香港人除咗生活急促，生態仲好獨特，例如鐘意冬天食雪榚、夏天打邊爐，突然挑起條筋想試下「如何大熱天時打邊爐」。不過人大咗，相對起「任食」，「質素」更形重要，記起大角咀有間「靚煲皇」，搬鋪後一次都未去過，於是就約埋男公關再次出征。成年無嚟過，由樓上鋪搬去對面街樓的地鋪，雖然Size好似差唔多，不過裝修同座位都大有進步，由平民化升級感覺更高檔。檯凳新束束之剩，亦有椅背，坐都坐得舒服啲。冷氣通風都唔錯，雖然夏天，有冷氣打邊爐無難度，而且食完唔會個身一陣「邊爐味」。仲有細檯仔同籃用嚟放袋用，相當貼心。特別要讚嘅係除咗有電視，仲有Wifi同USB差電口，慢慢一邊打爐，一邊打手機Game長期作戰無難度！一埋位阿姐就送上前菜，花生瞬間掃清，但酸瓜對好多人嚟講就真係太酸，幾乎無乜食過。除咗前菜，阿姐亦會遞上醬料Box，方便客人依個人口味「混醬」。邊爐湯底有好多種，除咗平時嗰啲「沙嗲」、「皮蛋芫荽」等，仲有「冬陰功」、「豬骨煲」、「花膠海參雞」等多種特色湯底。亦有少量鑊氣小炒，不過打得邊爐就唔叫Lu。靚煲皇 $238

雖然想叫「花膠海參雞湯」，不過因為有朋友唔食花膠，最後都係要「靚煲皇」。本身就係胡椒豬骨煲做底，上面鋪上多隻大扇貝、魚乾、魷魚乾，光睇到都興奮！打邊爐前梗係要試下頭啖湯，豬骨入味香淋，而且肉同軟骨勁多，真係啖啖骨膠原！湯頭絕對要讚，入口除咗濃濃嘅豬骨味，仲有淡淡嘅海鮮鮮味，加上微微嘅胡椒香辣，真係一飲就停唔到口！嗰一刻我曾經諗過「不如剩係飲湯飽算」。順帶一提店員姐姐好好人，因為唔知湯底入面有栗米同蘿蔔，原本有落到，姐姐見到後特登走過嚟同我哋講入面有，問要唔要取消，好貼心。桂花蚌 $108

每次打邊爐必叫，幾新鮮，淥幾秒爽口微甜。雪花肥牛 $68

開頭我以為會嚟啲酒樓未融雪一大舊勁薄嗰啲，所以好驚喜，好有肉香，雖然油脂多，肉質都較韌，不過好有咬口，意外地正！手切肥牛 $178

特登叫多款較貴嘅牛肉感受一下分別，因為手切所以每塊都好薄，而且油脂明顯上面個款少得多，牛味亦較重。
等級，係食得出嘅。手打墨魚滑 $98

黏性幾高，淥完後都好彈牙，不過唔知係師傅調味重口咗，定湯底濃，食落略咸同重胡椒味。手打墨魚丸 $78

意外叫錯（明明應該叫四寶，到底班FD有幾鐘意墨魚？），雖然同樣係墨魚，但同「滑」又唔同滋味。質感實淨非常，彈性十足，唔鬆散，而且吃到墨魚粒，單係呢點經已加咗唔少分。包心芝士丸 $48

皮雖然厚，但好彈有咬口，亦因為厚皮，內涵嘅芝士剛好受熱融化而唔會漏出。成粒放入口唔覺熱，但一咬芝心立即激射而出。
無錯，我呢下就灼親喉嚨。蟹籽包心丸 $48

整體同芝士丸差唔多，都比出面食嘅好味。豆卜 $38

無乜特別值得彈，不過質素的確係比一般食肆好，吸收埋湯嘅精華真係不得鳥！白鱔片 $78

家下物價咁貴，$78蚊食到大條白鱔片，而且新鮮得嚟份量都幾足，我心足鳥。
不過如果切厚少少口感會更正，始終食鱔都係鐘意種煙韌咬口。黃沙豬潤 $32

雖然睇落好新鮮（事實的確都係好新鮮），不過可惜味道無想像中咁鮮甜。不過要讚每塊豬潤都吉咗些少針洞，方便淥個時睇到有無血水出，唔會咁易Overcook。娃娃菜 $28

新鮮，不過相對就咁食，佢嘅煲湯作用更大。唐生菜 $28

一睇就知有幾新鮮，而且本身味濃，相對娃娃菜我更鐘意呢種。炸鮮魚皮

同出面一包包即開即食嗰啲好唔同，用鮮鯇魚腩皮即炸，外面金黃香脆，但脆卜卜下嘅魚皮仍然保持煙韌。而且咸咸地，就算唔淥齋送酒都好一流！烏東 $10

Meun無寫係手打烏東，開頭以為會係cheapcheap酸味烏東，突然感覺到「果然唔係靚料唔上檯」。成個男公關部出戰點可以少得Asashi，價錢都係咁上下喇。最後店員姐姐仲送多份人頭綠茶小甜品，雖然係唔使錢，但味道又真係幾好食，結果係受同行全體一致讚同。

好耐之前經已略為聽過呢間由日本遠道而來嘅日式咖哩店，不過一直無特別記著所以就無去試到，今次因為約咗朋友去銅鑼灣Sogo，就係Openrice搵下有乜好食，見到呢個「猩猩」LOGO咁特別，又點可以唔嚟試下！入到去環境非常整潔乾淨，桌面上餐牌、調味品、紙巾一應俱全。餐牌有好多款唔同嘅Set，而且亦有分唔同份量，方便唔同食量嘅客人，非常貼心嘅設計。最特別嘅就係為311地震籌款嘅「復活咖哩」，而且仲有兩塊炸豬扒，絕對唔孤寒！最後三個人就叫左兩個餐。輕量級炸豬扒咖喱飯 $65 ，咖哩味道香濃惹味，而且辣辣地越食越停唔到。味精感覺唔重，食完都唔會太口乾。比「銀咖哩」同「白熊咖哩」好太多，不過都貴少少。迷你咖喱烏冬 配 迷你滑蛋豬扒飯 $28+$38 ，呢個係一個迷你組合餐，可以俾客人每樣試少少咁。咖哩都係招牌咖哩唔使講幾正，手打烏東非常煙齦彈牙，而滑蛋豬扒都做得唔錯，都有中上級水平。怕食辣嘅朋友，可以加台面上嘅醃紅椒，以甜為主，微酸，但加入去咖哩到可以中和辣味，味道更有層次感，佢嘅爽口都增加咗咖哩嘅咬口。非 常 正 ！大紅袍烏龍茶 $15 ，不過店鋪雖然有賣嘢飲，不過其實只係支裝嘢飲。

為了朋友能好好溫書，所以花咗唔少時間尋找舒適嘅Cafe，終於搵到呢間「Kubrick」。雖然之前去睇戲都經過門口兩、三次，不過就係無入過去，今次可謂第一次正式光顧。因為有一半地方係書店，所以Cafe佔嘅面績唔算特別大，不過座位、擇設都非常貼心，令人坐得好舒服。先係座位高度明顯有用心設計，睇書時非常舒服，而且場地主用外面照入嚟嘅太陽光，夠哂光猛！另外亦設有插頭俾客人用電腦。就算唔買書，都可以係書店拎去Cafe坐著睇。Cafe牆上亦有個人畫展，會定期更換。雖然溫書，不過都要醫下肚仔，今次我點嘅係 菠菜利可塔芝士釀意式雲吞伴玫瑰汁 $82 ，賣相同Menu上嘅相差無幾，而且芝士味道真係幾好食，值得一讚！唯一可惜嘅係意式雲吞份量向來比較少，食完仲想繼續食啊喂XD！朋友點嘅就係 香草醬烤雞柳天使麵 $78 ，可能受到意式雲吞嘅美味沖擊，所以覺得差少少，而且雞柳無咩烤過嘅感覺，不過香草味幾強烈。飲品方面，我揀咗 牛奶寶貝奇樂 $28 ，因為唔知係咩嚟，所以就試吓。英文名Babycino，其實就係打到起泡嘅奶（我覺得係），份量細細幾精緻，味道、質感幾好。P.S. 小童買呢個半價的！朋友就試咗 抹茶咖啡 $38 ，上面有少少拉花，不過圖案一般，而且都幾易散，味道方面好似無咩抹茶味，不過朋友話以咖啡味道嚟講都係唔錯。

難得紅日放假，梗係要約朋友見面，因為唔想行太遠所以就決定去從未試過嘅「caffè HABITŪ」。去到時值Lunch Time過後，所以唔係好多人（不過食完近下午餐時段走嗰時就好多人等），雖然得2個人，不過店員亦好好咁俾4人座位我哋。環境整潔而且自然光好足，所以令人覺得好光猛舒服。經典凱撒沙律 $68 ，沙律菜好新鮮，咬落去「爽爽」聲，而且醬汁份量同酸度好適中，食人好開胃。另外糖心蛋意外地好食，驚喜！可惜沙律面嘅煙肉就比較硬，略為失色。素菜千層麵 $98 ，賣相一流，雖然只係用素菜整成，不過因為有菇類，所以食落去依然好有咬口。加上醬汁調味唔錯，唔會過酸，而且麵皮嘅層次感做得好好，絕對要推薦！意國風味薄餅 $98 ，雖然只以三種素材（蕃茄、芝士、羅勒葉）整成，但有種令人意外嘅風味。蕃茄切得好薄，但唔會好乾身，而且蕃茄味算幾香濃。芝士味唔會太濃過搶，而羅勒葉令成個薄餅更Flash，加上薄批即叫即整脆bobo！玫瑰錫蘭奶茶 $39 ，味道香滑，帶點玫瑰香但唔會太搶，令人感受一下寫意人生。野莓喜冰樂 $42 ，即製嘅野莓沙冰，莓味幾濃，不過我本身唔太慣呢種莓味，所以初飲時有啲覺似藥水。

難得兄妹聚，雖然只係大埔，但梗係要搵下好嘢食，所以就去大埔中嘅名店「蕃滿門」。嚟得蕃滿門，緊係要食下特式蕃茄滑蛋濃湯餐，有唔同主菜可揀，要蕃茄滑蛋濃湯可麵可粉，選擇眾多，而且可以揀辣唔辣。香酥雞扒 $42 ，味道好夠，除咗腌料外都有幾香雞味，炸得香酥可口，唔會有太多炸粉，正！脆皮咸豬手 $42 ，好多朋友推薦嘅主菜，豬手焗得皮脆金黃色，皮脂肪大部份已經被焗走咗，剩低既外皮口感香脆煙韌，而入面反而啖啖肉，意外好食！蕃茄湯長意粉嘛，炒蛋滑嫩，湯底有濃鬱蕃茄香，而且無味精感覺，保持一貫高水準。

因為朋友要搞聚會，所以就相約先去試食「探路」，原本Book咗下晝3點試Tea Set，不過因為早咗去到中環就決定早啲上去，上到去時仲做緊Lunch Set，所以就直接試「8-Course Lunch」。餐包：薔薇洛神花包 ，第一次見嘅嘢食，Gooday特色食物之一 ，平時見嘅都只係洛神花茶，而且個人並唔太鐘意洛神花隻味。不過味道幾特別，意外地好食，有啲似「玫瑰鬆餅+芝士」嘅感覺。餐湯：鮮芋忌廉湯 ，忌廉湯滑到好似鮮奶咁，味道比西餐廳嘅淡同稀得多，不過感覺幾清新，細小粒粒嘅鮮芋增加咗忌廉湯嘅口感。如果飲慣出面同罐頭湯，應該會有啲唔慣。前菜：女爵甜薯蓉 ，沒加多餘的調味，甜度自然適中，如果先食其他嘢就會Cover咗隻味，前菜果然就係應該食其他嘢前食。沙津：田園雜菜沙律 ，蔬菜新鮮而且面包粒香脆，平時唔太鐘意太酸嘅沙律汁，Gooday就剛好啱我口味。小食：糖漬蕃茄 ，因為掛著食所以唔記得影，只好放借朋友仲有蕃茄嘅餐相，調味上比其他甜少少，不過都不失原味，反而更突出咗蕃茄嘅酸酸甜甜，好食！主食：芝士蕃茄香茅豬頸肉焗飯 ，我叫嘅主食，芝士蕃茄香茅味濃厚，不過略嫌over咗啲，如果無白飯送嘅話會好Heavy。不過豬頸肉絕對要讚，兩個字：爽、鮮，焗完都仲咁多汁爽口，超正！另外要讚嘅係店主嘅貼心，因為佢見我男仔驚會唔夠食，特意用另一個碗放多少少白飯同蕃茄香茅汁俾我！主食：忌廉三文魚汁海鮮扁意粉 ，朋友叫嘅主食，忌廉三文魚汁略濃杰，海鮮足料味道唔錯。甜品：Butterfly Cupcake ，外型滿分，Cream幾重檸檬味，同下面嘅Cake剛好調和翻。甜品：宇治金時馬卡龍 ，細細個但幾香抹茶味，原本甜品係意式奶凍，不過想試舖頭嘅特色食品就加錢了。餐飲：花香油切黑烏龍（無糖） ，雖然係烏龍但味道一啲都唔苦，亦唔會過甜，因為主食都幾濃味，呢嗰烏龍茶就剛好去除油膩感。

同「男公關部」太耐無見，所以心思思想聚大聚，難得約齊人梗係要約食飯，不過一大琴男人又唔想太貴，就決定再去試過平靚正嘅「陳根記」。去陳根記如果係食飯鐘數，就一定要等，因為一定爆！好彩一行十人分散投資，等咗半個鐘終於有位！

滷水拼盤 ，大圍食飯必叫，除咗滷水鵝、牛展、魷魚、蛋、豆腐、紅腸、豬腸，就算唔點滷水汁都好入味，滷水嘅鹹味配上花椒八角，豆腐特別入味，配啤酒一流！Wasabi蟹籽手撕雞 $208壹隻 必食之選！幾嫩滑而且Wasabi味幾夾，唔算太辣，就算平時唔食Wasabi嘅朋友應該都接受到。份量相多大碟，而且仲有啲蟹籽同海蜇，又係配酒良物。孜然一條骨 $56 鋪頭招牌菜之一，幾咸香入味。

孜然棒棒骨

0

孜然棒棒骨

魚香茄子煲 $40 ，睇相都知啲茄子幾新鮮，煲上熱辣辣，魚香隻咸香味叫突出但唔會OVER，意外好食（通常出面都會好濃色水煮老哂）。椒鹽骨 $48 ，少少辣幾惹味，不過唔知點解出街唔係太鐘意食豬肉（個人問題）。椒鹽鮮魷 $48 ，皮唔會粉之餘，入面嘅鮮魷仲咁鮮嫩多汁，被十個大男孩秒殺！蒜蓉蒸蝦 $78 ，時間蒸得剛好，蒜蓉同豉油味唔會襟咗蝦味，預想以上。金銀蛋萈菜 $48 ，食咁多肉梗係要叫翻啲菜中和下。

0

豉汁蒸大鱔 $78 份量算幾足，家吓啲魚真係好貴，不過幾好食，無後悔叫嚟食！豉油王腩仔肉 $48 ，非常入味，送飯一流！下面有啲芽菜，配肉一齊食口感豐富，亦中和翻腩仔肉嘅咸味。
根記頭抽雞 $110半隻 ，因為有朋友唔食Wasabi雞，所以後加嘅一味雞，同我屋企整嘅豉油雞差唔多，都係咁嫩滑。不過豉油汁就稀啲，味道都清新啲，可能頭抽關係？Arashi啤酒 ，男公關部聚會點少得Beer一Beer，大滿足！之後仲有甜品，應該係鋪頭寄賣，本來無咩期待，不過一食就中槍！如果去陳根記食飯就唔好放過佢！整體嚟講可以俾10個大男孩飲飽食醉，幾好味之餘仲要有甜品，每人埋單都只係$150，夫復何求啊！

跟朋友去完歷史博物館想找個地方溫書，之前來過一次覺得環境、食物唔錯，所以就建議嚟「Cream」。因為舖頭喺地庫，而且大廈外面正在裝修，所以唔知嘅都幾難發現呢間舖。因為基本上過咗晚飯黃金時間，所以人唔算多，環境幾靜幾舒服，同朋友傾計、溫書一流！Menu除咗一般Cafe Shop有嘅咖啡、芝士餅外，都有唔少主食、意粉、就連Pizza都有，選擇種類非常多！因為Lunch食太飽關係，所以同朋友Share主食就夠，今次叫咗個 煙三文魚天使麵 ，三文魚唔錯，但就係菠菜汁味道有啲怪，搞到個成個天使麵難食咗，而且一凍左仲令啲麵漿哂，最後只好放棄。之後就到最鐘意嘅 拉花咖啡 ，其實係因為呢個先會對「Cream」印象咁深刻，兔兔拉花超可愛，因為想俾朋友要兔兔，所以我就叫左要貓貓，不過其實自己覺得貓貓無咁可愛。味道方面，都幾香滑易入口，我平時唔飲得咖啡都幾鐘意飲呢到嘅咖啡。最後叫咗個 藍莓芝士餅 ，大小適中就係一人份量，藍莓醬超正！芝士唔會太漏，而且幾香濃，真係好想食多件啊喂XD！

朋友聽講「大喜屋」嘅放題唔錯，所以趁著佢生日特意同佢一試，不過打去訂位時尖沙嘴分店經已Full Booking，好彩網上得知佢地剛係銅鑼灣開新店，竟然成功Book到，咁就事不宜遲相約慶祝。因為經已Book好位嘅關係，所以一到步都唔使等好耐就有得入座，店鋪算係幾大，雖然排位都密密地（偷聽到好似因為意外接得太多Booking而要臨時加位），不過唔會太逼坐得唔舒服。一坐低當然係點野食先，雖然食物都離唔開熟食、刺身、壽司，不過款式比一般放題鋪頭更多，一啲比較少見嘅款都有。刺身款式超多，而且都好新鮮，不過一次點嘅數量越多就越新鮮，因為試過一點得少明顯光睇賣相就知跌左Watt，反而數量叫得多就明顯靚得多，而且仲可以係比紙時講少少要求（例如三文魚唔要腩位之類）。不過最特別嘅一定係「甜蝦」，唔係其他地方嘅細細隻，而係大隻唔新鮮甜蝦，鐘意嘅朋友一定要嚟狂食！卷物款式都好多，而且款式幾創新，鮮度亦算唔錯，而且尺寸唔會太大，細細件就算係女仔都可以一啖食哂，可以比人試到更多款式！壽司、手卷質素亦見一班，紫菜係脆嘅，用料亦唔係馬虎，好似芥辣八爪魚就非常新鮮，絕對唔係放咗好耐嘅貨仔。同樣，尺寸唔大係重點！熟食方面就好壞參半，一啲要用「醋」嘅食物會好酸，燒物水準唔錯，最有驚喜係「蟹粥」，意外地好食。因為今次係試營，所以並未有甜品紙，連酒牌都未有，好彩之後朋友再去個時經已加翻，今次都有每人一粒雪米滋。整體嚟講，雖然價錢較平時貴，但食物水準好高，而且侍應服務態度超級好，會收Order紙、同你傾下計問有咩好味、唔好味、邊到可以改進等等，絕對係值得一去再去！

知道朋友喜歡High Tea，所以喺團購網見到呢個套餐就即刻買咗相約嘗鮮，由原價$299 減到$138 + $13.8(加一服務費)，因為團購野食都一定要早幾日Book定，所以都醒水早成個星期打去，當然輕輕鬆鬆有位。不過去食當日因為未去過呢間，所以都搵咗幾分鐘，因為門口唔係向大街，所以行咗成個圈先發現到入口。

可能嗰嗰時段都係食呢個High Tea團購，所以我係第一位入場嘅客人，所以見到之後入嚟嘅客人都係叫呢個Tea Set。講翻環境真係唔錯，高貴、整潔，名副其實嘅高級地區食府，重點係門口對內街，睇翻出去個View幾好，而且亦比較靜。整個Tea Set共有3層，雖然外表睇落去唔係頂級精緻，不過看起來都相當唔錯。頂層嘅就係「英國皇室朱古力餅」、「比利時窩夫伴特級雪糕」嘅雪糕同「咖啡忌廉泡芙」， 雪糕溶得好快！而且同窩夫分開左放，令我完全唔記得左係一齊食嘅，所以就先食咗雪糕先。朱古力餅成塊朱古力磚咁，甜得好過份，要飲水沖淡翻浸味。反而個咖啡忌廉泡芙味道平衡得幾好，值得一讚。中層嘅就有「日本和牛漢堡」、「法式鵝肝漢堡」、「焗田螺伴黑松露薯蓉」同「芝麻脆蝦方塊」，漢堡只算係不過不失，反而焗田螺薯蓉很不錯，芝麻脆蝦雖然好香，不過食落去就比較多油。最底層嘅就有3款唔同嘅香草蕃茄包（煙三文魚、蜜桃鴨胸、巴馬火腿），味道唔錯而且塊包幾鬆軟，意外地好食。而原本伴雪糕食嘅比利時窩夫就唔知點解放左係呢層，雖然無咗雪糕，但估唔到就咁食窩夫都好夠味，而且烘焗得軟硬度適中，第一次食到咁好食嘅窩夫。Tea Set仲包2杯餐飲，就叫咗凍咖啡同凍檸茶，雖然就唔會有咩特別，但高級食店質素你明嘅。整體嚟講可以百幾蚊有得High Tea，質素絕對唔差，而且份量算係多，我同朋友無食Lunch都食飽咗，加上咁靚環境，如果再搞團購真係要再戰！