生日多飯局，有時都唔知揀咩食好，今次不如揀間特別啲啦，我有個朋友好中意食蒜，就試呢間多蒜啦！book左6:30(因為下一場係8:30)，留檯「5分鐘」，其實唔好咁啦，最少都15分鐘啦係咪。入去坐卡位都坐得舒服嘅，不過就好焗囉。 人未齊就放左蒜蓉包啦，我同另一位朋友到先，食嘅時候仲叫暖暖地唔算硬，另外兩位稍後到就食硬啲啦 (爆) 烤雞柳牛油餡角配蒜香乳酪醬，雞柳燒得幾香但可以juicy多D，沙律菜有醋dressing中和一下油膩，牛油餡角偏硬，蒜香乳酪醬其實食唔出蒜味，但整體係夾嘅，可做得更好。 Garlic Snowing Pizza基本上食評中人人都會order，的確好多乾蒜片，少少蝦同芝士，薄pizza唔會令人食得太飽，雖然多蒜片但唔算好大味，至少食完唔會口臭(爆) 多啲溶左嘅芝士會更好。 p.s. pizza餅底同餡角餅底係一樣，比較硬同埋韌 特色醃漬蒜頭炒韓國牛油飯，飯炒得乾身不會油膩，蒜味唔突出，中間有一隻蝦咁多，入面有少少青紅椒，辣椒、露筍等等做配搭，口感&味道更實在一點。 又係好多人會叫嘅蒜香忌廉汁蟹肉龍蝦意粉，每條意粉都掛上濃厚creamy嘅白汁，但好少蒜香味，蟹肉龍蝦分量偏少，整體感覺可以。 飲品方面選擇算ok呀，橙紅色果杯係 Cinderella，有橙、菠蘿、檸檬汁等等嘅開胃飲品，仲有橙soda同埋白色果杯蒜味牛奶? 我冇膽飲蒜味奶，但朋友話都ok喎，入得口嘅(笑) 最後就當然唔少得蒜味甜品啦啦，同一個pizza底，換上香蕉、蒜片、朱古力漿同雪糕，gimmick野岩香港人呀，唔難食嘅，都幾得意吖，出奇地個味都夾喎。

之前睇IG見到有人話呢觀塘工廈cafe正，book位試下先，地點唔難搵，入到去cafe燈光比較暗，7:30左右到達唔算多人，坐得舒服唔會趕你走，員工都有禮貌嘅。 睇到廚師推介黑毛豬肩乜乜，賣相都幾好喎，但件豬一切落去已經覺得唔會juicy，比較乾身，單食豬扒冇乜驚喜，加左蒜一齊食感覺好D，下面薯蓉同蔬菜都一般，南瓜好爽口 (*๓´) 咸蛋黃天婦羅軟殼蟹意粉，滿心歡喜的等待著濃郁嘅蛋黃香，以為個sauce有起沙咸蛋黃，原來冇嘅，轉移到軟穀蟹到啦，都係冇，天婦羅粉好厚同埋硬喔！ 6粒裝田螺焗薯蓉，冇咩特別，亦唔係特別好食。 小食係雞泡魚乾，第一次食到咁稔身冇乜咬口嘅質地，覺得阿婆都可輕鬆食到，唔洗擔心。 最好食個蒜蓉包，推薦(笑)

今年生日正日我揀左嚟天穴食日本菜，自從冇喺尖沙咀返工，都好多年冇再嚟了，以前總會間中過嚟食個lunch。生日貪佢有海景睇下，不過真係坐得幾迫下㗎，好彩有book位並且要求window seat，仲有訂埋生日蛋糕，所以位置坐得比較舒適。 鱆紅魚薄切沙律，前菜薄切會覺得冇咁膩，加埋旁邊嘅沙律醋開開胃先。 蔥吞拿魚腩薄脆，加左蔥簡直冇得頂，配埋脆米餅喺底，唔覺唔覺就食左一件，口內油脂&蔥味一絕。 生日飯食好啲一定要叫個刺身啦～我地唔食魚籽嘅，店員好好幫我地轉左第二款刺身，另外再加上日本空運海膽，海膽非常鮮甜，甜到唔捨得咁快食哂(笑) 其他刺身當然係夠新鮮啦，連平時唔太中意嘅魷魚 & 帆立貝我都冇抗拒喔，呢一口拖羅簡直係入口即溶，冇得頂呀！ 其實2個人食魚生都食到有點膩，但又怕夜啲會餓，所以叫左少少串燒，雞皮燒得麻麻，如果燒香啲乾身少少，脆多少少就perfect啦！ 另外仲有少少天婦羅，個蝦頭俾我K.O.左，好似食薯片咁脆，好香好好味。 最後就係我嘅生日蛋糕，索價$150，真係好細件咋，真心唔抵玩吖，不過生日一年一次就算啦，之但係佢寫我個名可以擺入中間少少囉，而家個畫面就係爭緊啲野，少左啲美感(爆)

上一次食完唔夠1個月又返嚟，因為上次冇食到栗子pancake，今次一定要補返數(笑) 疏乎厘pancake口感似食空氣，大啖大啖放入口慢慢食到蛋香、麵粉香，老實講栗子唔係重點，都係普普通通甜糖漬左，重點應放返喺pancake到。 識我嘅人應該都知我比較中意食原味嘅野，所以唔少得咁個original classic野啦！當然冇疏乎厘口感咁鬆，比較實淨嘅pancake又係唔同食法，食落去感覺實在啲，會有飽肚感(笑) 原味呢款比較重牛油及蛋多香，真心中意食呢款多啲，不過人類好現實，打卡影相一定係疏乎厘pancake顏值勝。

都好一段日子冇幫襯啦！呢一日咁岩經過荃灣，又諗唔到食乜，最後就行左過黎慢活一下(笑) 其實佢地嘅lunch set都算多野揀，我地叫左個黑松露軟殼蟹意粉，一如既往好味，軟殼蟹好鬆脆唔油膩，意粉煮得QQ有咬口，加埋淡淡黑松露醬，好味。 仲有個咩咩芝士pizza (sorry我忘記左個名) pizza底唔係薄嘅，但亦未算厚，lunch黎講一人食一個應該好飽下，所以share比較好。溶溶地嘅芝士最好趁熱食，上面嘅火箭菜係畫龍點睛嘅功效，令賣相更吸引之餘，味蕾亦有多一種感覺。 仲叫左芝士肉醬薯條，當時我都幾肚餓，呢個一上檯仲係熱到辣口，所以覺得好好食，粗薯條如果冇炸過龍，都好難整得唔好食嘅係咪? 跟餐我地叫左2杯熱薑茶，天氣凍飲完暖下胃真係唔錯。 最後叫左2件cake，講真，2件都唔好食，無論口感質地，味道都仲有好多改善空間，不過佢賣點應該係「賣相」會吸引人去試嘅。

其實真係比較少去觀塘搵食，相信喺觀塘返工嘅朋友應該體會到周街都多人到好似行年宵咁嘅苦況。不過有一日睇IG有人話觀塘呢間cafe正，當時我只見到塊牛扒相咋，但都決定去試下。 我地大約7點去到，上到去別有洞天咁樣，好大好舒服，裝修幾靚，完全冇壓迫感，店員亦好nice為我地介紹食物。喺觀塘工廠大廈上樓竟然有咁嘅餐廳，好正。 我地叫左野之後就有熱辣辣嘅麵包，真心好食嘅麵包，唔係hea你食空氣果種，真係鬆軟得黎有麵粉嘅香味。 caeser salad細細碟，份量剛好2人前，成碟菜係完全新鮮，唔會老左黃左都攞出黎俾客食(笑) 每一口菜都被salad dressing包圍著，讚。 再黎一個令人心動的薯蓉焗田螺，嘩~我冇諗過呢個咁好味，有驚喜，薯蓉帶有牛油香仲好鬼滑，加上少少蒜香，令田螺更好味，一定要試。 炭燒美國肉眼扒，叫5成佢真係做到5成，入口仲好柔軟有肉汁流出，炭燒得黎唔會乾，恰到好處，抵讚。 其實仲有塊澳洲穀飼牛扒，但相比肉眼呢塊真係輸哂，又乾又老又冇汁，仲整到好熟，近乎well done，所以我都費事影相(爆) 每份牛扒嘅side dish都有薯蓉同埋少少蔬菜類，其實食左2件扒都好飽，雖然冇食哂澳洲果塊(笑) 如果你打算去呢到試下，我建議你俾多少少錢食塊好啲嘅牛囉～

終於去左食聞名已久嘅輝哥火鍋啦！今次係舊老闆請食飯，老遠去到九龍城又點話吖(笑) 我地叫左個花蛤蟹煲，一放試檯各人相機出動，為蟹煲影返張寫真先(爆) 話明花蛤蟹煲當然有呢兩樣主角啦，主角超鮮甜好新鮮呀～個湯底係蕃茄味的，如果唔係蕃茄會唔會好啲呢。個煲入面仲有菜呀、菇呀、粟米果啲咁啦，都好豐富嘅。 我地仲叫左蟶子王、手切肥牛、手打丸、水餃、芋頭、魚皮、紫菜響鈴等等。其實輝哥真係冇得頂，全新食材都好優質，我地叫啲野當中真係搵唔到邊樣係唔好食嘅，有機會再黎幫襯啦！

一直都想試下㗎啦！不過初頭人太多真係唔想排隊太耐，咁岩呢一日我可以早點收工，就過黎潮聖一下吧。 叫左2個burger，2杯drink + 1個cheese fries。金鐘店都算多人，搵位需要點時間，最後係需要搭檯的。 買完野坐返低等，個鐘仔響就出返去取餐。 芝士薯條上面佈滿左邪惡嘅芝士，喜歡芝士嘅朋友一定要試，粗身嘅薯條外脆內軟，加埋溶左嘅芝士真係好難抗拒，不過最好趁熱食，凍左芝士硬啲，薯條都硬埋 (笑) 再黎就係我期待已久嘅smokeshack，點解我揀佢? 因為有煙肉囉(爆) 除左脆口嘅煙肉，當然就係塊牛啦～唔會乾到乜咁，入口仲好juicy，不過chopped cherry pepper好咸，太多啦，食多幾啖要撤走哂先可繼續。 仲有就係最classic 嘅 shackburger，塊牛一樣juicy，加埋蕃茄生菜感覺好似健康啲(哈哈) 反而呢個簡單啲仲易食哂囉。 最後我想講個包都好鬼油下，佢塊牛油紙已經油到不行，要用幾張紙巾包住先唔會搞到手指油淋淋，覺得呢一餐真係好肥好邪惡囉，但係食左先算吧！

Luna來自北海道嘅芝士蛋糕，之前都有買返屋企食過幾次，今次第一次幫襯Luna Cafe。果日做完野大約3點去到，cafe好細，入到去得好少位，講真坐得唔太舒服嘅。 我地點左2杯飲品，玫瑰荔枝梳打好味吖，好清新呀，荔枝同玫瑰味能共存，讚呀！焦糖咖啡比我想像中苦澀，咖啡味比較濃，雖然係焦糖，但唔算太甜，ok嘅。 食物方面我地唔想食太多，所以叫左呢個牛油果蟹肉沙律(我唔太記得個名)，呢個沙律好清新，牛油果同蟹肉出奇地夾喎，中意牛油果嘅朋友一定要試下。 再叫多個日本直送松阪牛肉pie，真係好好味，個pie好鬆化好香牛油味，入面嘅牛肉餡好大陣牛味，熱辣辣食真係不得了，好野。 再叫多條crunbar試試，嘩嘩嘩。。。一定要食呢個，外面鬆脆，上面仲有啲杏仁碎增加口感，講到入面嘅芝士。。。OMG我勁中意呀，要慢慢食唔敢咁快食哂，慢慢享受(爆) 最後一定要叫最出名嘅原味芝士蛋糕啦，每次食都唔會失望，不有人話佢冰感重，但如果完全解凍就唔佢有咁嘅問題啦！

其實已經好一陣子冇去到豚王， 今次就去沙田店啦。 由於我係六點左右去到， 所以係唔需要排隊嘅(笑) 朋友叫左個赤王拉麵，麵要普通硬度，一上檯睇到呢個顏色，心諗應該好Q辣 (爆) 點知不出所料，我試味啦～初頭食都唔太覺得咩野，食多幾啖喉嚨俾火燒咁(利申: 我係食少辣嘅人)。 不過如果食得辣嘅，呢個都係唔錯嘅選擇。普通硬度麵剛剛好，湯底唔講啦～飲唔到 XD 再黎一個正常版豬骨湯底，個湯都幾濃厚，杰身啲嘅湯底，個湯夠熱，唔會死咸，我要左偏硬麵，因為我食得慢，所以怕食到尾個麵太稔(笑) 正如我所講，食到尾個麵未稔得哂，岩岩好。 佢呢塊肉真係不得了，肥瘦適中，入口仍然有咬口，好香呀～但食2塊就覺得好內疚，好肥呀(爆) 溏沁蛋都係必食，個溏沁真心做得好好，入面輕輕有啲醬油味，唔會搶左蛋味，正到爆炸。