新釗記 (已結業)

今日中午執左一陣屋，見餓餓地落街開飯又唔想走得遠，於是就幫襯附近呢間茶餐廳。甫入門即見滿座，無辦法只好站著等，恰好我站的位置又尷尬- 出菜位隔離，所以企左無耐就俾個載眼鏡的女侍應大喝︰『行開，行開呀﹗』，仲作勢要撞過黎咁，真係好巴士閉。等左陣，終於可以坐低，先頭個侍應又即刻行過黎落單，我菜單都未睇邊咁快柯打喎，咁咪係加埋唔該的情況下叫佢一陣再過黎啦，點知佢就即刻一路行開一路單打︰『慢吞吞，都唔知係咪路的，阻住地球轉。』，咁樣對客，有無搞錯？本來想走，但又唔想同五臟廟鬥氣，唯有炒左碟牛河拿拿臨食完閃，點知碟河上桌，份量只有附近茶餐廳三分二，牛肉寥寥幾片，全碟油光泛泛，進口一嘗，鑊氣中包含淡淡的煤氣臭味，明顯炒時火氣少。席間，那個女侍應不斷走來走去，當中很多時她也是拿著客人的餐點的說個不停的。至於其他女侍也不甘示弱，全場不停放聲說話，全不理會食客感受。今餐好飽，但好快消化晒，畢竟落肚的只有小量牛河大量氣。以後唔會再去。