星期五約左同事一齊食LUNCH，搵左附近呢間餐廳。由於餐廳座位唔多，建議大家最好打電話BOOK定枱穩陣D。 餐廳大部分都係Bar櫈，我自己就唔中意坐呢款櫈，吊腳坐好辛苦😅。另外，餐廳開房式設計，無門、FEEL唔到有無冷氣，不過好彩當日唔算熱，即使無冷氣都無問題🤓。 當日客人計埋我地有十位，職員只有兩位，但出餐速度可以接受。 全日用同一個單點餐牌，無套餐，但可以優惠價點咖啡。另外午市唔收加一之餘，另外亦可柯打黑板寫嘅食物，價錢比餐牌平幾蚊左右。 由於本身對意粉同飯無興趣，所以叫左個睇名好邪惡嘅芝士熱狗😏。 巨人火炙芝士肉醬熱狗$55 食落完全無火炙嘅味道😂麵包脆；腸仔幾肥，所以好juicy；肉醬較少，存在感唔高。 由於德國腸味濃，蓋過左芝士香，對芝士控嚟講，幾失望。 如果同齊柏林比，呢度嘅麵包同腸仔size比較大同粗，不過人地齊柏林呢個價錢有薯條同汽水😏；至於味道方面，我個人比較中意齊柏林。

見到網上平台有限時買一送一優惠，晚市燒肉放題$199/位，另外每位收原價加一即$39。見網上平台評價唔差，加上喺粉嶺開左咁耐都未試過，決定星期五去食🤔。

BOOK左星期五晚上8點，估唔到全場爆滿😯 即刻有少少期望🤓
望完個餐牌後發現，餐廳本身只有$248、$348同$448三個餐，根本我地呢個聲稱原價$399嘅餐🤔。網上平台呢個特別餐，係可以食到$248所有野同$348嘅刺身，另加壽喜燒湯底。

一坐低，職員就送上每人三片牛肉，由於無講係咩部位、等級。牛肉油花唔差，入口油脂爆棚!!😏

之後任食就當然無呢個等級嘅牛肉啦😅除左已經售罄嘅厚牛舌外，澳洲和牛肉腿肉、安格斯板腱、牛五花、一口牛都係任食。不過質素就麻麻。

海鮮方面，除售罄嘅鹽燒虎蝦外，仲有非常鹹嘅壼漬魷魚鬚、鯖花青、蟹柳、同埋我個人覺得算係比較好嘅急凍半殼帆立貝。枱上有一樽已調味蒜蓉，加埋落去一齊燒就最正😋。

豚雞方面選擇唔多，我地只試左黑豚肉、無味嘅芝士雞肉、兩款無醃到入味嘅手羽、好難食嘅兩款火雞腎。

除左可以喺出面拎嘅生菜盤外，QR都可以點半油金菇、髀菇、好酸嘅菠蘿、翠瓜、牛油粟米等。

主食叫左正正常常嘅胡麻烏冬、櫻花蝦蔥飯、蔥玉子飯。


呢度嘅炸物完全唔掂，炸到好深色、好乾、好硬、好界口….😣




呢個餐最好嘅係刺身，即係$348個餐嘅刺身全部都叫得，當中甜蝦同赤蝦都唔錯😋。

如果想食又熱又濕嘅野，都仲可以點壽喜燒，不過跟嚟果盤牛肉真係連佳寶最平嘅肥牛都不如😂

自助區除左無糖盒裝茶外，仲有啤酒；甜品除左杯裝啫哩外，仲有好稀嘅紅豆沙、三款牛奶雪糕杯；前菜都有螺肉、中華沙律、泡菜、四季豆。

總結，食物質素麻麻、選擇唔多、餐廳煙氣味大，不過上菜快，又會主動換網。人均$240，試一次就夠。

上年年尾喺大埔墟街市熟食中心試過加工海鮮，印象唔錯。諗住每個政府街市，收費應該唔會差好多，所以近近地同屋企人試下上水街市熟食中心如何。 上水比大埔收費每斤貴$10-15，但味道卻無大埔咁好😅。 豉椒炒花甲(加工)$90/斤，呢度兩斤 好能兩斤太多太重，所以炒到好濕，不過調味OK。 椒鹽鮑魚(加工)$90/斤，呢度一斤 呢個整得唔錯，鮑魚好彈牙，椒鹽又唔會過分鹹。 酥炸台山蠔(加工)$90/桶，呢度一桶 呢個加工費好貴，大埔加工先$80/大桶。😂 呢個整得好差，好厚粉!! 食落油膩感好重。 胡椒豬肚雞全隻 $338 三和出名雞煲，所以特登點左個。雞肉好嫩滑，但雞味淡，而且唔係完整雞，雞屁屁有2隻😂煲內仲有好軟淋嘅豬肚、兩三舊大豬骨；我地當湯咁飲，唔會太鹹。 咕嚕肉 $128 當時近乎每枱都點一碟，而且算大碟。可能隔離飯香啦，我地覺得自己果碟就特別細碟😅。咕嚕肉少少厚粉，但好彩粒肉唔細粒，可以平衡到個粉感。調味正常。 小炒王 $138 男朋友話食過咁多小炒王中，呢個最好。配料加入炸到香脆嘅魚仔&蝦乾，仲有少喺小炒王見到嘅炸豆腐粒，至於魷魚，唔肯定有無，起碼我無食到。整體好有鹹香、同鑊氣。 豉油王炒麵 $88 好有豉油香，但欠缺鑊氣。 楊州炒飯 $88 餐牌上只有午餐肉炒飯，但我地唔想食午餐肉，職員表示其他炒飯都有，講就得。不過呢個炒飯唔多掂，無乜味、無鑊氣。 以上合共$1,145，以熟食中心呢個唔算乾淨、又多二手煙嘅環境嚟講，小菜價錢唔平，而且無鑊氣，我覺得性價比麻麻。

平日約左屋企人喺沙田食飯，由於新城市D餐廳價位較高，所以行遠少少去禾輋商場，呢邊較多平民餐廳。今次試葡式餐廳，晚餐包湯或餐飲、無加一、自助落單同斟水。上菜快，食物份量大，性價比幾高。 馬介休炸薯球$58/6件 話明葡式餐廳，又點少得呢款經典小食呢?!😏 馬介休球新鮮炸出嚟，外脆內有一絲絲鱈魚同薯蓉，食落味道唔錯。 東望洋芝士鮮茄焗豬扒飯$60 炒飯底，豬扒厚薄適中，肉質唔韌，屋企人好中意。不過，個茄汁偏甜，所以整體我麻麻地😅。 脆皮鹹豬手配薯條$108 豬手如其名，豬皮食落似食緊薯片咁脆!! 😋膠質好高，好痴嘴唇😆 豬手本身唔係好鹹，唔點醬汁可以食到原味。薯條係熱辣辣炸出嚟，整體唔錯。 BBQ醬烤豬肋骨配薯條$82 豬肋骨份量唔少，有兩排骨!! 如果喺其他餐廳食，一定過百蚊!! 不過BBQ醬唔係英式/美式口味，味道偏向中式燒味。肋骨無煮到骨肉分離，食落依然有肉嘅口感。 香煎紐西蘭牛扒配薯菜$68 本身對呢個價位嘅牛扒無期望，切落要用少少力度，加上見到全熟，已經做好心理準備。點知，食落又唔差喎!!?😮 牛扒居然食得到牛味之餘，入口唔會好韌，亦無梳打粉怪味!! 食得過喎!!😏 係個薯差D，普通烚薯仔😅 餐湯有紅或忌廉湯供選擇，不過自助落單無得揀口味，職員話如果要紅湯就同佢地講，如果自助落單嘅話會係忌廉湯。 我地四個人，四款主菜加一款小食，無加一，合共$382，非常抵食!!🤓 不過商場冷氣較弱，天氣再熱D嘅話，應該唔會嚟呢個商場住。🙈

農曆新年紅假最後一天，第二日就開始番工，加上情人節迫近，所以同屋企人提早食情人節飯☺️。雖然餐廳二人餐做緊六折，但我留意到用訂座平台 Book枱嘅話，主餐牌有五折😍，啱哂我地可以揀自己想食嘅野。

晚上5點半到達，當時客人唔多，被安排望街景嘅座位，我地四個人坐圓枱有少少逼夾。
我地叫左三個主食加一個小食，半價後連原價加一$500都唔駛，非常抵!!😏

16oz肉眼(五成熟) $448



牛扒大概1吋厚，肉質非常軟淋，牛味唔重但濃肉味同炭燒香。簡單用鹽調左味，所以唔沾個醬已經好夠鹹。
忌廉薯蓉質地細滑，好有奶油香。

廚師推介嘅意式辣肉腸薄餅 $158


呢個PIZZA外貎令我諗起之前喺中環食果間Fiata Pizza🤗，個批邊同樣焗到焦黑、脹卜卜、夠乾身。食落當然完全唔一樣啦!! 😅不過呢個批用料充足，批邊微焦脆、焦香，食落唔油膩。

炸魚薯條配他他醬 $158



炸魚大件又厚身，食落無腥味；不過醃料較中式，花雕酒味幾濃😂
最中意餐廳用有皮嘅粗薯條，灑左少少紅色粉，我估係另一款名叫澳式雞鹽薯條味，可惜唔熱又唔脆，估計係等埋炸魚所以放耐左。

由於我地係薯怪，所以最後加多個黑松露薯條 $58

呢個薯條新鮮炸出嚟，熱辣辣!! 外脆內軟!! 😋黑松露都比得幾慷慨，每條都沾上松露，食落淡淡松露香，唔會太煤氣，幾好🤤。

其實之前已經食過觀塘分店嘅LUNCH，但我只記得坐露台窗位，對食物零印象。今次嚟黃埔分店，印象最深刻係個PIZZA，材料簡單，但配搭出最經典亦最好嘅味道🤤。

自從食完聯和墟雅士餐廳之後，就一直都想試埋喺北區同樣有歷史背景嘅上水畢打奧餐廳😃。雖然去上水唔遠，但又唔想特登去食個飯就走，所以遲遲未有實現😆。 點知最近去聯和墟食飯，比我見到畢打奧居然喺度開左分店，仲要喺正雅士對面，有少少打對台Feel!!😏 2月14號平日星期三，約埋爸爸一齊去鋸扒🤓 我地上午11點半到達，唔駛等位可以直入。下午1點門外已經好多人等位，再對比下對面雅士門外只有幾個人等位😆，估計過多幾個月就會見真章，到底大家係中意試新野抑或真心覺得畢打奧好味架啦。😏 當日午市有兩款原價$119嘅套餐做特價，分別係鐵板美式什扒$99、新西蘭西冷牛扒$99 另外叫左畢打奧焗豬扒飯$89同埋寓意橫財就手嘅燒德國豬手$129，每個套餐都包餐包、餐湯、同熱飲。 餐包拎上手暖暖地，望落有黑芝麻，但食落無芝麻香。 餐湯要左羅宋湯，同埋加左$29轉酥皮龍蝦湯，前者唔辣偏酸，每碗湯都有好多蔬菜； 後者酥皮酥脆但唔係我中意嘅牛油酥皮，龍蝦湯蝦味濃但有少少澀，內裡有幾隻蝦仁。 新西蘭西冷牛扒配薯蓉$99 份量望落唔多，但牛扒比雅士厚身；雖然有筋，不過整體肉質唔錯，牛味一般但有肉香。薯蓉好有薯香，食唔太出牛油或忌廉味，感覺油分唔多，較健康。 畢打奧焗豬扒飯$89 好傳統嘅焗飯，唔會加芝士。茄汁偏甜；飯粒望落似白飯底，但其實細心望會留意到有蛋絲，但真係無乜存在感；豬扒係吉列豬，如果怕熱氣嘅人要留意；豬扒係用新鮮豬，所以食落肉質偏實，亦比較鞋，但感覺健康D。 燒德國豬手$129+$9配薯條 豬手炸到好脆，食落膠質好重、好黏口，可惜肉質太軟淋，有少少湯渣Feel。 鐵板美式什扒$99+$9配薯條 什扒有豬牛雞、腸仔同煙肉；最好食係雞扒，夠濕潤；牛扒好薄、豬扒實正。由於職員比錯左薯蓉，所以後來補番個炸薯條比我地。 整體環境唔錯，不過職員比較生手，當日有跌碟嘅情況出現，亦上錯薯蓉；特價套餐幾抵食，四個餐連加一共$541，可用信用卡付款。

唔少餐廳因為農曆新年而休息，就連自己一直都想試嘅陳公館都唔例外😣，所以沿路搵其他甜品店，最後嚟到呢間農曆年期收加一嘅糖水舖。 桂花綠豆仙草配芋薯雙圓$49 普通仙草都會配紅豆，但小店就配綠豆，兩款屬性都偏涼，一定好下火😂不過，其實唔駛擔心會涼過頭，因為仙草好細舊😐食落幾滑，但偏甜。 綠豆沙加入海帶絲同埋我最愛嘅臭草。芋圓三色口感煙韌，但食唔出芋/地瓜味。黑芝麻湯圓有三小粒，芝麻味濃，甜度可接受。另外仲有舊芋頭同雞蛋黃，用料豐富。 熱喳咋$22 由於屋企人唔中意椰奶，所以揀左加花奶。喳咋質地杰身，但唔係因為豆爆開嘅沙沙口感，而係店家加左西米，西米嘅澱粉令喳咋變杰，食落似埋左芡，我地麻麻地呢個質地😶。 楊枝甘露$35 小店用上大西粒，食落幾有口味，整體味道正常，但由於最近喺粉嶺聯和墟食左一碗幾高質嘅楊枝甘露，比較之下呢個有少少遜色。 牛奶桃膠椰皇燉奶$49 齋睇個名都覺得好滋補😏燉奶啱啱熟，好滑溜，奶味唔算好濃，甜度適中，我見好幾位食客都點佢。

每年年三十都會喺屋企食飯，今年嚟個不一樣嘅團年飯，決定去荃灣打邊爐，之後去埋附近個年宵。 由於我睇開嘅一位youtuber介紹呢間做開泰菜嘅餐廳，而家攪火鍋放題，見佢段片D食物質素唔錯😋，所以打電話BOOK左19:45。 星期五當晚全場爆滿，本以為BOOK左枱嘅我地，去到先發現，原來接聽電話果位職員無Mark低資料，即係無BOOK到枱😨 不過，有一位應該係經理嘅職員Nandom熱心幫忙，我地只係等左個零字就有枱，美中不足係要分兩枱坐😂 我地揀左最高等級嘅澳洲M7放題$298成人90分鐘，呢個套餐包一次性嘅海鮮桶，內有龍蝦尾、扇貝、熟蝦、青口、𠝹花魷魚、薯仔、粟米，但唔係按人頭量，因為我地兩枱嘅份量唔一樣之餘，有一枱更無龍蝦尾😂 海鮮係急凍貨，食落無鮮味，全靠個幾好味嘅泰式醬汁。 鴛鴦湯底唔駛加錢，我地揀左冬陰功拼椰汁雞，前者唔辣少少酸，後者椰味偏淡。 Nandom喺入座前已經問我地第一輪豬牛雞有無咩唔食，我地當然只要牛啦!!😏 所以圖中全部都係牛。我地一致認為M7牛胸腹肉質最好，煮到啱啱熟果陣肉質最嫩滑。帶點少油花嘅牛板鍵雖然明顯鞋少少，不過較有肉味。 另外我亦推介佢地嘅蝦滑同墨滑，用料幾足😋。至於餃子同丸我就無食到。 小食方面，QR可以落到豬雞串燒、豬頸肉、豬手、魚餅。我最中意嘅係串燒🤤，豬雞都好味，唔鞋唔乾又夠味。 自助區除左有醬料同蔬菜外，仲有少量椰汁糕、兩款小蛋糕、炸薯角、蝦餅、春卷、雞翼、酸辣鳳爪、泰式炒粉絲、木瓜沙律。 炸物有少少炸過龍，食落好乾好𠝹口；煙韌椰汁糕有班蘭同奶茶味，前者班蘭味濃唔算太甜，後者奶茶好香但甜左少少。 飲品方面可以QR點泰式特飲，經典嘅龍眼冰、梳打、奶茶都係免費，不過無得揀甜度，所以一律偏甜。 整體而言，如果同我最愛嘅牛大人比，呢度食物種類較少(無蝦無蜆)、湯底亦較遜色、M7牛胸腹亦不及牛大人嘅牛好味。不過，呢度嘅服務真係好好，特別係職員Nandom快速解決座位問題外，中途亦非常照顧我地兩枱，埋單果陣更主動比左9折我地作補償，令我地倍感興奮。

星期五晚同屋企人食完飯，興起想食埋糖水先番屋企😏。即刻上Openrice望下聯和墟有咩糖水舖，最終揀左呢間喺我腦海無記錄嘅小店，應該係新開嘅舖頭?!🤔 餐廳好光猛，所以喺街頭已經留意到佢，亦見到門外有好多人😮 晚上8點半到達，原來門外嘅人等緊外賣，我地唔駛等位可以直入。 雖然已經食過正餐，但見到隔離枱好滋味咁食緊小食拼盤😂，我地又忍唔住叫左個$40，另外叫多個炸薯條$25 兩款食物都新鮮炸出嚟，我自己特別中意拼盤裡面重香茅味嘅魚餅、仲有炸到外皮脆卜卜嘅司華力腸😋；至於薯條就麻麻地，好似炸得唔夠時間，外觀偏白，亦唔脆。 芋圓仙草紫米露$34 呢碗糖水質地幾啱我口味，紫米露夠杰身，食落好足料；芋圓只有橙色，食落幾有雞蛋黃蕃薯味。 豆腐花$20 揀左落黃糖，豆花幾滑，食落幾有豆香，不過個人覺得同百福果D唔會差太遠。 楊枝甘露$38 暫時係我喺香港近期食過最有料、最有誠意嘅楊枝甘露!! 🤤清甜嘅芒果大概有半個、配上大粒西米、未溶嘅芒果蓉沙冰，足料!!好味!!😋 紅豆粒仙草$30 紅豆比較細粒，睇得出唔係日本紅豆；另外食得出係自己煲，唔係罐頭紅豆；雖然偏甜，但配埋無乜糖嘅仙草，整體甜度可以接受。仙草幾滑，但味道不及我心目中第一嘅鮮芋仙嘅仙草😅。 埋單$187，小店好似只收現金。門外長期有一堆人等外賣，生意似乎都唔錯。如果我屋企附近有間咁好質素嘅糖水舖就正。

難得星期一放假，適蓬有個寒風襲港，最啱打邊爐烚下烚下~~🤓 旺角火鍋放題真係好多選擇，由於唔想食D已經食過嘅餐廳，所以挑選之後，BOOK左呢間位於兆萬嘅壹火鍋。我地食最早時段$189/位，可以食2.5小時。 餐廳玩法係客人可以揀1雞煲之後加清湯、2免費鴛鴦中式普通湯底、3一款特式湯底、4加$50百里香牛骨鍋/麻辣牛骨鍋(呢個連埋精選靚牛任食)；除左火鍋外，仲可以加$50任食刺身，又可以加$50食一次性海鮮拼盤，豐儉由人。而我同男朋友都唔餓，所以乜都無加，湯底就揀左沙嗲拼冬陰功。 沙嗲湯底少少甜、有花生香，但整體偏淡；冬陰功偏酸，但越食越辣。 餐廳提供嘅醬料除左一D常見款外，仲有XO醬、桂林辣醬、皇后同皇帝醬😮 入座後職員送上精選和牛拼盤，如果覺得啱食，客人可以加$50/位任點，不過我地覺得無呢個需要，所以無加。 呢個和牛拼盤最好味係極上牛板腱，肉質柔軟，有牛香!!😋 手切封門柳肉質較實，帶點牛內臟味；至於我自己最期待嘅SRF同安格斯牛小排表現就令人失望😥，前者肉質唔夠嫩滑，後者切到一條條、碎濕濕。 部分火鍋配料可以自取，部分就要用QR落單。 我個人推介甚少見嘅豬肝，煮完依然帶點爽🤤；洗得乾淨嘅長爽脆鵝腸🤤；唔會好肥嘅基本牛板腱🤤，我叫左兩輪，雖然帶點瘀紅色，不過以$189呢個價我收貨； 牛展濃牛內臟味；薄牛舌嫩滑爽脆。 是日海鮮係幾大隻下嘅蜆，不過限量供應，我點左4次，但只嚟左2次，共14隻😂。 基圍蝦雖然細隻，但肉幾甜。 蝦滑同墨魚滑都唔錯，前者食到有好多蝦仁； 飲品無而家大熱嘅自家製冷泡茶，不過有啤酒提供，凍櫃、暖櫃同常溫三個溫度供選擇；甜品選擇唔多雪糕係本地品牌COCOBERRY、韓式雪條、仲有雪米糍。 整體用餐體驗唔差，食物種類、質素同價錢成正比，無野可以投訴😏。