芝士迷今次有福啦！旺角一間酒店嘅自助餐餐廳The Place推出芝士主題自助餐，有齊各款用芝士製成嘅海鮮、肉類同甜品。驚食得多會漏？唔怕！仲有各款冰上海鮮如長腳蟹、小龍蝦同埋即開生蠔任你食！

芝士海鮮系列

四式芝士焗龍蝦

龍蝦選用加拿大龍蝦，大大隻，食落去肉質彈牙，龍蝦味重，仲有埋膏添！大廚用咗四款唔同芝士去焗，芝士味香濃得嚟又唔會蓋過龍蝦鮮味！

芝士焗半殼帶子

帶子鮮甜多汁，加上Parmesan同Camembert，奶味較重。

芝士焗海鮮鍋

帶子、蝦、魷魚同青口再加上車打芝士，全部海鮮好都爽口！

肉類主打流心芝士吉列雞扒、雞扒內夾有鹹火腿同流心芝士，再點埋自家製嘅蛋黃醬，味道層次更豐富。

仲未夠？現場有大廚即場烹調巴馬臣芝士車輪意大利飯或意粉，首先用菇造嘅上湯煮熟米飯，再喺芝士車輪入面刮啲芝士出嚟加落去一齊煮，最後再將成個飯/意粉文放落芝士車輪入面撈，芝士味超香濃！私心建議加埋黑松露醬食，兩者味道好夾！

芝士甜品系列

芝士梳乎厘

加埋芝士嘅梳乎厘味道甜甜鹹鹹，食落無咁漏，同埋梳乎厘咁鬆軟，真係食多幾件都得！

盆栽意大利芝士蛋糕

用盆栽裝住嘅tiramisu夠趣致，而且每個都細細件，最啱就係自助餐食！

芝士撻

熱辣辣食就最好，餅皮脆，而且流心效果好澎湃！

法式軟心芝士蛋糕(左)，蛋糕札實，芝士味好濃！驚太漏可以試下依個芒果瑞士芝士凍餅(右)，芒果味較重再配上淡淡芝士香，好fresh！

喺海鮮區仲提供多款冰上海鮮，包括長腳蟹、蜆、活海蝦、小龍蝦同埋青口，仲有即開愛爾蘭同紐西蘭生蠔，另外除咗芝士系列，仲有超過數十款嘅甜品同鹹點比大家揀，要食回本仲唔係今次！

「芝味無窮」主題自助餐
供應日期：2018年9月17日至11月30日
供應時間：自助午餐（每天中午12時至下午2時30分），自助晚餐（每日下午6時30分至9時45分）

價錢：
自助午餐（星期一至五）成人：港幣$338; 小童及長者：港幣$268；（星期六、日及公眾假期）成人：港幣$418; 小童及長者：港幣$318
自助晚餐（星期一至五）成人：港幣$628; 小童及長者：港幣$438；（星期六、日及公眾假期）成人：港幣$678; 小童及長者：港幣$478

The Place

地址: 旺角上海街555號香港康得思酒店L樓層

文、相、片：Yanica