放工之後聚會，最方便梗係去尖沙咀。去到海港城，想搵間好味高質又好錯嘅泰國嘢食下，發覺原來有一間有海景嘅泰國菜！叫做Nara Thai，餐廳位置喺尖沙咀Apple Store附近。 入到去，原來呢度係打卡餐廳，環境幾靚，仲有個打卡位！ 呢度嘅嘢食都幾多選擇，餐前小食蝦片非常好味。首先叫咗個馬莎文咖喱牛肉，另外再加左薄餅食。馬莎文咖喱唔會啦，甜甜地，好惹味，同牛肉撈埋一齊過未好夾，非常好味。薄餅嘅上菜方式幾特別，一開始以為餃子。有心思！ 另外仲叫咗個冬陰功忌廉湯，因為呢個配搭睇落好得意。賣相好吸引，上面嘅酥皮非常鬆脆。忌廉湯味道唔錯，有好濃嘅忌廉味。 炭燒豬頸肉，經典菜式，豬頸肉份量好多，好肥美，肉質爽得來有肉地，好正，調味好出色，好味！ 黎食泰國嘢梗係要食芒果糯米飯！芒果糯米飯非常滿意，芒果份量好多而且非常甜，糯米飯嘅飯嘅黏程度啱啱好，好味。 滿足的一餐。

尖沙咀一向多有情調既餐廳，今日去左海旁有風景嘅酒吧餐廳食飯，以前成日行過星光大道見到都覺得好吸引，今日終於嚟食！ 呢度嘅菜系係偏向地中海菜式，平時嘅西餐唔同，裝修都好有風味。呢度嘅店員服務態度好好，好悉心去介紹佢哋嘅菜式。 hummus bil lamb 鷹嘴豆蓉配上羊肉，呢個配搭都係第一次試！因為係店員推介，係傳統菜式，於是我哋就叫咗。份量都幾多，羊肉同啲豆蓉加埋起嚟嘅味道好夾，啲羊肉都好香。 主菜我哋叫咗蟹肉墨汁意粉，蟹肉份量好多！墨汁意粉無論口感定係味道都好高質，意粉口感好彈牙，好香，非常啱口味！ 燒雞肉串，非常香！分量超多，覺得呢度好似真係足夠三個人食！雞肉好滑，調味好出色，仲可以撈埋啲沙律同埋wrap一齊食，口感豐富。 飲品方面，由於我哋揸車過嚟，所以都冇叫酒，試咗佢哋嘅 mock tails，款式好多，幾清新，味道偏酸，好開胃。 好飽又滿足的一餐～

今日喺荃灣廣場行街，心血來潮想食燒肉，原來呢度都有一郎燒肉嘅分店！既刻去食。 一郎燒肉最大嘅賣點我覺得係佢有好高質既和牛，而且係任食！不論係燒肉定係刺身都有，justify到佢既價位～作為食肉獸，就梗係好抵食啦。 所有牛肉嘅紋理都非常之靚，唔同顏色都有，佢仲有label話俾你知呢一個係咩部位，唔會一路食都唔知自己食緊啲咩！ 除左多款飲品沙律，雪糕都有好多款，豆腐雪糕、抹茶雪糕、海鹽味都有，我就食海鹽味，好味！ 之前喺日本食過和牛刺身覺得好好味，估唔到喺香港都有得食！ 牛肉刺身好感好正，好似食魚生咁，拖羅刺身都真係有食拖羅既油脂感！點完豉油Wasabi，真係好似食日本壽司咁！ 最後以豆腐味雪糕作結，滿足！

都已經好多年冇上深圳，近年都唔會再去～不過有時有啲中菜又真係幾令人回味嘅，好耐冇食過烤魚啦！上次同同事傾完先發現原來香港係有烤魚食嘅！

旺角登打士街嘅烤魚工房原來都幾出名！今次去到，入到去環境好闊落，坐得好舒服，氣氛好好，一入到去就聞到好大浸酸菜麻辣嘅味道，入邊嘅員工非常之親切同埋貼心，成個感覺真係有離開咗香港嘅感覺，好地道嘅烤魚店！

一場嚟到梗係要食我好耐冇食過嘅烤魚啦！叫咗個唔辣嘅蒜蓉酸菜烤魚，只有一個大細選擇，我哋兩個人食應該都好快飽！於是其餘嘢食我哋都係叫少少小食。

賣相超級吸引，味道非常香，所有魚肉都係大大嚿，好多肉而且好鮮嫩，非常美味，而且好入味，每舊魚肉都有好濃嘅蒜香味，超級啱我。而且呢隻魚唔多骨，非常容易處理，真係好好食。我哋仲加咗$20要寬粉，份量都幾多，呢一隻彈牙麵條再加落去呢啲湯底真係超級一流！一定要加！

另外仲叫咗個麻辣蒜香花甲，花甲份量好多，佢打開曬比你，竟然每邊殼都放一隻花甲嘅肉！調味極度出色，超級惹味，下面仲有粉絲。

另外仲叫咗啲燒烤串燒，首先有口燒牛舌，啲肉好爽口彈牙，調味粉好惹味，係真係仲食燒烤嗰種調味。

另外仲叫咗羊架，啖啖肉，連個肥膏都超好味！新鮮滾熱辣，好好味～

不得不提佢嘅嘢飲都好正，芒果沙冰，我飲咗成餐飯都仲有好多！食辣嘢一定要配呢個芒果沙冰，仲有好多芒果肉。老公就叫咗咖啡，係凍啡，佢都覺得好好味。

成餐都都冇得彈！真係超級有風味，絕對可以媲美以前喺深圳食過嘅烤魚，而且所有食物擺盤都好靚，絕對係非常適合打卡😆。

慶祝生日，決定買下附近嘅美味外賣開個party。Pizza Hut嗰啲都叫到厭啦，今次一於試吓叫韓國外賣！ 新港城近來開咗間又韓國人主理嘅韓國餐廳，位置喺譚仔三哥附近，見到評價都幾好，一於買返屋企試吓！ 呢度食物嘅價位都幾親民，見到有唔同味道嘅炸雞拼盤都只係需要二百幾蚊！見隻隻味都咁吸引，一於就揀呢個，咁就全部都可以試。 雖然係外賣，但係賣相都非常吸引！呢一個擺盤真係完美，一開出嚟大家都wawa聲。炸雞冇骨，拎到返屋企仲係香脆可口，啲醬料調味非常出色，特別係蜜糖蒜粉真係永遠冇得輸！ 另外仲叫咗個烤牛肉Pizza，好大個批，份量好多，好抵食，爸爸都好鍾意食呢個！ 另外仲叫咗個炸醬麵，同埋炒年糕。芝士炒年糕份量都幾多，啲芝士都好多！拎到返屋企可能啲芝士會晏咗，放入焗爐叮一叮，又變返拉絲，正呀。 炸醬麵，味道唔錯，平時啲炸醬麵好容易太甜，呢度我覺得都啱啱好！ 我都冇為意，原來佢仲送咗可樂！ 滿足嘅一餐，炸雞真係冇得頂！

原來古今二終於開到黎尖沙咀，真係好，勁就腳，今日係TST 買完野之後，就黎食晚飯啦~ 今日好餓，都叫左唔少野食。首先叫左燒玉子，賣相勁吸引，調味好正，佢玉子唔係捲蛋果隻，似關東果種，有彈性既，都幾正~ 之後係蘆筍串燒，脆皮燒得好香口，平時唔食蘆筍，但呢個配搭幾清新新唔錯~ 之後有沙律，勁大碗！D魚子、蟹子、豆腐份量都勁多，fresh得黎又好美味，好高質既salad。 牛油果饅魚卷，勁有驚喜！牛油果好足料，饅魚脆脆地好有口感！夾埋好好食。 另一個壽司係牛油果配三文魚，又係好好味，我絕對係個牛油果控，牛油果配三文魚，食落有雙重三文魚既錯覺！哈哈。 勁滿足既一餐~

尖沙咀一向都多好野食，今次發現左間西餐小店都幾好味！叫做JUST'er Bar & Restaurant ～ @justerestaurant 呢度都幾多野食，好多野都想試，最後我地揀左羊架、烤豬、沙律冋花茶～ 花茶好抵食，估唔到有咁大樽！可以沖到起碼四五杯，而且感覺養生，清新嘅檸檬味㗎啲淡淡嘅菊花茶味，好啱飲。 豬肋骨，調味出色，外面嘅醬汁好惹味，肉質唔錯，都好易切，食落去口感幾好，而且份量都好多。不得不提啲薯條炸得幾正！好脆好香，鹹味好夠，好好味。 羊架好香，慢煮方式，燒得口感幾脆口之餘保留到肉質鮮嫩，調味出色，有南瓜汁牛油蕃茄，配搭好味。 沙律份量都幾多，好清新好Flash嘅感覺，仲有青瓜！佢配上嘅醬汁都好夾好好味。 非常飽，滿足的一餐。

平時成日食日本嘢 西餐，都好少食中菜，心血來潮覺得好耐冇食小菜，於是今晚就搵吓邊度有得食。 原來金雞廣場附近嘅點心度係有小菜食！聽個名以為係飲茶點心，原來晚市係賣小菜！咁啱我又喺波鞋街買完嘢，啱晒啦。 首先我哋叫咗個水煮牛肉，好香，個辣味香得來唔會辣得滯，啱啱好，少少麻辣感覺，味道唔錯，入邊仲有粉絲！非常好味。 之後叫咗個蒜爆小排骨，豬肉好香口，超鍾意蒜蓉味嘅我，呢碟當然岩口味啦！好有鑊氣。 之後仲叫咗個流沙包，佢嘅包係竹炭包嗰種口感，棉棉地又有啲爽，幾正！奶黃嘅味道出色，熱辣辣嘅流心奶黃流出嚟，好好味。 最後用一個楊枝甘露甜品作結，芒果好甜，份量都幾多，好好味，有啲唔會太酸又唔會太苦，完美嘅作結。

慶祝升職，銅鑼灣一講起好味嘅日本菜，朋友就帶咗我去呢間花貝日本料理。 入到去已經感受到高級嘅氣派，我哋今次坐師傅吧枱，食omakase，好有感覺。 午市Menu有兩種set，一種係刺身壽司嘅set，另一種係懷石料理嘅套餐。我就揀咗壽司刺身套餐，因為都好耐冇食啦。 首先係前菜，非常開胃，蕃茄豆腐酸酸甜甜，最有驚喜係冬瓜！佢浸咗落嗰隻汁好好味。 刺身拼盤方面，全部刺身都好新鮮，有中拖羅食！非常鮮甜。牡丹蝦質素都好高，口感彈牙，蝦味好香，非常有驚喜！ 日式蒸蛋，非常足料！好滑身。 之後戲玉啦！壽司！食壽司之前，師傅就俾咗幾樣開胃菜我，有洋蔥、蒜頭、薑，全部都有醃過，係平時食唔到嘅味！ 壽司質素好高，全部魚生都好新鮮，仲有你會睇到佢唔係純粹魚生，師傅係有用心設計每一件壽司，不論係賣相定係調味方面，你都見到佢係有精心計劃過，希望突出魚既鮮味。 當中我最鍾意係海膽上面加咗岩鹽！個感覺好pure，冇平時點豉油嗰啲咁濃烈，但係有淡淡的鹹味，非常有驚喜，好正，而且海膽非常新鮮！一啲異味都冇！非常高質。 另外大拖羅佢炙燒咗，呢個方法好特別，不過佢絕對冇浪費咗個刺身！燒完嗰陣油香更加出。 另一款炙燒魚生都好正，加上上面嗰個用甜酒煮過嘅類似紫菜嘅調味，非常有心思，完全帶到大拖羅嘅香味出嚟。 食完壽司真係感受到師傅嘅功架，好欣賞佢每次都會用心咁解釋食用方法同埋佢用咗乜嘢食材，增長知識。 最後有一碗湯同甜品。 湯有蜆肉，好鮮，卜卜蜆嘅感覺，下面仲有麵條，可以當面咁食，當然湯底我都飲晒啦。😍 甜品有日本嘅蜜瓜，非常高質，極度鮮甜，超好味！完美嘅作結。

古今二開到四圍都有，淨係荃灣都有兩間，行完荃新天地，次次都會想去食！ 因為今日早到，所以都唔算太多人，直接有位，太好啦。 魚籽胡麻豆腐沙律非常大盤，豆腐好多塊大大片，好滑，加生菜同三文魚子食，口感好立體，份量好多，抵食。 之後係兩款卷物。首先係煙花，上面有好多吞拿魚蓉，份量好多，仲有啲脆脆地嘅片喺上面，食落口感好豐富，而且有啲辣辣地，會一路想食落去！。 彩虹卷係有好多種唔同嘅魚生做卷，賣相好靚，魚生都好新鮮，仲有我最鍾意食嘅牛油果！完美嘅配搭。 玉子燒，熱辣辣！ 加埋上面啲醬，超好味！每人三件啱啱好，唔會少，但係又唔會飽到食唔到其他嘢～ 最後係燒雞翼， 調味出色，鹽燒味道，雞翼幾大隻，個皮好香～ 好夠飽，滿足的一餐～