情人節一大早係office就收到男朋友既靚靚花，巧開心呀 ！臨睇戲前，我地決定去飲杯茶，歎個包~男朋友既最愛 ！我地本來打算去"利苑"歎茶，但實在太爆嘞！男朋友又肚仔餓，唯有另覓新點！經過"百樂潮州"門口，瞥見廳内格調優雅高尚，又有八、九成客人，應屬不錯，便上前攞位，侍應生即時帶領我地入座。環境寧靜，燈光幽暗，蠻有情調既中菜館子啊 , 巧啱Valentine's feel！二人座位極舒適寛敞，無限時任坐，hea爆燈 ！我地一口氣點左巧多點心呀
1.百樂蝦餃皇 : 有四大一細粒 ，皮薄蝦大大隻，非常爽口彈牙！2.蟹籽鮮蝦燒賣皇 : 蝦彈肉滑！3.上湯牛肉球 : 平時食開蒸牛肉球，第一次食呢款用上湯煮既牛肉球，巧特別呀 ……味道其實無分別，球球質鮮，味道爽口。4.豉汁蒸排骨 :  半肥瘦排骨，肉質滑溜。芋頭香熟。5.XO醬蒸鳳爪 : 鳳爪夠辣夠入味！6.蜜汁叉燒包 : 叉燒包軟熟味美。7.潮式糯米卷 : 香口鬆軟。8.糖醋伊麵(小份) : 伊麵脆中帶軟，但唔夠焦脆！男朋友唔多欣賞呢個點心，我個人就覺得爭d, 炸得唔夠焦香囉 9.春風得意腸 : 入口外滑内脆，幼滑既腸粉，包著脆卜卜既春卷，饀料係香甜既芋頭蓉，層次豐富，好吃到讓人驚呀 ！食物質素高，環境清幽，價錢偏貴，二人情侶價$535.70，但坐得舒適自在又浪漫，也就沒所謂了！
今餐巧滿足，巧幸福，原來情人眼裏既點心係咁完美無瑕架……

來到2015年 一早聽聞有間名店叫paisano`s 既食店pizza大件又抵食,於是我同女朋友當日下午在銅鑼灣看完電影,就從灣仔方向行去paisano`s  我同女朋友都係超愛pizza,又點會錯過呢 大約3點左右到了目的地,發覺都幾多人下 店舖好細間,坐位都只係得10個左右 太少了,但我地都照等位 好運地只等了5分鐘左右就有位了. 我地就叫了一件size12"既辣肉腸同埋一件size"12既四種芝士           1. 辣肉腸:熱烘烘的,腸切成圓型薄片與蕃茄佈滿在薄餅面上 意大利肉腸咸香又惹味，帶點辣味 蕃茄又甜美,芝士味都算重,餅底好厚又脆好鬆化  係必食既             2.四種芝士:熱烘烘的,內有四種不同既芝士 分別係水牛芝士,車打,巴馬臣,寶伐郎四種芝士. 濃烈既芝士味道 咬開時還有一絲絲的芝士連著, 芝士下層還有蕃茄醬 ,抵消了四種芝士既膩感 餅底都係好厚又脆好鬆化. 又係必食既 以後食pizza一定去番paisano's            用膠刀叉切pizza似乎對煙韌的pizza有點難度,一定要改善啦,又唔環保. 店舖坐位少得可憐,又係要改善的.

留意左呢間餐廳好耐喇 ！上次同男朋友去完會展個"冬日美食節"，經過呢間餐廳，見唔太多人，就買左一件兩份食，件pizza太香太誘人 ，搞到我地忘記相機食先，無得寫食評,  簡直係2014年既遺憾！2015年元旦日，第一件事，就係再去食我地既至愛pizza , 仲要指定去呢間"Paisano's Pizzeria"添！

我地睇完戲，慢步行去灣仔mtr, 餐廳就係天僑底，好易認！餐廳細小呈長方形，有開放式㕑房，但座位得几個，快餐店形式既銷售服務，侍應生全是外籍人仕。是日元旦假期，人流特別多，尤其係外籍人仕，外賣亦爆滿 ！今次再點返上次既辣肉腸pizza (Pepperoni slice) , 依舊揀左12", 超大件 ，又鬆厚 ，少少辣味，餅身夠脆，中間饀料豐脥, 酥軟可口 ！我地意猶未盡，決定再點多個pizza，因為太暢銷既關係，有部份心儀既款式已經賣哂 ……咁試下4款芝士味pizza(4 Cheese slice)喇 ，12"新鮮出爐，燙口非常，芝士味特別濃郁，煙靱到拉出絲，質感軟滑creamy, 香鹹適中，唔會膩口！世間上竟有如斯美味既pizza食，實在太震撼了！最愛其鬆厚既質感！仲有唔同size任君選擇, 以後食pizza唔使成班人先食到，亦唔使再去Pizza Hut喇！

又係時候打邊邊喇 ......由好友"為食狼"帶領我地去滾, 地點係長沙灣既"壹窩煱"。聽講一個月前就book定，唔係邊有我地坐得咁爽 呀！係長沙灣地鐵站EXIT A2出，開GPS導航，步行約數分鐘便到。依家人人都有一部smartphone在手, 其實好易揾，唔知點解仲有迷途小羔羊:ghost 其中兩個為食嘩鬼），走錯去隔離街，話舖有相似，仲要開埋位，死未 ？！

火鍋店以透明落地玻璃做門面，即時空間感增強，内裡一覽無遺！一張中型圓枱，坐9個人，都頗為迫狹 ，枱上擺放左兩個爐及碗筷後，查實都無咩位再放d火鍋料，有d食物仲要擺過隔離張閒置枱, 淥嘢都几唔方便 ！湯底方面，我地分別點左一個招牌香辣蟹雞鍋(小辣） 及一個香濃花甲蕃茄海鮮鍋 。前者既蟹肉鮮甜，蟹膏味美，雞肉嫩滑入味，小辣剛剛好，都米話食一半雞件先淥野，係直頭比我地ko左八成呢！後者既湯底超清鮮甜，蝦肉彈身，蟹鉗肉甜美，可能係加左蕃茄喇，酸甜清新,  整返碗清湯飲下先, 簡直一滴不留  ！火鍋店既負責人、侍應伙記等好親民，不時推介一d好嘢食俾我地，仲有問必答添！唔使訂定，是晚咁啱就有隻象拔蚌留俾我地 ，我地切片食，靚靚勁大盤 ，片得夠薄又爽脆鮮甜， 到痺喇！食到七七八八，剩返個大舊蚌肉，唔問唔知，原來呢舊肉係象拔蚌既內藏 ，食得㗎！又來個切片食，不過几厚片下，個個唔多敢試，其中一位男仕試左話一般般。"為食狼"話怕食左會肚痛想縮沙，我地點可以由得他浪得虛名㗎，一於迫佢試，佢試左話ok，咁即係大家唔使食啦……hehe ！另外推介既靚靚扇貝，每人一大隻，我地揀左蒸來食 , 熱辣辣，鋪滿哂蒜蓉粉絲，粉絲入味夠香，扇貝鮮甜爽口, 蒸得剛好夠火喉，又唔會過淡過鹹！炸魚片頭 : 趁熱即食，差d被燙口，厚厚既一塊，超級彈牙香脆，點上秘製酸甜醬汁後，簡直快活過神仙 ！至於火鍋料 都唔弱，有肥牛，牛味濃郁。芝心丸，芝士味濃，有芝士拉絲。貢丸，彈牙爽口。韮菜餃，香口好味。雲吞，皮薄肉饀多。炸魚皮 、炸嚮鈴 ，灼几下後食，勁爽身脆口，滋味無窮！皇帝菜、茼蒿菜，清香嫩爽。仲有豬肺、芝士腸……等。今個冬季第一餐打邊邊, 愈滾愈起勁，爽呀 ！

近排傾開計先知, 原來有好幾個朋友都鐘意食pizza, 不如搞返個pizza團 喇！可惜時間上夾唔到，唯有約鐵膽飯脚去……靚女密友第一時間推介去California Pizza Kitchen，食過巧巧味 咁話！

我地預先訂左7點4位，準時到達旺角家樂坊分店，人流唔多，靚女密友仲話，好耐無來光顧喇，以前好多人，要排隊㗎，乜家下 咁多吉位嘅？！餐廳寧靜幽喑，裝修簡單舒適。侍應生安排我地坐四人卡位，夠舒服自在！

由於餐廳只限個半鐘時間用餐，分秒必爭下，每人點一款，快趣吖麻 ！

1.頭盤揀選左生菜包 : 泰式、中式生菜包就食得多嘞，西式就第一次試！饀料有雞肉、蝦、蒜蓉粒、脆炸米粉等等……d料炒得勁入味，生菜新鮮爽脆，混入隨附之秘制醬料而食，確有一番滋味！2.前菜揀選左摩洛哥風味雞肉沙律(全份)  : 極欣賞呢道菜式，配搭新穎，驚喜之作！未食過咁好味既沙律呀 ！材料相當豐富，有微烤過既雞肉，肉質軟熟柔韌。有甘筍，新鮮爽甜。有烤焗南瓜，瓜肉烤得剛好，唔會過腍，瓜質亦唔過甜。有甜棗，巧特別。有牛油果，油潤滑溜，中和返其他配料既甜味！有杏仁，我既至愛，勁香脆！有粒粒紅菜頭，甜美可口。有红梅乾、提子乾，甜甜地，唔會膩口。有羅馬生菜，夠新鮮。有甜椒，夠鮮爽。仲有雞蛋碎添，認真多不勝數呢！
我地本來打算叫半份，怕食唔哂嘥野，細心既侍應生remind我地，話全份較好，唔係真係唔夠喉，實在太美妙 嘞！3.主菜揀選左鮮蘑菇辣肉腸雞肉pizza(厚批) : 我地為左食pizza而來，卻失望而回！又係期望過高既結果！批邊就真係夠厚嘞！但批中間好鬼薄皮囉……饀料有蘑菇，新鮮爽口及少少辣既肉腸雞肉等……賣花讚花香，靚女密友梗係猛話ok架！我地三個則相視苦笑咗！真係唔多夠豐腴，餅身太過乾亦唔夠脆，似腍左既麵包，兼且過鹹，食完要狂灌水，一d都唔健康 ！4.蘑菇芝士意大利雲吞 : 比較飽肚膩口既一道菜，雲吞皮厚重。經過相機食先既洗禮後，成件灘凍左既雲吞變成d硬化既糯米糕，口感一般。其實內裡既蘑菇芝士饀料一d都唔差，帶點鹹鹹地，能為厚皮雲吞增添不少味道！我地一心來嚐pizza, 卻發現此餐廳既亮點原來只係沙律, 認真失敗！食材質素唔差，只怪㕑師重手左，廚藝略欠成熟！唯有嘆句: 可一不可再！

"甜筒"哥臨時吹雞招集搞全羊宴，好友"為食狼"知道我酷愛羊肉 ，即時wechat我，我點會say no吖！班為食嘩鬼話去土瓜灣既"大漠"嘆羊宴，wechat左個地點俾我。憋傢伙 ……土瓜灣唔熟路 添！
同靚女密友嘆完個豐富既下午茶，她送我到銅鑼灣世貿出面個車站，教我坐106。我上車問司機北帝街點落，司機話欣榮花園，我落車後開gps導航，步行三分鐘即到，智能手機既發明，實在太棒了 ！

無論室内或室外都帶點蒙古feel既"大漠"，感覺豪邁奔放，環境幽暗再配搭上牆上既布藝，加埋木枱木椅, 置身其中，尤如做了真的漢子 ！我地自選既全羊宴名單:-
1.烤羊串 : 啖啖羊肉，鮮嫩唔羶，有少少咬感，加左孜然粉及辣椒粉後，分外香口！2. 炒紫椰菜 : 顏色好靚 呀……椰菜新鮮, 炒得稍微乾身左！3.香蔥烤餅+咖喱羊肉 : 我地一心以為d烤餅會好似重慶咖哩d烤餅款，點知原來咁厚身架 ，件件甘重手似法包，好飽肚吓喎……不過味道唔錯，撈埋d咖哩汁及羊肉食, 頂瓜瓜 ！唯一唔夠完美係咖哩汁唔夠辣，羊肉嫩滑可口！4.當歸杞子湯浸崩沙羊腩 : 呢個湯係靚女友人特別order既，太燥熱太補喇，我只飲左一啖湯，有藥材味。羊腩夠羶，半肥瘦羊腩肉，口感滑溜！5.羊腿 : 全宴中最巧食，肉質超幼嫩 滑溜，羶味少！6.青檸梳打 : 我地見到隔離枱d飲品顏色超靚，齊齊點返杯，過下隱 ……原來做左手腳，杯内放左個電子，所以一閃一閃亮晶晶 ，味道只屬無咩味既青檸水已矣！7.羊奶 : 得靚女友人一個點呢款飲料，她話入口有點酸，羊奶味濃。意猶未盡既我地, 再encore烤餅，改點有羊肉饀既，點知來到, 卻毫無分別 ，米又係餅同羊肉分開擺，使乜叫羊肉饀餅呢 ！

全羊宴呀全羊宴………不到大漠，心不息……

近排留意到除左"CoCo壹番屋"有蛋包飯食之外，原來"盛八食堂"都有得食 架！好想食呀……咁啱見到團購有優惠，以58蚊換購100蚊券，好似好抵喎 ，即刻買定兩張coupons先！本來打算帶男朋友去試食，但因為大家有d心事 要處理而閣置左！嘴饞饞既我，化悲傷為食量，一於約閨密去勁擦一餐 ！

團購券既食用時段係下午兩點開始，我地兩點几到達位於銅鑼灣名店坊既"盛八"，見AEON招牌，坐自動電梯上一樓轉右就係。一間日式餐廳呈現眼前，佈置簡潔清新，客人唔多，座位舒適，簡直hea到爆 ！入座後慢慢看menu, 好多款式啊 ……花多眼亂，心大心細思量中，細心既侍應已走過來話幫我地調過去餐廳較入面既座位，認真識做 ！兩個人咩都想試，一口氣點左一個飯、一份三文治、兩份甜品、一杯咖啡(因為靚女密友只飲清水)！
1.芝士野菌黑豚漢堡蛋飯配茄汁飯 : 香噴噴既飯，切開聞到醒胃既茄汁，蛋包幼滑，飯粒軟熟入味，茄汁多返少少就perfect嘞！黑豚漢堡，豚肉味鮮，但口感似肉碎多d，芝士味太淡，菇菌爽脆可口。2.芝士火腿地雞三文治 : 賣相好 ，外型有些少似厚批既pizza, 其實係芝士焗多士 呢！三文治邊焗得夠脆，芝士rich得黎有絲，可惜芝士味太淡囉……味道唔夠係敗筆！饀料有滑嫩既雞肉、新鮮既蕃茄及美味既火腿，口感豐富搭夠！3.朱古力雪糕窩夫 : 我地既至愛唔係chocolate，只是大家既男朋友都鐘意食朱古力，所以先點呢個甜品，愛情既魔力 好偉大！朱古力雪糕幼滑濃郁，可惜窩夫軟熟得濟兼唔脆配合唔到，唔夾添 ！4.朱古力蛋糕 : 軟滑香濃！5.咖啡 : 我唔酷愛咖啡架，貪個拉花賣相夠可愛 ，氹到我開心，望住杯coffee, 心情都即時靚返哂！咖啡味好淡，似罐裝既雀巢咖啡，但實在好啱我，苦中一點甜！今餐下午茶超滿足，謝謝妳陪我，簡單既幸福！

剛剛係土瓜灣嘆完全羊宴，時間尚早又飽飽地，几個為食嘩鬼決定散步行去旺角，見到商場就走入去，影下相笑餐飽既……其中有人提議話去食甜品，問有無好介紹？！自從琴晚到訪過"貴花甜"後，一直念念不忘! 我即刻拍心口帶佢地去食好野！可能早得濟，今晚無咩人，我地一行六個先可以坐埋一齊

四個人心意相通，一點就四款心太軟齊齊食:-1.綠茶心太軟 : 今次伴碟有好多又甜又熟既紅豆呀！由於大家都掛住輪流相機食先，攤耐左個心太軟，d流心自然流失係碟邊，搞到切開果陣，流心少左，無太大驚喜添！味道依然故我，一個字 ! 不過雲呢拿雪糕就無左層朱古力脆皮囉！2.比利時朱古力心太軟 : 我男朋友最愛朱古力，有機會要帶他來食下！朱古力特別幼滑濃郁，靚女友人掛住拍低流心澎湃既一刻，又搞到流心走哂火喇！

3.南瓜心太軟 : 萬勝節題材，插左d十字架餅乾、啫喱糖眼做裝飾。雪糕有朱古力脆皮包住。蛋糕外脆內軟，勁香牛油味，南瓜流心甜入心！4.香蕉心太軟 : 蛋糕同樣熱辣辣香噴噴，流心甜而不膩！
四款心太軟，至正係綠茶，其次係朱古力！另外兩款都唔錯，但切忌要盡快一刀切，唔係就會錯過流心精采既一刻！

另外兩位朋友點左兩款雪糕甜品，睇賣相都略知一二，聽朋友講又真的麻麻地！所以話呢...不聽老人言，吃虧在眼前！呵呵！

食過生日晚餐後，好朋友跟住帶我去食好正既甜品 ，間甜品店叫"貴花甜"。點知佢無咩記性，記錯左地址，帶左我去佐敦果間同名既西餐廳，結果要坐返地鐵去油麻地，開gps先知最近係C出口。
細細間既糖水舖，入夜後都依然勁多人 ，多到要坐到出門口外，好似d大排檔咁。最初我地被安排坐係門口外，後尾舖内埋單有位，後生哥仔好識做，即刻安排我地入内坐，有冷氣自然涼快過坐出面！

好朋友話來呢度最好食係心太軟, 即叫即焗架！其他款一般般咋！花心既我，無理由食死一款心太軟姐，反正大家share食，揀個另類既先...

1.綠茶心太軟($58） : 一捧上枱，已經聞到香噴噴既牛油味 ，切開後更加不得了, 火山溶岩既綠茶流心，係咁蜂擁而出！食左一啖，發覺蛋糕外皮微脆又香口，緣茶味恰到好處，認真好食到停唔到口 ！另外既朱古力脆皮包住雲呢拿雪糕都好好食！2.咖啡芝士凍餅伴曲奇雪糕($46) : 舖左粒粒綿花糖既芝士凍餅，幼滑軟綿。伴碟既粒粒咖啡啫喱，咖啡味濃。而朱古力脆皮包住既曲奇雪糕，亦好正！下次一定要試多几款心太軟先得！

認識左僅僅一年既好朋友話同我慶祝生日，我巧開心感動呀 ，同佢講心領得喇，唔使咁客氣呢! 盛意拳拳既佢跟住對我講，話會帶我去一間環境好舒服既餐廳，從來只帶過兩個人去過呢間餐廳，而我將會係第三個人……好感激佢咁重視呢份友誼，永遠既好朋友 ！
大家約左係佐敦地鐵站等，神神秘秘咁，跟著跟著走到廟街，係一間唔多起眼既餐廳前停下腳步，到達了"尚館"！一間細細間既法式餐廳，綠色既門面，感覺好peace...餐廳寧靜幽暗，座位唔多，牆壁放置左酒櫃，格調優雅！侍應生比較年長，服務態度非常週到。

我地點左兩款set dinner share食，頭盤有蝦沙律，係中蝦，質感爽口。沙律菜新鮮但略嫌醬汁太少。餐湯類似係磨菇湯，口感幼滑濃郁。香草多士乾身得來唔脆，第一次呢類多士，几特別新穎！兩款主菜分別係三文魚pizza($128), 唔夠脆既薄身批，太乾身似變腍左既餅乾。饀料三文魚味道剛好，好多洋蔥鋪面，香味十足。另一款係芝士焗龍蝦($268)，龍蝦肉還可以，但都係略嫌乾身左，芝士唔夠豐腴。原來揀左餐飲就無甜品，唯有另覓地方再食！
環境舒適，只是食物僅屬一般而矣！