近日太忙，已經好耐無寫食評...今次嬲得滯忍唔住要寫出嚟😡 本身無諗住要寫嘢，所以一張相都無影。 ⁡ 當日同朋友兩個人，去到坐低無人理 點心紙要開口問... 睇晒成張點心紙都無燒賣又要再問... 侍應完全踢一踢郁一郁, 唔係好想理人咁款🙄 ⁡ 一心諗住去試20款自選味道燒賣...點知當日無得自選， 焗人叫set👎🏻 無得揀自己最想試嘅味道都算數，就叫一個廚師發辦4粒set ⁡ 兩隻碗勁油，過咗兩次水用紙巾抹咗當睇唔到🫣 ⁡ 等咗一陣開始有嘢食到，我哋叫咗👇🏻 ⁡ 北菇滑雞飯 第一次食到所謂「即叫即蒸」但唔熱嘅蒸飯， D雞仲霉霉哋👎🏻 ⁡ 鮮蝦腸 唔夠熱，D皮仲厚到好似棉胎咁👎🏻 ⁡ 蝦餃、棉花雞、排骨、鳳爪 味道普通過普通，但都係唔熱🙄 ⁡ 期間問侍應👩🏻攞咗碟辣椒油 嗰碟珍貴嘅辣椒油唔知有無半茶匙 入口完全唔辣，仲要有陣怪味🤢🤢🤢 ⁡ 食晒所有嘢之後仲有4粒燒賣未到，問咗侍應👩🏻，佢答「漏咗單，而家幫你落」 OK，唔緊要...我哋繼續等 等咗廿分鐘再問侍應👦🏻，佢答「蒸緊」 再等多五分鐘問侍應👵🏻，佢聽完行入廚房無再覆我哋🥲 ⁡ 過多陣搵番侍應👩🏻，同佢講「我哋趕時間，唔要個燒賣喇」 佢眼尾都無望過我哋，淨係答咗句「你哋出收銀同佢講取消」 ⁡ 然後我哋出收銀排隊比錢，侍應👩🏻突然由廚房衝出嚟，一路行一路大大聲講「佢哋走咗未呀❓有燒賣喇❗」 (咁緊張做咩呢? 明明頭先好瀟灑) ⁡ 同一時間，侍應👵🏻圍埋過嚟一齊講「蒸好咗喇，食埋先走啦❗」 我哋話趕時間唔要，佢哋再次死纏爛打「比個盒你裝走啦，整咗喇，無得唔要，你哋咁樣係浪費食物呀‼️」 ⁡ 佢哋響亮嘅聲線+死纏爛打嘅程度令我哋全場矚目🙄 明明係佢哋漏單愛理不理，點解變成我哋「浪費食物」⁉️⁉️⁉️ 我哋由落單到埋單都個幾鐘，最想食嘅燒賣等極都唔嚟已經超無奈... 蒸極都未得嘅4粒燒賣，喺我哋起身去比錢嗰一刻就突然間蒸好咗🙄🙄🙄 ⁡ 最後收銀👨🏻出聲問我哋係咪漏單所以想取消，我哋話係 👨🏻:「咁係我哋唔啱，我幫你取消」 侍應👩🏻👵🏻同時收聲，但都仲企喺原地圍住我哋 連等緊外賣嘅客人都忍唔住出聲「一係我哋要埋佢啦」 侍應👩🏻👵🏻先肯罷休行開 ⁡ 我真係好想知...如果嗰4粒燒賣最後都無人認頭，我哋係咪出唔到個門口⁉️ 呢種連大排檔都不如嘅態度真係令我大開眼界🤬👎🏻 ⁡ 由地鐵站行去呢度，沿路會經過兩間同類型嘅點心舖 我哋走嗰陣終於明白點解嗰兩間都排長龍，係得呢度可以直入😌