影片
營業時間
星期一至日
11:30 - 23:30
以上資料只供參考, 請與餐廳確認詳情
招牌菜
一年一度細妹生日飯，就番細佬妹，所以過返哩深水埗搵食，今次唔揀中菜，揀咗米桶改試越南嘢，因為佢哋唔似我，少出街食，亦少周圍試嘢食。是晚係中秋前嘅星期日，好多人會提前做節，路經好多中菜館都好爆。事前訂咗枱，7:00pm準時到，但就嚇咗我一跳，唔係人多到無泡，相反係人少到你唔信，入門口右手邊係卡位，大概有5排左右，4枱有人坐，最尾第5枱就安排咗俾我哋；左手邊係可加可減嘅2、4、6枱，大概有40、50個位，全部都吉嘅，雖然啲人多數揀酒樓食飯做節，但依刻始終係飯市，都無乜理由咁空了了架。隨後嗰一個鐘都陸續有客，最終都有8乘幾滿，真係以為佢差得咁緊要，恐怕都同做節有關吧！話說回頭，我又幾鍾意佢啲裝修喎，應該叫順眼囉，一室青青綠綠，感覺光潔清爽，兩邊牆又鑲嵌咗好多越南景物嘅畫，有山水、有人物，因為舊年自由行去過一次河內同下龍灣，所以對牆上嘅景緻有份親身感，令我同太太又講番去越南嘅事物，想番起好多第一次嘅體驗，雖然越南幾落後，但當地人一般都好友善。咁晌米桶，啲侍應都好友善有禮，大多數都係後生仔女，做嘢都幾勤快。小拼盤 $48都係常見嘅越式小食，有越南絲網春卷、越南蒸粉包、蝦片牛肉、扎肉、炸章魚餅，不過炸章魚餅自己就少見啲，當然有蝦餅就仲正啦，可能個碟大大，睇落份量唔算多。越南蒸粉包同個蝦片牛肉比較出色，蒸粉包外皮好薄有米香，餡料又多，包到四四方方，賣相幾討好；而蝦片牛肉，就大塊蝦片之上放咗撮檬粉，再加啲炸牛肉碎，撒多少少蔥粒晌面，味道同口感都變得唔單調喇！蒜蓉牛油雞翼 $10依個招牌菜，又係做緊優惠，堂食三個人起，就可以用 $10換一客三隻雞翼，雞翼係雞全翼，認真超抵食，直頭成本價傾銷。其實個雞翼話難唔難，話易唔易整，雞翼醃好上粉炸至金黃，瀝乾油回鑊加牛油、蒜茸中火兜勻搞掂，牛油易燶大火就出事，所以$10三隻蝕賣價。味道唔錯，有牛油香，但蒜茸味覺得唔夠，可以再重手啲。外皮香脆，證明快炸快炒，如果唔係好易腍番晒。火車頭湯河粉 $42真係唔同鋪做嘅火車頭都唔同，米桶嘅火車頭湯河粉就似乎簡單啲，餸料只係得生牛肉同黑椒牛丸，份量亦唔多，另附送香葉、芽菜、青檸、辣椒做佐料；湯色呈淡啡色，帶有肉香；而河粉同廣式麵檔食嘅差唔多，但賣成$42一碗就唔係咁抵食！反而分別叫兩碗越南湯河仲抵，因為晚市優惠每碗$26，好幾款湯河仲係雙拼添，例如：生熟牛肉、牛丸栢葉、扎肉雞絲，比凈叫一個火車頭多十蚊雞之嘛！咖喱牛腩煲跟薄餅 $65．追加蒜茸包 $18咖喱煲系列都有好多選擇，雞牛羊，仲有牛尾、班腩，可配白飯、薄餅 、蒜茸包。一個咖喱牛腩煲都唔少嘢，牛腩多，咖喱汁就仲多，所以食完薄餅之後，就追加一客蒜茸包（5件），唔好嘥啲咖喱汁，反正食得落。牛腩炆得好腍好鬆軟，仲墊咗啲芽菜伴住哩食，咖喱汁香得哩唔算辣，椰奶味稍重，又唔及印度咖喱嗰類有多種香料味，但都算唔錯。馬拉盞炒通菜 $38鍾意蝦醬嘅鹹香惹味，順理成章就揀咗馬拉盞炒通菜，馬拉盞可以話係東南亞人常用嘅蝦醬，名稱有別，實質大同小異，都係小蝦用粗鹽醃，再曬再發酵細磨而成嘅醬。炒通菜確實好夾，可能去親大排當好多時都會叫蝦醬通菜牛，食開有少少慣性。 紅豆冰、青檸梳打、大樹菠蘿冰 $9晚市優惠，好多特飲都係$9，所以我哋都叫咗幾杯哩飲吓。細佬嘅紅豆冰唔係好OK，佢話啲豆未腍透；細妹嘅青檸梳打OK嘅，有汽梳打水加兩片青檸，感覺話似飲檸七；我嘅大樹菠蘿冰色澤幾搶眼，石榴糖水加大樹菠蘿，不過，都知係罐頭貨，所以質感差少少，都叫做還可以。仲有十幾款特飲，好似三色冰、越南青檸茶，不過如果想試越南嘅滴餾咖啡，就要$25喇！4個人又飲又食，試咗唔少嘢，加埋一，三百蚊都唔使，質量都OK，況且環境、招呼又唔錯，食得過！仲有好多特價嘢未試，好似單張所介紹嘅「家鄉魚湯系列，採用越式獨特秘製嘅香濃湯底」，遲吓可以再哩。
繼續閱讀
係呢度 睇到d人話幾正~ 於是去左試下價錢尚算大眾化 有唔少 特價野食見到好多人推介 蒜蓉牛油雞翼 $ 28 我都叫左一份個粉漿真係好薄 少油 雞翼又大隻 多肉 好香蒜蓉味 上枱熱辣辣~只係嫌佢唔太入味 食到裡面味道較淡越式炒蜆 $ 38唔係好辣 味道唔差 不過朋友話唔係越南風味原本想食 芝士焗大頭蝦 $ 48 但個部長 都算老實講明冇貨 現有的大頭蝦比較細隻 於是我地唔要炸蟹餅 $ 28 唔太油 但係就唔覺有蟹 朋友話似扎肉餅多d既然有人讚海南雞 都叫左個細例牌試下 $ 28 講真 普通到唔恨 極為失望 而且冇咩味道....唯一好處 係雞脾囉~咖哩牛腩煲 連 薄餅/白飯/蒜蓉包 $ 65我揀左薄餅其實味道就唔係難食 但點解會係招牌菜0架....首先 咖哩味唔夠濃 根本點薄餅食都唔太夠味而 牛腩亦不出色 又係失望馬拉盞九菜花炒鮮魷 $ 28 味道幾好 都唔錯 只係油多左少少 同 有少部份九菜老左dd成餐飯 245元 普普通通 唔會再去lu~但要讚讚侍應態度唔錯 坐得亦幾舒服 仲有個廁所好乾淨 哈哈~另外 白飯 $ 8
繼續閱讀
十蚊既牛油雞翼 ~ 友人見到食評後話一定要食, 果然好好食, 好香口及少油牛湯底鮮甜, 一層油喺面令到溫度得以keep住高企, 吃的時候仲好熱, 河粉不算很滑, 可以令到湯的味道得以沾上河粉, 令河粉更可口, 湯底更用上大量香葉肴過, 加埋白蘿白同白胡椒的濃味, 覺得味道很濃及很正宗, 哈, 不過自己食過都覺得幾好!
繼續閱讀
天氣又熱又焗, 加上成日落雨, 想食越南或泰國菜開開胃, 所以上opemrice睇下屋企附近有咩好野食 呢間餐廳行過好幾次都比佢好清新的招牌吸引, 見食評都不錯, 就入去試下啦!在門口已經有個又有禮又有耐性的職員介紹他們的食品, 可能落雨的關係, 入面唔係好多客, 我地就坐卡位, 地方清潔整齊, 周圍都係綠色白色為主, 感覺好清新我地一家三口叫左五款食物1. 蒜蓉牛油雞翼 熱辣辣的, 外皮炸得又香又脆, 雞肉仲好滑, 真係好食過KFC, 阿仔好鍾意, 食完一隻仲要再encore2. 炸雞脾凍檬 不過不失的水準, 合格! 檬粉碎左少少, 個汁都OK, 好開胃3. 越式鳳爪 個汁食落去同撈檬的一樣, 但今次勝在夠入味又唔會太酸太辣, 鳳爪仲好爽, 唔會浸到淋晒, 我最鐘意呢個, 想學下調呢個汁4. 生牛肉湯河粉 雖然牛肉唔係好靚的肥牛, 但D河粉好好, 唔會碎濕濕, 個湯底都OK, 但芽菜少左D, 不過老公好鐘意個河粉5. 蒸粉包 呢個係用好腸粉的皮包住D肉碎, 味道一般, 下次可試第二樣 最後, 送上免費甜品 - 黑糯米總括來就都算OK, 可以再來
繼續閱讀
好耐無嚟過呢到,主要因為水準一般,但最近喺屋企信箱收到佢哋嘅傳單,望一望無郵chop,估計應該係親自派發,見佢哋咁有誠意,今晚就俾多次機會佢哋7點鐘去到,見到門口排晒隊,原來等7:30(呢到出咗新menu,星期一至五18:00及星期六,日19:30後特價小菜$18-$28),之前喺傳單都見到,但估唔到今日父親節都有入到去侍應送上menu,咦?點解有羽壽司menu嘅?問一問佢哋原來同集團嘅,而且六月起可以兩邊都食到對方食品,唔錯喎叫咗幾款小菜:越式炒蜆:唔會好辣,配上越式香料,感覺好有越南風味甜酸雞煲:雞好滑,而且外層炸粉超薄,味道酸甜適中,一流酸辣牛栢葉:味道同泰式鳳爪差唔多,但換上牛栢葉,都幾特別酒煮蘿蔔牛尾:一向唔食牛尾,因為大部份西餐廳嘅紅酒燴牛尾都做得好差,但呢個就唔同啦,不但炆得夠淋,亦無牛尾嘅酥味,配蘿蔔清清地,幾好味紅燒烏頭魚,無乜特別,但都算ok埋單連2枝beer都係$200左右,咁嘅價錢有咁嘅水準,下次一定再嚟
繼續閱讀