最近做左件好耐無做既事 - 食放題！

當然，我所揀選的地方，肯定有番咁上下質素，絕對唔會係填肚既貨色。

呢間新開的肉佐，主打壽喜燒 + 涮涮鍋放題，同坊間大部份的放題店的玩法大同小異，都係有分級數，吃不同的東西。

簡單說，劃分左五級，頭嗰三級係食九十分鐘，牛肉是美國貨。以我既性格，一係唔食，要食就食好啲，所以就要左最高層次的第五級，三小時任食，有齊最靚既A5和牛，同埋海鮮、壽司及刺身。先會送來每人一份的壽司，包括有和牛與及大中拖羅，估佢唔到放題店可以食到如斯高質的壽司。一份唔夠喉既話，仲可以QR Code再自行下單，都係食到你夠為止。另外都點了些刺身，又帆立貝又三文魚等等，當中的劍魚爽身好食，最為出色。一些前菜小食，菜蔬及丸類，同埋飲品，都係外面自己拎。吃罷刺身壽司，就出去兜個圈睇定有咩心水。好了，還是留肚吃壽喜燒及涮涮鍋最為實際。先以壽喜燒形式，各式肉類如豬牛以雞吸收了壽喜燒汁的甜味，都吃得過。牛肉一於食最靚的，仙台A5霜降黑毛和牛肉眼，看雪花紋理都深知是頂級貨色，不論是壽喜燒，抑或係涮涮鍋的吃法，都是入口溶化的絕等美味。山形縣的藏王和牛上肉，都唔講得笑，不讓仙台牛專美。海鮮嚟講，都有松葉蟹、帆立貝、鮑魚以及蠔等，唔係只得肉類既選擇架！飽左大半，有人仲拎沖繩午餐肉回來烚烚下，我就食少少菜蔬，心理上平衡下，之後再向甜品進發。其中一款我認為必食的甜品，係梳乎厘班戟，因為要30分鐘時間製作，建議大家預早少少以QR Code落單。其實，在放題店食到呢個鬆軟的班戟，真係好難得。最後食埋百味堂既雪糕，想唔捧住個大肚腩回家都好難。

尖沙咀商場眾多，不過以我個人習慣，要搵食既話，多半會去各大酒店、海港城，以及K11 Musea，其他的則甚少到訪。

其中少之有少的，可說到I Square，若不是朋友相約，我差點兒忘記了這個Mall。

是夜朋友介紹來的潮藝館，平日晚上都有九成滿，看來店家是有一定實力。朋友點餐，選來的都是傳統口味的菜色，當中肯定包括外脆內嫩、味道咸香的普寧豆腐，簡單美味。翡翠蟹肉羹，以火熱住保持溫度，是細心位。湯頭夠熱其實已經無得點輸，加上蟹肉在內，漓淡而不至食之無味，喝得舒服。平時食鹵水嘢，十之八九會吃鵝片，今云改改口味，又墨魚又腎。兩者不同的爽脆口感，同樣討人歡喜，精華從來在於墊底的豆腐，入晒味。西芹雞縱菌炒蝦球，勝在用料上乘，蝦球身型有番咁上下之餘，爽口彈牙。春菜排骨煲，又是一味懷舊菜色，春菜清淡甘香，軟嫩無渣，底下的蘿蔔腍身入味，啖湯更加合我心。甜品前來個蠔仔肉碎粥，有時在外邊食到的，蠔仔份量像要尋寶般，好似彩數。呢度就來得慷慨，隻隻漲卜卜，飽滿味鮮，米粒開花但不太胡爛，我包辦了大半。嘆埋最後像花般美的糕點，又係抱著個肚歸家既一夜。

見呢度有任食點心，有機會可以來一試。

話說已有十多年沒到Cafe Too食自助餐，難得有人吹雞，一呼百應，齊齊渡過Happy Friday。

先總結一句，食物款式仍然多，水準依舊地高。嚟緊母親節父親節，甚或是佛誕假期，我決定同屋企人再來一次。

唔打算係度花一萬幾千字逐款食物介紹，重點講些我認為值得推介的項目吧！海鮮絕對是強項之一，冰海鮮是基本，仲有蒸海鮮。龍蝦有清蒸同埋蒜茸蒸，用料新鮮，若然你係海鮮迷，胃口又夠大的話，建議你兩款都試，自行作個比較。蒸龍蝦吸引，但我覺得更加精彩的是蒸大頭蝦，隻隻肉爽甜鮮，尤其是蝦頭，大啖吮下去，爽皮！凍海鮮既話，凍蝦、蟹腳、花蟹、翡翠蝦及蜆等，一應俱全，其實食完蒸龍蝦蒸大頭蝦，再吃點凍海鮮，已飽了一截。然而，海鮮環節其實未完，因為海蝦呀，魚呀等等，還可以拿給師傅，即場表演鐵板燒，火光熊熊，香噴噴，視覺味覺及嗅覺三重享受。未完未完，熱葷仲有唔少海鮮，包括惹味的豉椒炒蜆、辣酒煮花螺等，要提一提佢既小炒皇，大蝦、魷魚鬚和韭菜花，炒得寧舍吸引，直頭要encore。海鮮以外，還有其他好嘢。燒味當然有油雞、叉燒等，但更值得品嚐，是燒鵝，因為是與米芝蓮星級食府一樂合作。食自助餐可以任食埋名店燒鵝，仲想點?刺身壽司間間酒店自助餐都有，不過呢度都係升級版，因為有供應藍鰭吞拿，真係唔嘢少。個人而言，幾中意食點心，就算是自助餐的出品，我都總會試幾粒。估唔到佢蝦餃同埋燒賣都咁食得過。我會說，甜品係呢度既另一強項。款式多、賣相靚之餘，總體味道都好唔錯，法式蛋糕的選擇尤其豐富。叮叮叮叮...！ 聽到叮叮聲響，就是要提大家出來拎的甜品，火焰雪山，師傅即場做出火焰效果，俾大家影相拍片，之後梗要乖乖排隊，拿一件回去細味。夾餅與雞蛋仔，是千祈千祁唔可以錯過的，因為是與我最最最喜歡的品牌低調高手合作。要時刻望實，一有新鮮整好，即刻攞番底，無得輸。講多句，佢既雞蛋仔，有原味以及咸蛋黃口味，個人認為，後者更加優勝。果汁檸茶等飲料請自便，要講講，呢度仲有珍珠奶茶，認真誇張。

潮流興懷舊。不時都有年輕一輩問我邊度有好既手工菜食，正好最近我係九龍酒店既龍逸軒吃過一系列的功夫菜，值得跟大家分享下。

餐廳有個懷舊手工晚宴的套餐，齊集焗魚腸、蝦子柚皮、炆斑翅及八寶鴨等手工菜，一次過滿足晒大家對手工菜式既慾望。套餐由大紅香芒乳豬打頭陣，八位用的套餐當然不會是全體上，但乳豬及香芒片砌得恭恭整整，依然吸引。酒店始終有自己既燒味部，自家燒製，成品是預期的皮脆肉香，是晚的芒果亦十分甜美，好吃。套餐總離不開湯品，菜膽螺頭燉海參，有原條粗大的海參，相當足料，湯頭也是甜到一個點，畢竟酒店中菜廳的湯水，都是信心保證。香煎蠔沒想像中的大隻，不過用上頭抽來煎香，香氣真的誘人，吃起來邊位帶微脆。炒桂花翅，雞蛋、蟹肉、金華火腿及素翅等，炒得乾身香口，可見師傅功架。八寶鴨是全晚我最期待的菜式，咸蛋黃、蓮子、薏米及糯米等餡料，滿滿的塞入鴨殼之內，吃起來沒膩滯的感覺，但又夠香夠味，記緊一定要連鴨皮同吃，會滋味很多。枝竹豆腐炆斑翅，用上了腩肉及蒜子的古法製作，味道寧舍好。師傅更細心地加入了枝竹及豆腐兩樣索味的東西，讓大家可以味盡所有精華。一如席上的朋友所說，焗魚腸以前在大排檔都可以嚐到的菜式，如今已買少見少。吃這味，我的要求很簡單，就是要夠熱夠香，同埋唔腥。呢度既出品，符合我期望，一點腥味都沒有，我連胡椒粉都唔使落。蝦子柚皮，質感幾好，沒帶半點苦。就是甜品都係懷舊的菲林筒，與及西米焗布甸，前者帶有濃郁的芝麻香，西米布甸如果可以再焗燶多丁丁點，僧更合我心。

一次過嚐盡多款手工菜式，這夜，滿足了。

去到我呢個階段，早已不怕什麼暴露年齡。話說我最常光顧翠亨村的日子，是咸豐年前既事，當時仍是綠白格仔的經典枱布，美麗華酒店剛轉名做The Mira。

然而，不知何故，近年甚少到訪翠亨村，睇番我自己Blog既紀錄，對上一次，已是疫情剛開始之時，與友人們來吃片皮鴨。

濶別數年，難得有機會再訪，真心期待。 是夜品嚐了一系列的順德菜色。打頭陣的順德魚雲羹，師傅刀功細緻，湯羹味道清鮮，魚雲嫩滑，最皇要是熱度足，喝得舒服。 黃湯龍蝦煮陳村粉，用上澳龍已無得點輸，肉質鮮甜，墊底的陳村粉細滑又索盡汁醬，更是精華所在。 鍋貼牛奶與煎魚餅乃翠亨村多年來的招牌菜色，魚餅記緊要沾蜆芥吃，滋味倍添。鍋貼與牛奶貼得緊緻，一邊鬆脆，一邊香滑，多年來水準依舊，抵讚！ 銅盤蒸原味雞，做得嫩滑，味道家常，平凡中見真章。 與魚餅有點近似的生煎鮮蝦豬肚餅，餡料更豐富，煎得更香口，同埋呢個組合，真係第一次見識。 不過要論全晚最讚的，必要數到油泡黃金冧哥魚。賣相有幾分像筍殼，吃起來香脆肉嫩又唔多骨，精彩。 甜品就是簡簡單單的馬拉糕拉倫教糕，只小小的一件，滿足一下甜胃。

約左幾位朋友食飯，佢哋都中意飲番杯，我即時想起銅鑼灣的Day Moon，原因好簡單，家陣呢度逢星期三及星期日，有$98飲任清酒的Package。

以為呢個場唔會太多人，好彩有訂位，否則明天請早。

大家點完嘢食，便開始飲了，摸住酒杯底吹水既時光，近幾年已少之有少。先來些刺身壽司，吞拿魚當然是少不了。赤身、中拖與大拖羅，三款各有其吸引力，朋友愛赤身的爽口，面我則從來喜歡脂香四溢的大拖羅。另外點了吞拿魚中落，即係痴住中間嗰條骨，算係幾岩打卡的東西。各人自行用殼刮啲魚肉出來吃，炒熱現場氣氛，大家老友鬼鬼就吃得更加豪邁。呢味送酒亦絕對合適不過。壽司只選了兩款，分別是金目鲷，與及左口魚邊。平時既我，多半會投油香充盈的左口魚邊，但佢個金目鲷又幾爽身。佐酒的話，平常都會吃魚鮫，不過今次見佢有罕有的下巴位置，就來一份，畢竟唔係成日有機會試到。幾香口的，與魚鮫的質感也有幾分相似，因此都是非常稱職的酒盜。此時的我們，大概已喝了N咁多杯。各自選擇了想吃的串燒，雞翼肯定穩陣，事實也是皮香而有肉汁。免治雞肉串醮上了生蛋黃，自會美味。另外大家還柯打了五花肉、白燒鰻魚及青椒等，總之就是佐酒佳品。怎樣也好，都要有點甜才覺圓滿。刨冰底下有奶凍作基底，師傅幾鬼馬。而士多啤梨拿破崙，正是近期大熱，圓碌碌的出品。

真正的飲飽食醉之夜，今時今日，盡興最緊要。

短期內未有再去日本的打算，不過日本嘢依然是無時無刻都想食的，如果癮起的話，就留係香港食吧！

近期係社交平台見到有人食過呢間甘味處鐮倉的刨冰，相片好吸引，就趁是夜經開銅鑼灣，拉埋朋友去食番個。
刨冰款式都唔少，但你說我食古不化也好，始終覺得宇治金時是最穩陣。

抹茶味道醇和而不太甜，質感軟綿清爽，白玉丸子與及紅豆跟抹茶從來是最佳拍檔，天時暑熱吃一個，透心涼！
單吃一個刨冰是滿足不了我們的，朋友是蕨餅迷，就要兩款出品睇下水準如何？
原味與抹茶蕨餅，兩者都做到鬆軟帶煙韌，有點點像啫喱狀的感覺。平日既我，多半會選原味，但今次個抹茶也出色，我會投後者一票。
淺川園抹茶飲料，清香而不會過份的甜，底下還有滑不溜口的蕨餅，令成件事更突出。嚐了一口朋友的草莓朱古力奶，同樣是有蕨餅墊底，我覺得更加正。

食甜嘢食到抱住個肚走，好耐無試過咁瘋癲~

週末的最佳節目，不外乎吃吃喝喝。

於筆者而言，暫時仍未有北上的意慾。留港消費，與朋友去酒店嘆個 Weekend Brunch，是我的選擇。

海景嘉福洲際酒店的The Mistral，由地庫搬左上一樓，變成真正的海景餐廳，來食個Brunch都寧舍寫意啲。跟坊間的Brunch玩法大同小異，頭盤凍海鮮Pasta及甜品任食任拎，悉隨尊便。主菜就係六揀一，肉類、海鮮，甚至素食均有得選擇。特別想提一提，呢度既紅白香檳與汽酒 Free Flow，只係加二百蚊，好抵玩！頭盤不外乎是各式沙律與Cold Cut等，但款式繁多，就是沙律都有紅菜頭、繽紛的茄子、水牛芝士伴番茄等等，用料新鮮，擺得靚靚仔仔，絕不欺場。Cold Cut既有風乾火腿、莎樂美腸，亦有牛仔肉片，同埋各式芝士。要讚的是連哈密瓜片都砌成花般，令人食慾大增 (定唔捨得食佢?)。凍海鮮款式不遜，凍蝦、小龍蝦、龍蝦、青口、蜆及阿拉斯加蟹腳一應俱全，而且質素不俗，最出色我會說是蟹腳，多肉，鮮甜。Pasta專區，師傅會炮製意大利雲吞、意大利麵、Risotto及凍湯等，麵條是手造，加埋濃郁芝士，口感贏晒。主菜分別按經理推介選來了燴海鮮，與及澳洲和牛拼鵝肝，前者是魷魚、蜆、青口、石斑、鱸魚及海蝦等大量海鮮，配個濃郁的龍蝦湯，畢竟用料全是新鮮，肯定穩陣，海鮮控相信會很喜歡。澳洲和牛採用牛柳部位，所以即使是勁厚身，質感仍然保持軟腍，配以甘香邪惡的鵝肝，食肉獸既筆者表示滿意。甜品件件吸引，但有幾款我認為是必試。朱古力慕絲，細滑而不膩；提拉米蘇處在質感，濕潤可口；巴斯克芝士蛋糕加入了松露，收畫龍點睛之效。其餘的如傳統既西西里奶油卷、千層酥交到功課。食埋杯Movenpick雪糕，來件馬卡龍配咖啡，週末留港消費，都可以好享受的。

疫情幾年，的確令香港人的生活習慣改變了不少，包括晚餐時間。

以往，七點幾八點晚飯好平常，但今時今日，好多人七點已開始吃，甚至更早，譬如我們今天的飯局。

主人家早已寫好菜單，人齊起菜！打頭陣的拼盤，鱈魚餃和嘉美海珍三丁餃做成不同顏色及形狀，但均做到皮不黏牙，餡料豐富味道好。另一款粗身像滬式脆鱔的東西，原來是冬菇，難怪口感與我想像有點出入，卻又幾好食，師傅有心思。葡汁雞粒酥，真的似雞仔在啄嘢食的樣子，造型維肖維妙。咬落酥化，葡汁令成件事更香，呢款點心，唔係得個樣。飯聚餐單總離不開湯水，花旗參石斛竹絲雞，打開盅蓋香氣四溢，足料是必然，花旗參亦沒預期中咁霸道，喝得很舒服。酥炸生蠔用上的是美國桶蠔，個子自然巨大。大啖咬下，香脆而內裡好Juicy，廚子仲好巧妙咁加入了海苔，令味道與層次生色不少。全晚的菜色都是位上，不過食雞又總要原隻拿出來才有體面。據聞是採用無激素的平原雞，雞皮唔會好厚，皮下脂肪少，而師傅拿控火侯亦好到家，肉質件件保持嫩滑。更吸引的是店家秘制之蔥油，令各位紛紛舉手要白飯來伴之。再來的都是雞，但完全是另一形勢呈現出來，因為是川椒雞。香到不得了，非常惹味，仲要加入左鵝肝，使唔使咁邪惡呀？簡單的一碗蝦乾肉碎浸菜苗，之後便是甜品環節，葛仙米雪蓮椰汁露的椰香十足，蛋撻是鬆脆的牛油皮，勝在夠熱辣，新鮮出爐的蛋撻必定好吃。

九點幾鐘食完走人，條街鬼影都無隻。

認識筆者既朋友，大概都知道我是帝京的常客，特別欣賞師傅將美食與文學文化的融合，令每道菜式都有其個人故事，你估真係咁容易架？！

總廚今期又有新搞作，大玩唐詩宴，我一定唔會錯過。

唐詩宴有分九道菜及十二道菜，心中當然很想試勻全部美食，但胃納話我知，要量力而為，九道菜對我來說已足夠有餘。 事不宜遲，一開波仙氣十足的頭盤分別有柚香冷麵、荷燻鯧魚，以及紅菜酥。爽脆之窩筍絲結合柚子清香，這道冷麵最好打開胃口。荷燻鯧魚香甜鬆脆，紅菜酥內除了紅菜頭，還有黑毛豬、菜脯及芝士等，香酥惹味。 杜秋娘的金縷衣各位肯定聽過，八頭鮑魚披上鬆脆的金縷外衣，師傅控制鮑魚的火侯當然很到位，咬落外鬆脆內軟嫩，伴以炸牛蒡及紫蘇葉，沾上以咸蛋黃、南瓜茸等打成的汁醬，邪惡又美味。是的，在營營役役的生活中，珍惜當下才是最實際。 花膠元貝鰂魚湯，清甜到一個點，花膠又是預期的大塊。古有杜甫以詩為畫，描述友人的惜別之念，今有總廚為客人烹調窩心的湯水，表達手法不一樣而已。 香煎比目魚色澤金黃，皮脆肉嫩，配合埋秘製的茄醬，來得迷人。 阿拉斯加蟹盒，上面加多粒黑金蒜頭，金元寶般的賣相，可想像到何期堅壯。事實上，蟹盒盛著的除了蟹肉，更有鮮蝦、露筍，以及水牛芝士焗至金黃香口，幾特別的配搭。 就是間場的啫喱，都充滿青檸茶的氣息，可見師傅的一絲不苟。 孟浩然的春曉，以雛鴿來作主角最合適不過，皮脆肉嫩又滿載鹵水清香的乳鴿，用手拿起大啖齒才夠滋味和豪邁。 師傅真係好嘢，諗到用極黑和牛尾配金不換來演繹李白的詠石牛，外型也有夠神似，佩服！口感尚佳的牛尾，最重要是結合恰到好處的汁醬，才令成件事更上層樓。 簡單直接以秋葵、海參及繡球菌烹煮而成的菜蔬，去演活白居易的烹葵，清甜好吃不花巧。 結尾的甜點，抹茶紅豆麻糬餅，做成中式的酥，伴以一件晶瑩剔透的玫瑰凍糕，太飽足太圓滿。

跟以往一樣，呢款唐詩宴都有Wine Pairing，包括特色的中國酒，嗜酒的朋友可留意。