火五越式牛肉粉專門店 (華生樓) (已結業)

扎肉米紙卷—扎肉無味又紙咁薄！食落剩係得醃蘿蔔味。黑醋牛油蒜蓉雞翼—牛油同蒜蓉味係零，雞翼本身唔入味外皮剩係得陣醋味。越式蝦春卷—真係唔知越南春卷，賣相同味道原來同去飲茶時用隻杯裝住果種乜鬼沙律蝦卷春卷一樣㗎喎！越式生牛肉河—牛肉同河粉正常，但無配任何香葉同湯底淡而無味，果啖湯有一種合成feel。法國咖喱牛肋油香飯—就係見到個名法國咖喱咁有趣先叫嚟見識下。結果係幾塊肉加幾條無味牛筋淋咖喱汁上去（肯定唔係同咖喱一齊煮）已經笑左，除咗鹹味之外全無咖喱香，個所謂油香飯食唔出同白飯有乜分別。咁多人話「正宗」究竟係我味覺有問題…定未食過越南菜？除咗價錢平同份量大之外，食物味道同越南百分百無關！