老婆前排同朋友去咗呢間食，早幾日同我講話掛住佢嘅白汁意粉😨於是就即日中午係openrice訂位再夜晚去食⋯ 環境：幾好，位幾多但算窄，有唔同嘅枱設計eg圓枱，長枱，二人，四人，八人或再大啲都有；環境偏暗。另外唔知係咪咁岩多大枱客，啲傾計聲好大聲，但餐廳背景音樂係細聲的。 食物：唔多講，直接去相 -慢煮安格斯牛西冷8oz 快評：煮法好，調味適中，唯一想講係塊牛嘅來源應該差啲，類似金鳳果啲扒再差少少嘅肉質，但個人覺得仍然對得住個價錢，唔錯嘅 -黑松露野菌天使麵 快評：呢個價錢食到呢個質素嘅白汁，天使麵軟硬適中，白汁食得出唔係用平價忌廉，黑松露味道夠又唔會太搶，仲想點？唯一係份量只係一般 -炸蕃薯條 前言：：呢個其實係食完上面個兩個之後成15分鐘都未到，而諗住小食應該食唔飽，追咗店員而店員話整緊無漏單，於是堅持等到佢黎埋先決定仲加唔加野 快評：勁新鮮，應該真係岩岩炸好，超脆！而且唔厚身，變相條條都好香口，脆邊口感真係不得了，食到停唔到；個醬睇相都見到有成督黑松露，撈完之後好香而且份量仲好勁，食到超飽 -蘋果汽酒 快評：飲開唔同地方啤酒同手工啤嘅我表示有啲失望⋯可能係我飲唔慣 極速總結：呢個價位，呢個環境，已經好難得；之後會再黎試埋其他，就係咁😂

當初係有次經過見佢門口有張好大個招牌印住d野食，又見佢開左好耐下，
小弟亦幾鍾意食越南野，所以試下，感覺唔錯，之後間唔中都會黎食。

位置：係電車路附近，涼茶舖隔離，算易搵，又唔係鬧市中間，唔使迫人

舖面：共兩層，舊式裝修餐廳，4-6人台居多
不過有少少要注意，樓上店員較少，柱位多，有時會出現叫唔到侍應既情況

野食：
椒鹽軟殼蟹：必試，味道香口，炸得好好，唔會好多粉，
而且蟹半身亦好味，唔會好似其他日本野果d咁瘦，咬落口多肉汁，又多膏，令人回味
蒜香雞翼：煎得好靚，金黃色，皮脆，裡面熟無血汁，
最鐘意係佢面頭舖左好多蒜蓉，鐘意蒜味既我當然非常喜愛

此外佢地既湯河亦好好，湯底好味；
牛肉粒紅飯既紅飯亦好味，甜度剛好。

建議三五知己一齊黎，可以多點小菜食。

星期五晚晚飯，二人。
因為見到openrice佢既好評咁多，旺角又太多野食唔知食咩好，於是黎試下。

因為佢係同元氣同埋美心MX同一個門口入，所以門口好多人排隊等位。
8點幾去到等，10張台左右。

值得一題既係係門口派飛既女店員態度好好，感覺親切，入座前會先叫number認左你係邊同你講就有位，到真係有位果陣會主動走出黎搵你帶你埋位。

環境：舖裡面積唔算大，好多四人台，同埋一張類似bar台既長台，望住廚房。
我地二人坐長台，唔迫，係木台木櫈黎。

點餐：滑蛋雞肉丼，汁燒牛扒丼，其中一個+$25轉套餐(+面豉湯，沙津，雪糕)，芝士薯餅，同埋富士蘋果茶定汁咁上下既野飲。

上餐次序唔記得左，因為唔係即日打食評，所以逐樣撈亂咁講下。

芝士薯餅：兩大舊，係"大"，以兩個人食黎講算好大舊，食完會濟的，建議四個人食。
岩岩上果陣夠熱，芝士味重，外脆內軟，個芯入面既芝士仲係流質，唔錯。
因為太大舊既關係分開兩次食，一次食一半，而個敗筆係係第二次食(個飯食到一半既時候食)既時候，
竟然食到有少少酸味。唔知係我味覺有問題定點，同行友人亦覺得食到酸味。
本人少食芝士，唔知究竟芝士擺得耐(都唔算耐，十分鐘左右姐，食果陣仲熱)會變酸定佢本身個芝士有問題喇。

汁燒牛扒丼：牛扒唔錯，好有"牛"味，哈哈，不過就un左少少咁多，係少少姐。
個汁唔知咩汁，都幾襯個牛肉，唔錯。
p.s.店員係落單時提過，呢個飯既牛扒廚師只會煮到5成熟，無得揀。
5成熟無問題，所以照去。

滑蛋雞肉丼：見佢平平地所以叫，而本人亦好食雞肉。
滑蛋夠滑，雞肉亦嫩口，不過我略嫌雞味不足。

跟餐面豉湯，沙津，雪糕，一般。
唔知係跟甩左定係咩，個雪糕摧左幾次先有，不過店員態度幾好，全程微笑，都嬲唔落。

蘋果茶：用矮身肥杯上，可斟到四杯左右。
杯裡有冰，同一串蘋果肉。蘋果肉應該係用cheap蘋果，肉質好散。
個蘋果茶本身就幾好飲，都幾香蘋果味，不過係唔係富士黎既就要問番個蘋果至知。
食完飯慢慢飲都幾舒服。

賣單係出去自己賣。

（題外話）本身都鍾意食車仔麵，因為貪變化多，想點食就點食，所以都會搵下唔同既舖頭食車記。

（正文）呢間店位於唔起眼既街上，店面不大，大概可坐廿人左右，座位空間算正常，未至於迫。

叫野食係用蠟筆畫上過膠紙的，款式大路，唔詳細介紹但重點推介：
牛爽：依佢講係牛舌芯，爽口而且不常見，第一次必試
冬菇：食幾次都炆得好入味
烏冬；煙un, 滑
辣汁：似乎係自制的，夠香，可叫另上自己「不」

仲有數款自家制茶品，其他不能盡錄，歡迎自己黎試試。

食開平野既我因同女友慶祝就上黎openrice搵食，之前聽過人講話呢間唔錯，
禁入黎睇見到其他朋友對呢間既服務水平上落好大，但見到食品質數好似唔錯，
同區黎講呢個價位搵左幾間，最終都係黎左呢間。

直去重點，叫左個set menu for 2

餐湯-磨菇忌薕湯：
唔係罐頭湯，足料既，但係俾湯入面放左既兩塊仔餅乾影響左ｄ味，頭淡湯係餅乾味 -_-

頭盤-小食拼盤 - 炸蝦x2 / 芝士餅x2 / 炸雞脾 x2：
正常水平，比茶記好食但唔算有驚喜
個芝士餅咬落幾煙un，唔錯
蝦幾新鮮，炸皮唔算厚
炸脾ｄ肉就鞋左少少

main-水牛芝士Pizza / 白汁海鮮意大利飯：
水牛芝士Pizza幾好食，熱辣辣既pizza係最好食既(唔只係暖，係熱辣辣)
材料好食，味道亦岩岩好，皮又夠脆
同埋幾鐘意佢切開左既pizza件係完全同其他pizza件完全分開
(即係唔係d芝士未斷尾...拎起一件時會痴住隔離果件，結果一拎上黎d材料就俾d芝士痴住跌到周圍都係)
白汁海鮮意大利飯既海鮮就唔好講喇，只係碎件，好細粒果d
但係個白汁就幾正，好重海鮮味，彌補番個味道
有兩隻大蝦跟，但唔係新鮮蝦

餐飲係凍士多啤利朱古力同熱Mocha
Mocha不過不失，同Starbxxxs差唔多
士多啤利朱古力就幾好飲，類似士多啤利糖咁既味，唔會酸亦唔會過甜，岩岩好

總括黎講今餐食得幾開心，食物質素真係唔錯，價錢亦合理
==============================
其實黎之前睇過其他食評，有人話服務質素差又趕客咁
而我自己呢次就覺得唔錯，waiter多數後生仔女，但幾有禮貌同幾細心
上菜既時候我電話放左係台面，佢有提醒我小心部電話
而且會換碟(cafe黎講真係好少見會主動換碟，抵讚)
走既時候亦提你拎齊野同笑住講拜拜，亦唔見趕客情況出現
不過佢類型係樓上cafe，環境偏暗，
現場亦有播放音樂，所以其他人傾計都會比較大聲，感覺上嘈左少少
如果唔鍾意嘈想靜靜地既話就可能唔係咁岩，
但一大班朋友黎就應該唔錯
menu亦見到有menu for 2 - 8位用既set

呢間既焗豬扒飯已經俾人報道到出哂名，就算平時少食豬扒既我都黎試下食。

因為係附近工作既關係已經食過幾次，其實係裝修後整體感覺都好左。
唔只焗豬好食，仲有嚤囉雞飯同其他野都好食。
係東大街食店林立既地方，有自己出名同獨特既出品係更勝一籌既，
佢既焗豬每次黎食，佢既豬扒都係整得咁鬆軟真係抵讚，仍然保持水準。
唯一本人覺得美中不足係個茄汁，唔係話佢個茄汁唔好食，
又或者我本身唔係好食茄汁，所以覺得個味同豬扒唔夠夾。
當然呢個係我個人口味姐，豬扒質素係無可挑剔既，
尤其是係呢個賣個面都要八九十蚊既年代，四十幾蚊個豬扒飯算係有交代啦。

總結：黎到唔使多講一定係食焗豬扒飯，必食

因為公司係呢頭附近，所以間唔中都會過黎lunch。
已經食過幾次，覺得d出品水準都唔錯。
佢地既叉燒話出名，食過係幾好食既，但未算出色。
乾炒牛河色水唔錯，味道亦適中唔會過咸/甜，唔算太油，同埋用幼河粉。
日式咖哩幾好食，易入口。

讚：
多選擇
份量大
日式咖哩幾好食
水吧既茶啡水唔錯
侍應態度幾好
座位舒適，環境光猛企理

彈：
價錢稍貴(以打工仔lunch黎計)
地理位置偏遠，唔就腳

總結：街坊高級茶餐廳

唔知係咪樓上舖既關係，黎左幾次通常都唔使等位，
最常食係呢度既二人餐，都同朋友食左幾次。

店舖裝修唔錯，可以俾你慢慢坐下飲下野咁，
服務一般，不過d野飲唔知點解成日要催幾次先上到。

二人餐包括(已唔係好記得)：
雞翼四隻，春卷一條(切兩份)，粉卷兩條(切四份)，蒜蓉包四塊，菜一碟，牛肉湯河/蒙粉一碗，飲品兩杯

雞翼：一般，有時仲好厚皮
卷物：一般，好重"李斯德林"味，不過幾鍾意佢個汁，佢有兩隻汁跟，一隻杰d另一隻稀，稀d果隻應該係魚露加左少少野
蒜蓉包：法包，外皮焗得幾脆，唔錯
菜：最普通不過既蠔油生菜
牛肉湯河：湯底唔錯，牛肉一般，有兩粒牛丸

早排有團購既coupon，$39買$80蚊現金卷，於是去試下。

7點左右就到左，可能因為仲好早，舖頭無咩人，唔使等。

佢原來有個二人餐，$208有兩個前菜+兩個面+兩杯飲品，但係因為一張單只能用一張coupon，而我又買左兩張，
於是就同女友各自叫。
我叫左博多元祖拉麵，而女友就叫左黑秀沾麵。
而佢係用紙仔畫tick號黎點菜，上面都有好多配搭俾你揀，
例如麵既軟硬度(軟/中/硬)，辣度(只限赤秀)，麵面既肉(肩肉/腩肉/頸肉)，配料等等，令到佢幾有變化。

約5分鐘後熱辣辣既麵就到喇。

博多元祖拉麵
麵身較平時食開既幼，都幾彈口，湯底好濃，有圓形脂肪粒浮面，好香，而且feel到好足料，
成個湯底都係料，而且飲完啖湯個咀會有少少膠痴口，應該用左好多豬骨去煲。
配上蔥碎，三大塊豚肉，木耳等等，好食。

環境：店內係長方形咁，門口cashier，一條直路入去左右手面都係望牆既位，
其中一面就望住廚房，好似日本見到果d拉麵店咁。

總結：以呢個價錢黎講算係唔錯，不過佢間舖頭要行上斜路少少，唔算好方便。
扣回coupon後只需補回十蚊左右。

係附近食完飯，知道附近都幾多甜品舖，於是過黎行下。
岩岩某電視節目介紹左係呢間舖隔離過兩間既甜品店，
原本諗住去試下，點知黎到見到呢間既甜品岩心水d，
而果間係西式甜品舖，都係呢間吸引我多d。

大約九點入到去，舖頭坐左八成人，一入就有位，店員ok有禮，
即刻睇下menu啦緊係。

而我實在太鐘意芒果喇，連埋女友叫左椰汁香芒清心丸同埋金玉滿堂。
金玉滿堂係menu上寫係楊枝金露既改良版，又講到係必試又盛咁，緊係要試下啦。

個椰汁香芒清心丸有椰果，芒果肉，西米，清心丸，椰汁做底。
原來呢度既清心丸係方形而唔係圓形，真係幾得意，咬落都幾煙un。
芒果肉ok甜，唔酸，不過細粒左d，哈哈。
佢西米d口感好特別，唔係好似平時出面食咁軟林林，係爽爽地咁，
其實我都唔知係咪西米黎，哈哈，或者有人知係咩可以話我知 =]
呢碗野都ok，不過係椰汁清左d，唔夠甜，想食甜品又唔想咁甜清清地既話呢個就岩喇。

至於金玉滿堂就好"芒果"feel，芒果汁底加上椰果，芒果肉，龍眼，中間一球芒果雪糕。
一食第一啖已經覺得好甜好正，連個雪糕都好有芒果味，
對於我呢d咁鐘意芒果既人簡直係美食，哈哈。
改良左既就係無左柚肉，我本身都唔係好鐘意楊枝金露既柚肉，
佢而家幫我整走埋實在太好喇，哈哈。

最後講下硬件，舖面黃色為主，好傳統果d甜品店咁，d位幾細下，
店員態度都ok，問佢野都唔會話好唔耐煩咁答你，唔錯。