栢檔去骨海南雞飯 (已結業)

間舖幾窄, 檯櫈又放得密, 坐得比較迫。第一印象就覺得佢都幾牙擦, 首先自稱係最好食嘅雞飯, 兼且全店差不多衹賣一樣嘢, 就係雞, 仲貼出告示, 寫明歡迎自備外來飲品, 即係話廢事賣埋叻啡、奶茶、檸水。唔通真係賣一味嘢就養得起成間舖咁巴閉???我個套餐係雞飯連湯。個湯好清, 冇油浮面, 飲到有籃瓜味, 唔錯。雞幾滑, 唔肥, 雞皮下面差不多冇脂肪, 好味。油飯味道調得適中, 幾好食。當日見佢客似雲來, 中午 12:20 pm 左右, 已經坐滿 8 成, 真係有 d 捧場客噃!服務方面, 待應全是中國大媽, 帶 d 鄉音, 但係訓練有素, 服務好。聽到佢哋同客傾偈, 講吓幾重同幾大嘅雞最好食, 邊一部分嘅雞肉最滑, 同埋邊一部分嘅雞皮最好味, 真係有 d 專家 feel 噃。結論 : 柏檔味道好, 服務佳, 抵佢牙擦!