每次諗起想食鹹豬手，就一定會去依一間淘大嘅supernormal , 佢驟眼睇起嚟好似一間酒吧咁，放工同埋同事坐低飲吓食吓真係幾chill. 今次俾我哋發現佢除咗有食開嘅脆皮鹹豬手，仲多咗個四周年優惠嘅原隻脆皮燒雞。 坐低點完豬手同燒雞，因為即刻準備要大概半個鐘，就再點咗啤酒同埋特飲。 杯Flower ball 雞尾酒有甜酸嘅果汁味，加上淡淡嘅酒香，好適合配鹹豬手烤雞等比較heavy 嘅食物。 飲下傾吓豬手就上嚟啦，用咗麥啤浸柚子造成嘅脆皮德國鹹豬手，塊皮真係脆到卜卜聲係鬆脆唔係硬，就係咁樣令到我成日都會掛住佢。裏面嘅鹹豬手肉唔會太鹹啖啖肉，亦都唔會乾，配埋酸菜一齊食，又或者點佢嘅特色醬汁都好啱。 啱啱食咗幾啖鹹豬手，隻原隻脆皮燒雞就上場啦！佢唔係出邊嗰啲細細隻嘅春雞，而係大大隻皮脆肉厚又多汁嘅燒雞。食起嚟有少少威士忌酒香，兩樣都係可以慢慢食，慢慢傾偈嘅菜色，咁就可以輕鬆渡過愉快嘅一晚啦。

夜咗收工，7點幾路經太子馬路轉角見到間燒味專門店仲有燒味賣，望入去都乾淨企理。 入到去店員立即同我哋講乳豬同燒豬都已經售罄，可能係佢哋嘅名物，所以會主動告知。 咁我同老公就點咗燒鵝三拼，跟一碗瀬粉同碗河粉。再點咗一碟燻蹄做小食。 燒味就係有一樣好，點完轉個頭就有得食啦。 三拼有油雞、叉燒同燒鵝，份量夠晒兩個人食，叉燒半肥瘦得來肥肉位仲係爽嘅，我鍾意。燒鵝唔止皮脆，肉味仲夠晒濃。 燻蹄切得比較厚，個皮好爽脆。 食完老闆仲好親切咁問滿唔滿意，佢話佢哋嘅燒鵝有用特別嘅汁料塗抹在燒鵝內，所以味道特別濃郁。 下次早啲收工嘅話要過嚟食吓佢今日賣晒嘅乳豬！

一去到呢間荔枝角尾嘅隱世居酒屋，即刻見到門口泊咗幾架名車，裏面爆曬場，似乎來頭唔細， 於是同朋友決定入去試一試。 呢本金丼真係唔係講笑，同朋友分開兩碗食，都覺得大份。可謂份量十足。有蛋，拖羅蓉，三文魚籽，仲有大大嚿海膽。 睇到啲蛋黃流出嚟嗰下，真係流晒口水。 個壽喜燒和牛鍋一大煲，其實三個人都夠食， 最緊要係呢一版和牛，4塊份量非常大塊 最後介紹呢個明太子雞翼， 啲餡塞到爆曬，超級和美， 皮燒到卜卜脆，絕對值得推薦！

太子有太多美食，今日被同伴帶到大南街，發現除了火鍋店外，多了很多新店。 因為會令肉味更香濃甘甜又香，所以大愛壽喜燒。有靚靚姐姐幫手煎烤肉，服務一流。食完完，更愛由充滿肉香醬汁加清湯做成的蔬菜火鍋。 食二人餐更有香口小吃：名古屋風味粟米，用手食最滋味。而吉列西班牙豬扒份量也是滿滿的，炸得香口。 這是令人滿足的二人餐，份量和價錢也洽當。 今次食咗美國頂級牛板腱同極黑豚，下次要再來吃更高級的日本A5佐賀和牛。好期待呢！

喺金鐘食飯，真係想變得優雅啲。Apinara 係我最常食嘅泰國餐廳，環境優雅又飽肚，午市套餐除咗主菜，仲有湯少食沙律同甜品。 佢個Pad Thai 有大大隻蝦仁，椰汁湯味道純厚，香炸小食細細份已經滿足左我想食香口嘢嘅慾望。佢個甜品清爽又有椰皇肉，有豐富口感。 朋友點咗冬陰功湯，小小嘅香辣更加開胃。 估唔到個海南雞飯嚟得比較遲，但佢個份量好多，啖啖肉之餘個醬汁仲好好味。但係如果唔點醬汁，味道就比較清淡，我都係比較鍾意重口味一啲，下次要過嚟識其他嘅套餐。

喜歡半自助午餐係因為可以按自己需要食多啲蔬菜、小食、湯、飲品同甜品。食品貴精不貴多，既然有足夠份量嘅主菜，小食就可以隨心品嘗一下，不必要怕唔夠飽。 佢有雜錦沙律菜，小蕃茄等在自助沙律吧，又有冷盤涼拌牛舌。熱食有炸物同港式咖喱魚蛋、豬皮，估唔到味道又好地道。 其實佢仲有意粉，如果唔夠飽可以食。 我揀咗燒雞做主菜，份量好足夠，燒烤得剛好。另一份三文魚大蝦都整得唔錯。 甜品唔只有好玩嘅朱古力噴泉仲有多款精緻甜點。 同埋雪糕任食。 百幾蚊依個價錢真係抵。

去觀塘做嘢雖然趕時間，晚飯都唔可以虧待自己食茶記。上到三樓 @itsuponsyokudou 見到好多人飲清酒食刺身船。 我哋就唯有食個雜錦剌身丼同滑蛋吉列豬扒窩飯定食止下餓。刺身都好大件同新鮮，最鍾意佢件帶子同大蝦，味道鮮甜。刺身丼的醋飯味道口感都唔錯，份量仲好大。 滑蛋吉列豬扒窩飯定食，有好大件吉列豬扒，滑蛋同飯嘅份量都好多，仲有麵豉湯同埋前菜。幾十蚊真係超值。 單點咗串牛舌，厚切牛味香濃，又有肉汁。 下次要舒舒服服咁嚟食隻魚生船。

飛日本機票咁貴，唯有食個正宗嘅日式拉麵頂下癮！ 好耐冇去過僕之拉麵，上次食咗佢個蝦拉麵，感覺良好，今次就決定要肉肉肉。 我哋一個要特選拉麵，另一個就點咗肉愛食者拉麵。 佢開咗一段時間，裝修仲keep 到，但桌面就有少少漬。 特選拉麵有好大條伊比利亞叉燒加一大隻糖心雞蛋同日式叉燒。 肉愛食者拉麵就鋪滿左日式叉燒同燒豕角，一樣有糖心蛋。 拉麵可選濃豬骨湯同清湯，麵嘅軟硬度適中。 再加上現炸大雞件，多汁好味道，雖然得四件，但已經大滿足。

黃大仙除咗拜神，仲係個大屋村，商場民生嘢為主，餐廳冇大商場咁呃錢。 地鐵站C出口一上，就見到依間靚仔餐廳 見晚餐價錢唔太貴，又有個舒適環境，就行咗入去試吓啦。 男士點咗漢堡包晚餐，我就點咗中餐 套餐都有跟湯同熱飲，中西湯味道都唔錯。 煙肉波特菇芝士安格斯牛漢堡，材料豐富，但係牛漢堡似乎唔算好大件，但味道唔錯好多汁。 佢中式套餐有好多款選擇，點咗個佢餐牌推介嘅士多啤梨骨，上枱見佢都幾大碟，本來以為佢骨多個肉，點知食落骨其實唔多，有嘅都係軟骨。

去懷舊寶石戲院睇完戲，就梗係要搵好嘢食啦，見對面有間壽司小店，就八卦一下，佢唔似其他壽司外賣店咁放曬D一早整好晒嘅壽司出嚟，而係即點即做，新鮮D又衛生啲。見佢二人餐價錢合理，再買多份一人前魚生飯就夠我哋一家三口啦。二人前個沙律由切得好幼嘅青瓜絲加上飛魚子、沙律醬及蟹柳造成，簡單而美味。 仲有兩份香脆炸物，個芝麻雞翼大大隻，蟹肉忌廉薯餅內餡又夠香滑。 16件手握壽司包括三文魚、油甘魚、帶子、鯖魚、虎蝦同赤蝦，因為係新鮮製作，壽司飯軟硬適中唔會被抽乾水份，魚生食材更加鮮甜肥美。依個價錢外帶有依個水準真係唔錯。 我選擇困難，就咁揀多咗個雜錦魚生丼俾屋企人，估唔到佢係由一片片大片魚生砌成，我最初仲以為係出面嗰啲頭頭尾尾角切魚生。味道當然好啦，只係返到屋企俾屋企人問點解丼同壽司材料咁相似，都怪我懶惰，其實佢可以有如車仔自選，想食乜都可以㗎，見佢材料咁新鮮，下次可以車仔自選啦。