琴日聽同事講話東海堂有款長方型條狀size既蛋糕好抵兼好食, 人地美心、聖安娜、凱施等既條狀蛋糕都要賣成$20-30不等啦, 依家午市優惠價只需 $28, 放工時間買要$50架!!! 平時一向係東海堂粉絲既我, 今次竟然走漏眼添, lunch hour即刻撲去買番條今晚做飯後甜品先得, 嘻嘻…

同事話呢款蛋糕好搶手, 有時食lunch後過去買都會無貨, 好睇彩數!! 通常唔食lunch住即過去就實有, 不過每日只出一款味道ja…聽講最正係芒果蛋糕, 今日俾我遇上它~藍莓慕絲蛋糕

外型夠哂厚身, d藍莓慕絲唔太甜剛剛好, 蛋糕鬆軟到好似平時食既birthday cake…good taste, 今晚好滿足!!!

十大最多好評自助餐入面, Le Menu總係榜上有名!! 見佢好評如潮, 而且個價錢又咁精彩, 已經心郁郁想試, 星期四就興志勃勃咁同屋企人嚟見識下。 六國酒店外表大大座, 但間餐廳就袖珍咗d, 行入去就已經一眼睇哂有咩食, 似乎款式唔多, 景觀一般。 是晚個場得8成人左右, 一開場已現人龍搵食, 仲等咩?! Let’s go…

冷盤: 翡翠螺大大隻但無乜味, 個人都係比較鐘意食烹調過既翡翠螺多d, 惹味d嘛, 可惜呢度無。 龍蝦仔細細隻又係味道麻麻地, 中蝦就一般。 D海鮮限量廖廖可數, 雖然有refill, 卻予人吝嗇既感覺!

生果沙律唔錯, 几醒胃。火腿咸左d, 煙三文魚及螺仔肉不過不失。

壽司就揀左三文魚、鰻魚、加洲卷等, 發覺舊飯好難食啊!

生文魚刺身有鮮味, 爽口又美味!!!

熱盤: 熱辣辣既炸蝦丸好香口。 牛仔肉大件厚切, 肉質好鞋, 好難啃!!! 爸爸話d燒牛肉又係好鞋好韌, 仲有d類似豬肉既扒類都係厚身大大件又煮得唔好, 媽咪話見到都無胃口, 我就覺得個賣相有d似隔左夜!!! 薯仔炆雞就味道OK。 我發覺呢度原來連蒸魚都無, 只有煎魚柳, 秋刀魚等, 味道仲好一般。 青豆炒青口唔好味, 後期refill左另一款炒青口已放棄再試!! D羊架雖然都厚身但勝在肉質嫩滑, 啖啖肉好口感。焗蟹蓋ok好味但食唔出係用乜野材料, 仲好多人爭住攞。 我覺得白汁意粉味道都算ok, 但媽咪就話d白汁好”陋”。 炒飯直頭差過係酒樓食。 見到其他鴨肉、雞肉、菜等已無食慾!!! 雖然有不停refill, 但是晚來來去去都係果几味。

湯: 有兩款-青紅蘿蔔同忌廉湯, 不過都無興趣試了。

熟食檔: 淥左d牛柏葉、牛肉、魚片、香腸、生菜再加個喇沙湯底….一陣濃郁既辣味撲鼻而來, 呢個就正嘞! 另外淥左碗皮蛋瘦肉魚片粥, 赫然瞥見d粥係由廚師係一桶疑似隔夜“一pat pat”又”杰達達”既粥入面攞出來滾, 情景就十足十美女廚房咁驚心!!! 師傅見我眼定定o哂嘴咁望住桶粥, 即刻俾張咭仔叫我轉頭先嚟攞。 人地大排檔都有明火煲粥吖, 唉! 呢度竟然….試食左一啖, 效果可想而知…

甜品:　好多種類~有鮮果撻、芝士蛋糕、朱古力蛋糕、心太軟、麵包布甸、朱古力忌廉泡芙、朱古力∕白朱古力噴泉、自製格仔餅、焦糖燉蛋、木槺布甸等, 估唔到有埋爆谷機。個人專攻cake類, 食落口感麻麻地。　

最有印象既竟然只得Haagen Dazs雪糕: 有4種味~咖啡、士多啤梨、朱古力及我至愛既雲尼拿, 一口氣食左6小球, 眼見小朋友食得最開心, 因為可以用筒食。

生果:　西瓜、菠蘿.、哈蜜瓜三款中得西瓜較甜較可取。

飲品:　任飲Fruit punch、橙汁、提子汁及其他茶、水丶啡。

服務:　收碟快, 值得一讚!　

對於我地呢班重質唔重量既人嚟講, 真係試一次就夠哂皮嘞!!! 是晚媽咪只靠西瓜、雪糕及小量甜品飽肚, 她話咁既質數就根本唔值咁既價錢!!! 尤其係食物既賣相, 有點兒粗製濫造, 天后d酒店既buffet就略勝一籌, 大家價錢相約, 但人地明顯地精緻得多, 烹調適中, 真難理解咁樣打入十大!!!

舊同學聚會諗住係九龍區食buffet兼試新野, 上openrice一search就被我發現左個新大陸 ~ The Square, 用coupon只須$188/位加一, 滿3位又有紅酒送添, 好啱洗,哈哈! 睇埋youtube個video, 直頭扑哂槌啦!!! 嘩~上網book位仲可獲贈精美禮品乙份, 即刻take action…
嚟到見間餐廳几大同舒適, 但d嘢食款式就少左d。 Buffet 6:30pm開始, d人已一窩蜂咁掃貨, 不消一分鍾就掃清哂d長腳蟹, 我地掛住傾密計既, 諗住第二round先攞啦, 點知得個吉!!! 唯有轉戰排隊攞鵝肝及珍寶蝦, 雖然煎得比較油, 但味道不錯, 可以翻叮…

魚生: 三文魚刺身中規中柜, 其他刺身賣相麻麻無食, 友人話其中一款刺身有腥味tim…壽司就口感一般d。

熟食: d焗螺仔肉味道ok。羊腩牛腩就咸左d勒。其他小菜都算合格啦。
沙律、煙三文魚及西式火腿味道都係普通。
甜品: cheese cake、其他味cake及鬆餅都算唔錯。
雪糕: 有4款味道既Haggen-Dazs雪糕, 算係全場最正既嘢食。
服務: 雖然多人但d waiter都成日走嚟添水, service算唔錯!
一分錢一分貨, 要求唔高既可以一試!

打電話嚟book枱慶祝父親節, 間酒店話最近比較爆場, 需要比deposit先, 我心諗“細細間酒店, 有無咁誇呀!!!”可能係意、法、日美食巡禮last night及有大型投射螢幕睇世界盃直播既關係, 是晚果然全場滿座, 連樓梯口位都爆埋:-O
揀呢間酒店食BUFFET都係貪佢做緊美食巡禮, 款式會多樣化, 真係不負衆望, 節日一樣咁多嘢食, 尤其每人免費有一隻焗大蝦(無coupon都送), 好yummy呀:-P
雖然我食量唔大, 但都盡量試左大部份美食
魚生: 三文魚刺身厚身好食, 北寄貝同赤貝刺身好爽口, 墨魚刺身太鹹, 吞拿魚刺身就毫無味道。全部壽司無試, 我怕浪費舊飯麻!!
海鮮熱盤: d螺及青口几大隻好味, 細佬食左几轉, 但就好細盤又無擺係當眼處, 唔係老豆講我都攞唔到。蒜蓉蒸扇貝唔錯, 蒸星斑好大條好滑仲無骨refill又快, 我食左几碟已回本! 咕嚕魚同”唔知咩班塊”唔錯, 龍井蝦仁ok,好鬼大隻蝦ga。 無試到炸天婦羅, 因老豆食左話麻麻地。
海鮮冷盤: 長腳蟹、螺、青口及蝦都無試, 因屋企人試左一致話熱既好味d。
熱盤: 扖類好似見得一款太少,怕heavy得滯無食到。燒雞脾肉好鬼滑,食左几件。福建炒飯唔錯,忍唔住食左半碟。燴牛尾几入味。金菇牛肉卷及菜芯ok。人參雞湯好有參味,有嗅覺可惜無味覺。
淥麵檔: 太飽無試。
蒜茸包好脆, 沙律、煙三文魚及西式火腿都好食。
甜品: 中式糖水得紫米露-ok。士多啤梨班戟、布甸、啫喱、cheese cake、其他味cake及迷你果撻等, 全部試少少, 味唔甜但普通d。
雪糕: 有6隻味但唔知咩牌子既雪糕, 好滑。
生果: 西瓜、蜜瓜、哈蜜瓜及菠蘿, 當中得哈蜜瓜無味, 其他几甜。
飲品: 兩款橙汁任飲, 其中一款加左少少酒精落去唔錯。有自助式咖啡機, 港式奶茶, 0茶0水任斟。
服務: 可能客人多令人手不足，收碟緩慢。不過一出去d waiter姐姐就好有禮貌咁攞埋碟俾你攞嘢食, 廚師哥哥好主動介紹d食物,又話好食ga試下啦。
雖然個view一般但勝在人多熱鬧 (唔係嘈果隻wor), 開開心心咁就過左一個充滿天倫之樂既父親節嘞。

琴晚同舊友聚餐, 3條友仔住埋同一區, 想食吓日本嘢la, 友人有"上壽司"會員卡, 生日月份有discount wor, 有著數梗係要用吓先安樂, 嘻嘻…

放工過到嚟, 唔使等就有位(5人卡位), 唔會餓親個肚仔^O^
間舖好就腳, 面向英皇道, 地鐵站一出過條馬路就搵到。環境舒適, 靜靜地, 適合几個朋友聚舊/一家大細/情侶食飯等, 卡位好濶落, 不過d迴轉位就好早已full哂…

我地share食, 點左一個海膽生文魚生飯 (雖然d海膽少d, 但係好新鮮同好味!),一個蟹籽沙律(几大碗, 好多蟹籽係入面), 一個豆腐窩(呢個就清清地), 一客串燒鷄軟骨(個賣相唔多似係鷄軟骨但食落就似), 一碟海膽軍艦(好鮮味), 一碟花之戀(好食但size細左d), 一碟帆立貝壽司(件帶子几大件,好厚身), 一碟鰻魚壽司(ok), 一碟鱆紅魚壽司(ok), 一碟油甘魚壽司(ok), 6件生文魚腩壽司(好肥美好正), 6件赤貝壽司(無腥味,唔錯!我係其他壽司店食過係好腥)等…

最後點少得唔叫既雪糕甜品: 芝麻, 綠茶, 豆腐 ~ 三球。(d雪糕几滑ga)

好食又抵, 比起我平時食開既元氣、元祿、板前丶板長、峰、北海道活壽司店等, 真係經濟好多, 食物質數差唔多, service几好, d侍應仲成日埋嚟添茶呢!!!

母親節唔想去酒樓慶祝,一來多人,二來環境又嘈,於是揀左去食buffet啦。

呢間酒店位於天后,比較清幽,可能細細間,無咩人識,又係節日關係,成個場得4,5成人,所以坐得几舒服。

食物方面: 中、西、日、泰式乜都有,仲REFILL得几快,尤其係蒸魚。魚生就0K, 初頭賣相麻麻, 後尾refill既都唔錯。熟食既味道恰到好處,煮得唔錯!!! 甜品不過不失。中湯就難飲,西湯ok。雀巢雪糕唔好食。生果就西瓜几甜。

整體算不錯,因節日計,($288位加一)價錢相宜,氣氛几好!