發記腸粉粥品 相信元朗人都一定識佢 同區仲開多咗幾間分店分散人流 但教育路呢間分店食物質素同其他分店有好大差距 真心唔好食 腸粉仲要痴埋哂一pat嘢咁 上個月試過雞地果間都幾好 所以先咁快會返轉頭再食 點知轉分店就變咗另一件事粥 . 整體體驗都好差 坐低即刻問食咩 到落單前後問咗三次 仲會加啲碎碎念「仲未諗好呀？」其實又唔滿座 我又唔係真係諗好耐 比兩三分鐘人諗下食咩係咪咁難？ . 埋單係收銀前面又會比說話你聽「企哂係到唔知做乜」 啫係咁 唔洗下下都要話人嘅 食個飯啫 食到一肚氣為乜 . 本身無期望會寫食評所以無影食物相 留返張單證明我真係食完 真實感受嚟

🔎日日香鵝肉飯店 (元朗) 最近新開咗間鵝肉店 裝修幾四正 睇落都幾乾淨 就去試吓啦 上網睇返呢間都有好多分店 不過係最近先開入新界區 🔹全日套餐：滷水鵝肉飯 $66 凍飲＋$3 已經包埋滷水蛋，豬肉條，豆卜，甜酸菜及時菜 鵝肉會肥啲但好食啲 想食啖啖肉可以揀鵝片 會貴少少，豬肉條都幾好味 好似啲幾彈牙嘅丸咁，甜酸菜好有驚喜 好好味 甜甜酸酸又爽口！ 呢個飯量都幾多 我諗普通女士應該都食唔哂 ＋$24 配滷汁油菜 揀咗菜心 份量都幾多 配返滷水汁好食過平時蠔油菜心呀 🔹潮式滷味拼盤（例）$128 有豬大腸、豬耳、豬腩肉、紅腸、豆卜、滷雞蛋 豬腸幾乾淨幾入味 豬腩肉最有驚喜 唔算好肥但又好淋 豬耳好爽 其他正常操作 豆卜吸哂啲滷水汁都唔錯 🔹原盅健康鵝骨燉湯 $28 好足料 鵝骨痴住果啲肉煲到勁淋 跟餐飲品加錢轉呢個湯就好抵飲了！ 📍元朗康樂路13-17, 21-25號鈞德樓地下7號舖 🍴搵返相關地區👉🏻 #90sfoodieshare_元朗#食在元朗

🔎木玥巷 (元朗)💛 一坐低就會有合桃食 食住等仲要幾香口 🔹木玥招牌紅燒牛肉麵 $96 牛方面都幾多 有牛𦟌、牛筋、薄牛肉 全部都煮得好入味 份量仲好多 牛𦟌厚得嚟夠淋 牛筋好滑 薄切牛最重牛味 豆卜要浸下湯先食 湯底唔算濃所以亦都唔會好油 紅蘿蔔同白蘿蔔好大舊 但無渣 🔹煎元貝干貝醬炒飯 $90 好吸引 炒飯粒粒分明 蛋嘅份量亦都好足 元貝煎得好香又好大粒 絕對係夠鑊氣 不過就比起一般台灣菜清淡啲 食得清淡啲嘅朋友都可以選擇呢個炒飯 🔹雙色鹽酥雞 $56 每次嚟都會嗌 係幾好味 雞有啲南乳味 再加埋個柚子醬 仲要即炸熱辣辣 平時真係食唔到 美中不足就可能係呢個價錢可以份量多啲 🔸木玥招牌水果茶 $38 好飲！癲咗勁大杯 西柚+百香果為主 仲有啲鳳梨、梨、西柚、青檸係面 酸酸甜甜好好飲 甜度好適中 飲開走甜都唔覺甜 呢個價錢完全OK 🔸金沙抹茶奶泡 $32 抹茶味濃得嚟係好飲嘅 唔會係cheap cheap抹茶味 我本身唔鍾意抹茶都唔抗拒呢杯 *晚市設加一收費 整體氣氛幾好 裝修精緻 又播住台灣歌 📍元朗媽橫路9號富來花園地下17-18號舖 🍴搵返相關地區👉🏻 #90sfoodieshare_元朗#食在元朗#我食在元朗你卻在大排檔

🔎稚 (元朗) 🔹汁煮豬軟骨 $70 +$30轉定食 定食跟前菜、漬物、煎茶、味增湯、珍珠米 推薦！豬軟骨煮得好淋 醬汁方面都好開胃 超配飯！另外仲有啲玉子、椰菜絲、醃紅黃蘿蔔 加咗定食嘅話仲有芝麻醬玉子豆腐 好滑🤤 海蜇都幾爽口 飯上面都有飯素 不過如果多啲就更好了 🔹大阪燒$78 好高身好大份 無論醬汁定紫菜同埋木魚碎都好多 係元朗嚟講算係比較少日式餐廳有得食大阪燒 無得去日本又想過下口癮都唔錯 🔹檸檬柚子雞翼（4隻）$42 燒到脆皮仲有好多柚子醬 雞翼略乾咗啲 不過有柚子醬cover返就ok嘅 🔹燒京蔥（2串）$28 燒完咗京蔥會少咗啲蔥味 但就多咗份甜味 🔹日本甜薯（2串)$28 好味 夠淋又甜甜地 可以encore 📍元朗俊賢坊18號權益大樓3號舖 🍴搵返相關地區👉🏻 #90sfoodieshare_元朗#食在元朗

羅東肉焿番 (元朗) - 鹽酥一口雞魯肉飯 $54 鹽酥雞size剛好 炸粉亦唔會厚 份量都唔少 魯肉飯都出色 的確係台灣風味 亦都唔會過肥膩 肉焿湯米粉（新竹米粉） $48 肉焿湯都係一樣幾代表到台灣嘅食品 有時會太濃有時又會太稀 但係呢度就唔會啦 個芡做得唔錯 連埋米粉好好味 仲有啲豬肉同竹筍 芫茜同辣係必備！ 酥炸甜不辣 $32 炸甜不辣係我食台式小食嘅首選 無揀拼盤係咁解🤣 堅正堅好味 果種煙韌嘅口感真係食唔厭 不過有時炸太耐會硬咗啲 仙草芋圓1號 $34 （三色芋圓、蜜紅豆、海藻水晶） 有啲就有口感無芋頭味 有啲就相反 呢間就做得比較平衡 比較有咬口 食芋圓黎講 紅豆都係必備 1號仲配埋海藻水晶幾爽口幾夾 檸檬蘋果西打 $25 台式飲品又點少得經典嘅蘋果西打呢 思鄉必飲！ 加左檸檬感覺清爽啲 感覺無咁甜

🔎Zeppelin Hot Dog Shop (西灣河) 📍西灣河筲箕灣道57-87號太安樓地下A55A號舖 - 食齊柏林又唔一定食熱狗嘅 今次係太安樓掃黄就淨係嗌咗小食 🔹雞塊 $20/9件 相信大家都唔會去食金拱門 但又想食雞塊嘅話其實齊柏林都係個好選擇 仲要係即叫即炸 無雪藏味 加埋BBQ醬都幾好味 🔹大薯條 $15 食小食又點少得薯條 大薯條係用熱狗盒放滿 真係勁多勁抵食 仲要係粗薯條 仲要淋咗大量茄汁同千島醬 又好味又唔dry呀 🍴搵返相關地區👉🏻 #90sfoodieshare_西灣河#食在西灣河

🔎泰Yummy (元朗) 💛 📍元朗教育路83號元達樓地下2號舖 - 泰Yummy Lunch 🔹海南雞飯 $55 凍港式奶茶 ＋$？ 飯底係用黃薑飯 薑味唔算好重 食落口好少嘅薑味就啱哂我食😂飯份量算多💛 海南雞一貫去骨做法 雞都算幾嫩幾滑 份量亦足夠 醬係自制泰式辣醬 配埋海南雞好夾好好食😋 奶茶正常操作 另外一讚佢地員工唔多 但每個都好快手好勤力💛

🔎尚品百好冰室(西灣河) 📍西灣河筲箕灣道160號地舖 - 40幾年歷史嘅冰室 雖然我對呢間冰室無感情 但都幾鍾意懷舊嘢 仲要裝修完環境舒服啲 整體食過好幾次味道都唔差 已成為非黃店嘅飯堂 🔹鮮茄濃湯牛肋條通粉配黑松露油炒蛋及牛油餐包 $50 跟熱飲 凍飲＋$3 鮮茄湯就無乜特別 唔會偏酸偏甜 有啲蕃茄蓉同薯仔 不過個牛肋條又幾淋幾好味 黑松露炒蛋都好香好滑 餐包係厚多士都唔錯 🔹ALL DAY BREAKFAST $56 香煎牛扒、早餐腸、煙肉、蕃茄、沙律菜、焗豆、薯條 唔想食飯就試下個all day 好似都幾多款咁 味道正正常常 呢個價錢咁多種類都算唔錯 不過配薯條又幾有趣 整體都幾好味 唔想食牛可以揀豬或者雞 都係同價

🔎黃金雞 (筲箕灣) 💛
📍筲箕灣海利街6號海利大廈地舖
-
前排停業裝修咗幾日 想食都無得食 不過撞正疫情第三波 少左堂食都係買返公司食算啦
-
🔹招牌黃金雞飯 $40
黃金雞飯即係海南雞飯，真心唔錯，雞嫩，油飯香得嚟唔油膩，醃蘿蔔絲酸酸地又幾開胃，仲有日式豆苖裝飾，飯一樣係跟湯一杯及兩款醬 有豉油汁同蒜蓉薑汁。

仲有幾款都仲好想試 牛腩同麻辣手撕雞都想試 慢慢試哂佢先

🔎沁沁麫 (西灣河)
📍西灣河西灣河街112號地下
-
🔹沁沁飯 $43 （限量發售🤣唔係次次都有
秘製臘味雞油焗飯 配菜：臘腸、潤腸、臘鴨、滑雞
首先臘鴨係用新鮮臘鴨 相當少有 比起一般食嘅係嫩啲而且唔會過咸，臘腸都係肥度適中，潤腸無怪味，滑雞就真係真心滑，個飯都幾特別 香得嚟又唔會太濃 淡淡地配返啲臘味係perfect match呀！

🔸凍飲半價 +$5起