厚福街一向多美食，每次嚟到呢條街都會見到新店，今次吸引我眼球的就是一間韓式漢堡扒店。 一望過去就係非常亮眼嘅藍色店面，餐廳好特別，主打嘅係漢堡扒，一樣我哋平時唔係經常會留意的食物。 入邊係類似韓燒的裝修，每一個座位都有一個抽風系統，好貼心。 餐牌上面的主菜都係和牛漢堡扒，但就有唔同嘅配料⋯比較吸引的是二人套餐，內容非常之豐富，一次過滿足好幾個願望。 和牛漢堡用鐵板呈上，上面有一小件圓形石塊，就係用來煎漢堡扒的重要部份。 對準吸風口，就可以享受煎漢堡扒過程的樂趣了！每次將漢堡扒切一少件然後放在石塊上，煎幾秒就翻一翻咁樣，大概1分鐘左右，一件自製的漢堡扒就完成了。 過程確實係幾得意，滿足左我們的童心。 有少少驚喜的是，二人套餐的牛肉飯味道都幾唔錯，絕對唔俾坊間的連鎖店遜色。 配上一杯特飲，係口腹都非常飽足的一個下午啊！

近來鮨店當道，唔小心挑起條癮，就周圍去試各鮨店的omakase。坊間有好多出名的長龍店，但我同朋友都少去，因為我哋大家返工時間都唔穩定，食飯真係要講緣份同心情！ 今次佢帶咗我去一間隱世小店，俾咗我唔小驚喜。雖然位置比較隱蔽，但門面好清新乾淨，入到去亦見到店家用咗唔少心機裝修，連小擺設同餐具都好出色。 因為冇訂枱嘅關係，坐唔到吧枱，但亦有意外驚喜。梳化位空間感同私隱度都十足，大班朋友嚟嘅話，就好似一個小天地咁。 午市餐牌選擇都幾多，豐儉由人。而我的目標好清晰，就係Sushi omakase。 前菜不過不失 茶碗蒸用料都幾豐富 因為唔係坐吧枱，所以壽司分咗兩盤上。 賣相好出色，飯同魚嘅比例啱啱好，魚身亦好有光澤，飯嘅味道同溫度都控制得唔錯，紫菜又夠脆，整體來講係令人滿意嘅 當中比較出色的係三文魚子同貝類。三文魚子卜卜脆又鮮味。帆立貝爽口又彈牙，口感100分。 12件壽司，美中不足的是吞拿魚蓉。吞拿魚蓉有跟影響咗口感，但我哋都好欣賞店家好接受意見，馬上重做一件補償返俾我哋。 同場加映朋友仔的西京燒 最後唔少得嘅甜品 整體而言，環境唔錯，價錢算相宜，質素穩定，值得一去。

搬咗去黃埔一段日子，睇住呢邊開咗地鐵站之後越嚟越旺，越來越多高級餐廳進駐。呢間鮨店新開嘅時候，已經馬上去試午市，一直心思思諗住試吓晚市omakase，但因為疫情嘅緣故，計劃一再延後。。。今日終於得償所願了！


揀咗一個中價的套餐，有齊刺身、壽司同熱食，可以滿足哂多個願望。
真蠔
帶子位甜 肉又夠creamy 

蝦上需係蝦膏蝦籽 配蛋黃醬
蝦好有蝦味 味道濃到好似食蝦醬甘

竹甲魚拌薑蓉 
有少少腥 
蒸蝦夷鮑魚係我最愛
蒸左4個鐘 超級好食
呢個日本我係我哋嘅東風螺 配唐辛子絲
口感十分軟滑 非常出色
免治雞肉 配月見汁 
咬落去一粒粒係雞軟骨 有雞軟骨口感的確幾正又juicy 而月見汁係不嬲好好食既
用餐中間有一個酸汁做既啫喱

呢個餐具好靚 好refreshing 
跟住落嚟就係最期待的壽司環節
真鯛 配昆布
魚味係好白身魚味 
但昆布無乜點發揮作用 
而飯口感都幾ok
深海池魚 配柚子胡椒
魚油味濃 有少少爽口 配上醬汁就會清新d 
可惜係魚似有粒筋 胡椒味突出
小肌 醋漬再由烏魚籽粉帶出鮮味
醋漬稍為酸咗少少 食唔到烏魚籽味
車海老 即係我地平時都會食既花竹蝦 
但師傅確實處理得好好 蝦好大隻令人好滿足 又好有彈性
銀鱈魚 輕輕炙燒過 加蔥花檸檬
又係一個魚油超豐富的項目 係我杯茶
赤身做左醬酒漬 可以提升魚味
用赤身做醬油漬的確係good choice 

拖羅 用紫蘇葉中和油份
一個字 正！
個湯都夠誠意
甜品係紫薯雪糕 同焦糖蛋糕
雪糕口味好特別 
而蛋糕焦糖味好實在 口感又軟又滑 仲有雲呢拿籽 係意外嘅驚喜

整體來講，套餐都幾豐富，性價比唔錯；
美中不足係節奏控制得唔夠出色，算唔上令人懷念的體驗。

最近工作比較忙，好耐冇坐定定食餐好嘅。今個星期忙裏偷閑，終於有時間同老公食返個舒適的午餐。喺商場入面兜兜轉傳，最後選定左我哋最喜愛的麻辣菜式。餐廳光猛整潔，感覺舒適，而且服務都好唔錯。靠窗位置仲有落地玻璃，可以見到全海景，下次再嚟一定要預先訂位！

老公同我都好鍾意食辣野，好欣賞呢度除咗我哋常見的傳統菜式外，亦都有唔少創意的菜品。

口水雞同酸菜魚係不可少的，亦算係麻辣菜的評分標準。

口水雞賣相唔錯，雞肉鮮嫩，而且好入味。個醬汁麻辣得來又好香濃。

酸菜魚的魚肉冇骨、厚身而且滑溜。入口先係酸到辣，再有麻感同魚鮮味，夠哂層次。

店員介紹海鮮匯，都幾有創意，係一味凍盤來的，比較開胃。

仲有一項菜式都幾特別，就係麻婆豆腐啦。呢度嘅麻婆豆腐唔係用豬肉碎，而係換上牛肉碎，其他地方都食唔到的。

除咗幾款麻辣菜式外，另外有驚喜同非常滿意的就係黃湯燉花膠。我地都係愛湯之人，最鍾意又香又濃的鮮湯。燉到軟滑的花膠口感一流，湯香濃得來又唔油膩，滿足感十足。

整體而言，環境舒適服務佳，而且食物有一定質素，值得回頭。

疫情當道，政府禁堂食，迫於無奈過了一段日子的「自煮生活」。呢段日子，總會常常留意有啲乜嘢食材係快靚正嘅。 嗰日見到有朋友包餃子，慨嘆她一雙巧手之餘，亦令我諗起一間難忘的食店。小小的餃子店，顛覆了我對餃子的印象，原來餃子可以咁好食，仲令人食過返尋味！ 心癮一起，馬上叫老公揸車去太子買外賣。滿滿的一大袋，包裝得好妥當，二百幾蚊係四人嘅份量。 生餃子放落滾水淥兩粒，幾分鐘就食得，絕對適合我哋平時要返工的人，放工又無得外出用餐。 四款餃子各有特色，但要數我最鍾意的，絕對係招牌松茸豬肉餃。呢款餃子，係我食過最好食的餃子（沒有之一）。而且，小店的水準保持得非常好，餃子味道始終如一。 好容易煮，輕鬆在家食到美味餃子。豬肉味好香，松茸味又好濃，但兩者完全冇衝突得來又異常地夾。 壽喜燒牛肉餃都有少少驚喜，同傳統的牛肉餃子有少少唔同。 小雲吞就細細粒，容易入口，小朋友最鍾意，我個仔食到停唔到口。 簡單的素菜餃亦非常出色，蔬菜份量多好健康，但味道又唔會寡。

被限聚令餓左咁耐，終於等到放寬的一日，可以四人飯聚。約埋另一對相熟的夫婦，一行四人浩浩蕩蕩地享受美食去。 我哋揀咗位於香港仔的南灣如心酒店，貪呢度唔算旺區，人流冇咁密集。而且酒店食飯，衛生環境等等都有保障。一入門口已經令人感覺好舒適。 入內果然好闊落，環境好舒適。我哋好好彩可以有一個私人嘅獨立空間，可以好放心又舒服咁傾計。酒店防疫措施都做得幾足，每台都有消毒濕紙巾同埋一支全新的搓手液。 至於放啲食物的區域，每個取食物嘅人都有帶口罩，令佢更放心。而且每一樣食物都有蓋遮好，感覺上衛生一點。 行咗一圈，整體而言，食物的選擇都多元化，各國美食都有。 最受大家矚目的海鮮盤，沒有驚艷，但都有齊基本元素。 令一邊係廚師即席炮製嘅美食，除咗有日式壽司刺身之外，亦有炸天婦羅同埋燒烤區域。我好鍾意即席做的炸天婦羅，唔會有油膩嘅感覺。 飲品的選擇都有好多。 有一樣令我印象深刻的是呢度都有唔少地道的特色小食，幾有心思。我最鍾意煮溶化的豬手，而最驚喜就係咖喱特大魚蛋。 至於主菜，可以揀花膠扣鵝掌或者開邊焗龍蝦，我同老公就決定一人揀一款，可以試晒兩種滋味。兩樣嘢來講，我比較鍾意花膠，入哂味。 最後甜品環節，選擇都頗多，但胃部空間有限，唯有淺嘗幾款，質素都唔錯。仲有我地最愛的雪糕，很圓滿。

近排最多的活動，就係在家研究新菜式。偶爾都會想念出邊的食物。今次就係機會，同朋友仔一齊去靚靚Cafe食個lunch，享受下別人的服務。 餐牌花多眼亂，而且唔少都有特惠的價錢，樣樣都令人好想試。 先來一杯特色飲品，淨係賣相都令人好開心好興奮。厚厚的cream，好邪惡啊！ 主菜的蜆肉意粉，份量好多，意粉炒香過，都幾好味。 小食賣相好靚，甜甜的玉子，口口的芝士，好完美的組合。 食飽飽就完？梗係唔係啦！食甜品就係時候開進我哋另一個胃啦！ 超厚pancake，又滑又軟熟，配蜜糖又得，果醬又得，雪糕都得😋

一排冇食就會掛住的食物，雞煲絕對係其中一種。睇完中醫，在太子到處搵食，唔經唔覺又走到一間小店前，小店主打香辛的乾雞煲，正正是我杯茶。 店內裝修唔算好華麗，但都頗闊落。 賣點係價錢親民，配料選擇多。 主角雞煲看頭十足，一上枱已經有撲鼻的辛麻香氣。雞肉好乾身，入晒味，都算幾正宗。美中不足的是，隻雞本身唔夠厚肉，唔夠滑。 牛肉都幾高質，係靚嘅手切牛。 配料應有盡有，但當中最特別，又令我哋印象最深刻的，就係黑柏葉。記得細細個成日同屋企人打邊爐都會食，但大個咗出去啲餐廳都係用已經漂白左的牛柏葉，呢款配料絕對令我哋食返小時候的味道啊！

朋友仔約我哋去旺角支持一下黃店，當然馬上響應啦！居酒屋的裝修格調都係十足日本風格，每一項細節都同真正的日式居酒屋好接近，令人好relax。 充滿清酒招紙的特色牆本來已經好吸睛，加上種種「文化氣息」後更加賞心悅目。 餐廳食物的選擇都唔少，而且價錢都幾親民。作為居酒屋，酒水價錢絕對會吸引人飲多幾杯。 食物當中比較有特色的就是石板燒，我哋當然唔放過，叫咗一客最高級的日式和牛。 A5和牛的油脂分佈好靚，油花好均勻，令人睇見都流晒口水。 放喺熱辣辣的石板上面，飄來陣陣香味，真係色香味俱全！ 魚生方面，我哋三個人share左一盒雜錦刺身丼，份量好足。 沙律菜新鮮爽脆。 炸蠔熱辣辣，外脆內軟，係我當晚最喜歡的小食。 其他串燒同小食，整體質素都唔錯，令人飲得杯落。 舒適的地方撐同路人，食得好飲得落，價錢又合理，值得支持。

最近疫情當道，出街食飯都要份外小心，揀食店都要諗過度過，最理想係一人一份、而且係全程望到食物的烹調過程。除咗食物要啱心水外，我都會留意一下食店有冇防疫意識，衛生程度合唔合格等等。 同老公商量過後，決定去食蒸氣火鍋。比起傳統火鍋，蒸氣火鍋相對衛生得多，每一款食物都係自己面前蒸熟，而且唔會生熟同在一鍋。唔駛經廚房，在餐檯上烹調，過程令人放心。 入到店內，店長同店員的防疫措施，都令到我更加安心同滿意，可以好好享受呢餐飯。一入門口，店員就遞上酒精搓手液，為每一位客人潔手。 一坐低，除低口罩，眼明手快的店員有遞上全新信封，確保細菌唔會周圍飛。 係我哋睇緊Menu之際，店員亦好貼心咁幫我地將所有餐具用高溫蒸氣消毒，連酒精濕紙巾抹餐具都慳返啊！ 我哋兩個人，點左一個中高價位的海鮮套餐，有十款海鮮，仲有蔬菜同粥。優惠價都唔使四百蚊，算係好抵食。 滿滿的海鮮，裝滿兩個大碟，令人睇見都流晒口水。令我哋感到驚喜的是，海鮮全部都好生猛，大部份上枱後依然識郁。 唔同的海鮮，需要唔同的烹調時間。但呢啲事情都唔需要我哋操心，店員會定時定候幫我地方海鮮樂精架，同埋將熟透的海鮮放到我哋碟中。 十款海鮮，每一款都有唔同的鮮味。 蠔肉好滑溜。帶子好鮮甜。鮑魚就有咬口。 瀨尿蝦有獨特的鮮味，係大蝦同龍蝦身上都搵唔到嘅。 無諗過龍蝦非常之大隻，街市買都要兩三百蚊一隻。龍蝦身好厚肉，肉質緊實又彈牙，一人半隻都好夠喉了。 爆膏肉蟹係老公最愛，一蒸熟就飄來蟹膏的濃香，未食已經好興奮。蟹膏的質感好厚好rich，味道好濃郁。更驚喜的是，成隻蟹都好美味，除咗蟹膏，蟹肉都係非常之鮮甜而且有口感的。 數輪海鮮過後，已有八成飽。但蔬菜同粥底都好足料又吸引，令人忍唔住食埋果兩成。 整體而言，是一頓美味放心又抵食的海鮮盛宴，性價比十足！！！