套餐包咗一個餐湯，今日嘅係南瓜湯，一飲就知好濃，係由南瓜打碎而成，另外，仲加咗蕃茄嘅酸味同埋一啲辣味，都幾特別。 接住出嚟嘅係餐包，三款嘅質感都各有特色，上嘅時候溫度微暖，都幾鬆化，唯一缺點係牛油雪得太硬，用嘅時候黐埋一舊。 另外套餐仲包左一個沙律，菜食落都幾新鮮，黃色嘅茄都幾多汁。 跟住嚟到嘅係一份豬仔骨，上邊有溶咗嘅芝士，好邪惡，啲肉食落都好食，不過如果多啲肉少啲骨會更加好。薯條就有少少唔夠熱，比較可惜。另外仲叫咗一個意粉，一上到黎就見到塊海膽真係好大塊，食落都算鮮甜，不過可惜有輕微嘅苦味。依個意粉連埋醬汁口感都好Rich，令人覺得幾滿足，如果意粉嘅硬度硬返少少會更加好。

黎到食午飯。首先可以去自助沙律吧拎野食，春卷炸得幾脆同埋唔油膩，而且o仲係幾熱，唔錯。

其他凍嘅沙律都幾新鮮，幾開胃。 然後就要排隊出去整主食啦。首先要選擇左主食嘅材料先，可以揀薄餅或者各式嘅粉麵。 然後就要將自己想食嘅配料放入器皿入面，包括有各種蔬菜，海鮮同埋肉食。按照自己想要嘅種類同埋份量拎好之後，就要係另一個小碗入面調教到時用黎炒嘅醬汁。 所有野都準備好之後，就可以交比廚房去炒或者焗。約十分鐘之後，侍應就會將完成品送過黎架啦。

雖然過程真係幾有趣，但味道方面，始終因為自己唔識控制各種材料嘅最坐比例，同埋材料都唔算新鮮。所以食嘅時候，只食到一堆醬好濃好濕咁，而食唔到材料本身嘅味道，而麵亦都被煮到淋哂。

因為肚餓，又突然落雨，就入左黎呢間泰國餐廳。見到下午茶餐好平，只要38蚊，就有一個麵同埋一個小食。 首先黎嘅係黃咖哩配蒜蓉包條，咖哩甜甜嘅，入面有淋嘅洋蔥同埋薯仔，包條就炸得幾鬆脆，不過就有少少太油。兩者配埋一齊，食落嘅感覺都幾豐厚。 之後就係遊船河粉，一睇就發現係份量十足，餸方面有肉丸豬紅同埋肉碎，尤其是肉碎嘅份量係超多，滿滿嘅一碗，食極都仲有。不過河粉就有啲癡埋一舊，有啲難夾同埋放入口。 整體而言，相對價錢，份量真係好多。

夜晚黎到呢度打冷，聽講呢度啲野食係偏貴但係足料。 首先黎到嘅係蠔仔粥，一鍋真係好大兜，入面超多蠔，而且都唔細隻，好飽滿，食落啖啖都係蠔。粥底同大地魚干一齊熬過之後，風味十足。不過挑剔嘅係食落個粥中間有好啲硬粒。 之後係九肚魚蠔餅，都算係一個好有創意嘅菜式。入面嘅九肚魚都幾多，但係食落啲骨比較硬，有少少un 住。但係整體都係香口好食。 另外仲有個鵝片拼墨魚，鵝片幾嫩滑，厚度岩岩好，而墨魚片都算幾彈牙。

黎到呢間韓國餐廳食中午飯，店主應該係韓國人，要以英文黎溝通。 點菜之後，店員就會送上前菜同埋湯，前菜個泡菜，芽菜都唔錯，而煎餅食落就好似擺左好耐咁樣。 嗌左一個牛肉石頭鍋飯，上到黎嘅時候個鍋係非常之熱，熱到係會令個飯之後出飯焦個種，視乎個人喜好啦呢點就。而牛肉黎到嘅時候已經係煮到比較老，所以食嘅時候都要咬得比較耐。不過配合其他配菜同埋醬汁，整個飯都係唔錯的。

之到呢間野係葵芳有間本店，評價唔錯，發現佢開到黎尖沙咀，當然要試一試。 嗌左一個黑松露芝士漢堡跟薯格。漢堡係非常之大個，由上到下咁講，包係厚個種，食落去表面烤得香脆，內裡鬆軟；再下面炒面嘅洋蔥，甜甜的，亦加入黑松露味；之後有兩層嘅芝士，咸咸香香；中間嘅牛肉都幾厚，而且多汁；最後生菜亦都幾爽脆。 而著格黎到嘅時候係好熱，熱到辣口個種，可口。

成日中午成日都見到呢間小店都坐滿曬，今日難得有空位，就入黎試下。 叫左一個東京牛肉飯，價錢真係唔貴，只係賣48蚊，都算係良心之選。 首先試一試個湯，味噌嘅調味適中，令人開胃，最特別係會飲到生蔥嘅辣味。 之後到主菜，東京牛肉伴炒野菜，野菜好甜，食落好舒服。牛肉調味稍為不足，而肉亦有啲煮得太老，不過整體亦好好味道。另外珍珠米亦幾癡，不錯。

中午想食個快飯，就黎到呢間港式加西式嘅菜餐廳。本身都對佢冇咩期望，但竟然都好失望。

點餐之後，好快就送黎湯同埋蒜蓉包，個湯飲落去好似罐頭湯咁，得味精味。 主菜黎左，原本以為就算個樣望落頹都會味道正常常，點知係超伏。首先唔知點解條腸一黎就爆開左，食落去係勁淋，完全沒有彈性。然後塊豬扒食落去係有酸味嘅，好似食緊不舊唔知放左幾耐嘅肉咁。

總結黎講，雖然係港式快餐，但都唔洗hea到咁吧。

同友人兩個黎試呢間餐廳，我地叫左一個二人餐。 首先黎嘅係餐湯，湯好似係平時茶餐廳麵粉加牛油個種味道，飲落好傑又冇食材味，而且入面真係咩配料都冇。 跟著係白酒青口，黎到嘅時候汁少到冇掂到啲青口，青口食落冇鮮味。 再之後係肉眼扒，生熟程度控制得幾好，食落軟淋，而且冇渣，好好食，而配菜薯仔表面亦烤得香脆。 之後另一個主菜巴拿馬火腿意大利飯，飯煮得比較軟淋，亦太濕，冇咩口感，而火腿同飯亦好似融合唔到咁，唔太夾。

晚飯黎到呢間菜餐廳食小菜。 首先係啫啫雞煲，入面主要嘅材料有雞件同埋豬潤。雞件入味程度就中等啦，但肉嘅部分就比較少，都係骨居多。而豬潤則係食落有一陣淡淡嘅苦味，所以唔係太理想。 下一味餸就係椒鹽鮮魷啦。皮係脆嘅，但問題係個皮好厚，食落去好似食緊好多熟嘅炸漿咁樣。 最好食係炒豬頸肉，食落去好有鑊氣，微辣亦令佢博分惹味。而入面嘅蔬菜食落爽脆多汁，更是驚喜。