我的確好憎食二手煙，所以唔會專登走去茶餐廳。不過係唯獨是呢間嘢係我的例外。

我欣賞佢整的炒蛋啦！多士啦！鮮奶燉蛋白啦！

炒蛋試過同人喺屋企玩煮飯仔玩過，發覺屋企真係整唔到佢個水準囉！( 唔係我都唔會食到念念不忘話要去返呢度食)

多士夠脆邊啦！又夠熱，加埋多牛油！一個字：正！

鮮奶燉蛋白我仍然都係鍾意嚟呢度食！嗰次去義順食，我食完第一啖都話：都係澳洲牛奶公司正d 咁！可能個人口味啦！我鍾意熱食，仲要係甜嗰隻~ 理由係：如果唔甜的話，我會覺得自己似食緊平日撈飯冇落鹽的蒸水蛋咁。XD

咁我覺得呢度d 凍檸茶對我來講係苦架！( 茶的比例偏多咗 ) 再飲朋友杯鴛鴦又好似好飲過我嗰杯~ :-P 梗係隔離飯香啦！

服務態度好迅速~ 咁我又唔會因佢咁樣而令到自己不自覺咁狼吞虎嚥食快咗啲！哈哈，咁起碼侍應們又冇企定定”謀”住我幾時先食完！同埋話晒呢度冇咩裝横，我去呢度係為醫肚就唔係食裝修，所以食完就諗住走，冇諗過要逗留喺度hae 住傾偈…

都習慣侍應們係咁架喇！話晒麻甩佬，好難要求到佢娘腔腔彬彬有禮，有基本適度的禮貌我已經會收貨！hee…

今餐係唔洗錢，朋友請~ 多謝！( 唔係唔洗錢，係朋友埋單我唔知幾多姐！^3^ )

第一次食。

我叫了個泡辣豚肉石頭鍋飯，香味濃郁，我覺得好好味。個鍋又夠熱，到食完就啱啱好，都覺好飽！我會ko 埋d 飯焦！hehe ~ 豚肉都幾好吖！冇so 味又入味！

朋友叫咗個正宗高麗石頭鍋飯，佢話好味，不過比起我個飯，佢話佢嗰個味道清d！

兩個餐前小食( 泡菜+ 酸瓜)

泡茶酸d 就好，o個酸瓜就okay :-P

set lunch 包餐飲、餐湯同甜品( 雪糕糯米糍—黑芝麻)，幾抵食喎！

無論接待或侍應，服務都很好。

環境很寬敞！我鍾意^^

兩個人假日撐枱腳，叫了四道菜。

小籠包：每次都例牌叫的。依然皮薄餡靚~ 我還未食厭！

上海粗炒：油就油咗少少，不過好好味。每條麵都根根分明，我出面食過有d 炒完都仲係痴埋一齊。同埋佢d 菜有落鑊一齊炒，出面食過有d 菜條係生的。咁成個餸冇炒到過火，有鑊氣，熱辣辣，很好。

南瓜鍋餅：超甜同漏！上次食個栗子南瓜酥好味得多囉！今次個鍋餅聞落好大陣滾油味，外面係就係好脆，但個餡撈埋紅豆蓉真係遮蓋晒南瓜味。

酸辣湯麵：麵底比阿拉麵館食的好，冇煮到過淋，啱啱好。湯底就…如果想一嚐真正酸辣湯的話，人多不如索性叫個酸辣湯會仲好。因為個麵的湯底得個辣字，冇酸味的，可能麵至係主角不宜湯底過酸呢！所以這個麵只適合我這種又貪心、胃口唔夠大又想飲酸辣湯的人XD

服務很好，只係忙d 咁姐！有不停斟水同有求必應，唔會扮睇你唔到咁。