悠閒的週一下午，同朋友來到這裡試試他們的午餐。 我點左蒲燒鰻魚滑蛋飯 鰻魚一大條, 同手掌一樣咁大，肉質結實，淋上蒲燒汁，送飯一流。 滑蛋應係用左不少牛油炒，每一口都充滿牛油香， 而且係超級滑，好好味，滑蛋有驚喜! 朋友叫左日式照燒雞扒飯 雞扒並唔係我想像的一大塊雞扒，而係三小塊薄薄的雞扒，其實一開始係有少少失望。但係味道真係有驚喜，雞扒用左黑椒調醃製，好入味，最出色係表面煎得香香脆脆，雞肉都好嫩，口感不錯。 飲品方面, 我點了玫瑰Latte，奶泡上撒了幾塊玫瑰花瓣，打卡靚之餘，入口有微微玫瑰花香。 朋友點了奶醬啡，個名特別之餘，賣相都好特別。杯既外面同杯邊用朱古力痴上碎果仁，每一口都會食到朱古力加碎果仁，咖啡中加左少少花生醬，咖啡甘香中帶些微花生醬香，估唔到又夾得到，幾得意。 整體呢到既食物都幾高質，有賣相之餘同時都好好味，值得一試。

叫左招牌海南雞飯配油飯，要讚下既係，雞做得出色，皮薄肉嫩，雞已去骨，份量都好多，有7大件。飯方面，同店舖一樣，好黃。😆食得出係落左黃薑粉，所以咁黃，但就唔係好食得出油飯既香味，同埋飯落多左水去煮，有少少濕，如果可以改善埋個飯會更好。 另外，點雞既醬汁酸酸辣辣，好正。最後用埋d汁黎撈飯食！ 午餐價$45連熱飲一杯，呢個質素，絕對係抵食！ 會再回頭！ 係呢個不公義，被禁聲既社會下，我地唔知仲可以做咩，我地需要珍惜仲肯表態既餐廳，入得去既都係同路人，證明大家都係一條心。今日唔知聽日事，或者聽日已經無哂同路人餐廳。儘撐！

見到標題唔好諗錯隔離，我所指既係旺中有一間以炸雞🐔做主打既小食專門店，以後行開旺角，想食雞既話，就會諗起旺中。 見到呢間小食店以炸雞為主題，當中俾佢既主打「shake shake雞髀肉」吸引，於是點左一份試下。 「Shake shake 髀肉」 顧名思義，雞髀炸起後加上調味粉調味。店家提供九種唔同口味，我就揀左「四川風味」，少少辣，食到有少少流鼻水，但係好惹味，食左一口就停唔到口，極速KO左隻髀。另外隻雞髀炸後仍然好嫩滑juicy! 👍🏻招牌真係無錯，黎到一定要試下炸髀！ 呢度既雞髀可以整件上或者切件上，想食得豪邁d可以成隻拎上手食，但我就因方便揀左切件上。 「Oreo 西多士」 估唔到炸雞店有西多士食，仲要係Oreo，幾特色咁。一開頭好怕佢太甜，但原來佢唔係落maple syrup ，而係落左少少煉奶，再係上面灑上oreo碎，整體唔會太甜太漏，幾好食。 「糯米釀雞翼」 糯米香軟，釀入雞翼後經過烤製，十分惹味，推介！ 「炸雞粒（送薯條）」 雞粒新鮮炸起，好香口好脆，薯條亦都算粗身，食到啖啖薯仔，好薯！

終於有機會試下觀塘有名既隱世食堂 餐廳只開星期一至六，下晝5點就收，所以唔係個邊返工或住個邊，只有星期六去食，所以星期六長期有條人龍，不過佢出餐快，翻枱都好快，即使排我前面差唔多有10個人，都係等左15分鐘左右。即使咁忙，老闆都好好態度，好親切，唔會黑面，好難得！ 「蔥花蛋治烘底🥪」好有驚喜既蔥花蛋治，蔥味香濃，蛋好fluffy，麵包烘得岩岩好，一口咬落去，外脆內軟，成件事超夾！  「牛腩蝦條煎米粉🐂」煎米粉同蝦條擺係同一碟，牛腩另上。煎米粉加左蛋落去煎，有少少脆口，上面有pat蠔油咁既野，但個人覺得唔需要落蠔油，因為用牛腩汁黎點個米粉已經好夠味。牛腩炆得好入味，食得出落左好多花椒八角等香料炆，算係重口味。牛筋同牛肉都炆得好淋。蝦條就無咩特別。 另外點左佢既「冰啡樂」☕️🥤即係可樂mix咖啡，估唔到又幾好飲wor。呢個都一定要試下！  總結：超好味，有創意有驚喜，一定會再食多次！

其實以前成日行旺中經過,，但係都無試過。因為要做到高質既雞蛋仔一D都唔易，所以好驚會中伏而無去試。 我依家發覺呢個諗法其實唔係咁岩，因為會好容易錯過左一D好味高質既店。店面細細，本身唔起眼，但依家經過會被佢黃到金既光芒吸引。 第一次試左佢既人氣之選「阿華田雞蛋仔」加$6要麻糬餡。 第一口，真係驚為天人(好似浮誇左XD但事實真係有呢個感覺)。外脆內軟，脆到D碎跌哂落地，阿華田濃但唔會過甜。裡面加左麻糬更加軟糯。超好食呀~ 「點解可以咁好食架?」我真係咁樣問返收銀個呀姨XD 老闆，你收唔收學徒呀?我真係好想學整雞蛋仔，將來萬一真係無路可逃要移民，都有一技旁身，將香港既雞蛋仔精神發揚光大!

因為on diet緊,，所以都要食得健康D。日式便當係一個唔錯既選擇。 今日放lunch決定試下呢間只做外買既店， 估唔到1點鐘去到已經有10幾人排緊隊，人氣真係爆燈，有良心既店，係值得等下既。 落order時店員已經提醒過要等15-20分鐘，結果等左差唔多30分鐘。大熱天時係條街等，都幾辛苦。店員話下次可以用手機透過一個外賣平台預先order，咁就可以預返時間去舖頭自取慳返D時間。 不過辛苦係值得既，因為的確係幾好食既。 我揀左「照燒雞扒野菜便當」。雞扒醃得好入味，用左孜然粉同七味粉去醃，雞皮好薄一D都唔肥，連平時唔食雞皮既我都食哂。 野菜炒得好味但調味又唔會過重，配搭紅米飯感覺更健康。 份量方面有D偏少，女仔食剛剛好，男仔食既話一定唔夠飽，可能加$8要個麵豉湯會好D。$68呢個價錢黎講，有D偏貴，但可以一試。

依家出街食野，儘量都會光顧良心小店，支持一下真正愛香港既香港人。  第一次食，當然試下招牌涼皮。 好似車仔麵咁，揀自己想食既配料同辣度。我揀左木耳同豆筋棍。  涼皮涼浸浸，好滑，厚道適中唔太韌又唔太淋，好彈牙。👍🏻 調味唔會太鹹，芫荽再加埋d芝麻令味道更香、青瓜絲令口感提升。值得一試！  餐廳比較狹窄，入到去有一張high table俾人立食， 逼逼地既可以企到10個人，但係食既期間不停有出出人入黎買野食，門口同檯既距離又好近，所以如果企近門口個邊可能會有d煩，要成日讓路俾人行。 對我黎講，只要食物好味，服務態度好已經好足夠。希望越來越多人會支持良心小店。 下次黎再試下個冰粉先。

星期六出去做facial順便係附近搵野食。見到呢間食沾麵既店，見佢都幾多選擇，一於試試好唔好食啦。 當日去到已經係下晝3點，但係店內人客都唔少，睇黎都幾受歡迎。 我叫左個都幾重量級既沾麵「極上Raclette芝士龍蝦沾麵」（$168）。 等左一陣食物上檯，龍蝦size唔係講笑，大過隻手掌🤚🏻。 面頭鋪滿熱溶芝士，芝士帶微鹹香濃。 撥開芝士，原來裡面填滿左蟹子，好驚喜。 龍蝦多肉，肉質結實，絕對係真材實料。 呢度既沾麵標榜係用日本小麥粉製成既粗麵，所以咬落有微微小麥粉味，麵質彈牙，口感一流。 沾麵既湯都好好味，係用龍蝦餚制而成，非常重龍蝦味。湯比較杰身，掛湯能力高，令每一條沾麵都可以沾上龍蝦精華，非常惹味！ 值得一提既係裝住湯既碗係用熱石碗裝，上檯時d湯仲係滾既，咁就可以keep住d湯唔會好快變凍而變得杰身，萬一湯凍左都可以叫職員幫你換另一隻熱石碗。 另外食物上檯時店員會主動俾埋一個龍蝦鉗。細心位加分！👍🏻 個人幾鍾意佢既麵質同湯，用心經營既餐廳可以從食物質素中反映出黎，而呢間沾麵專門店值得一試，之後都一定會回頭。

唔知由幾時開始，賣手作餛飩既餐廳係香港開得越來越多，淨係我公司附近呢一個月已經新開左兩間。今日行開尖沙咀，估唔到係厚福街呢條食街都隱藏住一間。見佢裝修都幾新淨光鮮，作為一個餃子餛飩愛好者，當然要去試一試啦。 餐牌簡單，選擇唔多，主打手作餛飩有三種味(鮮肉、薺菜、香菇鮮肉)，有分大、小size。 除左餛飩，另外仲有各式飯麵同小食。價位大約$40-50，價錢唔太貴。 第一次食當然要食佢既招牌菜啦。 我叫左全家福小餛飩(18粒)，即係三種味都有哂。其實唔好俾18粒嚇親，因為好細粒，一口一粒無難度。 我之前都食過其他店既呢類餛飩，同呢一間一樣，佢地同我地平時食開既廣東餛飩唔同，餛飩皮呈半透明狀，用肉眼已經可以分辨三款餛飩。咬一口，餛飩皮富彈性，無廣東餛飩皮的梘水味。 味度方面，三款餛飩都好出色。豬肉新鮮，而薺菜係野菜既一種，味道濃厚，翻查資料，原來薺菜營養和藥用價值。香菇鮮肉餛飩味道香濃，感覺好似黑松露個種濃郁程度，整個口腔都充滿住濃濃的香菇味。湯底就比較普通同淡，如果個湯都可以有d特色，咁就完美啦。 整體黎講係可以一試既餐廳，下次有機會再食，都係叫返啖啖肉有咬好既大餛飩好d。XD

石燒牛排係呢一兩年越開越多，一般比人既感覺都幾貴，但今日竟然俾我發現係深水埗都開左一間，而且價錢唔貴，最平$80有交易，一於擔當試伏器試下有無伏先。 一入門口右手邊就會見到有部係日本常見既自助點餐售券機，點選自己喜愛既牛排之後就入錢，最後將單據交俾店員就入座慢慢等食。 餐廳走日本風格，門口有大大個紅色燈籠，用餐部分就以紅色為主調，牆身掛有好多日本風既旗幟，播著日本流行音樂，彷彿置身於日本。 餐廳採用半自助形式服務，設有自助區供應沙津、白飯、牛肉湯、醬料，檸檬水。餐具亦都擺放左係呢一區，記得食之前係呢度拎定啦。 好快食物就送到檯上，滋滋聲既牛排上有一塊用竹籤串起既廚房紙巾防止D油彈落身上。 今次我叫左「牛肩肉眼180g」。 牛肉上檯時已經燒左一成熟，裡面仍然係生的，客人要自己用石板上既熱力將肉燒到自己喜愛既生熟程度。 呢塊牛肩肉眼帶少少脂肪，咬落好嫩同juicy，肉味好濃，以呢個價錢黎講絕對係有驚喜。 切成小塊後好快已經熟左，但係牛肉依然好嫩口，一D都唔鞋。 自助區供應三款醬料: 自家製燒汁、黃芥末、辛味燒汁。 另外每張檯上面都有黑胡椒同岩鹽供應，但係個人覺得唔洗點任何醬都已經好好味。 180g對女仔黎講已經好夠，另外只食左一碗白飯同一碗沙律，飲左兩杯水已經好飽。 總括黎講，牛極係值得下一試同會回頭既餐廳。👍🏻