呢日同母親大人嚟Elements食嘢🍽~
而家春天,Surasang就推出咗一啲櫻花系列🌸~綻放的櫻花生牛肉嘅韓牛肉味香濃🐮~配搭埋脆卜卜嘅炸紫菜一齊食🌱,完全唔覺得膩~
而且牛肉上面仲有少少金箔🌟,感覺好有貴氣~個櫻花蝦蕈菇釜飯上面有好多櫻花蝦🦐,仲有各種菇菌🍄~個釜保持一定嘅熱度,所以食到後來個底仲有啲飯焦添🍚~
蝦嘅鮮味配埋菇菌嘅香味,個飯無乜調味都好香好好食😋~平時都鍾意食韓式煎餅🍕,加埋韭菜更加香~
佢嘅面頭鋪咗啲醃漬櫻花,而個煎餅都係櫻花嘅粉紅色💗,實在好靚~另外,主食仲叫咗個神仙雪濃湯鍋~
因為當日唔太舒服,想飲啲熱湯~
佢嘅雪濃湯鍋係湯料分開上檯,啲牛肉鋪得好靚🌹~先倒入大約一半湯煮滾咗,然後就可以邊食邊再加湯~
個湯好濃郁好味,而韭菜味又唔會好濃搶過晒👍~另外點咗兩杯cocktail🍸,都有外表又有實際~
我揀嘅呢杯Snowing Night比較多果味~
又有柑橘味🍊又有青檸味🍋‍🟩,反而酒味唔會好出~
母親大人本來想揀See You,但咁啱賣晒~
呢杯The Night Begins都係好清爽嘅~
以青檸🍋‍🟩同埋菠蘿汁🍍為主~間餐廳以木系為主,裝修得好靚~
而且啲職員仲好友善,好熱心咁serve每檯客人🥰~
下次有朋友聚會,都可以考慮嚟呢間~

以前想食韓式炸雞要跨區去大埔食,而家喺粉嶺都有啦😍!
而且價錢合理,份量夠大👍~ 今次叫咗個二人餐,包咗8件炸雞,主食可以三選一~
仲配埋醃蘿蔔同兩罐飲品🥤,實在三個人食都夠~ 佢嘅炸雞有4件原味🍗,4件有醬~ 如果會食唔晒,建議食有醬嘅先,如果唔係就會腍~
我哋喺現場食,啲炸雞真係好脆💦,而且脆粉夠薄,雞肉仍然有肉汁😋~ 另一款叫咗柚子檸檬,清清爽爽~
佢哋仲有好多款口味可以選擇~
如果佢哋推鹹蛋黃味,我一定第一時間嚟食😍! 主食就揀咗牛肉飯🍚,牛肉嘅量足~
而且汁都好多,可以夠撈晒下面啲飯~ 個人覺得比起某連鎖店嘅牛肉飯好食得多了👍~
而醃蘿蔔味道都唔錯,唔算太酸,有少少柚子條🍊~ 整體而言,以一間屋邨小店嚟講真係唔錯🤤~
不過,如果外賣啲雞就可能無我現場食咁脆~
我哋食剩咗兩件雞帶走,第二日焗爐叮返都好食🔥~
只係雞肉乾水咗少少,實在唔錯👍👍~

四月份係母親大人嘅生日月🥳~
而家炑八有好多生日優惠,所以帶埋母親大人嚟食個韓燒🔥!好耐無食過醬油蟹🦀,味道真係好鹹鮮香甜~
用嚟撈紫菜飯食🍚,好快食晒~生日嚟炑八,就會送一個肉肉蛋糕🎂~
上面仲有肉肉玫瑰花🌹,滿滿儀式感!
有豬頸肉同牛肉🐮,肉質唔錯~呢個炑八厚切五花腩之前都食過,個皮燒香咗脆卜卜🐷,猛火少少燒都唔怕~
不過個五花腩好大塊,要花啲力氣先剪得開✂️~個雞腿肉好嫩滑🍗~
不過建議燒完啲肥嘅肉先燒,因為個鑊面有油無咁易燒焦🤨~
而且個蜜糖都易焦🍯,所以最後燒會比較好~燒嘢食熱辣辣🥵,點埋杯荔枝梳打涼下喉~
佢嘅荔枝梳打唔太甜,加埋粒荔枝肉🍒,打卡好睇又好飲~最後仲食埋甜品,烘到勁脆勁薄嘅牛角包好似餅乾咁脆🥐~
上面加埋個雪糕🍨同朱古力醬🍫,圓滿咗呢個晚餐~

雖然天氣開始暖,但最近忽然好想打邊爐🙈🙈~
最近方叔叔推出咗春日限定嘅豬肚雞鍋🐔🐷~鍋底超足料,記得留返個肚食埋~今期多咗好多火鍋配料,點咗個母親大人喜愛嘅魚肚🐟~
厚厚一塊,用嚟吸湯汁一流~春日限定仲有呢個姬松茸菇~
一個個菇好似姆明嘅家🍄,擺得好靚呢😍😍~而我就鍾意食筍🎍,之前食嘅筍片覺得有少少渣...
呢個龍鬚筍絲就易食好多~
而且解成一絲絲,吸湯效果又提升咗📈~而家仲有紐西蘭嘅青青口🦪,夠大隻,淥一淥就食得😋~仲見到嘢新嘢小水母,一隻隻好的的骰骰~
咬落超級爽口,係珊瑚蚌以外我最推介嘅👍~另外仲有呢個手打魚籽蝦滑🦐,食落真係好彈牙,又足料~呢次嘅蔬菜見到有海帶苗🌱,而且好抵食,直接叫咗一份~
佢雖然只需淥30秒⏰️,但淥耐咗都唔怕變黃變老。飲品方面每次都係檸茶同梅汁之爭~
今次再飲返水仙烏龍檸檬茶🍋,仍然覺得個茶底好香~
而且超大一杯,好抵飲~嚟緊夏天再熱啲可能就唔打邊爐住啦😆~
期待佢年底天氣凍時再推出啲新嘅湯底同火鍋料啦😍!

呢日嚟到荃灣呢間COZi Hotel嘅COZi Lounge食晚餐🍽~
因為而家做緊優惠~
只要follow佢哋嘅社交平台🤳,就有靚靚嘅甜品Sweetie Fantasy一份啦😍!
我個人最鍾意食鹹豬手,所以呢度有火焰德國鹹豬手就必點🍖~
佢嘅皮烤得好脆🔥,而啲肉又唔會十到柴~
配埋啲脆脆薯條🍟,兩個人食真係好飽足!
另外點咗個鮑魚及大活蜆伴松露薯蓉🦪~
個蜆真係好新鮮,又唔會煮得過老,鮮味甜味好出~
個薯蓉就稍為淡咗啲🥔,如果再鹹少少就更好🧂~
佢哋有唔少signature cocktail同mocktail🍸,我哋揀咗一杯清新嘅Zingy Grass~
入面有青檸汁🍋,又有香茅,清爽解膩~
另外點咗杯Unicorn🦄,因為個名好靚~
而實物同個名一樣咁靚,係夢幻嘅紫色漸層💜,因為有蝶豆花茶~
呢個Sweetie Fantasy雖然係送嘅🍨,但係一啲都唔馬虎~
佢用乾冰做出煙霧嘅效果,實在非常igable📸!
三款不同雪糕口味,下面係脆脆地嘅croffle🥐~
呢個甜品份量都唔細,建議大家要留肚食呀!
呢度個位睇落好似有啲偏僻,但酒店好貼心咁有專車往返葵芳站🚍~
一個鐘有兩班,所以記得睇啱個時間去等車😉~

最近工作忙,成日都想食好嘢慰勞下自己~
今日去咗北角一間好有溫度嘅omakase🔪~
除咗食咗好多師傅精選嘅靚海產,仲了解咗佢哋背後嘅巧思💭~ 頭盤係華漣生蠔🦪,係時令最靚嘅蠔~
比較爽身,海水味唔重比較甜,配少少酸汁已經好好食😋😋~ 然後有kanpachi,雖然係白身魚,但食落口都係好肥美~
不過食落又有少少柑橘味咁🍊,好清新~ 然後又食咗虎河豚白子🐡,真係我第一次食白子!
樣子睇落好似燒棉花糖咁🍡,食落口亦非常軟綿綿~
佢嘅皮帶有特別嘅香味,加埋少少鹽燒就已經好好食🧂~ 另外,仲有金鯛松立燒🔥,肉質嫩滑~
但個皮燒到好脆,啲魚鱗仲一塊塊咁立起,所有咁特別嘅形態🤩~ 而另一樣好特別嘅食材就係鮟鱇魚肝🐟~
嚟到季節尾嘅時候,因為比較多膏,就呈現帶橙色嘅形態🧡~
佢嘅口感有如雪糕咁軟滑🍦,但又好香濃~
因為食太多會滯,所以小小一片,享受佢嘅豐腴口感已經好足夠💯~ 壽司部份有深海大池魚,赤貝,梭子魚等🍣~ 佢嘅火炙金目鯛有火炙嘅焦香,肉質比較爽🐠~ 師傅亦安排咗赤身豉油漬,估唔到咁軟滑,入口即溶~
而用豉油漬仲令佢可以保持鮮紅色澤,唔怕氧化👍~ 跟住係赤身同中拖羅之間嘅肉,唔係太重油份~
但嫩滑程度實在係用舌尖一壓即化👅! 最後係好靚嘅黃膽同埋更高級嘅食昆布大嘅海膽~
向來覺得海膽腥嘅我,第一次感受到海膽原來係咁甜美😍😍😍! 呢個omakase食到嘅品項實在太多~
而師傅嘅介紹令我對日本海產有更多認知🥰~
佢仲會自家製啲水果酒,尋晚就俾我哋試咗百香果同柑桔酒🥃~
仲不藏私咁話我哋知點整~
我就比較喜歡甜嘅百香果酒🍋‍,亦係師傅新研發嘅~ 同埋呢間店實在好有溫度🌡~
因為一般omakase都係廚師決定食咩,最多避開你唔食嘅~
但呢度嘅師傅係會因應你喜歡食咩,而推介俾你食😋~
呢晚座上有位熟客,師傅就會為佢特別安排佢喜歡嘅❤️~
但就算唔係熟客,只要訂位時話俾師傅知📲~
你鍾意食肥美嘅定係瘦身嘅,師傅都會精心為你安排~
咁好嘅嘢食,又學到咁多嘢,攪到我好想快啲再嚟食過😋~

最近完成咗好多嘢📚,所以嚟COVA做一日貴婦😂~
九龍塘店成日都好多人,預早打去訂位就唔使排隊👍~
我哋週六下午去,都大約10人左右排緊~
佢嘅二人下午茶有scone,幾乾身幾鬆,最鍾意佢個藍莓醬~
三層架就有龍蝦包🦞,帶子包,果撻,tiramisu,palma ham等🍖~ 個人最鍾意佢個撻,撻底鬆脆又有層厚嘅朱古力🍫~ 個tiramisu都唔錯,因為我一向唔食咖啡嘢...
但佢嘅咖啡味真係好香☕️,唔會太甜,同啲cream好夾~ 佢頂層有個扇形酥,非常酥脆又唔太甜~
哥日仲送咗coupon俾我哋🎫~
可以用優惠價買一盒,實行又食又拎💪!

喺灣仔返工一段時間💼,都無好好去覓食~
今日有同樣喺灣仔返工嘅朋友帶我嚟食拉麵🍜,一間正宗由日本人開嘅店~
雖然店仔細細,但食客絡繹不絕👯‍~

我自己本身喜歡吃筍,所以有麻油炒味筍揀唔會食枝豆~
佢有麻油味好香,鹹鹹地好開胃~
煎餃子本身40,生啤就58,呢個套餐有齊只係90,當然要嗌啦🗣~
如果想同朋友嚟吹下水💦,又唔太餓,其實叫呢個都幾適合~
佢嘅餃子煎得好靚🥟,個底好煎香~
配埋個生啤🍻,喺呢間咁有氣氛嘅拉麵店真係好爽~
嚟到主食方面,我哋點咗個牛筋black拉麵🐮~
呢個拉麵似乎都幾受歡迎,我見其他檯都有點👍~
牛筋好軟滑,而個湯底非常香濃,而且啲麵非常掛湯,入口又彈牙😋~
另外試下櫻海老沾麵,個湯面滿滿嘅櫻花蝦🦐,飲落口完全係蝦味爆發🤯!
如果唔喜歡咁重口味,仲可以加啲湯,調配返適合嘅口味~
佢嘅配料都好吸引,叉燒油香~
流心蛋更加係咬開就有蛋汁流出嚟🍳,每樣食材都一絲不苟~
呢間店不停有客人到,好不容易先等到兩檯客一齊走咗偷偷影下個環境📸~
呢度好有日本風🎏,仲會聽到大廚講日文~
實在有喺日本食拉麵嘅感覺!
難怪由2014年開業🎍,可以屹立至今~
佢哋仲會每月有啲優惠,今次就送炸蝦🍤~
記得嚟食時睇下有咩優惠,唔好錯過呀!

自從上次去澳洲無食到Messina🍨,我就一直心心念念~
因為喺香港好似從來無見過hokey pokey口味🤔~
而呢個係我對澳洲最大嘅回憶🦘~
呢一日去開中環,因為無乜特別嘢做~
忽然另一半想食雪糕,於是就去咗Messina啦👍! 只可以話每間店嘅hokey pokey配方都唔一樣~
雖然佢嘅雪糕底都係好香濃軟滑🍦,但啲脆糖唔係好夠脆...
我心目中係好似honeycomb或者直接一粒焦糖硬糖咁脆嘅🍯~
而另一款揀咗好多人推介嘅開心果口味,的確非常濃郁😋~
而且細心咁品嚐,仲會feel到除咗果肉,仲有層衣哥種焦香味~ 實在值得一試💯!!
但其實佢啲口味咁多,真係款款都好想要🙈~ 然後再順路行上大館,睇下展覽影下相📷~

呢日去大埔拎啲嘢俾舊同事💼,見到呢間新開嘅小店🎊~
湯底係自家熬製嘅五指毛桃豬骨湯,幾特別,所以去試下~
個百香果酸辣鳳爪似泰式鳳爪咁酸酸辣辣🐔~
雖然唔係好食得出係百香果,但的確有種水果甜味🍯~
而且已經拆好骨,可以大啖大啖咬~
佢哋嘅涼拌皮蛋個醬汁幾清新🌱~
再配埋帶點醣心嘅皮蛋都幾好食~
佢哋嘅手打牛筋牛丸肉味香濃🐂,而且好彈牙多汁~
食落明顯唔係出面凍肉舖買到嘅貨色🍡~
筋唔算多,食落中間見到有一粒粒明嘅,幾有驚喜👍~
佢哋嘅米線同食開嘅唔一樣🍜~
望落比較粗身,咬落較煙韌~
我個人對豬軟骨麻麻😐,因為覺得個軟骨都係好硬,通常唔會食埋...
但母親大人鍾意,所以點咗個鮑汁豬軟骨米線~
估唔到佢哋處理到個軟骨咁軟~
咬落反而似較咬身嘅牛筋😋,全個都咬得開~
而佢哋個湯底真係唔錯,而且唔會太濃太鹹🧂,感覺比較健康~
我就想養生啲,揀咗玫瑰花黑枸杞茶🌹~
佢落咗好健康嘅黑枸杞,仲加咗圓肉帶起甜味,唔會太甜~
啱晒想揀咗檸茶奶茶以外嘅人🧋~
母親大人就揀咗個菠蘿梳打🍍~
一支梳打水俾你沖落蜜餞菠蘿度~
飲完了埋啲菠蘿出嚟食都一樣好味~
估唔到呢間小店都幾有驚喜🥰~
不過個位置僻啲,不過啱晒我呢啲會周圍搵小店嚟試嘅人~