黎到尖沙咀既cafe Urban Coffee Roaster。 幾年前去過銅鑼灣嗰間分店覺得幾唔錯，今次黎到尖沙咀分店，入面既環境裝修走工業風。 食物選擇cafe黎講都算多元化，除左各款咖啡、茶類飲品之外，熱食有5款brunch menu、沙律、意粉、漢堡、輕食，全日供應。 飲品叫左Uji Matcha Latte同Mocha都唔錯。 兩款都可以轉做Oat Milk，好濃郁！ 仲有靚既拉花！ 叫左一份egg benedict。 特別在於佢係油漬黃油雞version。 手撕雞肉配搭乾蔥、水波蛋、自家製辣醬同埋酸種多士。 成個配搭我覺得幾豐富。 手撕雞肉調味幾惹味，配埋流心度十足既水波蛋，蛋液流到酸種多士入面，好味！ 手打安格斯牛肉漢堡。 佢個漢堡入面有一塊都幾厚既安格斯牛肉漢堡，仲有蕃茄、酸瓜、煙肉、芝士、生菜等，材料係豐富，不過略嫌無咩醬汁會有啲dry，但塊牛肉漢堡係厚身juicy重牛味既。 呢度既甜品都幾吸引我！ 法式焦糖Pancake。 金黃色既焦糖pancake賣相好吸引！ 味道焦香香甜，而pancake有返一定厚度，雖然唔係好重空氣感嗰啲，但勝在鬆軟同埋有蛋香，可以一試。 另一份甜品係雲呢拿麻糬巴斯克芝士蛋糕。 呢個味道唔錯！芝士味好突出，蛋糕口感幼滑，入面既麻糬好煙韌拉絲，好加分！

再訪銅鑼灣呢間主打牡蠣既日式居酒屋KAGURA。 今次過黎除左要encore好味既燒蠔之餘，仲試左上次無食過既嘢，質素不變，都係咁高質好味。 鐵盒燒生蠔係必點！ 半打生蠔放喺鐵盒入面燒，每隻都好大隻又肥美，蠔肉非常飽滿鮮味，加左清酒去燒，食落除左更加鮮，多左清酒味道更好味。 可以加搭配特別檸檬醬汁或辣椒汁，會更加惹味！ 不過我個人就始終中意就咁食，原汁原味。 Kagura彩虹魚生飯。 第一次見用牛奶樽裝著既魚生飯，好有創意。 食既時候店員會將樽內豐富既角切魚生倒出黎，舖得好靚咁喺飯上面。 魚生款式好豐富，有海膽、三文魚、吞拿魚、吞拿魚蓉、海帶、生蠔、山藥等等，色彩好繽紛，味道亦好，每一款魚生都好新鮮。 鯖魚板壓壽司。 一份有6件，板壓壽司既size都唔細。 好中意塊鯖魚，魚鮮突出，醋醃過特別開胃，味道豐富！ 牡蠣泡菜鍋。 再黎一份鍋物，同樣以牡蠣為主角。 個鍋物份量十足，入面有多隻肥美蠔，啖啖肉又鮮甜。 泡菜辣辣地特別惹味！ 入面仲有多款野菜、冬菇等等，好豐富！ 啲蔬菜索埋啲湯特別清甜好味。 試左款串燒 牡蠣手羽先。 呢款串燒都幾出色喎！ 第一次食釀左蠔肉既燒雞翼，兩者都幾夾，好飽滿既蠔肉，燒雞翼皮脆肉嫩！

真係好中意食酸菜魚，而喺香港食到最接近我中意既口味既酸菜魚，覺得係姚姚酸菜魚既出品。 今次去左屯門分店，呢間都坐得幾舒服，服務又好。 二人份既酸菜魚，大大份勁吸引。 可以自選辣度，小辣真係啱啱好，食落麻辣香口。 個湯酸辣又椒麻十足之餘，仲好鮮甜添。 鱸魚片份量慷慨，啖啖肉，魚肉嫩滑。 酸菜好入味，酸爽之餘仲好爽脆，食唔停口呀。 入面仲有其他配料，如金菇、萵筍、粉絲、豆腐等等，好豐富，而且真係好送飯。 眨下眼已經清左成碗白飯，仲忍唔住飲左好多碗湯添。 平日中午過黎仲有好抵食既lunch set添。 個套餐包括左一款自選特色主菜、小食、白飯、三色冰粉、爆打青瓜檸檬茶或升級其他特飲，勁豐富！ 主菜叫左豬頸肉麻辣香鍋。 真係無諗過呢個lunch set既麻辣香鍋份量都咁大，目測好似二人份咁，好澎湃！ 雖然睇落紅噹噹好多辣椒，但其實辣度適中，會有麻辣感覺，但唔會辣到好緊要，好香口惹味！ 嗰種鹹香辣又係好送飯，入面除左豬頸肉之外，仲有蓮藕、椰菜、薯條、百頁等配料，連呢啲配料都係勁好味喎。 尤其蓮藕片同薯條，真係好夾，好過癮。 小食每日都會唔同，當日既小食係口水雞。 呢個就正常發揮啦。 不過甜品同飲品就好出色。 三色冰粉配料豐富，冰粉係烏龍茶味，好特別，茶香仲好突出添！ 套餐包括既青瓜爆打檸檬茶，飲落清新又清爽！爆打檸檬茶飲落檸檬味更突出更酸甜，好解辣！ 另外叫左份醬蘿蔔都好唔錯！ 第一次食呢種口味既醃蘿蔔，蘿蔔切到好薄片，口感好爽脆，味道酸甜開胃，配辣嘢就絕配。

黎到旺角食日本嘢。 今次選址係旺角山東街既巧 すしたくみ。 店內座位不多，不過有席前座位可以睇到師傅手握壽司既功夫。 點餐用QR code自己落，食物款式都多！ 除左多款壽司、盛合、卷物、手卷之外，仲有各式丼飯、小食、串燒等等，價錢唔貴，質素不錯，性價比都ok。 點左份巧·上壽司盛合。 有8件壽司，包括赤身、油甘魚、時令鮮魚兩款、帆立貝、赤蝦、墨魚、玉子，每件壽司都係師傅手握，佢個米飯用左赤醋，覺得佢醋既比例啱啱好。 而魚生亦好高質新鮮！ 赤身、油甘魚好肥美重魚香。 其中一款鮮魚係金目鯛，魚味突出之餘肉質嫩中帶點爽脆。 另外散點左兩款炙燒系列壽司。 左口魚背壽司好好味！重魚油甘香，口感又軟滑。 三文魚都好香口，炙燒過後更加肥美。 卷物點左蔥粒碎拖羅小卷。 一向都好中意食吞拿魚蓉，呢個吞拿魚蓉小卷好香口！ 加州卷雖然係簡單食材，但都足料。 熟食方面叫左蒲燒鰻魚丼。 有兩大塊厚厚肥美既鰻魚，鰻魚肉質彈牙爽身！ 鰻魚既呢個份量真係好滿足呀，亦好送飯！ 唐揚炸雞。 有4粒，每粒個size都幾大，炸得香脆肉嫩juicy，唔會覺得食落太油膩！ 可以一試！

最近食到一間銅鑼灣好高質既意大利餐館Mano。 餐廳環境唔大，但裝修頗有格調，而menu更係相當吸引。 特別推介食呢度既pasta，令人一試難忘！ 前菜先黎一份Burrata Salad。 色彩繽紛既沙律，中間有好大份Burrata Cheese。 一切開仲有流心效果，好澎湃！ 口感幼滑香濃，配埋清甜既蜜桃果肉同三色蕃茄仔，好fresh又好好味既一款開胃菜。 試左兩款pasta都好出色。 必點Black Truffle Mushroom Tagliatelle！ 係最近食過數一數二濃郁既黑松露意粉。 香氣撲鼻，上面有新鮮黑松露片，個意粉sauce好creamy，重黑松露同菇香，意粉好掛汁！ 佢個Tagliatelle口感煮得啱啱好，係al dente。 芝士控絕不能錯過既King Prawn Conchiglie。 用上三款芝士焗出黎既貝殼粉，Cheddar + Mozzarella+Parmesan，每一口都係濃濃又拉絲既鹹香芝士！ 而入面既海鮮都好鮮味，有King Prawn同蜆、帶子等。 有兩個size，一人份既份量都好足！ 4款side dishes都好吸引！ 試左其中一款Eggplant Millefoglie。 一層層既焗茄子配上番茄醬、Mozzarella、洋蔥同蒜蓉，味道豐富！ 好中意茄子一層層又煙韌既口感。

已經數唔到究竟有幾耐無食過新加坡菜。 今次過左黎銅鑼灣既A.T.A.S食回憶中既新加坡味道。 呢度既食物選擇都幾多，而且除左常見既喇沙、咖央多士等外，仲有啲香港少見但係喺新加坡好地道，hawker centre會有既新加坡菜式，例如Rojak, 板麵, 魔鬼魚等等。 講到新加坡經典菜式，一定少不了辣椒蟹。 而呢度都食得到！ 呢份辣椒蟹既蟹都幾肥，有飽滿既蟹肉，而個辣椒醬就好香辣惹味，混埋蟹肉，食落特別鮮味。 絕配組合一定要用炸饅頭點個蟹肉辣醬黎食，好滿足！ 叄岜魔鬼魚。 真係估唔到呢度都有得食魔鬼魚！ 第一次食就係喺新加坡，當時已經好中意。 覺得呢度既魔鬼魚都還原到新加坡食到既味道。 叄岜醬嗰種鹹香辣配埋魔鬼魚係特別惹味，魔鬼魚啖啖肉，而我自己都好中意食魔鬼魚既軟骨。 福建炒蝦麵。 都幾足料又份量十足既炒麵。 混合兩款麵條，黃麵同米粉，仲有唔少海鮮、肉片等等，食落充滿鑊氣，辣辣地惹味又香口，而且唔會炒得太濕！ 咖啡骨。 呢個又係好特別既菜式，第一次食，原來真係用咖啡整成既醬汁，真係食到咖啡既苦味，意外地又唔會覺得好違和。 豬排骨都煮得軟腍入味！ 沙爹串。 一份有4串，牛、豬各兩串。 呢份串燒highlight係佢哋嘅沙爹串，食到花生顆粒，好香濃。 最後留肚食埋佢哋嘅Summer Special甜品-新加坡紅豆冰。 呢個甜品真係消暑佳品，玫瑰味同椰糖味既刨冰，而且佢入面好多材料！有紅豆、粟米、仙草凍、珍多等等，一份兩個人share啱啱好。 叫左兩杯飲品，柑桔水必點！ 味道超濃，柑桔味道清新又突出，酸甜開胃好解渴。 美祿爆炸有特濃美祿，面頭仲有美祿脆脆，邪惡，但好正！

GYOJASANG係銅鑼灣既一間韓國菜居酒屋。 收工之後想飲杯野食下好野，就同朋友黎左呢度。 環境好舒服，服務亦唔錯，食物種類多元化，仲有多款唔同既韓國酒類飲品。 價錢屬於中上，但係質素係高既！ 先點返款韓國酒盡興一番。 點左GOHEUNG YUJA WINE。 非常清新又充滿柚子酸甜果香既一款酒，柚子味道非常突出，飲落好順口！ 前菜先黎一份醃漬前菜。 估唔到呢個前菜都幾特別，係自家製既泡菜同辣魷魚絲，泡菜酸辣爽脆，魷魚絲甜甜辣辣，的確好開胃。 韓式生牛肉好正。 生牛肉新鮮又滑溜，撈埋蛋黃、洋蔥、辣醬、蒜、蔥末、松子等，味道好豐富！ 配埋紫菜脆片一齊食特別夾。 海膽紫菜包飯超吸引呀。 有種日韓fusion既感覺，韓式紫菜飯捲上面有晒生牛肉同疊到好高既海膽。 一次過滿足兩個願望，好正！ 壽喜燒和牛鍋。 呢個壽喜燒都係有少少日韓fusion感覺。 成份鍋物入面既牛肉份量都幾多，而且牛肉好高質，滿口牛油香，點埋蛋黃好滑溜！ 好中意佢個鍋入面仲有大量芽菜、雜菇等等，吸收晒牛肉精華更好味！ 人多既話建議點一份海鮮煎餅share。 呢個韓式煎餅好足料，滿滿既海鮮大滿足。 而且煎得好脆邊內軟，食落好香口呀。 最後食埋個韓牛飯作結。 韓牛飯同樣有份量慷慨既韓牛，牛味好濃郁，撈埋佢哋嘅秘製辣醬好惹味，仲有啲飯焦好脆口。

終於一試銅鑼灣人氣Bakery- Hashtag B。 之前喺銅鑼灣返工既時候一直抽唔到時間去試，而家去左第二區返工反而有機會返黎試。 呢度售賣各款麵包、特色方包、撻等等，麵包造型同口味都好吸引呀。 試左全新推出既鮮雲呢拿士多啤梨泡芙。 呢個泡芙真係唔錯喎！ 泡芙外層酥脆內軟，雲呢拿cream夠晒輕盈又重奶香，士多啤梨果醬酸甜開胃，整體甜度唔會太高！建議即買即食！ 想食呢款泡芙要留意bakery既出爐時間啦。 拿破崙焦糖撻。 呢度既人氣商品之一，果然無令人失望！ 佢哋嘅拿破崙酥皮好酥脆又重牛油香，食到嗰種一層層既感覺。 中間既蛋漿好香口又帶有焦糖香。 買返屋企翻焗都一樣咁好味。（店員建議180度焗5分鐘) 琥珀核桃無花果麥雲。 呢度有多款特色方包賣，每款都好真材實料！ 我呢個方包都好足料，入面好多土耳其無花果乾同埋脆口既核桃粒。 無花果乾好香甜，核桃粒增添口感，麵包又軟熟，就咁食都好味！ 松露薯仔沙律包。 一咬開就好重松露味，內餡係薯蓉，好中意佢入面除左薯蓉之外仲有薯粒，食落特別有口感！ 紫薯雞尾包。 靚靚紫色既紫薯包，內餡有天然既紫薯蓉，唔會太甜，感覺健康既一款。

無意中發掘到一間性價比好高既酒吧餐廳Amus。同朋友過左黎食。 喺深水埗同佐敦都有分店，餐廳走文青工業風設計。 有好多款既酒精飲品選擇，仲有唔同西餐菜式。 最抵食既一點，係佢哋既所有食物每日逢4點至8點都可以享有半價優惠！ （星期五除外; 意粉、豬手、迷你漢堡拼盤、BBQ豬肋骨、腸仔拼盤除外）而cocktail/mocktail等都有happy hour優惠，下午茶或晚餐過黎食飯飲杯野真係著數好多。 點左炸啤酒魚柳薯條。 Fish & chips份量十足，足足有兩大塊魚柳！ 而且魚柳炸得熱辣辣又香脆，唔會覺得好厚粉，入面既魚肉都好嫩滑。 點他他醬同檸檬真係好好味！ 半價之後只係$74真係性價比極高！ 特色雞翼拼盤都好唔錯！ 一份拼盤有三種口味既雞翼，分別有我最愛既水牛城辣汁同埋蜜糖芥末、威士忌燒烤醬。 三款雞翼都好香口又惹味，炸到好脆口，佐酒一流！ 拼盤有兩個size選擇，大拼盤每款有3隻雞翼，啱晒同朋友開心share。 德國鹹豬手。 呢個雖然無半價優惠，但都好值得一試！ 脆皮豬手份量都比想像中大，而且餐廳已經切好一舊舊，食起上黎方便好多，貼心。 豬手皮脆，肉質有彈性，個鹹味啱啱好，配芥末醬會開胃好多。 另外點左兩款cocktail，分別係Dawn同Zeal Thai。 Dawn嗰款賣相吸引。 成份有Gin, advocaat, passion fruit liqueur, grapefruit juice & lemon juice。 飲落都幾有果香！ 另一杯Zeal Thai有vodka, white wine, lime, lemongrass, ginger, apple juice。 飲落真係帶有東南亞風情，香茅同青檸味道突出。

香港好似唔係好多地方有得食日本既湯咖哩。 旺角朗豪坊原來都有間食北海道湯咖哩既專門店。 呢間餐廳都幾有人氣，平日夜晚過黎都大排長龍！未食就先期待啦。 湯咖哩都有成10款選擇。 每款都有唔同配料，最平$88已經有交易，價錢都算抵食！ 叫左份和牛肩胛湯咖哩同埋Suage Special，各有千秋。 每款湯咖哩都可以自選主食(烏冬/拉麵/飯）、湯底同埋辣度。 湯底我揀左原味，辣度就Level 5 小辣，食到辣味，但我對我黎講可能下次可以再辣多兩度會更過癮。 湯底有咖哩香帶點蔬菜既清甜，無論係配稻庭烏冬配飯都唔錯。 不過我自己就更中意配飯，特別呢度既白飯可以加入檸檬汁，食落多左陣檸檬清香更好味，不過湯底質感再濃稠啲會更好！ 配料方面，和牛嗰款有3大塊和牛肩胛，肉味香濃，肉質軟嫩，掛上湯咖哩之後更惹味！ Suage Special就係一個雜錦，咩材料都有，包括雞串、法蘭克福腸、唐揚炸雞、日本厚切煙肉，感覺好豐富呀！ 而且法蘭克福腸真係好脆好鹹香，連湯咖哩入面既蔬菜，例如茄子、南瓜、薯仔同洋蔥，都好清甜好味！ 呢份湯咖哩黎講對女仔黎講份量偏多。 試埋佢哋嘅小食，唐揚炸雞可以一試！ 即叫即炸，上檯仲係熱辣辣，好香脆，外脆內嫩又juicy。 木魚花茄子係涼菜黎，茄子好軟腍清甜，比較開胃。 特飲有多款選擇，好多望落都吸引！ 士多啤梨抹茶奶。 有好靚既漸層顏色。第一啖飲落會覺得下面既士多啤梨醬好甜，但之後攪勻左就啱啱好，飲到淡淡抹茶甘香。 芒果乳酸特飲。 果香十足，酸甜開胃，好解膩。 最後留肚食埋甜品。 有兩款口味既甜筒軟雪糕。 3.5生乳軟雪糕同和梨軟雪糕。 雪糕口感都幾滑，生乳嗰款有香濃奶香，不過比起和梨就顯得低調，和梨軟雪糕有驚喜！ 入口好清甜又突出既和梨果香，食落好舒服開胃！