因為幾張memo紙而紅透金鐘嘅Noodle LAH!吸引左我，
今日決定去試一試呢間良心店。海鮮喇沙

話明“LAH”，梗係要試佢嘅喇沙，
點左海鮮，再加個香茅荔枝

海鮮喇沙材料十足，
青口，大蝦（真係大蝦），鮮魷等等，
唔似平時大X樂個啲海鮮焗飯入面得一塊雪藏魚柳咁呃秤，
喇沙湯底好香濃，
不過我本身對喇沙唔係好有研究，
所以唔可以話佢係好傳統定好香港口味，
但係香料就好足，係東南亞口味沒錯

最要推介嘅係佢嘅麵！
勁﹣彈﹣牙！

杯野飲係因為個配搭吸引我，
香茅＋荔枝原來咁夾咁好飲，
如果個甜度再低少少就perfect！

踏入秋冬就好想搵野暖下個肚，
前兩年開始鍾意左食蛇，
一來經濟賽惠，
二來食完成個人暖晒感覺好正

收工之後去左裕民坊周圍行下搵野食，
行行下去左宜安街，
見到有三間蛇王店，
醒起前年係小巴站附近食過一間好正但唔記得咩名，
今日就隨機走入蛇王娟。我點左B餐，
一碗細蛇羹＋一碗蛇湯＋一碗細糯米飯先講蛇羹，
蛇肉大大舊，成碗都係料完全唔吝嗇！
蛇肉口感似雞柳，好軟熟一啲都唔韌！
基本上食完個蛇羹加蛇湯已經有少少飽！

蛇湯就胡椒味好重，有少少辣辣地，
應該係想辟腥味，
但呢度蛇湯係可以無限refill的！！！
伙記仲係咁問你要唔要refill！糯米飯相對就比較遜色，
飯底有啲硬，唔夠臘味味，
料都ok夠嘅，
不過下次我會嗌一個大蛇羹而唔要糯米飯。呢度仲有好多其他野食，
我想試下炸蛇丸！
呢度仲有經濟蒸飯，三十蚊就有個蒸飯＋蛇湯＋汽水，
非常超值！

呢度嘅老闆伙記都非常親切，
老闆娘（應該就係娟姐喇）對每個食飽嘅客人都會好有禮貌咁講拜拜，
叫人如何可以不愛她呢？
 

又一個沒有飯腳嘅晚上，
諗起好耐無去過Kubrick，今晚就係機會喇！南瓜湯配烤蒜蓉多士

今晚嘅Soup of today真係正到爆炸！
南瓜味濃且非常甜，忌廉湯做到非常有厚到，
而且佢地仲係用有機農場嘅食材！
飲完成個人暖笠笠～岩晒依家轉涼嘅天氣！煙三文魚香草忌廉汁意粉

相反煙三文魚就太濃味，過鹹，
我無點野飲所以食完之後好口渴
但係佢地嘅意粉真係好好食！
韌度適中而且好滑～

食完飯去旁邊嘅書店逛逛，正！

係廣告公司做都慣左食無定時，
不過都造就左我地一班同事成日都可以享受到下午茶嘅優惠

今日去左花園餐廳，
呢間都可謂同事們首選，
因為下午茶真係抵食！蒜蓉雞扒意粉

我點左雞扒意，雞扒都大塊，無咩雪味，大大份仲包埋杯熱檸水都係$36咋！
係觀塘黎講真係算係咁～

今次係第二次黎幫襯，
前兩日試過佢嘅喇沙，超正！
今日就想試下其他野，就點左呢個怡保雞飯雞好滑好香！
個飯先一流，混合雞油嘅香味同薑蓉，正！
再配埋杯三酸，非常開胃～

秋風起梗係去打邊爐啦！
朋友話屋企附近有間火鍋想試下～
於是收工搭地鐵過去試一試先！
係黃大仙站A出口行過去大概五分鐘到，都算方便！

呢間涮得棧係譽宴旗下嘅，
今日譽宴晚市同火鍋兩邊都好滿場，
所以侍應安排左我地入房，
四個人都有VIP房～LUCKY！
間房入面有電視，
方便我呢啲電視精一路十下十下，一路追劇！

坐低第一樣就攞張Menu黎望下先
海鮮嘅種類都唔少，
我地點左個清清地嘅芫茜皮蛋鍋，
一碟大嘅本地手切肥牛、海生蝦、極上黑豚肉、鯇魚片、
蕃茄、山水豆腐、炸枝竹、鮮淮山、
炸魚皮、響鈴、蝦滑墨魚滑雙拼、韮菜餃、灌湯小籠包
另外再嗌左四款小食：泡椒豬手、拍青瓜、木耳、素海哲

房裡面有個叫人制，
拍著佢一分鐘就有侍應入黎處理我地嘅order～ 個涼拌素海哲好好食！ 有麻油嘅香味，微辣，非常開胃！
啲小食都唔細碟架！ 打邊爐期間食番啲凍盤即刻無咁熱氣！ 等緊個鍋黎嘅同時調較下自己嘅醬料先～
不過就只有辣椒、蔥、蒜蓉同炸蒜片。 另外我地有一大壺火鍋湯，
唔知係咪想方便我地坐房想加湯個陣唔使下下叫人黎，
都幾體貼，而且夠我地加三次湯！ 湯底黎到我地就將蕃茄、豆腐、淮山都落落去，
原本嘅湯底有清香嘅莞茜味，唔似平時出面好攻鼻嘅味！
個鍋仲好大鍋，
唔怕咁易就煲乾痴底 大手切肥牛夠晒四個人食，
試過唔沾醬都好鮮味，
牛味夠！
大小厚度非常好，
涮十秒就熟，仲要一啲都唔靭！ 蝦滑墨魚滑雙拼，唔算大舊，但好好咬口，好彈牙，
料好足，仲食到一粒粒蝦肉同墨魚肉～ 炸枝竹無乜特別但浸左湯食就好正！ 海生蝦屬細蝦，但都好多隻，有成十隻！
新鮮，灼一灼就食得 韮菜餃同灌湯小籠包各有八粒，
韮菜餃都好大粒，個餡好足料，啖啖肉，韮菜好香

灌湯小籠包係大驚喜，
開頭諗住試下，點知一試就愛上！
熟左嘅小籠包好似平時食嘅小籠包咁，
外皮軟熟通透，
睇到入面裝住好多湯汁！
一定要小心翼翼咁咬開外皮，
漏出黎嘅湯汁一個匙羹都裝唔晒！
打邊爐嘅小籠包比起蒸嘅小籠包更加新鮮熱辣！
個餡都好濃味！ $38仲有八粒咁多超值！

整體而言食物質素都幾好，
比起任食，無論份量同質量始終都會比較出色，
唯一比較可惜係我地八點落單，有好幾樣野都已經賣晒，
打邊爐無竹蔗水同五花茶點都爭咁啲！
佢嘅蟹鍋、多寶魚刺身同多汁一口肥牛粒我都好想試！
下次唯有再約早啲啦～

今日早收工，Green Monday，去左公司附近嘅APM搵食
行過Table 18，難得咁早無人排，就揀你啦！點左個Baby Spinage嘅沙律，
仲有大大個蘑菇～
兩樣都係我至愛

大蘑菇通常都好飽肚，
最後我都無叫到湯，
嗌左個熱朱古力就暖笠笠咁走人lu～

Kubrick係我一個人的晚餐推介系列中嘅首位，
不過今日男人陪我去享受左個美好嘅午後時光Kubrick係一間同書店結合嘅Cafe，
仲鄰近電影中心，
之所以會成為我嘅首選，
一來食物不錯，
二來美食＋電影絕對係一個人嘅最佳節目！

今日係周末嘅下午，無夜晚咁多人，
好快就可以兩個人坐一張大檯，
點左墨汁麵同大蝦意粉，
不過今次想講佢嘅飲品。Cafe Vienna
我唔飲咖啡，都唔識咖啡，男人嘅評價係似Flat White，味道唔錯，Size都唔錯我嘅必點飲品係呢杯杏仁忌廉蜜糖茶，
面頭嘅泡沫打得非常細膩幼滑，杏仁嘅香味濃郁，令人忍唔住不停咁“不”黎呷，
不過蜜糖茶底就比較遜色，所以一定要茶連泡沫一齊飲，
搞勻的話杏仁味都會減弱，
所以飲嘅時候都要花啲技巧先唔會嘥左杯野

兩口子去南丫島環島遊，
經過呢間裝潢很有外國feel嘅餐廳，忍唔住就入左去芝士磨菇醬全麥多士配磨菇

呢間餐廳做嘅主要係外國人生意，
食物都以西餐為主，
有好幾款輕食、All day breakfast，
外表都好吸引！
呢個全麥多士烤得非常鬆脆，
一層多士，一層蘑菇，一層芝士，再一層多士，
係真正嘅“層次”！
而且份量好大，
加多杯鮮果沙冰，
帶本書去，
嘆完個早餐睇下書抖番個令兩個鐘先去行山，
正！

人嘅口味真係會隨住年齡而改變，
今年無啦啦鍾意左去食蛇羹！
最難得係男人肯陪我去周圍食大蛇羹拼臘味糯米飯

今個冬天試過幾間蛇王X，
今日試下由細到大番屋企都會經過嘅蛇王善

一如其他蛇店，有幾個餐俾你揀，
我地兩個細食，
嗌左一個大蛇羹拼臘味飯，
臘味飯一般，唔夠香，
蛇羹都夠大碗，
蛇肉都多但肉質麻麻地，
啲脆脆都好普通～