韓國過江龍Terrace in seaside最近有新搞作，今次去咗Terrace in seaside x Care Bears 主題聯乘餐飲「Care Bears in Terraceland」，一共推出咗五款聯乘菜式，每款都好可愛同埋有驚喜，加上到處都係色彩繽紛嘅Care Bears 公仔擺設，充滿少女心，好適合打卡。 熊仔頭獅蚶拌飯 以Care Bears 熊仔頭造型好可愛，飯粒沾上韓式辣油，色澤均勻，飯粒粒分明，味道微辣，好惹味。螄蚶份量十足，螄蚶嘅鮮味同韓式辣醬嘅香辣味完美結合，另外配有幾隻大蝦，大蝦爽口彈牙。旁邊仲有爽脆沙律菜同埋香甜嘅濟州柑橘。 愛心傳播飯卷 聯乘餐飲用上韓國經典菜式飯卷，砧板上有熊仔頭圖案，可愛有心思。飯卷色彩繽紛，好似彩虹咁，漸變色彩好特別，材料有韓國米、紫菜、紅蘿蔔、青瓜絲同埋蛋絲，味道鹹鹹地，食落好脆口。 Care Bears彩雲窩夫 窩夫外脆內軟，蛋香味十足，配上幻彩忌廉同埋彩針糖作為點綴，好有夢幻嘅感覺，忌廉充滿奶油香，另外夾住香甜回甘嘅柑橘果肉，口感豐富。 Care-a-lot彩虹樂園蛋糕 以七色彩虹為主題，重現Care Bears繽紛活力嘅感覺，七彩蛋糕每層都夾有奶油，入口細緻，味道甜甜地，配上酸酸哋嘅砂彩虹軟糖條，造型營造出歡樂樂園嘅氣氛。 Starbuddies 紫薯南瓜冰 紫薯南瓜冰有藍、紫同埋黃色，層次感分明，飲品充滿香濃紫薯同埋南瓜味道，頂部嘅忌廉鋪滿咗蜜糖星星同埋彩針糖，口感豐富，飲到底部仲有珍多條，質感爽滑，味道清甜。 濟州柑橘乳酪 柑橘乳酪係招牌飲品，用上濟州特產柑橘，新鮮柑橘果肉配上乳酪打製而成，味道微甜清新，清暑開胃，上面仲有成個柑橘裝飾好吸睛。

今次去到ELEMENTS圓方水區有一間優雅高檔嘅韓國料理餐廳- Surasang 수라상 ，餐廳裝潢華麗高雅，以深木色為主調，餐廳燈光柔和亦都好有格調，座位方面舒適闊落，用木材去劃分唔同嘅空間，私隱度十足，牆身用上由韓國訂製嘅花紋牆紙，現代得嚟又保持住韓式傳統豪華風格，除此之外，呢度嘅韓國料理精緻又有水準，服務亦都唔錯。另外餐前店員會送上五種韓式前菜，包括泡菜、大豆芽菜、菠菜、辣魷魚等，味道酸酸辣辣好開胃。 韓牛大蔥卷配泡菜炒飯 韓牛非常高質，牛嘅紋理非常精緻，有豐富均衡嘅大理石花紋，包住滿滿嘅大蔥。韓牛大蒽卷同炒飯由店員現場烹製，唔洗怕過哂火喉，喺煎煮過程中，已經聞到牛肉香氣四溢。韓牛牛味濃郁，肉質juicy，入口即溶，裏面嘅大蔥滲透咗韓牛嘅油脂香味，味道鹹鹹甜甜，食落爽脆入味。店員將最後兩三塊韓牛剪成碎粒，加入泡菜同埋飯，加上炒牛肉剩低嘅油脂，炒成美味嘅韓牛泡菜炒飯，炒飯粒粒分明，每一粒飯都充滿牛脂香同埋泡菜香味，味道微辣。 烤風川鰻魚釜飯 釜飯係現今韓國流行嘅韓式日本菜之一，類似石頭鍋飯，加入韓國人喜愛嘅食材。釜飯上面鋪滿肥美厚肉嘅鰻魚，鰻魚油香豐盈，加上燒汁濃郁入味，肉質鮮嫩滑溜，帶有微微焦香，配上芝麻、蛋絲同埋蔥花，加埋惹味嘅韓式辣醬，撈勻嚟食一流，食到最底仲有香脆嘅飯焦，好美味。 韓式炸雞 韓式炸雞可以揀兩種唔同味道，今次揀咗蜂蜜味同埋芝士味，兩種炸雞外脆內嫩，充滿juicy肉汁，芝士炸雞芝士味道濃郁，蜂蜜味炸雞嘅表面佈滿蜂蜜味粉，味道鹹鹹甜甜咁，好開胃，而且仲係無骨，食落好方便，鍾意食韓式炸雞嘅一定會好滿足。 Snowing Night 餐廳特製cocktail由韓國清酒、青檸、果醬同埋冰塊調製而成，杯口上粘有一層鹽，味道酸甜，口感清爽，好開胃，飲落亦好順口。 柚子梳打 柚子梳打充滿柚子嘅芳香，底部有豐富嘅柚子肉，味道酸酸甜甜，梳打清涼可口，非常解膩。

剛踏入2024 ，PHI 聖誕主題嘅menu 仲可以食到，繼續充滿節日氣氛。今次去到位於旺角雅蘭中心嘅分店，方便就腳，餐廳以暖木系色調裝潢，環境舒適。餐廳主打梳乎厘Pancake、意粉、法式吐司、咖啡同埋各類輕食，種類繁多，今次一於試吓聖誕限定嘅Pancake。 聖誕老人拯救雪地裏的小熊 梳乎厘pancake淋上奶蓋，味道微甜，奶蓋上有幾隻等人拯救嘅小熊曲奇，好可愛，旁邊有聖誕老人同埋鹿仔糖果，仲有花瓣點綴，擺盤好有創意同埋心思，充滿聖誕氣氛。Pancake口感鬆軟，空氣感強，裏面有微微濕潤，帶有香濃蛋香，配上忌廉嚟食，非常幼滑。 聖誕龍蝦扁意粉 龍蝦肉質鮮嫩彈牙，鮮香四溢，扁意粉軟硬度合適，口感煙韌富有彈性，意粉亦好掛汁，每條意粉都充滿濃厚龍蝦汁同埋奶油味。 Lotus海鹽焦糖法式吐司 金黃色嘅法式吐司有烘過，口感外脆內軟，充滿焦糖味同埋牛油香，加上雲呢拿雪糕，有冰火交融嘅感覺，雪糕上面嘅Lotus餅乾口感酥脆，亦有肉桂焦糖嘅香氣，吐司配搭咗香甜鬆軟嘅香蕉，旁邊仲有焦糖脆脆，味道微甜，口感豐富。 小熊的朱古力泡泡浴 聖誕限定飲品，賣相可愛，忌廉上面係幾隻得意嘅熊仔曲奇浸緊泡泡浴。凍朱古力味道濃厚香醇，口感順滑。 Matcha Latte 抹茶鮮奶入口順滑，抹茶味道香醇，帶有濃郁抹茶回甘香氣，奶味亦好濃郁。

Weekend下午同朋友去咗Black Coffee，位置喺旺角廣華街角落，旺中帶靜，假日吸引咗唔少人光顧。餐廳裝潢以全黑色為主，型格又神秘，門口無任何招牌，非常低調，餐廳內有一大片落地玻璃窗，整體空間感好大，透光度十足，另外呢度嘅食物幾高質。 自家製番茄醬炒意粉-配慢煮口水雞扒 意粉配中式口水雞扒好fusion特別，慢煮口水雞味道微辣，麻味香濃，雞皮煎得焦香帶脆，肉質嫩滑軟腍多汁，味道唔錯，配上酸酸甜甜甜嘅蕃茄醬炒意粉好夾，意粉亦沾帶有少少麻辣嘅味道，好開胃。 手打牛肉及原隻大蘑菇漢堡配薯條 個漢堡疊到好高，材料豐富飽滿，手打牛肉厚身，牛肉味濃郁，配上半溶芝士好邪惡，加埋大蘑菇食落好Juicy，黑色竹炭麵包焗得香脆，內裏鬆軟，加上新鮮嘅生菜同埋蕃茄味道好Fresh 。粗薯條即炸熱辣辣，炸得鬆脆之餘仲帶有香濃薯味。 自家製青蘋果拖肥金寶醬班戟 最後點咗班戟作為餐後甜點，嚟到個班戟震騰騰咁，好生動，班戟表面淋滿咗拖肥醬汁，好吸引。梳乎厘班戟做到口感軟綿綿，空氣感強，裏面微微濕潤，帶有豐富蛋香，拖肥醬汁味道甜甜地，旁邊配上咗烘焙過嘅青蘋果粒同埋鬆脆金寶粒粒，口感層次豐富。 Maccha Latte 宇治抹茶鮮奶嘅拉花非常用心，拉花係一個鸚鵡，翠綠鮮艷顏色，非常適合打卡。Latte入口順滑，帶有濃郁甘甜嘅抹茶香氣，澀味恰到好處，奶味亦都好香濃。 Mocha 摩卡咖啡拉花亦非常用心，拉花係一隻鷹，好吸引。咖啡嘅口感豐滿，咖啡嘅苦味同埋朱古力嘅甜味互相融合，有咖啡嘅香氣亦有朱古力嘅順滑。

踏入聖誕節前夕，都會有好多聚會，今次二訪銅鑼灣𤅗豐放題料理專門店食放題，位置好方便，𤅗豐有多達180種港日泰菜式混合放題，款式豐富，仲有前菜、甜品飲品自助區，啱晒想試唔同菜式嘅朋友。環境方面，放題嚟講幾舒適闊落，另外呢度用QR code落單，而且上菜嘅速度幾快，而且見到平日晚上都爆場。 刺身拼盤 拼盤上枱時噴曬煙好澎湃吸睛，魚生刺身豐盛，種類繁多，包括有三文魚、赤蝦、醬油吞拿魚、希靈魚、油甘魚、赤貝、八爪魚、冰山蚌、鮑片、北海道角螺等。每款刺身都好新鮮，三文魚腩肉質肥美；赤蝦大隻新鮮，肉質爽彈，蝦頭仲有唔少蝦膏；冰山蚌肉質飽滿，口感鮮嫩爽脆。 海膽帶子 將海膽夾喺帶子裏面，帶子粒粒鮮甜彈牙，海膽呈金黃色，味道甘甜，口感creamy，入口即溶，兩者加埋一齊好鮮美。 生蠔 每隻生蠔都好大隻同埋新鮮，餐廳定期喺唔同國家進口新鮮生蠔，今次嘅生蠔帶有少少海水味，肉質鮮嫩，蠔味好重，味道鹹鮮甜美。 泰式料理 除咗日式料理外，仲有泰式料理，熟食方面點咗飛天通菜，通菜翠綠，新鮮爽嫩，味道微辣，好有鑊氣，口感一流，泰式炒菜好值得推介。另外仲有乾炒泰式金邊粉同埋冬陰公蝦湯，款式豐富。 炸物 大蝦天婦羅嘅炸衣薄而鬆脆，食得出內裹大蝦鮮味；八味黃金豆腐一口一件，粒粒炸至金黃，外表鬆脆內軟，豆腐味濃郁。 燒物 泰式燒元貝大隻厚肉，加咗蒜蓉提鮮，元貝惹味彈牙；炭燒豬頸肉Juicy，口感焦脆；串燒沙嗲雞肉燒至微焦好香口，肉質嫩滑；七味雞軟骨粒粒都口感香脆。 松葉蟹杯 蟹杯上面放滿松葉蟹肉、裏面仲有蟹籽、蟹膏同埋壽司飯，雖然細細杯但好足料，蟹肉肉質鮮美，蟹籽爽口，配埋蟹膏食好惹味。 涼菜 冷盤口水雞皮爽肉滑，微辣香口；尖椒皮蛋晶瑩剔透，口感彈滑，食落微辣好開胃；另外自助區可以拎涼拌海蜇絲、中華沙律、芝麻八爪魚、泰式酸辣鳳爪、付味螺肉等等小食，全部屬於開胃前菜，好吸引。 飲品 飲品種類繁多，韓國嘅罐裝飲品好多選擇，有樂天忌廉溝鮮奶，口感香甜順滑，仲有芒果汁、鮮蘆汁薈，另外有香港嘅維他檸檬茶、菊花茶、道地茶類飲品同埋楊協成飲品，仲有幾款唔同品牌嘅啤酒。 甜品 自助區嘅甜品種類多，有香港製造嘅CoCo Berry雪糕，有雲呢拿、朱古力、咖啡、綠茶等口味，另外有蛋糕切餅、糯米糍、布甸、維他奶山水豆腐花等提供，食完甜品為今次放題畫上完美嘅句號，好滿足。

嚟自韓國仁川咖啡店品牌Sips;;lban最近登陸海港城，餐廳以復古色調設計，融入咗夏日同埋沙灘元素，風格十足，營造出好chill嘅氛圍。呢度主打多款韓式美食、特色蛋糕同埋刨冰，包括招牌粟米蛋糕，主打用韓國釜山粟米同埋食材，好高質。 香濃花生夢幻沙冰 韓式刨冰賣相精緻，刨冰充滿奶香味，口感綿綿，入口細膩，上層有粒粒紅豆蓉，味道香甜，淋上花生醬，花生味道香濃，另外仲可以加煉奶，好邪惡。刨冰裏面餡料豐富，仲有花生碎、黃豆粉同埋麻糬，食落多重口感。 軟綿綿粟米蛋糕 粟米蛋糕係Sips;;lban招牌之一，外表精緻吸引，粟米用上韓國釜山粟米，色澤金黃，香濃甘甜，更烘出粟米表面微微焦香。蛋糕融入咗粟米嘅香甜，蛋糕嘅mousse質地幼滑，淋上栗米醬汁，好吸引，蛋糕底下用上脆皮底同埋曲奇餅碎增加咗口感層次。 橡果黑毛豬卡邦尼意粉 卡邦尼意粉配上橡果黑毛豬，意粉彈牙，掛有濃厚芝士味同埋忌廉味，口感Creamy，加上黑椒嘅調味好惹味。橡果黑毛豬屬優質品種，肉質軟腍，咸香味十足，令整個意粉嘅香味更提升。 玫瑰醬八爪魚年糕 八爪魚年糕賣相特別 ，有原隻八爪魚喺上面，好吸引。橙色色澤令人食指大動，年糕用上幼身嘅年糕，口感煙韌，每條年糕都沾滿玫瑰醬同埋韓國醬汁味道，味道微辣，令人越食越上癮，配上大大隻爽口彈牙嘅八爪魚，好惹味。 甜蜜蜜桃桃伯爵冰茶 韓式café 流行嘅冰茶味道，香甜嘅蜜桃同伯爵冰茶碰撞，味道好夾，淡雅嘅蜜桃果香味回韻，加上伯爵冰茶嘅甘香，令人有清爽嘅感覺。 怦然心動熱情果梳打 熱情果梳打用天然百香果製作而成，含有粒粒黑籽果肉，營養豐富，味道酸酸甜甜，令人開胃，梳打味道清新，加上冰塊，令人秒回夏日透心涼感覺。

大角咀旺中帶靜，有一間人氣Cafe 吸引唔少人去打卡，叫Easy Joe二世祖，個名好特別，好容易比人留下深刻印象。餐廳行簡約工業風，有好多可愛壁畫同埋擺設，舒適寬敞。餐廳主打多國菜、輕食，同埋最出名特濃朱古力飲品及甜品，好多選擇。 自家製冬蔭功虎蝦闊麵 虎蝦有兩大隻，鮮味彈牙，冬蔭功味道一流，有泰式香料伴碟同炒香咗嘅蒜頭，闊麵亦相當掛汁，食到濃郁嘅冬蔭功香，味道酸酸辣辣咁，惹味又醒胃，可以再加少少青檸汁 ，更有泰式風味。 美國牛肉蘑菇芝士漢堡配洋蔥圈 漢堡擺盤可愛，麵包上面有對可愛嘅眼睛，麵包口感鬆軟帶有牛油香，牛肉漢堡用上美國牛肉，牛肉味濃，肉質鮮嫩有肉汁。漢堡亦非常足料，加上配料芝士、蕃茄、酸瓜、生菜同埋洋蔥等，食落清爽唔油膩。另外小食配有炸洋蔥圈，香脆嘅炸衣包住洋蔥嘅香甜味道，好邪惡。 阿祖朱古力心太軟配雪糕 朱古力心太軟擺盤可愛，送上台時好夠熱，一切落去朱古力流心效果澎湃，朱古力味濃郁，朱古力控必定鐘意，熱騰騰嘅朱古力醬配上雲呢拿雪糕球，冷熱交融，呢個甜品令人好滿足。 Rose Latte Latte上面有一行玫瑰花瓣點綴，帶有清幽嘅玫瑰香味，入口幼滑，最近天氣轉冷，飲杯熱嘅Rose Latte順滑好舒服，係一個唔錯嘅選擇。 朱古力香蕉奶昔 朱古力香蕉奶昔香蕉味濃郁，又唔會搶咗朱古力嘅味道，奶昔濃稠，質地香滑，啲泡泡睇出有打過，奶昔亦唔會過份甜膩，旁邊仲有香蕉果肉，証明真材實材。

最近天氣開始轉冷，最適合就係打邊爐，今次去咗北角滾得囍宮廷火鍋小炒，餐廳概念源於清朝宮廷，店內裝潢大走中國古典宮廷風，精緻中式火鍋爐具同埋青花瓷器餐具盡顯皇帝氣派，呢度座位舒適闊落，有帝皇級高質火鍋享受，別具典雅。 嘉慶椰子藏雞濃湯鍋 龍頭湯鍋出場，有氣勢之餘更仙氣十足，賣相精緻吸引，湯底有陣陣嘅椰子香味，有大大塊嘅腐皮包住雞肉，仲有椰子、杞子同埋紅棗，好足料。雞肉索晒椰子湯底味道，雞肉嫩滑，湯底香甜鮮味。 本地牛頸脊騙牯牛肉 牛肉上枱好有仙氣，打邊爐當然唔少得靚牛肉，今次限定牛肉用咗本地騙牯牛肉牛頸脊部位，牛頸脊油脂分布平均，牛味濃郁，口感腍滑，好有肉汁。 滾得囍宫廷餃子拼盤 餃子拼盤有四款唔同嘅餃子，包括有和牛芝士一口餃、新鮮菜苗帶子餃、韮菜豬肉餃、馬蹄冬菇豬肉餃同埋芋泥豬肉餃，每款各有兩粒，全部餃子都皮薄餡靚。 手打珍珠帶子墨魚丸 墨魚丸以手打製作，真材實料，墨魚鮮味濃郁，口感爽滑彈牙，有原粒帶子喺墨魚丸裏面，帶子鮮甜，口感豐富。 黃金雙拼 黃金雙拼有炸魚皮同埋炸響鈴，用咗秘製鹹蛋黃醬去炸，魚皮同埋響鈴香脆可口，鹹蛋黃醬味道濃郁，好邪惡嘅一道小食。 滾得囍豐盛雜菜拼盤 雜菜拼盤有好多唔同既蔬菜，好豐富，包括有皇帝菜、唐生菜、油麥菜、菜心苗、黑木耳、娃娃菜、粟米、蕃茄同埋蓮藕等，全部都好新鮮，食落好爽口，蔬菜索曬啲椰子雞湯汁，香甜美味。 足料竹蔗茅根 竹蔗茅根清甜可口，味道濃郁，有清熱下火嘅功效，今次打邊爐就最啱飲。

踏入聖誕月，韓式咖啡店花煎Coffee Hwajeon最近推出咗聖誕Menu，以薑餅人同埋聖誕樹為主題嘅甜品迎接聖誕，好適合打卡。餐廳環境舒適闊落，特別有韓式榻榻米座位，有繡球花位置同埋門口有聖誕樹裝飾，充滿濃厚嘅聖誕氣氛。 薑餅人聖誕牛角包窩夫 好可愛嘅薑餅人造型，牛角窩夫好似層層疊咁疊到好高。牛角包窩夫味道帶有鹹香微甜，口感鬆脆，每層牛角窩夫都夾咗奶油同埋新鮮士多啤梨，味道酸酸甜甜，好足料，餐廳自家製薑餅人餅乾大大塊，口感鬆化，帶有濃郁薑味同埋微甜，旁邊配上聖誕造型嘅雲呢拿味雪糕，牛奶味香濃，跟窩夫冷熱交融，好滿足。 花煎聖誕刨冰 聖誕刨冰高度還原聖誕樹造型，充滿住濃厚嘅聖誕氣氛，綠色表面用上抹茶醬，味道甘香，下面紅色用上士多啤梨醬，味道酸酸甜甜。刨冰口感綿綿，入口細膩，刨冰頂上有粒星星造型嘅朱古力，刨冰裏面仲有煙韌嘅年糕，口感豐富。 半半炸雞 半半炸雞可以揀兩種唔同味道，今次揀咗蜂蜜味同埋芝士味，炸雞外脆內嫩，充滿肉汁好juicy，芝士醬嘅味道好濃郁，蜂蜜味炸雞撒上咗蜂蜜味粉喺炸雞上面，味道鹹鹹甜甜咁，好開胃，底下仲有香脆熱辣辣嘅粗薯條，餐廳嘅炸物幾出色，鍾意食韓式炸雞嘅一定會大滿足。 薑餅人棉花糖朱古力泡泡浴 薑餅人餅乾瞓咗喺朱古力上面泡泡泡浴好可愛，朱古力融合咗薑餅風味同埋朱古力濃郁嘅味道，充滿聖誕主題氣氛，薑餅人下面有五粒棉花糖，增加朱古力嘅甜味同埋口感。 薑餅人融入奶昔 奶昔口感creamy，帶有濃郁嘅薑味同埋焦糖味，奶昔上面同樣有一塊薑餅人餅乾，好可愛。每杯飲品都會配上一件韓國傳統嘅花煎，餅上面用上鮮艷嘅食用花作為裝飾，充滿少女心，花煎餅入口煙靭，帶有花香味道，餡料用紅豆蓉製成，味道唔會太甜。

今次去咗銅鑼灣高質食日本蠔嘅居酒屋，有日本人主理嘅餐廳，餐廳定期由日本唔同縣分直送靚蠔，係蠔愛好人士必去嘅餐廳。餐廳日式裝潢，有吧枱同埋榻榻米座位，比人一種整潔舒適嘅感覺，呢度師傅好有職人精神，有做日餐20年經驗，鍾意同客人分享心得，每種食物都能夠感受到師傅嘅認真，值得一讚嘅係香港同埋日本侍應服務好好，殷勤有禮，好細心。 鐵盒燒生蠔 鐵盒燒生蠔係餐廳嘅招牌，今次嘅蠔用上廣島縣蠔，店員將生蠔倒入清酒放入鐵盒一齊蒸煮，清酒嘅香氣滲透入蠔肉裏邊，店員幫手逐隻開蠔 ，每隻生蠔新鮮，肥美飽滿，鮮甜多汁，帶有柔和嘅海水味，更可以加幾滴檸檬汁帶出鮮味。 其中三隻額外加左拉克萊特芝士，睇住店員手拎住熱熔後嘅芝士刮落個蠔度，好療癒，Raclette芝士嘅咸香味同蠔好夾，亦唔會搶咗蠔本身嘅鮮味。 石燒北海道北寄貝 北海道直送嘅新鮮北寄貝，師傅用特製石燒嚟烹製，熱辣辣嘅石頭上面放上北寄貝去燒熱，師傅火喉掌握好好，北寄貝口感軟熟爽口，味道帶有石燒嘅香氣。 自家製紫蘇入鴨 餐廳自家製紫蘇入鴨，將鴨肉打成一塊漢堡扒形狀，好特別，鴨肉鮮嫩多汁，中間加入左雞軟骨好有咬口，結合紫蘇香氣，味道唔錯。 和牛卡爾帕喬 將和牛切成薄片，口感嫩滑，油脂分均勻，中間夾住洋蔥絲同埋醬汁，味道酸甜清新，好開胃。 壽司8貫 每一道壽司都好用心，擺盤吸引，好豐富，而且係omakase，餐廳定期日本直送海鮮食材，確保壽司用料新鮮上乘，師傅手功精緻細膩，飯亦握得微暖，米飯醋酸味濃郁，其中拖羅色澤粉紅，油脂甘香，入口即溶；帶子厚肉鮮甜，甘蝦味道鮮甜，口感軟糯；左口魚邊爽甜，魚油慢慢滲出，配上柚子味道清新。 澤蟹 澤蟹嚟自日本宮崎縣，擺盤精緻，營造出澤蟹翩翩起舞嘅感覺，好生動，餐廳門口亦都擺放一缸裝滿生猛嘅澤蟹吸引食客觀看。澤蟹經過高溫油炸，加咗海鹽，味道鹹香，香脆可口，好吸引嘅一道佐酒小食。 鮟鱇魚肝 鮟鱇魚肝厚切，口感滑嫩細滑，似奶油般嘅質地，入口即化，上面鋪上葱花好清爽，配上日本清酒同埋柚子醋，更加提升魚肝嘅甘香味道。