每逢想平平地吃日本菜，便會和家人到這裡來。叫了三個定食。

生薑燒豚肉定食：來到的時候，已經有少少凍了，而且同牛肉烏冬好似，又係洋蔥同肉，下次都係唔好同時叫這兩樣。

鹽燒鯖魚定食：很肥美，剛燒好便上碟，熱辣辣，皮重脆脆地，配埋白飯，好吃！

壽司加牛肉烏冬定食：壽司幾新鮮，牛肉烏冬我覺得很好吃，但媽媽嫌湯太肥膩了一點，而且配菜只有洋蔥，食少少便有點滯。

甜品是啫喱，比以前有進步。

地震以後，每次來也即刻有位，希望它能頂得住！

本來想吃火鍋，但是七時去到，火鍋已經暫停，唯有轉吃美國牛扒鐵板餐$48，另加意粉$6。

以前吃過幾次，還可以。但今次的牛扒，大塊就幾大塊了，但很薄，沒有牛肉味，差了。羅宋湯：OK。意粉：有一點蒜蓉味，OK。下次要早點去吃火鍋。

我在這裡吃了五次，水準也沒有甚麼變化，都是OK的。每次都是吃特盛牛肉飯和鯖魚。

牛肉：OK，缺了小小牛肉味。

飯：有咬口。

鯖魚：有一點腥味。

洋蔥：很薄。

結果，有驚喜！ 幾好吃。

Sorry, I forgot to take photos.

炒麵：普通，沒有驚喜。

豬肝粥：豬肝相當新鮮，粥很綿很可口。

魚皮：的確很爽，但是有點橡膠感，有點失望。

魚腩粥：魚腩有鮮味。

五香咸肉粽：的確好吃，咸蛋和味，豬肉可口。

（注意：好多相都係食左Ｄ先記得影相。）

當灣仔人家仲係灣仔道嘅時候，頭一次食陳皮香酥骨簡直係一吃難忘，陳皮嘅幽香入晒Ｄ排骨度，令人拍案叫絕。仲有鹽焗雞，係我個奄尖爹哋罕有叫好之作。之後再去過幾次，但係正如其他私房菜一樣，相同菜式食多幾次就會悶。後來想再去發覺已經結業，失去聯絡。最近朋友請吃飯，先發覺原來搬左黎呢度，改左名叫“富家粵菜”。中秋節同爺爺嫲嫲做節，就揀左黎呢度食。

因為要就埋其他屋企人，所以早左一日做節。11大3細叫左個十人餐，有勝瓜魚尾湯（本來係蜜瓜螺頭雞湯，因為屋企人感冒，所以改左），鮑汁鵝掌生菜，招牌頭抽浸雞，陳皮香酥骨，燒焗法國鴨胸，生煎蓮藕餅，古法炆柚皮，生炆龍躉斑翅，魚湯灼浸時蔬，鮑汁炆玉米麵，蛋白杏仁茶。另外加左咕嚕肉同生炒糯米飯。

勝瓜魚尾湯：有驚喜，勝瓜加埋一種不知名菇嘅香味，令到個湯好清香，正。

鮑汁鵝掌生菜：得十隻唔夠分，客戶經理簡小姐好體貼咁攞左兩碟鮑汁撈玻璃生菜俾工人姐姐。鵝掌好冧好入味，剩番Ｄ鮑汁我攞左黎撈白飯，唔好嘥。

招牌頭抽浸雞：因為感冒唔敢食，但係屋企人話好得。

陳皮香酥骨：反而好失望，雖然肉質唔錯，但係陳皮味完全欠奉。

燒焗法國鴨胸：嫩滑，食神嫲嫲話覺得好似係新鮮鴨胸，咁講已經係俾左好高分。

生煎蓮藕餅：開頭以為落左鹹魚，因為食落有Ｄ地方好鹹，但係簡小姐話無落鹹魚。可惜。

古法炆柚皮：相對黎講平凡左Ｄ，而且我食到有少少酸味。

生炆龍躉斑翅：加左豆腐炆，個人覺得如果可以加Ｄ爽Ｄ嘅材料會平衡Ｄ，因為龍躉皮比較膩，但係 overall 都算幾好。

魚湯灼浸時蔬：俾左白菜，好有菜味，我食到停唔到口。

鮑汁炆玉米麵：其實好似米線，個人唔係咁鍾意，因為唔鍾意個種滑 lut lut 嘅感覺，而且我覺得有Ｄlung 味。

蛋白杏仁茶：好香，真材實料。

咕嚕肉：食嘅時候外皮仲係脆嘅，但係Ｄ肉好似無乜味。

生炒糯米飯：唔油膩，材料好，爹哋大讚，添食左幾次。

個餐本身$2398，加左咕嚕肉同生炒糯米飯，埋單$3300。

其實呢度食物同服務都好有水準，雖然有Ｄ餸我無俾“正”，但係係同佢地自己比，如果同其他食肆比，呢度已經好好多。招呼我地嘅侍應哥哥好細心，簡小姐又好熱情咁幫我地張羅車位。但會唔會又係墮入私房菜去多幾次就會悶嘅困局呢？

呢間 Delifrance 係地庫 food court 隔離，大部分的檯都係擺左係出面，空間感好好，坐得好舒服，而且我一向鍾意食法包，所以都經常幫襯。

三個人叫左兩個套餐，有雜菜湯，忌廉湯，白汁吞拿魚法包，白汁煙三文魚意粉，同兩杯飲品。雜菜湯比較淡，忌廉湯就香濃好多。白汁吞拿魚法包餡料好滑又唔會腥，加埋生菜番茄好清爽，白汁煙三文魚意粉夠煙韌，醬汁都造得唔錯。

食完再加了一個蘑菇吞拿魚酥，個女經理好好人，特登當我地外賣，平幾蚊。夾埋總共100蚊鬆D。

星期日同朋友一家食飯，佢地住太古城，就近去中心食。本來大人諗住去西苑，但係朋友兩個細路強烈要求去王家沙，咁梗係聽小地頭蟲講啦。

四大三細叫左欖菜四季豆、雲吞雞、蔥爆羊肉、蔥油拌麵、蒸饅頭、牛肉餅、砂鍋鹹肉菠菜炒飯、小籠包、豆沙鍋餅。蔥油拌麵最快黎，呢樣亦係朋友兩個細路嘅至愛，掛住食，又係剩番兩箸先記得影相，入門食家即係入門食家。 除左大量蔥花同熟油，碗麵仲有Ｄ較過嘅豉油，甜甜地好香好好味。

欖菜四季豆同蔥爆羊肉都幾有鑊氣；雲吞雞每人都分到一碗，湯味好濃郁，雲吞唔錯，雲吞同小籠包嘅餡，應該都係鮮肉做。牛肉餅係朋友推薦，好好味，但係咁啱我地食個件入面無湯汁，如果唔係我諗會仲正。蒸饅頭我無試，但係細路食完想encore，應該都好味。

叫砂鍋鹹肉菠菜炒飯係因為有張推介話係必食，但係反而最普通，飯雖然炒得乾身，但係成碟飯無乜味，很一般。豆沙鍋餅唔油，幾香口，而且甜度適中。

埋單$560。我覺得比起其它我去過嘅分店，呢間算最好。兩個細路都算無介紹錯，大個可以做食家。

傍晚到柴灣探婆婆，就近去杏花村稻香食飯，因為生飛滋，所以無食火鍋。

三個人叫三個餸，唔想食太多肉，所以叫左兩個海鮮：茶菇煎炒象拔蚌（$68），潮煮廣島蠔（$58），同一個小食蜜燒排骨（$38）。飲品同甜品係自助吧，每位五元任添，一叫就要人頭甘計，fair enough。自助吧有汽水、酸梅湯、夏枯草、雪梨茶，甜品有紅豆沙、紫米露。

先黎蜜燒排骨，排骨肉質都唔錯，蜜汁幾香甜，所以食左三分二碟先醒起要影相。

跟住黎茶菇煎炒象拔蚌，呢個夠鑊氣，D醬好惹味，送飯一流。茶樹菇同翠玉瓜都可以，唯獨是象拔蚌比較韌，鮮味都唔係好夠。

最後黎潮煮廣島蠔，都等左幾耐下，原來潮煮即係用豆醬煮，一試好意外﹣﹣好辣，再食多少少，辣到頂唔順！搵勻成碟，有一片辣椒，真係估佢唔到，唔通就係呢片辣椒出事？即刻同部長講，好在佢都無托手踭，同我地換過碟走辣椒、走胡椒粉既。跟住又要等，卒之係我地話要取消後就即刻黎左。廣島蠔都幾好，又唔會太大隻，豆醬中芹煮幾有新鮮感。

開頭叫左兩個飯，原來係蒸砵仔飯，好正，想再叫時已沽清。

埋單＄286，有兩個海鮮，每人仲飲左兩杯飲品，一碗糖水，都算係甘。

家人在附近返工，但一路都無留意呢間餐廳，最近上OpenRice，發覺幾多好評，就去試下。

七點鐘去到，鋪面已經滿座，以為要等，點知佢地招呼我地一路行去後面，原來仲有兩間房響個度，有八、九張檯。

三個人叫了個$288二人套餐，再加一個我的至愛牛肉烏冬。先黎蟹子沙律，我一向唔係幾鐘意食，所以無乜特別感覺，只係覺得不過不失，而且青瓜絲好似雪左好耐，已經無乜鮮味，蟹子又有D腥味。呢碟最後都食剩。跟住黎的刺身同壽司就好新鮮，每樣有六件，特別係有種白色的刺身，好肥美，唔記得問佢係乜野魚。麵豉湯就很普通，無乜味。

燒西冷扒或燒黑豚肉，我地揀了前者，要七成熟。扒的用料唔錯，吃下去還有肉汁，伴碟的沙律菜都好味，yummy 。三文魚炒飯（可揀冷麵）仲正，炒得好有鑊氣，飯粒乾身，三文魚同蛋好香口。芝士焗生蠔（可揀吉列生蠔）size適中，幾新鮮，芝士味道都唔錯，但係稍為有少少出水。另加的牛肉烏冬都好好，湯底香濃，牛肉有鮮味。啫喱就很差，開得好稀，完全無味，而且份量奇少。

總括來講，食完有D意外驚喜，thumbs up，連我那個要求高的爹哋都話好，用料唔錯，個廚幾有誠意，而且好抵食，如果再少一點味精就perfect（雖然佢唔係用得多，但耐何我好敏感！），希望佢能保持水準。

招呼就有天堂同地獄之比，有個阿姐好好人，但係大部分時間都係一個非常黑面兼同佢講野完全唔會俾反應的阿姐招呼我地。

爹哋成日讚大家樂水準穩定，所以想快又唔知去邊到食好嘅話，就會去大家樂。

今日去左北角健威坊嗰間，叫左冬瓜盅＋梅菜扣肉菜飯套餐同一碟蜜汁叉燒飯。大家樂最抵讚係佢的服務，我地食完冬瓜盅想食菜飯時，發覺非常冰凍，羅去櫃檯想叫佢幫手叮熱，佢地二話不說換過一碗俾我地。

最好味係碟蜜汁叉燒飯，大家樂的燒味真係一直保持高水準，好野！唔記得話要半肥瘦，如果唔係仲正。但係得一條小棠菜就孤寒左D，雖然佢D菜麻麻地。

套餐比較弱，冬瓜盅雖然味道幾好，但係味精都唔少。梅菜扣肉，扣肉唔夠冧，相反梅菜就無乜咬口，最好係菜飯，好香。

爹哋俾錢，套餐好似$40幾，叉燒飯$26。