金鐘區一向搵食艱難，今次試吓新嘢； 前菜 大鷹沙律 Hawk Salad 沙律組合唔錯，有青瓜、櫻桃蕃茄、羽衣甘藍、菊苣、麥片、藜麥、烤腰果同石榴等等，入口清新爽脆，用料非常新鮮。 主菜 烤鱸魚 Grilled Barramundi 鱸魚份量一般般，皮不夠香脆，不過魚肉尚算煎得嫩滑，入口有肉汁，配合小西蘭花 + 薯蓉整體配搭可口，3 樣加埋基本上份量足夠一個成年男士。 熱咖啡 Americano 咖啡香濃，上枱時熱度夠，不過忘記了拍照。

～經典早餐 沙爹牛肉麵 + 火腿炒蛋多士 沙爹醬汁應該是自家調製，不過入口淡而無味。。。。牛肉醃到死實實，唯一可取的是公仔麵煮得唔錯，剛剛熟、入口重有小小爽口彈牙。 炒蛋估計師傅想做到炒滑蛋效果，不過眼高手底，無論蛋漿比例，時間同火喉掌握都只留於初哥階段。。。結果係令到邊沿位置嘅炒蛋入口老柴，中間啲蛋漿重係”水汪汪”的感覺，火腿不過不失，烘多士合格 奶茶 合格 綜合只是一間普普通通的地方茶餐廳，路過肚餓嘅可以試試無妨，唔食又唔會有損失。

再興燒臘係灣仔已經開咗好多年，每次路過都爆場，出品追求快、靚、正！ ～三寶飯 三寶有义燒、切雞和燒鴨，肉明顯是急凍冷藏肉，入口有點過於鬆軟，失去彈性和肉汁。。。不過經醃制加上燒烤後味道還可以，喜歡的是汁可以按自己喜好而加，要挑剔的話白米飯溫度入口只是暖的。。。呢個失分好多。。。可能老闆希望大家可以盡快吃完盡快埋單盡快多做幾個客人。。。。。。 綜合只是一家網紅店，不吃沒什麼損失，如果路過花過港幣52蚊一碟燒味飯打個卡也無所謂嘅。。。

～烤豬扒撈檬 烤豬扒做得唔錯，入口有淡淡嘅香茅同調味好平衡，豬扒應該係用新鮮貨，撈檬伴菜有生菜絲、青瓜絲、紅蘿蔔絲、炸蔥蒜同蔥油，入口清爽好舒服。 ～鷄絲扎肉湯河粉 先呷一口湯頭，牛骨清湯夠清爽同滋潤，配合生洋蔥同金不換香草滋味更上一層樓。要挑剔的話缺小了”鵝蒂”。。。 ～越式炸春卷 合格 ～馬拉盞炒通菜 油份同鑊氣都夠，問題係馬拉盞未夠惹味，有點點失望。 ～凍青檸冰 合格 ～越南得小梅 第一次飲，有青檸同咸金桔加Soda 水，味道ok 綜合係一家用心做的小店，用料足，味道雖然未必可以做到百份百越南真味，不過個人覺得已經有90 分以上，支持！

路過見人小小又係童年回憶，一於幫襯支持一下小店。 ～蒸腸粉 腸粉10 蚊有4 條，唯一要贊的係腸粉夠熱辣辣。食腸粉嘅靈魂梗係要加入大量混醬（有芝麻醬、鼓油同甜辣醬）。呢到賣嘅腸粉係齋腸，所謂味道其實已經俾啲混醬蓋灑，剩下的只有啖啖童年回憶嘅味道。。。 咖哩辣魚蛋 雖然已經加入大量咖哩和辣油炆煮，魚蛋入口依然帶有點點腥味、而且是軟腍腍不夠彈牙。。。完全不合格！ 綜合只係一間讓自己心靈開心嘅小店，食物質素雖然有待改善但並不是重點。。。

~ 海鮮拼盤 有龍蝦、海蝦、帶子和翡翠螺，一大盤份量足、新鮮，要挑剔的話翡翠螺的份量有點多。。。如果將翡翠螺量減半並改為其它海鮮品種會更加分。 ~ 燒白鱔 非常新鮮、肥美肉厚，唔錯，要挑剔的話缺了點點炭火燒烤的味道，這個是香港做餐廳的無奈（因為受相關飲食條例的規限）。 ～炸馬介休球 一客有5 粒，香脆內軟，味道合格，馬介休球是一道非常受歡迎的傳統葡萄牙小食，做法是直接用馬介休（或用鱈魚加鹽醃過），再蒸熟拆絲，加上薯泥，同時將洋蔥、芫茜或三色椒切碎先炒香一拼攪勻，最後弄成橄欖形狀或圓球形，最後炸至金黃色便可以。吃時能咬到一絲絲魚肉為最佳。 ~ 燒葡國腸 燒腸比預計淡口，伴青蘋果不錯、醒胃消滯。 ～葡式椰菜 用乾燒的方法煮，第一次咁食法，入口有點點乾身，味道尚可接受。 ～招牌葡式烤乳豬 (1/4隻） 師傅烤肉功夫掌控一流，入口皮脆肉滑，配醃椰菜味道會更上一層樓。 ～葡式焗鴨飯 傳統的葡式焗鴨飯會先以鴨架熬成湯後，再注入炒香的葡國米中，然後一層飯一層鴨肉絲地鋪在缽中再用焗爐焗香。這𥚃的焗鴨飯入口滿滿米飯和鴨肉絲獨特的鴨羶味，再配以葡國臘腸的鹹香，紮實而不花巧的美味。 ～草飼羊𣕧配燒汁 用的是成熟的羊，入口有咬勁和羊羶味，配厚身紅酒一流。 ～法式焗梳夫里 梳夫里份量足，加上鮮忌廉一齊入口軟滑好味道。要挑剔的話這𥚃的梳夫里太有質感沒夠”梳乎” ～ 心太軟伴雲尼雪糕 流心朱古力蛋糕入口 creamy ，合格 綜合是一間非常用心經營的小店，出品穩定，週末有 live band 演唱英文老哥，氣氛唔錯，支持小店！

下午茶時間路過見𥚃面坐了八成客、咁啱肚子有點點餓，一於坐低試試出品怎麼樣。 ～香煎香草豚肉眼配嫩滑炒蛋+胡麻醬田園沙律 跟北海道咖喱飯 等咗 10 分鐘左右，豬扒同咖喱飯分別上桌，先來一口豬扒，唔錯、熱辣辣即叫即煎做法，豬扒既有肉汁又有咬口，並非坊間一般的”化學師傅”醃肉法攪到啲肉質滑潺潺、味如嚼蠟果種，滑蛋火喉做得唔錯，配上咖喱飯很夾。所謂的北海道咖喱似係用大路S&B咖喱磚果種味道，反而米飯有驚喜，上桌時熱辣辣已經加左分，加上米飯粒粒分明，足見煮飯師傅仔的用心去做好每件事。 奶茶 合格 踪合出品是一間值得支持的連鎖小店！

曾幾何時在網上見到評語話老板娘做得唔錯，今晚終於有機會試試。 ～ 豬油渣炒番薯苗 油分夠、份量足，合格 ～ 長沙臭豆腐 臭豆腐真係好臭，味道十足，不過非個人喜好，輕嘗一件即只。。。 ～ 豬肉蒸餃 似係交來雪藏貨，入口味道一般般，失望。。。 ～ 手工羊肉煎餃 落單時要求係煎餃，不過上桌時真係無言以對。。。。。。餃子本身已經係冇味，所謂的煎餃真心不懂欣賞，一個字 ～ 差！ 綜合嚟講只係一間普通到唔普通的小店，希望老闆可以俾心機做。。。啲廚房出品真係唔值得呢個價錢。。。

記憶中第一次幫襯羅富記已經是 37 年前，今日中午路過見入面人小小一於坐低慢慢嘆吓世界，順便回味一下。 鯇魚腩粥 個人理解鯇魚腩粥係屬於老餅粥、Uncle 教落食魚腩粥一定要配碟胡椒粉鼓油（自已溝），先呷一口粥、熱辣辣軟綿綿，幾十年完全無變過，師傅功力足。查網上資料食粥在中國有數千年的歷史，是中國一種獨特的傳統飲食方法。不同地方的粥有不同的濃度，而不同地方對其他地方的粥也有不同的別稱。廣東和香港的常見粥品是「生滾粥」，生滾粥是盡量縮短肉類食材受熱的時間，避免肉類因長時間烹煮而變得粗糙，以保持肉類原有的嫰滑口感。生滾粥的做法是從一大鍋粥裏，搯出約一至兩碗份量的粥到另一個較細小的鍋子加熱，然後加入肉類、海鮮或動物内臟等新鮮食材，煮至肉類剛剛熟就立即停止加熱，以保持肉類的鮮嫩香滑。與老火粥的不同之處是生滾粥較強調突出肉類食材本身的味道，盡量保留新鮮肉食的原汁原味，肉類食材在一碗粥中所佔的分量也較多。羅富記師傅原全能表現出煮粥的精粹！魚腩肉質鮮嫩剛剛熟，要挑剔的話魚腩份量偏小，只有約半個魚腩。。。唉、生意難做？！。。。 魚片皮蛋粥 大至如上、魚片和蛋蛋合格，粥底正！ 菜心 賣 $23蚊，份量同賣相都不值呢個價錢。。。 蜆蚧鯪魚球 （半份） 靈魂嘅蜆蚧水汪汪。。。薑絲都冇條，鯪魚肉一般般，似係雪櫃拎出嚟嘅行貨，油溫控制又不當。。。失望中嘅失望。。。 綜合係一間認真做嘅老店粥舖，不過感覺上老板已經年事已高，有啲嘢顧唔到咁多（或者已經退咗休唔想理）。。。希望有認真想做嘅接班人𠄘傳落去。。。

~ 鬆化鮮雞潤 送酒小食合格，用嘅係靚冰鮮雞潤，入口棉潤，要挑剔的話份量小咗啲啲。 ~ 炸三寶 炸排骨、炸雞腎、椒鹽腰果、重有一様唔記得咗。。。用油靚、油溫掌握得宜，送酒一流。 ~南乳炸豬手 （半份） 賣相有點亁身，入口尚算軟琳，老實講、豬手非個人所愛，小吃多滋味。 ~蟶子凍食 泰式沙律做法，入口清爽，送啤酒唔錯。 ~原件蝦多士 時價 蝦肉新鮮爽口、合格、不過不失。 ~風沙雞 （半隻） 用嘅係冰鮮靚鷄、鷄肉入口嫩滑，唔錯。 ~豉椒炒鵝腸 用嘅係冰鮮靚鵝腸，靈魂嘅鹹酸菜味道做得剛剛好，合格 ~自制香草豆腐 標榜自家製豆腐，入口無驚無喜，不試無損失 ~鯪魚球胡椒湯浸時菜 熱辣辣，淡淡胡椒香味，飲完酒暖胃之選 綜合只係一間網紅搞 Gimmick 嘅餐廳，開啤酒樽、唱80 年代卡啦ok 純粹滿足老板個人慾望，喜歡不喜歡真係好睇個人同現場氣氛，反而我認為重點應該放番係啲餸菜出品上，以事論事，睇得出老板願意俾錢，用料上乘，當中包括食材同食油，不過價錢相對不平宜，變相食客夾錢比貴租同每日只做一轉枱生意，價錢完全反映番哂係到，值得唔值得就見仁見智啦。