果日星期六晚去舖頭得2枱客 同朋友各點咗開心果心太軟同朱古力心太軟同一個冰 原來雪糕得乳酪雪糕無其他揀🫣感覺同心太軟唔多夾 而且2個心太軟入面一啲都唔熱. 連暖都稱唔上🫠好明顯未焗夠時間 開心果味亦唔出. 得甜味 嘢食都算..但服務態度真係.. 呢度負責樓面果位女店員好似完全唔多想serve 我地咁🫠 食物嚟果陣叫佢俾多隻匙羹我哋佢完全無理. 再叫多次應完隔咗好耐先拎嚟. 重要俾一隻裝唔到嘢嘅匙羹我哋用😂係無咩弧度. 一畢個心太軟就會跌 重點嚟..我地叫佢俾一杯水我哋..又係好耐之後先有. 而且得少少🤏🏻 如果唔俾得水你可以出聲話無. 但俾得果少少係咩意思呢？ 果一下真心覺得無回頭 因為良心小店先山長水遠揸車嚟支持下. 但店員真係好趕客. 只怪自己無睇咗食評先過嚟

日式吉列豬扒就食得多. 韓式吉列豬扒就真係第一次食 今日就嚟到位於蘇豪區嘅Kyung Yang Katsu. 係一間以韓國新鮮豬肉製造嘅韓國炸豬扒專門店😍喺韓國大約有80間分店營業中 香港分店亦有韓國師傅親自駐場製作 使用韓國新鮮豬肉製成嘅香脆多汁炸豬扒 🐷特級吉列豬扒定食 特級豬扒係豬扒加上豬面肉. 每隻豬只有450-500克嘅稀有部位中 咬落去充滿肉汁. 而且肉質鬆軟 配上黑松露鹽、芥末、蝦醬、刀魚醬 可以先點下松露鹽. 試吓豬肉本身嘅滋味 蝦醬同刀魚醬係製作韓國泡菜嘅材料. 同豬肉嘅味道好夾 食食吓覺得有啲膩嘅時候. 可以用青芥末去解膩 🐷芝士&吉列豬扒套餐 芝士吉列豬扒係水牛芝士包裹着豬肉嘅炸物 拉絲嘅芝士真係相當邪惡. 外皮鬆脆爽口. 唔會油膩 吉列豬扒肥瘦得宜. 肉質比特級豬扒結實 每個定食都會配飯、麵、沙律同前菜 米飯上面會配上飯素同埋可愛嘅鵪鶉煎蛋 麵嘅味道亦都唔錯. 而且重可以refill!! 一定食得飽

香港都有得食溫體牛啦😍😍之前係台南食過後念念不忘 今日就嚟到位於旺角嘅三公台灣料理. 係香港首間溫體牛餐廳. 有任食溫體牛套餐🤤重有岩漿沙嗲湯底添 溫體牛肉有牛頸脊、牛嫩肉同牛菲力可供選擇. 上枱果時已見到牛肉嘅色澤紅潤. 紋理分明. 入口更加係鮮味嫩滑. 沾上濃郁嘅岩漿沙嗲湯底簡直一絕 另外重有蔬菜拼盤同丸餃類 台式邊爐點可以無我最鍾意嘅蛋餃同燕餃. 不過配沙嗲湯底真係第一次🤭 蔬菜都好鮮甜. 特別係粟米 最後梗係煮埋個大光麵. 嚟個高級版嘅沙嗲牛肉麵火鍋啦😝 依家餐廳重推出咗黑夜火鍋優惠. 20:30後可以以HK$288 (原價 HK$368) 享用2人岩漿沙嗲温體牛肉火鍋（＋HK$33任食牛肉）

一直都有聽Mano呢一間餐廳. 而且喺lunch time嘅時候都好爆場 今日就嚟到試一下.見到個lunch set 選擇都唔少. 而且都有薯仔麵團就梗係要試吓 餐湯係南瓜湯. 唔會太重忌廉味. 都食到南瓜碎 凱撒沙律份量都幾好. 而且好多汁 🍴意式煙鴨胸薯仔麵團 煙鴨胸煎得好香. 保留到肉汁 醬汁好香香蒜味. 薯仔麵團都幾煙靭 🍴10oz 燒紐西蘭肉眼扒配烤蔬菜 肉眼扒嘅肉味幾香濃. 肉汁亦都好多 烤蔬菜估唔到係椰菜花. 烤得好香口 由於朋友唔鍾意食，我只好幫忙食晒佢啦 🤣 🍴Tiramisu Cream cheese好滑身. 帶有好香嘅咖啡酒味 上層嘅朱古力粉份量都好多. 味道豐富

永年車仔麵呢個名相信好多元朗人都有聽過. 我亦都由細食到大 見到佢由細舖搬大舖. 再見到佢裝修變靚同加開分店 真係有一種一齊成長嘅感覺❤️ 今次嚟到沙田呢間分店. 已經進化到車仔麵茶冰廳. 裝修重非常之有心思. 有一個懷舊士多corner. 好啱打卡影相 🥢永年大碗麵+永年男神麵 嚟到就一定要食車仔麵. 佢嘅蘿蔔、豬腸、雞翼、豬紅等等由以前已經好出名. 好貪心嘅我哋就決定嗌咗呢兩款面 而且食得辣嘅朋友一定要配招牌辣汁. 真係辣得好爽 所有配料都煮得好入味. 豬腸唔會有臭味. 蘿蔔唔會有渣 🐮鐵板一人套餐(美國安格斯封門柳） 見到人哋食個鐵板渣渣聲. 我哋都忍唔住叫咗個嚟食 塊鐵板相當夠熱. 一到啲汁落去即刻渣渣聲 封門柳大大塊. 肉質鮮嫩多汁 我哋重加咗個炸麵同埋酥皮湯🥄酥皮周打蜆肉魚湯 個酥皮焗到好脆好金黃 個湯好cream好多材料. 啖啖都食到蜆肉 🍤蝦多士 竟然有唔喺度都食到嘅懷舊蝦多士😍 炸得好香脆. 唔會淡淡油 蝦嘅份量亦都唔少 ❄️紅茶龍眼冰+抹茶紅豆冰 龍眼冰香甜清爽. 飲落都覺得好養生 抹茶紅豆冰. 抹茶味香濃加埋香甜嘅紅豆好味 今餐食得好滿足. 車仔麵嘅質素仍然維持到水準 最有驚係個鐵板封門柳. 估唔到咁平嘅價錢都可以食到咁高質素嘅封門柳

之前就嚟porterhouse house 同朋友happy hour. 啲食物質素令我驚艷 所以今次就充滿信心咁決定同朋友嚟食佢個brunch Brunch分為兩個時段.分別係11:30-13:30及1:45-3:45 由於太早起身嘅話我戰鬥力會下降. 所以我就揀咗第二個時段😝以最佳嘅狀態去作戰 呢度嘅brunch選擇非常之多. 有頭盤、冷盤、熱身、甜品等等 當日令我最驚訝嘅係竟然有好多唔同嘅龍蝦款式. 有凍龍蝦、焗龍蝦同蒜香龍蝦. 真係食龍蝦都可以食飽 除此之外仲有龍蝦湯. 同晚餐飲咗個龍蝦湯係一模一樣咁好飲. 配埋佢嘅酸種麵包一齊食真係好正 生蠔都好好食. 雖然望落好似唔係好大隻. 但食落好鮮甜清爽. 但有淡淡的海水味🦪真係令人忍唔住一隻接一隻咁食 熱葷重有燒和牛、炸韓式雞、蒸魚等等 至於甜品方面. 除咗小朋友最鍾意嘅雪糕corner之外. 仲有蘋果批、提拉米蘇、麵包好啲、芝士蛋糕、黑森林同埋水果等等 每一款甜品嘅質素都非常之好. 搞到個肚都真係就嚟裝唔晒 而飲品方面. 亦都可以加錢free flow 我就加咗最簡單嘅無酒精版本. 有fruit Punch、提子汁、茶同埋咖啡等等揀 佢嘅提子汁睇落好似白酒咁. 但提子味好香濃 今日真係完全滿載而歸. 晚餐都唔使食

作為大圍嘅街坊. 我一直都有去區內比較少見嘅馬拉菜食下 而且呢間算係比較正宗嘅馬拉菜餐廳. 特別係佢嘅肉骨茶 店內嘅空間唔算好大. 但都幾溫馨. 座位唔算好窄 🇲🇾豆卜金菇肉骨茶 呢間小店嘅肉骨茶款式非常多. 唔一定要啖啖肉 飲落有好香又甜甜哋嘅藥材味. 香濃但又唔會有苦味 豆卜同金菇嘅份量都好多 🇲🇾鮮牛油咖央多士 我每次嚟必食！ 多士烘到金黃脆口. 夾住香甜嘅咖央醬同埋冰凍嘅牛油 真係令人又愛又恨 🇲🇾舊街白咖喱滲滲 係馬來西亞同檳城獨有嘅美食 椰漿令到湯底變成奶白色. 食落充滿椰香 配埋虎蝦、豬紅同豆卜等材料 非常豐富 🇲🇾芽菜雞配黃薑飯 雞肉都幾嫩滑而且入味. 芽菜爽口唔會好油 黃薑飯仲可以加$5轉做其他飯類 🇲🇾愛他愛他 係馬來西亞嘅傳統美食. 將魚肉茸混合咗各種香料後 用香蕉葉包住再烘烤. 得意又好食 🇲🇾炸饅頭 外脆內軟. 加埋煉奶冇得輸呀

La Famille 一向係我最鍾意買嚟同朋友慶生嘅蛋糕🎂每次慶生總會食大餐食飽飽. 如果蛋糕太大大家又總會食唔哂 La Famille 嘅蛋糕size啱啱好. 10cm同朋友食又得. 自己食都得. 多人嘅時候重可以買多幾款口味開心share❤️ 價錢亦都好相宜. 質素又好. 簡直係大部分人嘅心儀蛋糕 每個戚風蛋糕都非常鬆軟濕潤. 就算放在過夜都依然好鬆軟 入面嘅cream唔會好膩. 奶味香濃幼滑 🎂日本柚子 日本柚子好清香. 蛋糕入面重有柚子皮 一個人食晒一個絕對冇問題 🎂沖繩黑糖栗子蒙布朗 栗子蒙布朗嘅栗子份量非常多又唔會太甜. 上面重有大大粒糖漬栗子 🎂泰式奶茶 泰式奶茶味都尚算突出. 每啖都充滿茶香 🎂大甲香芋黑糖麻糬 綿密嘅香芋蛋糕夾住Q彈嘅黑糖麻糬. 口感豐富 佢嘅蛋糕口味越出越多. 搞到有選擇困難症嘅我更加困難😂因為每一個都好好食

希慎廣場嘅地庫大改造後. 變成潮流生活空間Urbanhood. 有唔少特色嘅餐廳進駐 Saraseihk 就係其中一間. 佢係一間和洋甜點專門店. 傳承日本職人傳統手工藝. 再融入西式烘焙理念 嚴選進口、天然食材作為原材料. 以日式工藝彰顯細節. 研發創新口味掀起新派獲大眾追捧的烘焙潮流. 打造令人「歡樂」與 「愉快」嘅和洋甜點 主打外型趣緻可愛嘅飯糰蛋糕 、口感層次豐富嘅天使蛋糕以及造型色彩繽紛嘅迷彩戚風蛋糕 🍙 飯糰蛋糕 （京都焙茶、Tiramisu 、Cookie and cream 及楊枝甘露） 以御飯糰作為靈感創作嘅飯糰蛋糕. 用法式薄餅同埋鬆軟蛋糕呈現紫菜同埋米飯嘅樣 既可愛又好食 🥚戚風蛋糕（開心果士多啤梨、皇室紅茶、士多啤梨、京都焙茶及70%濃厚朱古力） 每件都鬆軟濕潤. 蓬鬆輕盈. 味道亦好特出 🍰 Earl Grey and Oreo Cake 伯爵茶味非常突出. 蛋糕都好鬆軟 加埋Oreo cream好清新

TERA由係佐敦嘅一間小店進化到依家元朗跟住大圍都有分店啦. 大圍店嘅座位都幾好. 維持返同佐敦店一樣嘅木系簡約裝修. 好有日式庭園嘅感覺🎋 🍛吉列大蝦旋風蛋包飯配咖喱汁 大蝦香脆唔油. 咖喱汁香甜更配有紅蘿蔔同薯仔.唔夠重可以加 配上珍珠米同埋蛋簡直係黃金組合 🥚開心果疏乎厘 嚟到Tera 梗係要食疏乎厘啦 每日限定竟然有開心果味嘅疏乎厘😍 疏乎厘鬆軟濕潤充滿空氣感. 有好香嘅蛋香味 開心果汁非常濃味又唔甜. 啱晒開心果控 旁邊重要有好多開心果粒 ☕️椰乳芒果咖啡 本身我就好鍾意飲椰子咖啡. 配埋芒果更加清爽. 成杯咖啡都好開胃