因為朋友要搞聚會，所以就相約先去試食「探路」，原本Book咗下晝3點試Tea Set，不過因為早咗去到中環就決定早啲上去，上到去時仲做緊Lunch Set，所以就直接試「8-Course Lunch」。餐包：薔薇洛神花包 ，第一次見嘅嘢食，Gooday特色食物之一 ，平時見嘅都只係洛神花茶，而且個人並唔太鐘意洛神花隻味。不過味道幾特別，意外地好食，有啲似「玫瑰鬆餅+芝士」嘅感覺。餐湯：鮮芋忌廉湯 ，忌廉湯滑到好似鮮奶咁，味道比西餐廳嘅淡同稀得多，不過感覺幾清新，細小粒粒嘅鮮芋增加咗忌廉湯嘅口感。如果飲慣出面同罐頭湯，應該會有啲唔慣。前菜：女爵甜薯蓉 ，沒加多餘的調味，甜度自然適中，如果先食其他嘢就會Cover咗隻味，前菜果然就係應該食其他嘢前食。沙津：田園雜菜沙律 ，蔬菜新鮮而且面包粒香脆，平時唔太鐘意太酸嘅沙律汁，Gooday就剛好啱我口味。小食：糖漬蕃茄 ，因為掛著食所以唔記得影，只好放借朋友仲有蕃茄嘅餐相，調味上比其他甜少少，不過都不失原味，反而更突出咗蕃茄嘅酸酸甜甜，好食！主食：芝士蕃茄香茅豬頸肉焗飯 ，我叫嘅主食，芝士蕃茄香茅味濃厚，不過略嫌over咗啲，如果無白飯送嘅話會好Heavy。不過豬頸肉絕對要讚，兩個字：爽、鮮，焗完都仲咁多汁爽口，超正！另外要讚嘅係店主嘅貼心，因為佢見我男仔驚會唔夠食，特意用另一個碗放多少少白飯同蕃茄香茅汁俾我！主食：忌廉三文魚汁海鮮扁意粉 ，朋友叫嘅主食，忌廉三文魚汁略濃杰，海鮮足料味道唔錯。甜品：Butterfly Cupcake ，外型滿分，Cream幾重檸檬味，同下面嘅Cake剛好調和翻。甜品：宇治金時馬卡龍 ，細細個但幾香抹茶味，原本甜品係意式奶凍，不過想試舖頭嘅特色食品就加錢了。餐飲：花香油切黑烏龍（無糖） ，雖然係烏龍但味道一啲都唔苦，亦唔會過甜，因為主食都幾濃味，呢嗰烏龍茶就剛好去除油膩感。

雖然成日去九龍灣行街，不過就一次赤丸都未食過，朋友得知後就決定帶我去試。因為星期六Lunch時間比較多人，所以都等咗成半個鐘先入到座。雖然一次都未食過，但睇鋪面格局同Menu大概都知有咩係一定要先試，而且睇Menu好似不時都會有新嘢推出，而且都幾有日本特色，例如呢個關東煮。蘆薈巨峰梳打  & 蘆薈水蜜桃梳打 $26 ，先嚟兩個特飲，因為蘆薈凍飲係買一送一，所以好平。味道方面唔太濃都唔會太藥水味，而且冰量適中。關東煮（醬油味） $24 ，難得係餐廳見到有關東煮就都回味下，有醬油、咖哩同蕃茄湯底可揀，不過既然係回味，所以就揀咗醬油味。各樣配料都好入味，蘿蔔就最好食！點少少芥末醬更加正，不過都係第一次咁食。章魚燒（5粒） $26 ，既然叫得「赤丸」，我心諗無理由唔試下佢啲「丸」嘅，所以就叫咗章魚燒試吓。雖然Menu上寫5粒，我見旁邊客人都係得5粒，唔知點解我呢碟有6粒。不過唔理啦，味道算唔錯，點都好過街邊買，而且章魚肉煙齦有味！P.S. 其中有一粒我食唔到章魚肉北海度蟹棒滑蛋湯烏冬 $42 ，我叫嘅主食，蛋味香濃唔會太杰，蟹棒亦算正常，烏東意外地彈牙，配一啖暖暖蛋花湯，冬天食超正！珍寶海鮮豚骨濃湯拉麵 $72 ，朋友點嘅主食，配料超多無咩雪藏味，而且仲有一隻溏心蛋，整體份量幾多，果然不辱「珍寶」之名！

之前有喺電視睇過介紹，不過因為太遠關係所以一直無去，今次剛好見到有團購，就約想試日式燒肉嘅朋友試嘢。

因為Book咗位又早到咗關係，所以去到時並無顧客，所以幾好招呼。環境幾光猛唔錯，而且座位下面可以放包包，唔會搞到一斟燒烤味，抵讚！今次嘅團購是Set餐嚟，1款主食 + 5款燒肉 + 飲品 + 甜品 ，只要填好點菜紙交俾店員就OK！壺漬牛小排 ，我點嘅主食，開頭睇好似好多，，其實底下都係洋蔥，不過都有3大塊牛小排。味道唔錯，不過唔好烤太耐，有啲肉汁好味好多！帆立貝 ，朋友點嘅主食，因為全部嘢食都係開心Share，所以兩隻剛好。味道幾鮮甜，不過店員落得多咗黑椒，食嗰時咬到一粒好濃味！呢間燒肉最特別就係提供豬肉雞唔同部位嘅內臟，團購Set2個人就可以揀10款。睇落份量好似好少，其實食完真係會好飽。雖然上菜時店員在說明過一次邊啲打邊啲，不過其實之後都分唔同記唔清，最有記憶就係牛舌、牛胸腹同豬小腸，整體真係幾好食！抹茶雪糕 ，最後揀嘅甜品，以為鋪頭以內臟燒肉為主，點知呢個抹茶雪糕意外地超好食！如果佢鋪頭問口有得好似7-11咁可以買雪糕走就正啦！抹茶味香濃，雪糕粉感有如雪芭咁，正！

同「男公關部」太耐無見，所以心思思想聚大聚，難得約齊人梗係要約食飯，不過一大琴男人又唔想太貴，就決定再去試過平靚正嘅「陳根記」。去陳根記如果係食飯鐘數，就一定要等，因為一定爆！好彩一行十人分散投資，等咗半個鐘終於有位！

滷水拼盤 ，大圍食飯必叫，除咗滷水鵝、牛展、魷魚、蛋、豆腐、紅腸、豬腸，就算唔點滷水汁都好入味，滷水嘅鹹味配上花椒八角，豆腐特別入味，配啤酒一流！Wasabi蟹籽手撕雞 $208壹隻 必食之選！幾嫩滑而且Wasabi味幾夾，唔算太辣，就算平時唔食Wasabi嘅朋友應該都接受到。份量相多大碟，而且仲有啲蟹籽同海蜇，又係配酒良物。孜然一條骨 $56 鋪頭招牌菜之一，幾咸香入味。

孜然棒棒骨

0

孜然棒棒骨

魚香茄子煲 $40 ，睇相都知啲茄子幾新鮮，煲上熱辣辣，魚香隻咸香味叫突出但唔會OVER，意外好食（通常出面都會好濃色水煮老哂）。椒鹽骨 $48 ，少少辣幾惹味，不過唔知點解出街唔係太鐘意食豬肉（個人問題）。椒鹽鮮魷 $48 ，皮唔會粉之餘，入面嘅鮮魷仲咁鮮嫩多汁，被十個大男孩秒殺！蒜蓉蒸蝦 $78 ，時間蒸得剛好，蒜蓉同豉油味唔會襟咗蝦味，預想以上。金銀蛋萈菜 $48 ，食咁多肉梗係要叫翻啲菜中和下。

0

豉汁蒸大鱔 $78 份量算幾足，家吓啲魚真係好貴，不過幾好食，無後悔叫嚟食！豉油王腩仔肉 $48 ，非常入味，送飯一流！下面有啲芽菜，配肉一齊食口感豐富，亦中和翻腩仔肉嘅咸味。
根記頭抽雞 $110半隻 ，因為有朋友唔食Wasabi雞，所以後加嘅一味雞，同我屋企整嘅豉油雞差唔多，都係咁嫩滑。不過豉油汁就稀啲，味道都清新啲，可能頭抽關係？Arashi啤酒 ，男公關部聚會點少得Beer一Beer，大滿足！之後仲有甜品，應該係鋪頭寄賣，本來無咩期待，不過一食就中槍！如果去陳根記食飯就唔好放過佢！整體嚟講可以俾10個大男孩飲飽食醉，幾好味之餘仲要有甜品，每人埋單都只係$150，夫復何求啊！

同朋友喺MK做完嘢後決定食埋飯先走，不過林林種種一時之間真係諗唔到食乜好，最後個個好似好耐無食過Pizza，就去Pizza Hut回味吓。

電視近來大賣「芝脆堡壘批」廣告，難得嚟一次又唔想諗食咩，所以就直接叫咗「芝脆堡壘批4人套餐」。套餐有四杯餐飲，可以選平時咖啡、奶茶，都可以選擇無限添飲嘅汽水。餐湯都係基本嘅「紅湯」意大利菜湯同「白湯」蘑菇忌廉雞2款，不過味道相當一般，而且唔算熱。煙三文魚凱撒沙律 ，份量不多不少四個人剛好，煙三文魚味道唔錯，配上蔬菜同法式硬飽條口感豐富清新。酥脆蝴蝶蝦 ，睇落幾靚，但味道好一般，無咩蝦味，只FEEL好炸野嘢嘅脆感同熱氣。秘製雞槌 ，味道香口惹味，帶少少辣，比炸蝦好得多！大蝦帆立貝芝脆堡壘大批 ，皮厚料少，雖然係特別出品，但味道真係好一般，只在份量取勝。意式鮮蝦蜆肉焗飯 ，極酸！而且有生米，完全入唔到口啊！雞肉煙肉意粉配拿破崙汁 ，見到拿破崙汁以為唔會出事，點知都係撞咗，兩碟主食都係茄汁，酸到喊出嚟！太耐無食，始終都係覺得意粉屋好得多，Pizza Hut？都係Party時叫外賣算。

因為去玩逃出密室嘅關係，難得地去咗太子嗰頭，因為連玩兩場，所以中途就要解決晚飯，雖然之前經已上網睇過有咩好食，不過最後都係決定唔到，所以就臨時行下有咩好食。離馬路就見到「美而廉餐廳」，因為吃貨一名，所以記得呢個名好似評價唔錯，就同朋友入內一試真偽。

鋪表環境就係7、80年代嘅冰室格局，不過裝修幾新淨整潔，坐得幾舒服。餐廳內所有員工都係老一輩，不過活力十足，做嘢手腳一啲都唔慢，而且全程笑面，仲會介紹有咩好食，問吓你好唔好食，好親切！雖然三人行，不過有朋友唔係太餓所以就叫咗兩個餐Share。

牛油多士 ，雖然唔知係咪一般貨色，但牛油味幾香，而且烘得幾趣，唔錯！羅宋湯 ，菜、肉感十足，而且味道幾濃又無乜味精味。XO醬鐵板海鮮炒烏東 $57 ，鐵板新鮮熱辣上枱好多煙，整體調味唔錯，XO醬唔會太淡唔會太濃，烏東都好入味。海鮮料算幾多，雖然每樣只有一、兩件，不過款式幾特別，就連八爪魚仔都有，而且無~雪~味~紐西蘭牛柳 $85 ，因為朋友食開較熟，所以就叫咗7成熟，不過平時自己就一定係5成。份量意想不到地大份，而且店員知我地要影相，就好Nice咁等我哋準備好先慢慢倒汁。味道方便相當唔錯，肉質幾嫩而且我哋選嘅香蒜汁味道唔會搶咗本身嘅牛道，值得一讚！最後自然上餐飲，雖然只係平常飲料，不過絕不馬虎，一飲凍檸菜嗰紅茶底就Feel到。雖然價錢唔會好似大XX嗰啲咁平，不過以佢哋咁高水準，真係稱得上「美而廉」，一定會再戰！

原來想帶朋友去食「八鯨料理」，可惜因為太夜所以無緣。只好轉戰開到好夜嘅「新豆漿大王」。

話哂叫豆漿大王，梗要整番支豆漿先，支裝就算飲唔哂都可以拎走，不過經已無以前咁好飲。朋友叫嘅煙鴨胸擔擔麵，煙鴨胸煎得太燶，擔擔麵非常一般。我點嘅雞翼芝士撈公仔麵，雞翼又細又乾身，芝士撈麵好多水，一Pat嘢咁，如果唔係「源汁源味」執咗，真係唔會嚟食芝士撈麵。

朋友有事來大埔，當然要盡地主陪佢食飯，但大埔好嘢食實在太多，一時之間都好難揀到食邊樣，見朋友平時都幾鐘意食蕃茄嘅嘢食，所以就決定帶佢嚟食「蕃滿門」。雖然長居大埔，不過「蕃滿門」我都只係第二次嚟（上次仲要係病到無咁感覺），所以都唔太知有咩好推薦，不過以蕃茄做主打，點都整翻過蕃茄湯麵先！招牌蕃茄滑蛋濃湯意粉 配 雞軟骨棒餃子 $34
朋友叫嘅，估唔到係日式長身包餃子，仲要另上，值得一讚，不過味道一般。
招牌蕃茄滑蛋濃湯螺絲粉 配 花枝丸、金菇 $34
另一位朋友叫嘅，唔要預設嘅餸都可以可自行選擇1款速食配料，多過一款就加錢，etc。招牌蕃茄滑蛋濃湯螺絲粉 配 香煎雞扒 $34
我點嘅，雞扒味道唔錯，不過我以為會另上，點知無。不過滑蛋堅好食，蕃茄濃湯比其他同樣以蕃茄湯做主打嘅鋪頭水準高好多。另外，蕃茄濃湯除咗原味，仲可以加唔同LV嘅辣，自問幾食得辣，不過佢個微辣真係預想以上，落到喉嚨個下嚇咗一跳！飲品方面都全部加錢轉特飲

朱古力
原本只係以為一般茶餐廳貨色，點知上面仲有Cream！驚喜！
菠蘿梳打唔記得咗咩酵乳

雖然自己係AKB48嘅Fans，不過就算元氣壽司搵咗成員渡邊麻友做香港代言幾個月，自己都未去過食。一次機緣巧合拎咗張50蚊現金卷，終於為咗用咗佢而「朝聖」一次。

時值Happy Friday晚，未入官門、先打50大板，好彩朋友係元氣會員，所以可以用手機Apps一早拎定飛，唔係就唔只剩係要等45分鐘咁短！場內場海外同樣人山人山，因為同朋友二人行，所以只係坐迴轉位。雖然好多時都係坐迴轉位，但一睇帶上壽司嘅種類同鮮度，都係向店員落單算。雖然元氣嘅價錢算係平民，不過質素都唔算差，帆立貝、赤海蝦鮮味十足，芥辣八爪魚都係出色之作，特別係海膽尤魚，平得嚟又好重海膽味，正！不過三文魚就比較失色了。

海鹽特大帆立貝 $32帆立貝鮮味十足，不過海鹽太多有啲喊。仲順手試咗近嚟好多鋪頭都強Sell嘅 池魚壽司  不過味道個人嚟講真係好一般。而限時嘅 柚子尤魚 ，個人覺得柚子味過重，好怪！

最後就叫咗新出嘅 尤魚天婦羅 $32 ，唔會好粉，熱辣辣又唔會太齦，推薦！

之前見朋友去食自助餐自然心思思又想去，所以就上網睇吓有無邊間抵食之選。睇嚟睇去，最後就揀咗呢間逸東酒店入面嘅「都會自助餐廳」，主因無他，就係因為有•生•蠔（嗰時賣嘅嘅團購就得呢間有，宜家選擇就多好多）。

雖然係星期六，不過入場後只有3份1滿座，所以待應們都好得閒，基本上就係1對1咁，有種莫名奇妙嘅壓迫感，食都食得唔夠放咁！講翻野食，自助餐當然唔少得「沙律吧」，有好多種唔同蔬菜同醬汁，食客可自由根據自己口味整，旁邊就有幾款凍肉同凍海鮮。雖然佢個自助餐都幾Sell海鮮，但「鮮度」明顯真係唔夠。除咗海鮮，仲有唔同種類嘅甜品，就連「朱古力噴泉」都有！雖然真係太甜，不過志在一試。雪榚方面就有朱古力同雲尼嗱味，味道唔錯，仲有勁酸嘅「檸檬雪芭」，食幾轉都得！除咗有沙律吧，仲有「生蠔冰架」同拎壽司、刺身嘅「日式專櫃」，壽司飯味道還好，不過無咩醋味，反宜刺身算新鮮，不過要問師傅拎，所以唔可以一次拎太多。生蠔味道還好，唔算特出，但對平時無咩機會食嘅人嚟講，有得任食經已係好好XD。另外，自助餐仲包任飲鮮橙汁，待應會自動幫你Fill滿，夠貼心！反觀熟食真係唔係太得，所以都無特別影到。不過甜品方面種類算多，雖然味道水準不一，而且往往蛋糕都會俾人拎到樣衰哂，不過甜品就有種魔力會令人食得好開心！特別推薦個綠茶奶凍，真心正！不過最有驚喜都係有一部自製窩夫機，有得玩、有得食，而且味道方面，至少我喺出面未食過咁鬆咁香嘅窩夫！（自製心理作用？）

不過整體嚟講，咁嘅價錢，但全部食物款式咁少，認真無下次，聽朋友講真係想食鼠助海鮮下次去尖沙嘴嘅酒店好過f