旺角火車站新世紀廣場以前有間叫Apple Green，抵食夾大件記得都好旺場吓。搬走之後商場翻新執位有幾多人會記得已經改名叫MOKO Mall？新加入唔同種類食肆，午飯多咗好多選擇。 平日中午時間嚟到約有八成客人，仲可以揀靠窗位置坐。頭盤自助形式另配唔同價錢主菜，由最平$98三文冶或漢堡包到$328的牛扒都有，誇張地真係有N咁多款選擇！ 自助頭盤有好多新鮮沙律菜，估唔到連羽衣甘藍都有！最正仲有燒菠蘿，有湯及冷盤肉類外仲有兩款不停Refill唔同口味嘅炸薯條！出去走一轉胃口細D的話都可以收工。 主菜揀咗Southern Risotto貪佢有辣味,見到個份量都呆一呆！兩個人食都夠，𥚃面主要有肉腸及雞肉，調味係ok嘅！明白好多人食唔慣正宗意大利飯果種生生地米囗感，一般食店寧願煮到佢淋晒為止好過比客詐形！唯有當台式燉飯咁食。加埋杯餐飲真係飽到叫救命！ 呢間Brooklyn原來就係Apple Green嘅新品牌！價錢合理食物出品有咁上下水準，係一間做得唔錯嘅進化版。

N年前去過增輝後已經好耐無喺深水埗區食晚飯小菜。近期最旺場原來係呢間！樓上樓下兩層環境算乾淨企理，餐牌上有不少特式小菜。 菜乾豬肺湯—近年飲到的多數是杏汁，甚少飲到這款最舊式的。飲落肉同菜味道比例平衡有老火湯感覺 不過呢款同要預訂。 胡椒蝦—胡椒味聞就頗濃，食就不太入味！ 乾隆生菜包—食味係ok,但再切細碎D口感會好得多。 蜜汁鱔球-完全同時食嘅唔同，鱔肉本身唔彈唔脆！口感全靠外層炸漿。調味偏甜到似食緊西多士咁！ 燒鵝-一般般。 窩貼小棠菜-超厚一層彈牙蝦膠。 火餡蟶子-大大隻有筷子咁長都算肥大肉厚，鐵板上淋酒點火。僅僅熟有少少酒香味，正！唔怪得七點鐘已嗌咪沽清！ 呢間店樓上樓下都好旺場！仲見到有張坐十八個人大檯，平時想開飯訂定位留定想食嘅餸穩陣。

旺角真係乜嘢奇店都有，呢個位對上一間係流到爆嘅越南餐廳。估唔到摺埋左之後變咗呢間都幾離地嘅餃腩店！賣嘅係清湯腩呢樣野我係向來麻麻，見到價錢都呆一呆！細剩腩$149大嘅$199，粉麵平均$50。唔想食腩諗住都仲有餃子吖點知得兩款咁大把！本來打算起身走.....點知又見到有呢個話要等十分鐘即煮番茄湯底自選配料麵餐。 牛筋加芫茜馬蹄餃米粉— 落單後三分鐘即到，又話要等嘅？真係接受唔到蕃茄湯加粗幼蛋麵....所以先㨂米粉。 一見到碗嘢個賣相都真係幾核吓！湯底蕃茄味淡到似有還無，好迷離。足足落咗三湯匙辣椒油先叫有D味，牛筋正正常常有少少黑椒味，同埋隻餃其實OK嘅。 清湯腩無興趣，$320隻醉雞又覺得貴。無乜機會再翻啅除非鬼揞眼！

而家有得食台灣牛肉麵地方，分分鐘已經多過日本拉麵！成舊水一碗又有五六十一碗又有，路線有分高低，呢間係走街坊路缐嘅。 冬瓜茶—唔知係咪店家就返香港人口味？比台灣飲到嘅淡咗幾倍。 台式滷味腸旺—完全係果隻醬油味！滷水味道唔明顯而大腸係台灣興果隻靱但未至於咬唔開嘅質感。 招牌豐盛牛肉麵—即係台灣叫嘅綜合啦！蘿蔔貢丸墨丸各一，牛筋腩加條菜。牛肉=牛腩,與平時食到嘅係牛𦟌唔同肉質偏瘦好在無渣。 牛筋就真係非常好食！入味有彈性唔黏口。湯頭肉骨餚的味道略淡反而有陣陣蘿蔔味，深色係醬油作怪。麵條硬身唔多索湯！ 再嚟會係為咗牛筋同其他感覺真係幾台嘅各款小食。

話說某次得龍飯局，席上有一對中年男女喺食名物金錢雞時，將成件冰肉夾開放埋一邊話接受唔到成塊肥豬肉擺入口囉！咁每人接受程度唔同OK吖。到大良野雞卷時有就大大啖成件啪入口.....原來唔知野雞卷係成舊油就無事。🤷🏻‍♂️ 嚟呢度目的係六十年代懷舊撈麵。 其實即係豬油撈麵！$29賣相簡簡單單上面撒滿韮黃，麵條全無鹼水味彈性十足每一條都均勻沾上豬油特香味。最厲害係食完碟底唔會有一層油! 唔係度度有得食，如果見到有又真係食得過嘅麻煩通知聲！食過一次...真係會對普通撈麵無感，返唔到轉頭！

唔係朋友介紹都真係唔會搵食搵到嚟呢度！知道肉丸係名物，嚟到啱啱見到廚房正正喺度唧緊肉丸。餐牌選擇除了肉丸外多數係豬雜類及以湯煮形式，可配粉麵或飯。 肉丸豬手湯飯$44—好少機會食到上湯煮豬手！平時都係濃味南乳或鹵水咁炇到軟淋淋入晒味果隻。呢度隻豬手毛去得乾淨，外皮咬落非常爽口！如果覺得平時去打邊爐食果種$70六粒手打肉丸已經收貨的話，咁食過呢度就會返唔到轉頭！鮮、彈、有肉味真係招牌貨！ 有機會一定會再嚟返兜肉丸同試埋豬雜係咪一樣咁得！

香港食拉麵如果去到$118呢個價錢多數都係食舖租嘅尖沙咀或中環區居多。如果唔係，一定係有特式或者出品質素都有返咁上下啩？ 呢間位於九展一樓要穿過超市再直行跟箭咀先搵到嘅「隱世」拉麵就同你上一課。 檯面有一壼室溫而唔係冰凍嘅水/淡到似水嘅茶。 餃子—包裝急凍煎翻熱嘅加工餃子有乜好講？ 九州地獄拉麵—血紅色油浸咁嘅賣相，食落去辣度低而且辣味唔係來自湯底，基本味道仲食到幾鹹！麵條直身唔多索湯靱度尚算0k，叉燒呢度嘅演譯為切片五花腩。四大片厚一厚好似好抵咁喎，食落真係嘩一聲！咬落去先是感覺到大量油脂口內爆發一陣陣羶味湧出，之後豬皮好似條橡筋咁咬極唔斷。成碗麵除左一片紫菜外就只有切到大小不一嘅蔥花，簡約得仲以為係乜乜流派大師級出品。 最後食剩三塊半所謂叉燒同半碗麵 無料扮四條，收得貴唔怕你𠴕都未足以形容對呢間嘢嘅感覺。 史上最雷非佢莫屬！

元朗好似專出產份量極大嘅食物？涼粉係咁，壽司又係咁，估唔到連大牌檔碟頭飯都係！平時入開屯門會順便落埋元朗去天鴻食燒鵝，甚少想起去呢度，因為大牌檔無冷氣.....會死！ 撞啱今日天陰陰....搏一搏。 午市係12:00-15:00 11:45已經有十幾個客坐定等食！ 但環境衛生好老實真係得1分。 豬扒飯豉油汁—見到呆一呆！完全係只見豬扒不見飯。兩大塊手掌咁大咁厚嘅煎豬扒，食落完全無經化學處理過，肉質纖維粗但絕對唔嚡無渣，最正係近骨位有一點肥。豉油味道濃非常好送飯，但件扒真係太巨變咗食唔晒碟飯。 兩碟飯連杯茶味夠幾好飲嘅凍奶茶都係$86，每人$43......！ ！！ 呢度唔係我食過最好味嘅豬扒，但肯定係最大份及價錢最平。

有時去過一些食店覺得出品唔錯，就諗住下次可以約朋友來飯局聚會。點知....上次明明好地地今次就完全走晒樣！朋友唔出聲自己都唔好意思。但呢度係唯一無論自己或聚會嚟過N次，但每次都能保持水準兼人人叫好食嘅越北菜小店！ 大蝦蓮藕苗沙律—較少食到沙律內有蓮藕苗，調味微酸帶辣醬汁非常清爽開胃。 白灼豬肚—豬肚洗得乾淨，軟腍無渣。用芽菜同金不換拌食再蘸辣椒魚露，係北越當地受歡迎小食。 椰青花螺—每次嚟食完一客都會再Encore!鮮甜、微辣..連汁都飲埋。 魚露煮大蜆—蚌無貨而且來價太貴，近期轉了用大蜆。鮮甜充滿香料味道，大蜆嫩滑僅熟。 燒鵪𪂹—非常入味而且肉質嫩滑。 豬肉米粉包—充滿香茅味的免治豬肉加入菠蘿、青瓜、醃蘿蔔絲及檬粉再用米紙包住蘸魚露嚟食，多重口感味道。 蟹肉米紙包—可算是一件正方形春卷，鬆脆外皮咬落滿滿蟹肉加上春捲餡料。 越式烤乳豬—效果唔似中式沙皮亦唔似葡式的光皮，入口一様皮脆肉嫩，有趣係配上蔥油來食！ 椰青煮蟹—從來沒諗過椰青的清甜加上香葉提味會同蟹肉係絕配！呢道菜要預定，主理人會去街市留貨。每一次嚟食都係實肉爆膏！ 暫時收到消息是會營業到30/10 ，會不會另覓地方重新出發或以其 它方式出現？還是未知數。有心的可休業前去試試這吃過會懷念的味道！

呢間店日頭門口永遠一堆妹妹仔等派米咁排晒隊！其實食D乜真係唔知，呢日睇戲開10:30，早到咗9:45唔知去邊好，咦？呢度有位唔駛等喎！ 兩個麻甩被帶位姐姐告知每人最低消費是要點一杯飲品，同限時九十分鐘要埋單。 一望餐牌原來係台灣果種和風洋食，即係飲吓菓茶食吓輕食甜點果類嘢。望吓場內九成客人係女女、男女，得我地係男男... 冰釀蜂蜜蘋果茶---茶無茶味得個甜字，有幾粒蕷果粒浮喺面不過無蘋果味。 香蕉巧克力蜜糖吐司---恕我欠缺少女心夾老土，唔識欣賞比成舊水食一球雪糕同幾粒烘麵包粒，加六片香蕉同朱古力醬杏仁片... 無論食物環境服務同台灣的原全無得比！ 小朋友知唔知屋企人搵錢好辛苦？