早前係團購見到呢間餐廳有德國啤酒節套餐賣，包一份拼盤、蒜蓉包同兩杯啤酒。
價錢相宜之餘，賣相又唔差，加上之前係度食過飯，感覺唔錯，就二話不說買左兩張，同阿亨同朋友一齊fever下。

可能係星期五晚既關係，七點半黎到已經有五六檯，驟眼睇大部份都食呢個拼盤。
入座後，侍應好細心同我地講燒豬手製作需時，可能要等耐dd。反正我地幾個人傾下計，時間好快過。

最先到既當然係啤酒，係一隻p字頭既德國啤酒，我第一次飲，都唔錯。酒鬼朋友J話想試第二隻酒，嗌左杯L字頭既啤酒 (題外話：我好鍾意佢隻杯)

之後就係熱辣辣既蒜蓉包，好香、好脆，餓鬼們話咁快就化整為零。主角出場！一上檯，阿亨同朋友C有少少o咀，因為佢地冇睇過相，唔知個併盤係點既樣。
(其實見到實物之後，我都有d震撼)

併盤有燒豬手、五款德國香腸，炒什菜、酸椰菜同沙律。

燒豬手：size有返咁上下，外皮好脆，肉唔鞋。非常好食。

德國香腸：(我問侍應拎餐牌睇有咩腸) 紐倫堡腸 、慕尼克香腸、辣燒烤腸、黑森林香腸同牛仔肉腸。腸仔燒得夠熱，款款都唔同味。我最鍾意食係紐倫堡腸同辣燒烤腸。

炒什菜：有蘆筍、紫椰菜、蕃茄等等。係食左一堆肉之後，有d蔬菜調劑下確唔錯。

之後我地每人仲encore多杯啤酒，傾傾下又食左差唔多2個鐘。

其實呢個併盤原價三百零for 2人都唔係貴，當然有團購價就更抵啦！

前身係清亭，裝修後變成越泰酒吧餐廳，感覺唔錯，多左好多卡位，亦有多部大電視，好有bar feel。

星期五晚3人行，差不多八點黎到，full左一半。安排坐卡位，岩哂，可以邊食邊girls talk。

泰式生蝦：一order有8隻，有冰墊住d蝦。蝦夠凍同新鮮，夾埋生蒜片，點醬汁食，好刺激。

炸春卷：一如以往清亭出品，炸得香脆。好味！

泰式鳳爪沙律：鳳爪數量不少，拌入生洋蔥，味道不錯。只係食到尾就覺得好濃味

串燒雞肉沙爹：正正常常

牛油雞翼：自從清亭搬左上樓上鋪之後，感覺佢冇咁好食，所以冇點呢個菜好耐。係友人極力要求下再點。結果都係覺得普通，好油、牛油味唔夠同炸粉略厚。

馬拉盞炒椰菜苗：食泰國野，我多數會點椰菜苗，貪佢夠爽口。廚師既馬拉盞落得好夠，好夠味。

泰式炒粉絲：份量正常，配菜唔馬虎，但可惜唔夠味。

邊食邊傾，唔覺唔覺食左個幾鐘。意猶未盡，各自叫左一杯啤酒再傾多個幾鐘。一頓滿意既晚餐！

值得一提，呢度應該係同下面果層酒吧合作，(我見到有下層酒吧侍應出lift，手捧一杯啤酒)，所以酒類飲品選擇好多。可能亦因為咁，有部份侍應唔係好熟d牌子，友人叫一杯啤酒，竟然有3個侍應埋黎問係咩酒，到最後要係餐牌指個名先點到。

四個人weekdays夜晚黎食，book左七點半，去到唔駛等位。
呢度係分兩層，我地被分配坐樓上。

店員好快就遞上熱茶同前菜。前菜係類似蠔油拌菠菜，偏鹹。
我係第一次黎，交比友人發板叫野食。因為電話冇電，所以就冇影相。

手羽先唐揚：叫左5隻，因為有一個朋友唔食得辣，我地叫左甜味。雞翼唔算大隻，燒得好乾，冇其他食評形客得咁好食。(有機會叫辣味再試過)

串燒- 牛舌、豬頸肉、冬菇、羊架： 牛舌同豬頸肉實在係不錯，厚身，肉質爽口。羊架一般，騷味夠。冬菇就極為普通(一串只有3件，為起成10蚊一件)。另外就係燒既時候，鹽撒得不夠均勻，有好幾件牛舌係極鹹。

炸腐皮溫泉蛋：似乎係必食，基本上檯檯都有點。一啖一件，蛋黃既香味同腐皮溶埋一齊，不錯。

鰻魚玉子卷：不過不失，唔夠熱。

味噌烏冬：芡汁好"杰"身同好鹹，烏冬煮得太"林"，唔爽口。

燒鱸魚：一個order兩件細細的，食落去有d似銀鱈魚，魚肉帶油份，味道可以。

食完呢餐，最大既印象就係d野食偏鹹。埋單九百五十幾，覺得有d貴同食唔飽。
但值得一讚既係侍應服務真係唔錯，自動自覺，好快就會加茶。

好鍾意食呢度o既pizza，隔一段時間都會黎食，仲會不停帶朋友黎，個個都讚。
唯一美中不足既係西環呢間分店有dd唔就腳。

友人生日飯，想食意大利野，一行七人，我就提議黎呢度。雞翼：一客六隻，中規中矩，唔算太乾身。火箭菜沙律： 火箭菜有獨特既味道，唔係個個都鍾意，不過我本人就好鍾意啦。炸魷魚圈：普通，不算出色。呢度Pizza薄底香脆，極為喜愛。意大利蛋味道不錯！蒜片欖油意大利粉：呢個粉要整得好食好難，呢度整得好出色。讚！一上檯已經香氣四溢，意粉煙un度適中，蒜片好味。有次帶另一group友人黎，encore左3碟。Parma Ham & Rocket Pizza：另一喜愛。Parma Ham 同rocket好夾，食時比較 "呢hea"，因為d parma ham唔係均勻地切開鋪係pizza上面，要自己分配好，如果唔係就會有一兩塊冇parma ham。Carbonara係好多香港人鍾意食既意粉款式，我個人就麻麻地d咁cream類既意粉，但都有食少少，味道不錯。白酒蜆扁意粉：略嫌鹹左少少，蜆肉新鮮。

話明係友人生日飯，即席叫左個tiramisu比佢，店員好好咁點著左蠟燭捧埋檯，仲同我地一齊唱生日歌。 友人好開心仲讚呢餐好滿足。

友人出左豐厚bonus，邀約一眾好友，一行8人食返餐好o既，揀左呢間 "龍泉" 私房菜。但係食飯前一日，臨時轉左去隔離海防大廈食，去到間野個名叫"尚膳"，但食o既野係一樣。我唯有揀返卡片果間寫食評。

可能係星期五o既關係，8點去度，已經滿座。兩間房都人頭湧湧，我地坐大廳。

因為朋友只有卡片，所以我地點o既係卡片後$248 o既套餐，上到去先知原來有更多選擇可以揀。服務態度普通，由操唔正廣東話o既嬸嬸serve，當然我地都明白係呢d地方唔可以要求好好service。

(順卡片序寫)
第1味：生拆蟹肉金山勾翅。味道一般，翅o既份量還可以，每人勉強都可以有兩碗。第2味：花雕蛋白蒸海蟹。有3隻蟹，都算新鮮，蟹膏夠多。蛋白蒸得夠滑，但冇咩酒味。第3味：原隻鮑魚扣山珍海味。除鮑魚外，有海參、花膠同小棠菜。鮑魚炆得夠腍，都幾有味。其他就普通。第4味：天下第一雞。呢味係最尾黎o既。雞冇咩特別，雞皮佈滿芝麻。味道較鹹同好似未夠熟。有友人先食雞皮，說感覺好似食緊煎堆 第5味：清蒸游水海班。魚蒸得過熟，魚肉有d靭。第6味：招牌三色蝦。三色：豉油蝦、炸蝦丸同流沙蝦。蝦算新鮮，唔梅。豉油蝦同流沙蝦偏鹹。蝦丸包住芝士，可能我食o既時候已經凍左，冇"爆芝士" o既感覺。第7味：金銀蒜蒸扇貝。蒜蓉同粉絲好多，扇貝size正常。不過冇咩豉油，唔夠味。第8味：瑤柱扒西蘭花。瑤柱份量足，味道不錯。
第9味：飄香炒飯。飯呈淡黃色，食落去感覺似楊州炒飯，還可以。
第10味：精美甜品。唔知係芒果定桃布甸。廚師用左一個花形模整呢個甜品，切o既時候已經feel到質地好硬。擺入口就好似食緊大菜糕，可能係魚膠粉落得太多。而mix埋一切o既生果就似係桃，因為唔似芒果咁腍。

私房菜黎講，呢間唔係咁特別，套餐入面冇一樣係好標青。但若以呢個價錢可以食到咁多款餸，算係ok。
下次有咩特別function，可能會再同朋友黎試其他套餐。

同友人一行3人去完大坑蓮花宮，就決定黎試試民聲冰室。

我地坐出面，行過見到10檯有8檯食o既o野都差唔多。聽得多人讚呢度o既鹹蛋蒸肉餅，黎到梗係要叫返個試下。另外點左馬拉盞炒通菜、口水雞。

不得不提，就係呢度o既waiter服務麻麻。可能人太多，點菜要等成6-7分鐘。個Waiter行到埋黎就講："食咩？講啦！" 唔可以話佢冇禮貌，但感覺有d晦氣。問佢仲有咩好介紹，佢就介紹我地膏蟹蒸水蛋同豉汁帶子蒸豆腐。之後又有一檯人黎，同我地問埋同一個問題，個waiter就好似背書咁介紹同幾款餸。d餸又傳到亂哂龍，要逐檯問客人有冇點。個肉餅外型係幾吸引既，豬肉係有肥有瘦，口感唔錯，不過食落去味道就一般。
口水雞唔夠辣，得麻o既感覺。個人特別喜愛食伴菜o既粉皮同皮蛋。
蒸水蛋就真係麻麻，蛋一d都唔滑，有d硬，冇蟹味。
炒菜就正常，馬拉盞夠辣。
帶子蒸豆腐，豆腐係山水豆腐，帶子算細粒，反而個豉汁夠惹味。

總括呢餐飯一般，並唔係咁特別同非試不可。

第一年同阿亨過情人節。我地一早Plan左睇場戲先食晚飯。
我地先去MegaBox睇七點半，再去戲院隔離o既Studio City嘆情人節晚餐。阿亨一早訂左位，所以我地好快就被安排入座。未入餐廳，係門口已經見到又簡單又靚o既佈置，玻璃窗貼左好多大大小小o既紅色心心；餐廳入面播住英文歌，感覺都幾好。
當晚o既情人節晚餐都幾豐富，有頭盤、湯、兩個主菜、甜品同餐飲，埋單大約600鬆d。

頭盤係煙三文魚caesar沙律同Parma Ham哈蜜瓜。沙律菜好新鮮，caesar醬開胃；個Parma Ham 好好食，夾埋哈蜜瓜一齊食，正！

湯係蟹肉南瓜湯，仲有蒜蓉包。湯夠熱，味又夠濃！

主菜分別係安格斯牛扒、虎蝦蕃茄天使麵。阿亨讚牛扒有肉味，叫七成，燒得岩岩好。 d蝦都幾大隻，唔"梅"，意粉煮得唔錯，個蕃茄汁好惹味。甜品就最令我開心，因為有齊雪糕、Tiramisu同Brownie，岩哂我胃口。雪糕上面插左兩塊用朱古力整o既心，阿亨讓哂比我食！基本上，我好滿意呢個晚餐。 o野食好味，餐廳o既Waiter服務都好好。

下次再黎，試埋其他o野先。

前排同阿亨去深水埗買o野，就去左呢度試試好出名既豬膶麵。

閒日兩點幾到，間間鋪門口都差唔多有十個人等緊，真係估唔到咁多人捧場。等左約15分鐘就有位，眼見其他人一張檯搭左3,4個group，好彩我地坐左係四方檯。由於人太多，我地嗌左幾次先有人落單，不過d食物都黎得幾快。

阿亨唔食內臟，點左牛肉麵、咖啡。我就叫左豬膶麵、奶茶，另外再加多個咖央西多。

西多咬落去唔算太油，但我稍嫌甜得滯，唔加糖漿都可以。
牛肉麵普通，阿亨嫌牛肉太熟。
豬膶麵湯好飲，豬膶淥得岩岩好，唔太粉。

但始終人太多，我地食得都幾貧能，食完就埋單走人。

總括黎講，有時間都可以再黎食，但一定唔會揀假期。