，濃濃朱古力味仲食到好有口感既珍珠，真係好味呢!! 下次要試埋其他口味。

太古城越來越多嘢食，同小朋友喂去完溜冰，喂向下街原本未肚餓嘅時候，你小朋友發現咗呢間特別嘅餐廳見佢環境都幾得意，而且由主菜仲有甜品，飲品賣相都唔錯，所以決定一次。 主菜點個鰻魚飯，2大塊厚切鰻魚，好有口感，醬汁超濃郁，配搭埋珍珠米，連放喺旁邊嘅小食，都好好味！ 大蝦蕃茄汁意粉，賣相超級靚，見到橙紅紅嘅醬汁鋪滿晒喺意粉上面，喂小朋友已經忍唔住會立刻起動，意粉軟硬度啱啱好，大蝦夠彈牙爽甜。 最驚喜嘅係甜品呢杯黑熊甜品，係用咖啡雪糕組成再配埋焦糖醬，仲有咖啡奶凍同埋焦糖脆餅，成個感覺真係好夾，好好味! 中間原來仲有蛋糕粒，食完好飽肚，感覺真係非常滿足。小朋友最鍾意乳酪雪糕，酸酸甜甜飲晒小朋友口味，每一口食埋香蕉同埋焦糖醬，yummy 好大杯，不過因為太好食，所以我同小朋友都將佢K.O.晒。

有次飲完野係登龍街食過呢間串燒，覺得幾抵食，今次又再次來食宵夜，依然都係點咗唔少串燒，例如燒日本番薯，同埋燒芝士年糕都係我最愛，芝士年糕外脆內軟，軟綿綿嘅芝士，配上燒到美味廚嘅年糕，真係好香。 燒雞亦一串有兩隻，仲要都幾大隻，味道好香而且啖啖肉，但係我最鍾意食嘅都係牛舌心，佢唔似出邊嘅牛舌咁爽脆，不過就多咗一份林滑嘅感覺，厚切食入口好有口感·朋友就最鍾意食雞腎，用佢黎送酒，真係可以食足10串八串。 最後我地最大驚喜係發現呢一碟鰻魚炒烏冬，價錢只係幾十蚊大大碟，賣相好似好普通，不過原來味道好好，烏冬軟硬度適中，烏冬吸晒啲醬汁味道，加上鰻魚雖然切咗條狀，不過食得出好肥美，呢間餐廳依然係我哋成班朋友飲完酒，坐低宵夜嘅首選。

點解個天又要派我去中上環開會？真係非常討厭喺呢區返工，因為逢食飯時間，大大小小嘅餐廳都會塞滿人，本身同事介紹我，黎呢間舖頭諗住叫過外賣食個飯盒就算，點知黑仔嘅我，原來冇download app，冇預早點餐等於冇得食，我再望望附近嘅餐廳，門口全部都排晒長龍，我決定就咁喺呢度買杯咖啡食個麵包解決。 見到收銀附近有特登介紹千層吐司，見佢最大嚿，估計應該係最飽肚，同埋之前喺其他麵包舖聽過，但從來都冇食過，今日就即管試吓囉。 入到去有點餐都可以拎食物，唔知以為自己返咗大陸，九成客人都係講普通話，前後唔使10分鐘令得嘢食，天氣太熱諗住求其搵個公園解決午餐，點知熱得滯都係決定坐車返公司慢慢食，可惜未返到公司我杯咖啡已經比我飲咗一半。 返到公司見到呢杯已經溶晒冰嘅咖啡，都無損佢嘅味道，依然都好濃郁，值得一讚，可惜見到嗰張飯盒嘅宣傳單張，好似好健康，不過就無緣一試啦。用微波爐叮一叮呢一大嚿千層麵包，未食得出好驚艷，不過都充滿蛋香同埋牛奶味，只能夠講我今日嘅午餐係飽肚的，只係唔夠滿足，可能個天真係要我減減肥囉。

家姐生日諗咗好多地方同佢去邊度食飯慶祝，無意中比我喺網上發現到呢間餐廳，可以食fine dining，但價錢唔算非常貴，慢慢坐足全晚，埋單$2000有找，作為慶祝生日，我覺得可以推介俾大家。 餐廳好隱蔽，但裝修好舒服，待應服務態度更加要大讚，dinner set比較其他fine dining餐廳，真係勁多嘢食，前菜除咗有面包，前菜仲有燒鵪鶉，同刺身海膽杯，餐湯有龍蝦湯同磨菇湯，都非常濃厚，好creamy真心好味。 主菜上之前都仲有一道菜，長腳蟹同鵝肝都係我最愛，太開心啦。鵝肝好香，蟹腳啖啖肉，每啖都食得出幸福呢🥰 之後用檸檬雪芭清清口腔，終於來到主菜啦。 主菜rib eye ，份量好大塊，我叫五成熟，真係剛剛好，好有肉味。和牛面額炆得好淋，味道好濃郁，超級好味。最後來個甜品，餐廳真係非常細心，知道家姐生日特登寫左個happy birthday 字，仲幫我地影即影即有，最後再飲埋杯花茶，真係非常滿足，飽到上心口，最緊要家姐都好滿意，生日快樂呀。