早排朋友約食buffet，見就喺公司附近，Happy Friday就蒲下頭啦！地點就喺北角碼頭旁邊，7月先開幕嘅海匯酒店Hotel VIC。 The Farmhouse無金碧裝潢，整體用咗earth tone設計，有梳化位又有露天位(暫未開放)，充滿田園氣息，反而更舒服。 食物方面，分開冷/熱兩大區，海鮮雖然無即開生蠔提供，但係選擇都豐富，有龍蝦、蟹腳、凍蝦、翡翠螺、青口同蜆。最緊要有refill，未見過吉咗。 旁邊刺身櫃都唔弱，魚生即點即切，有牡丹蝦、帶子、八爪魚、吞拿魚、三文魚，同幾款手握壽司，仲畀我發現有人點即開海膽做軍艦，我當然即刻都order一份！ 後面個雪櫃仲有沙律、ham、煙三文魚同芝士，款式唔算多，但係都足夠。隔離竟然仲有即榨新鮮蔬果汁，有雪梨、甘筍、橙、西芹等等畀你任揀任mix，第一次見酒店buffet咁招積！當然飲品仲有coffee or tea同汽水。 熱盤區就喺餐廳最入面，長長雲石枱放滿中西東南亞菜，一入去就係石燒，有燒牛肉、串燒、羊架，每晚仲有煎法國鴨肝或者焗生蠔。 沿長枱行過去仲有唔同嘅即叫即煮，好似意粉、通粉、闊條麵、拉麵、河粉等等，將材料自己食幾多夾幾多交畀師傅，保證熱辣辣。 仲有個特大蒸籠，入面有各款中式點心，旁邊仲有燒味、水煮牛肉等等中菜。 但我覺得最正都係個燉湯，我去嗰晚係螺頭蟲草花！ 最後去返甜品區，其實就喺一入門口，都係冷凍區就有部好大嘅旋轉雪糕櫃，閂咗門入面就會一直轉，開門就會停，望住佢轉好治愈。入面放滿Movenpick、Haagen-Dazs同牛奶公司雪糕杯同雪糕批。 旁邊仲有師傅即點即制crepe同waffle，仲可以自己DIY豆腐花，有得食又有得玩！雖然小件裝嘅甜品款式唔算多，但係賣相相當精緻，都有泡芙、Tiramisu同抹茶蛋糕等等。 可能因為5歲以下免費，夾夾埋埋啲優惠真係好啱家庭客，同場大部份枱都有小朋友哈！ 以五星級酒店嚟講，食物、環境、服務都好好，只係無其他大酒店嘅「排場」。就算你未有小朋友，想試下新場或者喺港島東搵地方gathering不妨一試！

來自上海嘅早餐品牌網紅店「桃園眷村」早前已經登陸香港，地點就係朗豪坊原Mos Burger位置。桃園眷村賣嘅係台式古早味早點，主打鮮製豆漿、古法手工燒餅、油炸鬼，三年前喺上海開張，而家已經發展到全中國有超過30家分店，真係個個都去打卡，唔通個個都專登去打卡咩！
桃園眷村裝潢用上文藝風，牆身簡約乾淨，店入面嘅「時間，在舌尖」充滿文藝腔，呢種台灣文青氛圍，無疑是近年大熱嘅中港台餐廳包裝。
香港租貴地方有限，所以嚟到香港就要走快餐風 ，店入面以開放式設計，而且要用再生紙杯紙碗嚟節省清潔時間，加上位置連室外位，基本上都唔太需要等位。不過就無咗碗底嘅文青短詩，呢方面就差咗少少。
國內店環境
你可能會覺得桃園眷村賣嘅豆漿、油炸鬼都係普通嘢，不過原來都係店內用獨門方法每日鮮製現磨！ 而且豆漿豆味清新，甜度仲可以按口味加減。
除咗鹹、甜豆漿之外，豆花都有鹹、甜畀你揀！我就試咗鹹豆花（$32）配菜有菜脯、蝦皮、紫菜、葱末。第一啖好特別，就係好多香口配料嘅滑豆腐咁囉，不過口感的確出奇過癮。
另外飲品仲有米漿、紅茶豆漿、紅棗豆漿選擇。

香港人習慣用油炸鬼配粥，喺台灣同江南等地就用嚟配豆漿，不過今日好似已經賣晒。。。（桃園眷村的確每日都有部分食物係唔提供㗎！）

桃園眷村第三寶就係手工燒餅，燒餅就係傳統台式芝麻燒餅，新派做法就將佢切開再放配料，芝士、沙律菜、燒雞扒、炸魚柳等等。今次就試咗芝士蛋燒餅（$42），燒餅脆卜卜，如果可以熱啲，啲芝士有少少溶就好喇！卡卡～
另外功夫辣雞腿燒餅 、燒餅油條蛋、豬排蛋燒餅都係推介喔！

桃園眷村除咗三寶之外，我仲好喜歡食即包粢飯，餡料好豐富㗎！唔同上海鋪嘅獨孤一味得肉鬆油炸鬼粢飯，所以我就點咗青瓜肉鬆飯糰（$34）， 除咗青瓜之外，仲有炸到卜卜脆嘅肉鬆同增加口感嘅菜脯。如果想試下台式啲嘅口味可以食台式香腸葱蛋飯糰同肉燥滷蛋飯糰㗎！
是次小分享完畢，有興趣可按本站內其他分享

ESPUMA嘅下午茶一向大受港女們歡迎，無他嘅，只要經常轉下款式，加一啲糖果元素（就好似一舊大棉花糖），影出嚟嘅相就可以完美呃Like！
之前都有同朋友嚟到ESPUMA食Tea同甜品，中環店好開揚，望出去就係半山勁優雅。最近佢哋搞搞新意思推出火鍋同大家過一個暖笠笠嘅冬天。
今次Afternoon Tea set有5款甜點同4款鹹點一共有9款小食。甜點分別有香脆窩夫、自家製藍白雲棉花糖、馬卡龍波板糖、三色芋圓同鮮雜果。而鹹點就有炸雞格仔餅、八爪魚配鮮芒莎莎、迷你炸魚薯條筒同忌廉粟戈一米肉碎脆餅。
「湯底」就有2款甜湯可以選擇，分別係伯爵茶火鍋同紫米露火鍋。我就點咗紫米露，直接將Waffle沾「湯底」食又得，或者將芋圓加入火鍋煲煲佢仲可以當糖水食。
火鍋上面一舊棉花糖真係好Suprise，可以撕落嚟食又得，等佢溶咗落「湯底」亦得。嚟到ESPUMA當然少不了最回味佢嘅自家製scone，配鮮忌廉同士多啤梨果醬好滋味！
下午茶可以選西班牙Novell即磨咖啡、伯爵茶、綠茶、烏龍茶、紅茶，如果想飲品都嚟個特別啲，可以加$15轉配其他特色飲品。
是次小分享完畢，有興趣可按本站內其他分享

Starbucks迷你布甸之前喺其他地區推出一直大受歡迎，終於嚟到香港啦！今次同時推出朱古力同焦糖雲呢嗱兩隻口味，以簡約黑白色Starbucks迷你杯包裝。 Starbucks迷你布甸之所以成為大家嘅新寵兒，除咗布甸杯小巧可愛之後，迷你杯洗乾淨之後仲可以循環再用，用嚟種植唔同嘅小盤栽，甚至掀起網絡上「呃Like」嘅熱潮！

朱古力味布甸用上香濃黑朱古力， 布甸較挺身，口感香滑，朱古力味香濃又唔會太甜，朱古力迷一定會愛上！
至於焦糖雲呢嗱味布甸，一打開包裝就有淡淡雲呢嗱味，表面仲有焦糖醬。 布甸充滿雲呢嗱籽，而且焦糖醬令雲呢嗱味更突出，味道一樣咁濃郁。
溫馨提示，唔同分店嘅貨量都有唔同，部分人氣旺盛嘅分店經常火速賣光，所以想食就要趁早啦！

另外，而家Starbucks推出咗星巴克種植套裝，有晒唔同嘅種植小工具（種植器、種籽、培植椰土、小盆栽插牌、小鏟子及手巾），食完布甸之後可以循環再用迷你杯，利用種植套裝入面嘅種子，悉心照料盆栽7至10日就可以種出可食用嘅芝麻菜或者苜蓿，環保之餘仲可以放喺屋企或者辦公室做擺飾，你都可以試試呀！售賣種植套裝所得嘅收益扣除成本之後會全數撥捐社企雲耕一族 Rooftop Republic 所舉辦嘅非牟利環保英苗學堂，支持本地環保推廣工作。凡購買任何一款迷你布甸杯，就可以$128換購一套星巴克種植套裝。
是次小分享完畢，有興趣可按 麵語錄aminn 或本站內其他分享

今年香港突然興起日本一種中間似梳乎厘嘅厚班戟，單睇外表Aminn姑且稱佢哋為「空氣Pancake」，而且專賣店越開越多，連甜品鋪都紛紛加入。 身邊好多女性朋友都對於「空氣Pancake」表示心心眼，但幫襯唔同店鋪之後comment好壞參半，Aminn都有啲卻步。。。 之前試過I.T旗下嘅Sweet Monster深深愛上，佢哋最近加入班戟行列，引入東京「奇蹟之班戟」熱店Flipper's，當然要試試啦！ 店鋪就係希慎6樓嘅新店，店內已經滿座，而且果然有人龍，不過都唔係好多人排隊啫～ 入座之後見到Menu有期間限定蜜瓜班戟，諗都唔洗諗我就揀咗佢啦，另一份就點咗焦糖榛子香蕉班戟。落單之後店員溫提我哋要用兩隻叉將班戟分開嚟食。 Flipper's售賣嘅「日式梳乎厘班戟」係即叫即做，製作需時30分鐘㗎～所以要排隊係有原因嘅！ 兩份同樣係有三件日式班戟同忌廉，再配上唔同水果。最吸睛當然係我嗰份配上香甜嘅日本蜜瓜同好清新嘅蜜瓜雪葩嘅蜜瓜班戟！ 班戟非常鬆軟，入口軟綿綿，仲有陣陣蛋香！本身Aminn都好細食，但都可以食得晒成份，仲有少少「唔夠喉」想多少少添！ 飲品都有好多選擇，包括唔同款式咖啡、奶茶、檸茶、果汁、汽水同Fruit punch等等。 總結嚟講，Flipper's班戟味道真係無得彈，如果定價可以包埋飲品就更加理想啦～另外店入面多數都係女生，可能因為暫時Menu都係得甜點，遲下有埋咸點應該生意會更加好～

Aminn從來唔係海鮮die heart fans，想食靚海鮮知道去西貢、流浮山、銅鑼灣、香港仔同埋離島南丫島。唔講真係無留意，原來屯門都係海鮮熱點！屯門對於住開新界東嘅朋友嚟講可能有啲隔涉，不過只要花少少交通時間，其實好多巴士都嚟到，仲有西鐵同輕鐵呢～ 之前跟班女仔朋友過嚟，有個海鮮lover帶路，唔駛煩！三聖邨其實就喺黃金海岸再過啲，入面條海鮮街有好多海鮮檔外，喺關財記買完海鮮再去隔離酒樓或者餐廳加工，加返工錢就可以，烹煮方法可以自己決定，或者叫店員介紹啦！ 喺關財記買咗啲貝殼類同蝦蟹，拎咗過去隔離間泰海鮮加工，泰國嘢啱我！不過話到明可以自己要求點煮，海鮮lover比較喜歡清蒸話要原汁原味喎～咁當然都有果啲芝士焗、薑蔥屈etc

首先嚟個白灼九節蝦，睇佢個樣同平時見啲蝦身形細少少，但係海鮮檔話係季節性，仲爽口啲就買嚟試吓啦。其實佢係咪九節我又無數過，不過㩒落去係實啲㗎～ 除咗蝦肉比較彈牙，用白灼或者清蒸可以保留原本海鮮嘅鮮甜，連平時唔鍾意拆蝦殼嘅我都食咗十幾隻。 陳皮清蒸鮑魚，鮑魚其實唔需要花太多調味料去煮，陳皮蒸就可以帶出原味，真正食到海鮮鮮味。 食海鮮梗係要講下邪惡，我哋都點咗幾樣。白酒忌廉煮花甲，大大隻花甲仲有澎湃嘅奶油白汁！ 泰皇芝心蝦丸，粒粒厚身彈牙，仲有熱辣辣嘅流心芝士！ 講邪惡又點少得芝士焗龍蝦加伊麵底，啖啖龍蝦肉，仲有濃濃嘅芝士汁包住伊麵，真係超邪惡！ 其實最最最邪惡係黃金班塊至真，同黃金蝦一樣，豪不吝嗇嘅咸蛋黃包住脆炸班塊，正！ 食海鮮又點少得拆蟹呢～點咗鹽油焗奄仔蟹，但係清清地保留到鮮味嘅煮法。搣開後見到爆蟹膏，蟹肉結實，加上以鹽油的方式焗煮，令蟹味更鮮。 最後嘅海鮮湯先係最surprise，就咁睇好似得番茄同薯仔，原來仲用咗雜魚同瀨尿蝦，每位都係$18就可以飲到鮮甜足料嘅海鮮湯，仲可以偷埋師返屋企都煲到，今日真係學到好多嘢呀！ 是次小分享完畢，有興趣可按 麵語錄aminn 或本站內其他分享

趁好天氣同朋友嚟個海景Brunch！
嚟到銅鑼灣Les Saveurs Private Kitchen，望出去就係紅隧口，天朗氣晴日子可以由東至西見晒成個維港景！ 餐廳本身係開放式，不過裝有流動層板，想要多啲私隱都輕易安排到唔同大小嘅廂房。 先嚟個麵包籃，好精緻嘅法包同牛角飽，好鬆軟香脆，唔塗牛油都好好食！ Menu有啲係法文(!?) 唔緊要！店員會貼心地先解釋再落order！ 留意返，店入面嘅碟有幾個動物款式，又幾Kawaii喎！ 頭盤每人選一款，炸蝸牛波波加上香芹蒜蓉牛油好惹味，賣相有點分子料理嘅感覺。 另一款頭盤係象拔蚌，質感夾口，一啖放入口好滿足，仲有西洋菜泡沫，配搭沙律菜都好好味。 主菜我選咗42度煙燻三文魚(+$88)，上菜嘅時候用玻璃蓋冚住，喺客人面前繼續煙燻，大概兩分鐘後店員打開個蓋，走出嚟嘅煙燻效果勁Artistic！煙燻三文魚配搭黑魚籽感覺勁華麗。切開慢煮三文魚，肉質油潤鮮嫩，滑到不得了！配鹹香黑魚籽，鮮味出晒嚟！ 醬汁用上紅菜頭蓉，旁邊仲有幾粒蘋果辣薑汁啫喱，又幾清新喎！

另一款主菜選咗龍蝦天使麵，主角除咗龍蝦肉之外，仲有龍蝦Cappuccino包住天使麵，每條天使麵都索晒鮮甜龍蝦汁，不過份量偏少，真係唔係幾夠喉！ 之後到是日餐湯—雅枝竹忌廉湯，店員先上一隻吉碟(!?)，再以茶壺即席倒出熱嘅忌廉湯，飲嘅時侯將伴碟嘅雅枝竹脆同乾火腿拌落去一齊飲，忌廉湯打得細滑，餐湯每日都唔同架！ 甜品方面，檸檬蛋白撻賣相好靚，檸檬味道清新，配搭雜莓雪芭酸酸甜甜效果好夾。 另一款係朱古力慕絲蛋糕，朱古力味好濃，配搭同樣香濃朱古力雪糕，朱古力Lover一定大愛！ 兩款甜品，一個輕怡一個重口味，任君選擇，甜品迷都唔會失望！

法國菜當然要慢慢享受，同朋友嚟慢慢傾絕對可以令人放鬆心情，而且午餐四道菜只係$238，食呢個景+法國菜絕對超值！ 是次小分享完畢，有興趣可按 麵語錄aminn 或本站內其他分享

幾個月前有次放工去逛銅鑼灣，晚飯時間差不多過先肚餓，又無咩idea就上網搜尋一下附近特色食店，搵到間主打窩夫嘅Green Waffle Diner，諗住輕食都可以就去試試。
點知呢個時間仲要等位！睇嚟窩夫真係熱賣喎！
等位其間睇下Menu先，發現除咗窩夫之外仲有好多主食，全日早餐三文治、鑊仔薯粒等等都有幾十款選擇。
最後點咗香辣番茄香腸薯粒鑊仔同咸牛肉三文治，雜莓香蕉窩夫就後上。

估唔到鑊仔薯粒份量咁多！
熱辣辣鑊仔，好多脆脆薯粒，仲有腸仔同番茄、墨西哥辣椒，加上流心蛋，撈勻流心蛋黃就可以食啦！
每一啖都係濕潤嘅脆脆薯粒，呢個份量好有飽足感。

另外點咗半份美式咸牛肉三文治，脆薄三文治包、咸牛肉片、酸菜、沙律汁，簡簡單單味道清新，唔會太飽滯，又係配搭脆脆薯粒喎！
見到有夏日特飲，就試下黑白配，Snow White同Bailey's Chocolate。
Snow White係椰子菠蘿smoothie，口感幼滑，仲有一支小小嘅菠蘿冰，搞住飲又得，就咁食亦得，得咗！
而Bailey’s Chocolate就係朱古力沙冰。
最後嘅雜莓香蕉窩夫，我轉咗做蕎麥窩夫，配朱古力雪糕。
窩夫外脆內鬆軟，蕎麥窩夫可以增加外層脆度，仲增加飽肚感添！
雖然仲有雪糕，不過配搭埋新鮮水果，Share食份量剛剛好，都唔係好肥啫！

餐廳係半開放式鋪位，剛啱坐喺商場行人路旁邊，環境未算十分舒適，不過地方算寬敞，食物質素有驚喜！

是次小分享完畢，有興趣可按本站內其他分享

標榜萌爆廣東點心嘅「点心代表」早排推出多款蠟筆小新「心點」，除咗有小新出現之外，仲有小新屋企人，美冴、廣志、小葵同小白，同埋一班好朋友，正男、阿呆、妮妮，Aminn趕到尾班車去探探野原家！ 餐廳環境貫徹主題，由門口開始已經鋪天蓋地係蠟筆小新蹤影。無論係掛畫定係玻璃貼紙全部都係小新同朋友仔嘅蹤影，成間餐廳都係打卡位！ 一坐低見到本Menu成本漫畫咁精美！點心仲分成「搗蛋篇」同「被打篇」，好過癮囉！

重口味嘅Aminn當然要玩下点心代表嘅超萌蒸包，另外仲點咗幾樣點心麵食，其實点心代表真係賣點心架！ 不理不理左衛門奶黃流沙包($49) 用筷子拮穿不理不理左衛門鼻哥窿，豬仔仲會流鼻。。。最啱post相呃like！ 大象朱古力流沙包($49) 朱古力流沙餡好有香濃朱古力味，同中式蒸包就唔係好夾混，不過有小新嘅小笨象同裸背，今次媽媽一定唔會發嬲嘅！ 点心代表嘅點心以即叫即做，確保客人可以品賞到最新鮮嘅美味，另外將潮流加入菜單，打造新派點心，Aminn仲點咗鮮蝦菜苗餃($29)、安格斯牛肉腸($39)、乾炒安格斯牛河($69/只限中環店)，估唔到喺中環用呢個價錢都飲到餐茶，而且兩款安格斯牛點心都無失望！不過用呢款茶包沖出嚟嘅清茶(茶位$10@)就差咁啲喇！

無心插柳遇到軒尼詩的江南 上星期原本出灣仔食上海菜放題，中間遇到一啲事，陰差陽錯路過好久以前嘅壽司鋪已經華麗轉身成為上海菜，見到門面幾乾淨就走咗入去，裝修幾光猛，一入去見到中間張bar枱，不過入面無乜人！

睇下個餐牌，基本上海蘇杭地道食物都有，拉麵、包點、小食同小菜，餐牌註明會用上「手製拉麵」！

門口入嚟就見到師傅喺度拉麵同整小籠包。

最喜歡點拼盤，啱晒想試晒唔同口味嘅我！

最後點咗醉雞、醉豬手同雞絲粉皮。酒味尚算可以，醉雞肉質唔鞋，尚算滑溜。豬手就未夠入味，不過豬皮夠厚夠爽。雞絲粉皮其實無乜特別驚喜，已經係喺街食到比較好嘅雞絲粉皮。

而個擔擔炸豬扒麵呢，炸豬扒係另上嘅，炸得幾乾身，豬扒剛剛炸起仲算juicy，放涼咗就開始乾。

呢度嘅手製拉麵有驚喜，係師傅即場拉嘅拉麵，麵條口感好好，唔敢講好彈牙但有咬口唔係淋身。仲有擔擔麵個花生麻醬，加咗辣味咁先夠蘇杭嘛～不過略嫌湯底唔夠厚身。

But手製拉麵必食！

食上海菜又點少得小籠包？

姥姥小籠包皮夠薄，肉餡夠鮮甜不鬆散，不過可能湯汁唔夠，未夠飽滿感。

話說Aminn好鍾意食葱油餅，見呢個圓碌碌咁趕緻就叫咗，點知一咬之下咁厚皮嘅？其實佢真係好似Donut咁，將蔥餡集中咗喺中間，油蔥勁香勁濃郁！不過呢，Aminn都係喜歡較乾身嘅葱油「餅」。

以灣仔人來人往嘅軒尼詩道嚟講，假期一點左右已經開始等位，而且上海姥姥勝在大眾化價錢坐得舒適，真心抵贊！