今曰晏晝同同事去咗上星期已约定嘅餐廳預祝我生日，幾乎兩年無嚟過呢度，有點久别重逢嘅感覺。 天氣又凍又落雨，真係要多謝班同事肯捱住冷雨去慶祝我生日。
咁凍三個女士異口同聲要熱湯做頭盤暖一暖，是日靚湯係蕃茄湯，蕃茄味濃可惜略酸，不過都可以接受，其他同事就揀魷魚沙律，魷魚都幾大塊，沙律菜都好新鮮，不過就唔適合唔鐘意食西芹嘅朋友。至於主菜我地分別叫咗蝦仁寛條麵、羊扒同烤雞。蝦仁寛條麵份量好大，女士食就多咗D，羊扒得兩件，男士食又偏少。我因為好耐之前食過呢度D豬扒，覺得太硬，今次穩陣D，就揀咗我鐘意嘅烤雞，睇落賣相都唔錯，食落D雞肉都幾香滑多汁，不過同餐牌個名有出入，红酒汁烤雞伴車厘茄，個汁無红酒味之餘，車厘茄只得一小粒，令人有點失望！伴莱方面，我最欣賞個小薯仔，可能加咗牛油嘅緣故，感覺好似焗薯，味道好好！ :）而其它配莱，由於烤係我鐘意嘅煮法，所以有分加，但係黃椒對我嚟講生咗D。甜品朱古力慕士球，我都幾滿意，有好香濃嘅朱古力味，唔太甜，份量啱啱好。......食完之後有同事話行11層樓梯返office......