今日唔駛返學，就同朋友嚟試下呢間餐廳。叫咗幾個餸，包括一個西班牙菠菜火腿奄列，一個Carbonara 同一個雪糕窩夫食。整體都唔錯，個奄列個人認為最好食，因為真係好多蛋汁，同好滑。個意粉就ok啦，芝士味幾濃。至於個窩夫就幾得意，因為個形狀幾特別，好似朵花咁。味道就同茶木個類甜品差唔多。呢間餐廳都係去尖沙咀一個幾好嘅地方，可以推介。

同朋友行銅鑼灣想食飯，有選擇困難症嘅我哋行嚟行去都唔知去邊度食好，
點知行行下見到有人派傳單喎，話呢間香港茶餐廳開業一周年有優惠，咁咪去試下囉。

可能時間有啲晏啦（九點幾），鋪頭都已經無乜人，
咁我哋兩個人就odd odd地咁坐低，嗌咗個有優惠嘅二人套餐，
個餐包一碟海南雞、一個煲、例湯、白飯，重有嘢飯，都係$98，銅鑼灣嚟講選係咁啦。

海南雞係好食嘅，好滑唔鞋口，但係略嫌雞肉唔夠雞味啦，搞到我要成日點汁先食 LOL不過呢個薑葱斑腩煲係正嘅，熱辣辣，薑葱味好香好香，
斑腩都好好味，味道恰到好處唔會太鹹，
亦都可以筆少少煲底嘅汁嚟送飯食，好惹味架！我哋兩個都食得好開心，份量望落唔係好多但係都食得好飽，
加上有優惠係開心嘅
你哋行開銅鑼灣都可以試下  佢哋重有好多其他菜式架！

放學有啲夜，唔想番屋企食飯，於是同朋友喺西環趴趴走搵嘢食醫肚，
結果就走咗入嚟呢間上海菜館食飯。

間上海菜館望落嘅感覺好家常，街坊小店feel，
老實講對間鋪頭唔係有好大期望。
因為都好肚餓喇所以就求其點咗個醉雞客飯同鱔糊客飯，點知出乎意料地好食喎。醉雞件件都好香酒味，雞件好滑唔鞋口，亦都好好味，
甚至個汁（應該係酒啦）我都筆嚟送飯食，連啲菜飯都有酒味，係正嘅！鱔糊都好好食，咪睇佢黑掹掹就以為佢鹹到飛起，其實食落味道唔太鹹，係OK嘅！
不過食完先見到個汁面有一層油浮下浮下，其實係唔健康嘅，不過想好食都無辦法！

當然個菜飯都好好食啦，啲飯軟熟，菜都好新鮮有口感，好食！
不過唯一美中不足嘅就係隨客飯送嘅豆漿，好似淡咗啲，溝咗水咁

前晚去荃灣做運動，去之前梗係要食埋d野，但又不可以太多，就諗起譚仔三哥。
叫左個豬肉酸辣米線，土匪雞翼同凍檸茶
豬肉普普通通預左，個湯底ok，米線亦ok，軟軟地。
土匪雞翼又預左，真係好野味。
待應都好有禮貌。

我諗好多人都知吉野家有下午茶食，都唔知有幾多人知道佢地D下午茶面餐真心抵食。

食開吉野家嘅人，都知吉野家主要都係食兩隻肉，就係牛同雞啦﹗

我今日晏就就外賣左個牛肉米（係呀，可以簡埋面嘅種類，唔止係有公仔面）上番屋企食啦，除左係貪佢抵食，亦都係貪佢出餐夠快（由落完單開始，等1－2分鐘就走得）。

鐘意飲凍野嘅朋友亦都有福，事關呢個set轉凍野飲（不論氣水、凍奶檸茶）都係加2蚊咋﹗

但係略嫌D面同牛肉分開放同埋D牛肉肉質都okay，但係就份量真係比較少啦

係紅磡做完野之後，驚覺已經係5點9…結果行搵附近茶餐廳都冇哂下午茶食，好彩仲有呢間大快活，真係抵讚啦﹗

由於真係太過肚餓，我叫左個35蚊嘅餐。入面包雞翼、奶油多士、餐蛋公仔面同埋一杯飲料。係食物方面，雞翼多汁、奶油多士亦都烘得岩岩好（金黃色嫁），但係相反餐蛋公仔面就比較失色啦，可能係臨時煮嘅，D面仲有少少硬未熟透。至於杯飲料，我就簡左凍綠茶啦。點知杯綠茶唔係好似其他快餐店咁無味，反而真係有幾分綠茶味，幾出色﹗

價錢黎講，我始終覺得下午茶應該要平過25蚊嘅，所以35蚊就真係略貴啦。

夜晚係廟街食完煲仔飯可以做D咩？梗係食個飯後甜品啦﹗

一入到去呢間糖水鋪，已經聞到勁大陣姜味，真係估都估到呢間係間傳統糖水鋪，出名食辣姜糖水同湯丸啦﹗果然睇一睇個menu，入面好多D中式熱糖水，好似：合桃露同番薯糖水咁。

因為之前試過呢到唔少糖水，所以最後決定叫左個「新上市」嘅凍楊枝甘露 (盛惠25雞)﹗其實個楊枝甘露都算足料，但係就貴左少少啦。如果係廿雞下，就相當抵食。

間糖水鋪比較美中不足嘅地方就可能係menu上嘅選擇比較少啦，我諗加加埋埋都係得15種到。

其實吉野家咁平嘅邊爐都係求個滾字，梗係唔會好似任食邊爐咁高要求啦，今次出咗隻新湯底，叫「雪濃湯底」，見個名咁得意於是就叫嚟試下。大家可以睇到，個湯底白雪雪咁，好有雪白豬骨湯底嘅感覺，比普通濃湯更夾個芝士竹輪鍋！更加唔洗講嘅係，個煲入面啲蔬菜夾埋呢個湯底同麻醬，好食！其實以幾十蚊嚟講，肥牛嘅份量係合理嘅，不過有時會覺得唔多夠喉，如果可以比多三兩塊就錦上添花啦。另外份肥牛雪得太凍，痴埋晒一舊，亦都係個問題，有待改善。

好耐無食過台灣菜，嗰日同朋友行開老銅就幫襯咗呢間易牙，
裝修唔錯，又咁啱有得坐窗邊，望街景，食嘢都開心啲

價錢以晚飯嚟講就算係咁啦，
我同朋友一人一個飯／麵，
我就食咗個紅燒牛肉麵，
味道一般啦，牛肉幾腍身同入味嘅，
不過覺得個湯甜得滯，如果加多少少辣會再惹味啲，
紅蘿蔔都可以煮下再入味啲就更好。反而呢個醉雞泡飯好出人意表，
成碗飯好香酒味，個湯都啖啖酒嘅清香，
雞肉好滑重索晒酒味，但係酒味又唔會蓋過雞肉本身嘅味道，係恰到好處嘅！我哋再額外叫多點滷水雞腎，好入味呀，加埋有汁呢，送飯一流呀！

一早聽過咖啡弄呢個名喇，見有好多朋友之前都有試過，又post咗好多食物嘅相上ig，見到都覺得好吸引，不過一路都無機會去。

去到真係好多人！我同friend兩個人都等咗好耐先有位呀！

講番嘢食啦，要留意一樣嘢，就係每個人都至少要嗌一杯嘢飲，規矩嚟架！
價錢係唔平嘅，所以就自己諗啦！
嘢食選擇係多嘅，我就最鍾意呢個紅豆抹茶雪糕窩夫，
窩夫好新鮮！嚟到重熱辣辣！
紅豆唔會甜到好漏，味道啱啱好，
抹茶雪糕都好好食，好香抹茶味，
我就鍾意夾少少紅豆同雪糕落個窩夫都一齊食，味道好夾，好正！
份量好多呀，有四塊窩夫，我當lunch食都食唔晒 芒果乳酪沙冰都好正，啲冰好細滑，飲落好香芒果味，加埋乳酪呢，酸酸地幾好飲！
加上杯入面真係有幾粒芒果肉，啲芒果肉好甜，好好味呀！雖然係貴咗少少嘅，不過係好食，會再幫襯！