放工去深水埗鴨寮街買電話卡後，順便去附近外賣店熊角外賣美食返屋企。 門口見到小黑板，4點半前特價$38真係好抵。 招牌藍帶雞扒$38配蜜糖芥末醬：雞扒打成肉餅再炸成吉列，內裡包住芝士。外層香脆有咬口，雞肉軟淋，芝士煙韌，口感豐富，加點蜜糖芥末醬錦上添花！ 熊角慢煮一口豬$22：切到一口方便進食，一口豬肉惹味多汁。 咖喱焗豬扒飯$63：外賣包裝精美，錫紙盒外仲有紙盒包住，相當穩陣！表面鋪滿香濃邪惡咖喱芝士醬，豬扒有兩大塊，肉質仲係嫰滑~ 跟餐藍寶石鮮奶+$15：藍色啫喱凍好靚，鮮奶味濃，打卡一流！

是日晚上來到元朗，被呢間門口寫上烤魚界天花板烤魚店吸引進來 。以前還在舊地舖時就大排長龍，現時搬上樓上座位寬敞舒適好多。 店舖裝修走年輕人風格，更播放愉悅音樂，打卡一流。 見到中午12:00 - 17:00 星期一至四任食配菜，相當抵食。 餐廳採用手機點餐，點了鮮青椒味烤魚$328，可以自行勾選辣度、少油、多湯等選項，十分貼心。 江團魚好大條，好滑沒有骨，湯底鮮味咸香，越煮越辣，加入金針菇同魔芋片配料，更顯豐富。 烤韮菜$26：烤得清脆嫰綠，條條分明 烤茄子 $36：茄子燒得好靚，表面滿佈蒜蓉，茄子肉嫰滑濃味~ 錫紙花甲$49：花甲充滿蒜辣香，底下仲有粉絲金菇，索晒蒜香辣汁。 金桔青檸特飲$36：清甜潤喉，解辣一流！ 環境舒服，食物高質，用料新鮮，可以媲美深圳探魚的烤魚~

放工和男友後來到呢間新開位處好近佐敦地鐵站酒吧，店舖頗有情調，店內座位闊落舒適乾淨。餐牌有西餐日式丼飯串燒，選擇不少。 自訂特色西餐點了紐西蘭草飼牛扒(黑椒汁)配炒時菜， 義大利麵:白汁義大利麵條條滿佈濃郁忌廉汁，裡面加入不少雜菇，增加豐富口感﹗炒雜菜有紅蘿蔔洋蔥椰菜，先加入牛油去炒，所以食落特別香口有肉味。 紐西蘭草飼牛扒好大一塊，牛肉味濃﹗ 鰻魚温泉蛋日式丼: 特別的是温泉蛋另上，需要客人自己打入碗中。上面有紫菜碎，珍珠飯入面加入沙律醬，食落特別開胃。鰻魚有四大塊，每塊都好肥美，滿足我食鰻魚既心﹗ 燒蠔:上面有蔥花同蒜泥，燒得香口多汁﹗

好耐冇同男友來元朗覓食，星期六晚上就來到這間越南家庭經營的小店，服務員帶有越南口音。 食物是正宗越南風味，店舖張貼住人手有限，所以出餐所需時間較長，望客人見諒字眼。 店家對制作食物有相當堅持，上碟時擺盤亦相當認真，慢功出細貨﹗ 男友點自家制竹筍豬骨湯檬粉:表面有大量竹筍，入面有不少豬骨，湯底充滿鮮甜豬骨味，食得出冇味精，飲多幾啖都唔會口乾﹗ 蟹膏蕃茄湯蟹粉:有鮮蝦2隻、蟹膏、扎肉、蕃茄、芽菜，而豆卜索晒鮮味清甜湯底，第一次食這種闊條厚身麵，麵條足夠彈牙。 柑桔雞翼2隻:燒得好靚，皮焦甜帶點柑桔酸味。 越南原味乳酪:自己食落同平時乳酪分別不大，甜甜酸酸幾開胃﹗ 蛋咖啡:第一次飲，表面有厚重蛋奶泡，同咖啡一齊飲時都幾夾，令咖啡更易入口。 凍熱情果味綠茶:夠晒酸甜解膩﹗

呢間店舖位於深水埗附近花膠工房，店家自設廠房，花膠來自台灣，來源可靠。花膠係女士們公認養胃、滋陰食材，可以增強免疫力。 花膠沙律便當$58:花膠沙律好特別，食法夠晒創新，可以揀麻醬或者是泰式醬拌沙律，我自己最鐘意兩者溝埋一齊食。花膠本身沒有多大味道，口感爽彈，加上清爽醬汁同沙律，食落好開胃﹗ 花膠湯$38:充滿好濃郁花膠湯味道﹗ 花膠燉鮮奶$38:來自北海道牛奶，夠晒滋潤又養顏，食落果然香滑﹗ 檸檬薏米水：清爽健脾去水腫。 食完補充足夠骨膠原，仲可以飲嘢去水腫，呢間店舖果然係愛美女士養顏健康之選﹗

放工後來到呢間中環新開，裝修小清新風格蒟蒻粉麵店。 五感即是指味覺、嗅覺、視覺、聽覺、觸覺，客人可以一邊聽住音樂，一邊舒服自在地享受呢頓健康飲食盛宴﹗ 餐牌入面有湯水、沙律、五目蒟蒻飯、清新蒟蒻撈麵、每日鮮煲海螺雞湯蒟蒻麵、開胃小食多種選擇。 每日鮮煲海螺雞湯$38:入面有肉碎、椰子絲，飲落果然滋潤！ 海南雞飯蒟蒻飯：海南雞肉質嫰滑，附上辣椒醬、黑醬油膏，底下有塊生菜墊底，酸蘿蔔絲。 蒟蒻飯係第一次食，調味適宜，加入冬菇、蟲草花入面，非常有咬口。 柑桔水: 酸酸地又好潤喉﹗ 蒜香牛油雜菌:冬菇、金菇、本菇，加上蒜蓉牛油，口感爽脆﹗ 自家手打蝦餅:煎得香口，肉質好彈牙！

放工後，來到上環附近呢間裝修有越南格調餐廳，牆壁掛著特色越南帽子。 店舖枱面印有QR code，方便客人可以用QR code 自助下單。 蕃茄蟹肉湯檬：入面有蟹肉、鮮蝦、扎肉、蟹肉餅，配料非常豐富。蕃茄湯底煮得好濃郁，茄肉同蟹肉餅融為一體，入面配料仲有芽菜、蔥花，口感豐富。而檬粉是我喜愛的幼身爽彈口感，夠晒容易去索晒湯汁，一啖檬粉，一啖濃湯，別有一番滋味，差唔多飲晒成碗湯！ 牛油果沙冰上面有一瓣薄荷葉，牛油果沙冰打得好綿滑。

星期六來到元朗呢間新開張燒窰雞米線店，店員殷勤同客人講解餐牌，企理乾淨，座位舒服。落單時更問是否需要走蔥需求，出餐算快手，枱面仲有醬料俾客人再加。 自己鐘意食辣，所以點了： 馳名窰雞（椒麻）米線麻辣湯：湯底好好夠麻香辣，米線爽彈，索晒麻辣湯底味。 而椒麻燒窰雞入面有麻椒粒、蒜粒、辣椒，雞肉滑嫰，充滿椒麻味，夠晒惹味。 腐竹特飲：自家製無添加健康飲品，健脾開胃，滋陰潤燥，除煩安神。腐竹煮到融晒，入口香甜順滑，用來解辣一流。

西九龍美食廣場6樓位置，空枱明顯比樓上美食廣場多，坐得更舒服自在。 見到呢間Pots & Pans賣尼泊爾菜式，平時較少機會食到，於是點來食。 點了老闆極力推薦蒸momo，即是蒸餃子。剛剛蒸起momo夠晒熱辣辣，一咬爆晒汁，好juicy。包得較鬆身，入面有洋蔥同肉碎，加上尼泊爾香料及香草，香料味配搭得宜，點少少中間醬汁更顯香辣惹味。 S2 韓式風味豬肉:飯盒餐裝得精緻，多洋蔥、豬肉、椰菜紅蘿蔔絲、韮菜、蔥花，炒得香口，微辣惹味，送飯一流。 S3 牛肉咖哩：同平時食開日本咖哩好唔同，咖哩較為輕盈，红蘿蔔同薯仔口感比較爽口。

放工後來到深水埗行街買手機配件，近地鐵站C出口附近見到呢間小食店，門外圍住一堆客人，有賣腸粉、炒粉麵、燒賣魚蛋、臭豆腐、牛雜、炸物等，於是外賣一些回家食。 海豐炒米粉$38 是即點即炒，鑊氣十足，有芽菜、蛋絲、椰菜、肉絲、蔥花等，配料豐富，米粉炒得乾身爽口。店家更特意詢問能否吃辣，加入辣椒，更加惹味！ 五香牛雜 細$25/大$35，入面有蘿蔔、牛雜，牛雜清洗乾淨，牛雜滷水濃郁入味。 鮮蝦腸$20：招牌石磨腸粉，即係皺皮腸粉，米香味夠，餡料充足，蝦仔爽彈口感，加上特調醬汁同辣椒醬，咸香滿足。