七八十年代是上海菜的興盛年代,名字大多也是叫做三六九或一品香,記得由長沙灣至深水青山道一段便起碼有大大小小七八家上海菜館.吃的是上海粗炒酸辣湯銀絲卷生煎包等飽肚較為平民的食物,但飽肚食物賣不了幾個錢,生意難做下舊式小店已愈來愈少.現還以一品香作名字的店全港也只剩下幾家.打開餐牌選擇著實不多,問了炒飯可轉做上海粗炒後免傷腦筋倒不如來個套餐吧!上海粗炒----想不到這個套餐的份量也不少!醬油味道濃配料有齊椰菜絲肉絲冬菇絲,唯一美中不足是麵條略硬身.回鍋肉----在上海館子點叫客飯的話回鍋肉永遠是首選,切薄片的腩肉吃起來有彈性不乾柴,軟稔的椰菜吸了辣豆辦醬的油份用來拌飯吃是最佳組合.賽螃蟹----蛋白炒得頗滑身,較特別的是有幾粒甚少會吃到的蠶豆在內,混合陳醋來吃味道不錯.小籠包----$39一籠十隻即叫即包,皮不算特別的薄但收口位不會搓成死實的一團,內裡肉質鬆化湯汁份量適中,很有舊式小店的老味道.酸辣湯----酸比辣的味道重一點,足料之餘份量更加是驚人!每人喝了四碗還剩下小半鍋.

近年上海菜已轉型走精緻或以貴價食材入饌.最常見的是在賽螃蟹內加入帶子又或在小籠包內加入黑松露. 舊有的味道仿似已留不住客人.

喺某飲食谷內見好多人去試過話唔錯！過咗一排行過就去試吓。 滑嘟嘟-牛柳加炒蛋蕃茄湯底烏冬—蕃茄湯底味道偏鹹，唔明有人點解可以食到加湯？如果以呢個連渣形成出現就叫濃湯的話，我寧願返去勝香園。 炒蛋就正常炒蛋，牛柳碎到五毫子咁嘅size，可以食得出咩呢？ 烏冬有人覺得咁叫咽靱有咬口，我會叫呢種做未煮熟。你估而家食意粉Al Dente 呀？ 慢煮雞翼—慢到從來無出現過。 凍檸檬雪梨露—賣晒喎！ 無論廚房同樓面都嚴重欠缺人手！下午兩點入座，等咗十分鐘執檯落單，落完單又等多廿分鐘.....樓面行過嚟唔好意思你頭先叫咗乜嘢？ 眼見遲過我坐低嘅都食緊。到全場得返五個客，等多十分鐘走埋嚟講雞翼又賣晒要等。好老實你碗嘢幾好食都無用，更何況只係咁嘅貨仔。吹到點用心做又如何？

唔駛講好耐就兩年前，一般有名氣西式扒房給我的印象是：有舒適的進食環境，濶落的美式真皮卡座，較為精緻的刀叉餐具...... 由訂位至用餐當日餐廳已開業營運超過一個月，正常來説應該出品及服務也一切正常吧？ 七點正五人凖時來到，已奇怪點解擺枱會咁擠迫？完全櫈背貼櫈背。一坐低未見餐牌侍應已話Sirlion及Salmon賣哂！晚餐第一枱客都未做就賣晒？ 頭盤 Crab cake$158 x 3---啖啖肉但用叉一掂即散開。似將蟹肉放入模具壓成一餅多過是真正搓成餅狀。 龍蝦湯$138 x 2---正常無特別。 蘑菇湯$108---濃味得來不太滑。 Wolfgang's Salad$165---絕對把X!只不過將三色椒蕃茄煙肉切成粒狀，加上調味又淡都唔知想點！ 來之前做定功課知道唔想瀬大嘢就千祈唔好叫Porterhouse. 主菜 Filet Mignon $580 x 3---唔明點解會將件牛扒預先解體切開一件件上碟？點睇呢個顏色都是Medium，外皮帶點焦肉質油潤牛味略淡。 Rib Eye $880 x 2---外皮是更加焦且帶燶味,肉質軟腍油份少、要靠檯面支酸甜牛扒醬汁調味。 Lamb Chop $530---算是最對辦的一樣！羊羶味適中肉質嫩滑多汁。（全部扒都係叫Medium Rare) 拌碟 Cottage Fries $92 ---炸得不油膩厚切薯片係好食嘅！ Onion Ring $85 ---完全唔掂！超厚粉漿炸完仲硬過我條命。 Lobster Mac n cheese$128---有幾粒龍蝦肉，芝士不太漏。 甜品 Apple Strudel,Key Lime Pie, Hot Fudge Sundae,ice cream 四款甜品除了比正常吃到的更甜，全無特別可留下印象。 埋單五千九百幾。 招牌菜Porterhouse人人試過都話係地雷。 杯碟刀叉用具的平民程度以為自己去咗金鳳！ 成晚環境仲嘈過酒樓中式婚宴新人敬酒果吓，爭企個朱咪咪出嚟唱歌就以為去咗八十年代尖東翠麗華。 原來今天的扒房已淪落至此！ 消費每位$1200這價位絕對有更好的選擇。

有些店想去試很久也沒成功,大多也是因營業時間與返工時間重叠而總是未能如願.
這裡便是其中一間!早已聽聞滑蛋系列的大名,據說質素在港更是數一數ニ之高.
這天在大浪灣曝曬了整個上午,離開往午餐時腦海中突然出現了"滑蛋"兩個字!於是一行六人便來到大坑向這裡進發!
車仔餸----腸粉早已沽清,於是便要了一份豬腸、豬紅、豬皮、蘿蔔、魷魚、辣魚蛋和冬菇的剩餸.豬皮、蘿蔔及冬菇炆得軟淋及非常入味,豬腸軟身得來有咬口,感覺到這裡的調味比一般麵店來得輕手,味道是足夠地恰到好處.
滑蛋牛肉飯/ 滑蛋蝦仁飯 x 2----如果這體形是蝦仁的話,那什麽叫蝦球呢?蝦肉處理得爽彈,而牛肉的處理比蝦肉遜色了一點.重點的滑蛋其實有點像澳牛的炒蛋,不過蛋漿流質感更重更滑及加了蔥花,配上帶點蔥香的甜豉油,兩個人吃三碟飯應沒有難度!
豬扒炒公仔麵----公仔麵炒得乾身,豬排沒經化學處理,吃起來不算鬆化但總好過吃完喝大量的水,只嫌麵的份量少了一點.
豬頸肉飯----原以為是一片片煎的豬頸肉,但原來是用醬爆香的!吃起來肉質柔軟鬆化,醬汁帶點甜味,是滑蛋以外的另一個好選擇.伴碟的還有幾件蘿蔔(在寫這篇的之後也來多了一次,同是豬頸肉飯但蘿蔔變成了煎蛋)
總算還了一個心願!吃到這個出色的滑蛋.
但藏在心裡還未去試的名單還有科記的豬排,波記的燒鴨脾瀨.......

唔係朋友介紹都真係唔會搵食搵到嚟呢度！知道肉丸係名物，嚟到啱啱見到廚房正正喺度唧緊肉丸。餐牌選擇除了肉丸外多數係豬雜類及以湯煮形式，可配粉麵或飯。 肉丸豬手湯飯$44—好少機會食到上湯煮豬手！平時都係濃味南乳或鹵水咁炇到軟淋淋入晒味果隻。呢度隻豬手毛去得乾淨，外皮咬落非常爽口！如果覺得平時去打邊爐食果種$70六粒手打肉丸已經收貨的話，咁食過呢度就會返唔到轉頭！鮮、彈、有肉味真係招牌貨！ 有機會一定會再嚟返兜肉丸同試埋豬雜係咪一樣咁得！

香港甚少打正旗號正宗四川重慶麻辣鍋店店，就算有類似的也多抱觀望態度，寧願等信得過的食友作先頭部隊探路。而結果都算幾正面。
訂了八點半的檯一行九人凖時來到，等五分鐘左右已可入座。一字排開打對面坐都幾擠迫！絕對說不上舒服，檯面放下巨型鍋後已沒多少空間擺放食物。
為辣而來當然是要招牌麻辣鍋，九格設計本來原意是不錯！但可惜電磁爐受熱不勻，所以只是呈十字型的滾，四個角郁都唔郁。
主打各款內臓，肉類及海鮮選擇不多。
鍋底辣度遠比想像中及看上去低，麻亦不重。吃到最尾才叫做有點辣。加了牛油來炒底料確是為鍋底帶來特別的香氣！這已經比市面標榜正宗四川XX來得出色。
火鍋配料用料新鮮是事實，其中鴨血、牛肝、腰花全部處理得好沒有異味。其中海蠣溜從未在其他店吃過，是蠔仔加了點像木薯粉，淥時黏黏的不大引得起食慾但原來入口極之鲜甜！值得推薦。
九個人三千五埋單，在尖沙咀來說算合理。
電視不停播著介紹此店的內地節目，最礙耳的一句：人均消費人民幣六十.....
唯一缺點是抽氣系統極差！要有心理準備食完身上衣服果陣味仲勁過舊式韓燒。返到屋企換哂衫沖完涼果陣味仍然陰魂不散地隐隐出現...

在新華吃過晚飯後順道過來打掃一下!這裡大部份糖水也試過,但好像對這款無甚印象於是就選定要這個:
琉璃之戀----上檯時都呆一呆!咁大碗剩西米嘅?透明似西米的物體是乾身一粒粒的,本身全無味道,質感似在咬一粒半生的米!如果吃完全碗恐怕會消化不良.
加上花奶顏色淡淡無甚吸引,之後原來有一小碗杧菓汁是另上,但加入後對味道也是於是無補!
其實是和幻彩明珠有八成相似!用上一樣的生菓,沒有了其它配料但價錢多了$10.
雖說甜品組合萬變不離其宗!但點變都要用吓個腦啩?

人就是這樣,常常希望自己會碰上奇蹟,總幻想在香港會吃到近似台灣味道的肉燥!豬手----外觀沒大問題,看上去乾乾淨淨沒有任何豬毛,但用筷子一夾豬手已開始解體!味道全無問題只是自己接受不了這種軟爛如果凍的質感.肉燥牛飯----怎看也看不出這一堆啡色有芡汁內碎與肉燥有何關係?肉碎加上甜醬油是中式的肉醬吧?牛四片中有一片是真的軟腍好吃,其它三片是近邊的位置吃起來像柴皮一樣,最有台灣風味是那半隻滷水蛋!極度堅韌的蛋白就像有在吃鐵蛋一般.飯粒軟身接近爛!
接近五十元連一杯飲品,抵不抵食是其次但這樣的味道就真是恕難有再見的機會!

台式麻辣火鍋在香港不成大熱做不起來，原因同湯底有很大關係。始終香港人是分不開四川式麻辣同台式麻辣的分別，結果出現大量混種怪異味道，家家火鍋店都話有麻辣湯底...結果原來求其加麻辣醬就當係，食多兩次中招都唔再叫啦！
昏暗燈光加上中式扮清朝的仿古傢具.....似內地多過台灣囉！
主打四款台式火鍋湯底，七個人兩個鍋剛好四拼全部試晒：
美人鍋----有參有杞子有藥材有烏雞，但煲足三小時都係非常咁淡麗！每人試咗一啖後無乜再郁過。
養生鍋----材料又係雞同火腿之類、味道又係得個淡字同美人鍋命運一様！其實...仲有D包裝韓國人參雞湯feel.
麻辣鍋----唔麻又唔辣都唔知想點！又係得個名。
酸菜白肉鍋----唯一叫做食得落似似地有台灣味。
酸度不高而且愈食愈開胃！
無一款火鍋料全部大路貨食完會留下印象，丸類價錢偏高$48半份約4粒。所有食品份量偏少，兩人一鍋的話可能較適合！
不得不提是兩個鍋三小時內換了超過十樽手提氣！成晚滾下唔滾下，等都等到我滾哂。
最失敗是自取醬料的擺位，坐得較入的要行一段路，左手豉油右手蔥再左閃右避。
唯一得分是其中一位男侍應服務態度有專業水準！對各樣也解釋清楚，不似另外幾位....hea到呢....
可憐竟有人當這𥚃的是正宗台灣火鍋味道！
而家機票平出去行吓啦。

雖然不是再一起工作已分散在不同的公司，但一班舊同事每年也總有幾次飯聚。因為想儘量坐埋一檯，十多廿十人每次安排飯聚地點其實也有點頭痛。這次巧合下找到了這裡，談好開飯時間人均費約$350-400其他便全部由主理人發辦，無需花腦筋去㨂食物。

是夜頭盤為自助形式，主菜則大大份一齊分！
氣氛應該比逐位上來得熱鬧及輕鬆。
七點半到齊便正式開飯！
餐湯是南瓜忌廉湯，冷盤有即開美國生蠔及青囗、翡翠螺，較特別有來自冰島的灼蝦！肉質結實鲜甜。還有些沙律及煙三文魚等。餐湯是南瓜忌廉湯。熱盤則是一些炸物及香口小吃為主。
主菜：
地中海烤鱸魚及比目魚---比目魚油份重鱸魚肉質結實，每樣一口搭配著來吃有意想不到的有趣效果，沒有了平時獨立來吃的單調。
意式烤春雞---烤春雞火候控制得宜，入味嫩滑！配菜由平時常見的薯條換上了蕃薯條，又脆又甜。
威靈頓牛柳---酥皮內層用上磨菇泥加黑松露再捲著原條牛柳，接近廿人的份量單是賣相也震憾！牛柳沒有血水約七成熟，但吃起來軟腍一點也不乾。
龍蝦尾扁意大利粉---超大厚肉原隻龍蝦尾肉質如何無需再形容，硬要來比的話一般波士頓龍蝦根本不入流！用剩餘龍蝦殻淆出來的精華來炒扁意粉，仲有得輸？

甜品：
朱古力心太軟配雪糕---每人一份真是場面壯觀！
熱辣辣有晒擺盆造型的心太軟百分百流心，旁邊的蛋糕是窩心的同事們給小弟的生日驚喜。

幸運地有這班好同事讓我知道，
誰說職場如戰場？人人冷漠無情勾心鬥角？
有好場地丶好食物丶好朋友來為2016年劃上一個完美的句號。